Sefer Tora en Djudeo Espanyol – Transkrivida kon letras latinas del livro por Ye’huda Sidi / DEVARIM: 54 – VEZOT ‘HABERAHA (33-34)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

54 – VEZOT ‘HABERAHA

33

¹Esta es la bendisyon kon la kual bendisho Moshe, varon del Dyo, a los ijos de Yisrael antes de su muerte. ²I disho: A’ vino de Sinai, i de Seir les esklaresyo; resplandesyo del monte de Paran, i vino kon milaryas de santos; de su derecha salyo Ley de fuego para eyos. ³Tambyen ama a los puevlos, todos sus santos estan en tu mano; i eyos se adjuntan a tus pyes, i resiven de tus mandamyentos. ⁴Ley nos enkomendo Moshe por eredad a la kompanya de Yaakov. ⁵I fue rey en Yeshurun, kuando se adjuntaron las kaveseras del puevlo, los trivos de Yisrael auna.

⁶Biva Reuven, i no muera; i sean sus varones numerozos.

⁷I esta es la bendisyon para Ye’huda: i disho: oye, ¡o A’! la boz de Ye’huda, i traelo a su puevlo. Ke sus manos le basten, i tu le seas ayuda kontra sus angustyadores.

⁸I de Levi disho: tus tumim i tus urim sean a tu varon santo, al kual prevaste en Masa, kon el kual barajaste a las aguas de Meriva: ⁹el ke disho a su padre i a su madre: no lo vide; ni rekonosyo a sus ermanos, ni konosyo a sus ijos; porke eyos guardaron tu dicho, i observaron tu firmamyento. ¹⁰Anbezaran tus djuisyos a Yaakov, i tu Ley a Yisrael: pondran saumeryo a tu nariz, i kemado entero sovre tu ara. ¹¹Bendize, A’, su aver, i envelunta la ovra de sus manos; yaga los lumbos de los ke se levantan kontra el, i de los ke le aborresen, para ke no se levanten.

¹²De Binyamin disho: el kerido de A’ morara a figuzya serka de el; lo kuvrira todo el dia, i entre sus ombros morara.

¹³I de Yosef disho: bendicha de A’ sea su tyerra, de la mejoria de los syelos, el rosio, i del abizmo ke yaze abasho, ¹⁴i de la mejoria de los renuevos del sol, i de la mejoria del produkto de las lunas, ¹⁵i de la kavesera de los montes antiguos, i de la mejoria de las kuestas de syempre, ¹⁶i de la mejoria de la tyerra i su inchimyento, i de la buena veluntad del ke moro en la sarza; venga sovre la kavesa de Yosef, i sovre la meoyera del apartado de sus ermanos. ¹⁷Su ermozura es komo la de su buey primodjenito, i kuernos de unikornyo son sus kuernos; kon eyos akorneara puevlos auna asta los atemos de la tyerra; i eyos son las milaryas de Efrayim, i eyos los miles di Menashe.

¹⁸I de Zevulun disho: alegrate, Zevulun, en tu salir; i tu Yissahar, en tus tyendas. ¹⁹Yamaran los puevlos al monte; ayi sakrifikaran sakrifisyos de djustedad; porke chuparan la abundansya de las mares, i los tezoros eskondidos de la arena.

²⁰I de Gad disho: bendicho el ke aze ensanchar a Gad; komo leon morara, i arrevatara braso i meoyera. ²¹I el provido para si lo primero, porke ayi la parte del ledjislador fue guardada; i vino kon las kaveseras del puevlo; la djustedad de A’ izo, i sus djuisyos kon Yisrael.

²²I de Dan disho: Dan kachorro de leon; saltare de Bashan.

²³I de Naftali disho: Naftali, arto de buena veluntad, i yeno de la bendisyon de A’; el oksidente i el sud ereda.

²⁴I de Asher disho: bendicho de ijos sea Asher; sea agradavle a sus ermanos, i banye en azeyte su pye. ²⁵Fyerro i alambre sera tu sapato; i komo tus dias sera tu fortaleza.

²⁶No ay otro komo el Dyo de Yeshurun, ke kavaya en los syelos para tu ayuda, i kon su losania sovre la nuves. ²⁷El Dyo eterno es tu morada, i debasho los brasos de syempre; i el desterrara de delante de ti al enemigo, i dira, destruye. ²⁸I Yisrael morara a figuzya solo; la fuente de Yaakov en tyerra de sivera i de mosto; tambyen sus syelos gotearan rosio. ²⁹Byenaventurado tu, ¡o Yisrael! ¡kyen komo tu, puevlo salvo en A’, el kual es el eskudo de tu ayuda, i ke es la espada de tu losania! i tus enemigos seran sodjiftados a ti, i tu pizaras sovre sus alturas.

34

¹I suvyo Moshe de las yanuras de Moav al monte de Nevo, a la kavesera de Pisga, ke esta en frente de Yeriho; i A’ le mostro toda la tyerra de Gilad asta Dan, ²i a todo Naftali, i la tyerra de Efrayim i de Menashe, i toda la tyerra de Ye’huda asta la mar postrera, ³i el sud, i la yanura, la vega de Yeriho, sivdad de los tamarales, asta Tsoar. ⁴I le disho A’: esta es la tyerra ke djuri a Avra’ham, a Yitshak, i a Yaakov, dizyendo: a tu semen la dare. Te la ize ver kon tus ojos, ma no pasaras aya. ⁵I muryo ayi Moshe, syervo de A’, en la tyerra de Moav, segun el dicho de A’. ⁶I lo enterro en el vaye, en la tyerra de Moav, enfrente de Bet-Peor; i no supo ninguno su sepulkro asta el dia de oy. ⁷I era Moshe de edad de syento i vente anyos kuando muryo; no se eskuresyo su ojo, ni se fuyo su freskor. ⁸I yoraron los ijos de Yisrael a Moshe en las yanuras de Moav trenta dias; i se akavaron los dias del yoro del luto de Moshe. ⁹I Ye’hoshua, ijo de Nun, fue yeno de espirito de saveduria, porke Moshe avia puesto sus manos sovre el; i los ijos de Yisrael le ovedesyeron, i izyeron komo A’ enkomendo a Moshe. ¹⁰I nunka mas se levanto profeta en Yisrael komo Moshe, a kyen A’ konosyo kara a kara, ¹¹en todas las senyales i las maraviyas ke lo enbio A’ a azer en la tyerra de Ayifto, a Paro, i a todos sus syervos, i a toda su tyerra, ¹²i en toda la mano fuerte i en todo el espanto grande ke izo Moshe a vista de todo Yisrael.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.