Sefer Tora en Djudeo Espanyol – Transkrivida kon letras latinas del livro por Ye’huda Sidi / DEVARIM: 53 – ‘HAAZINU (32)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

53 – ‘HAAZINU

32

¹Eskuchad, syelos, i avlare:

i oyga la tyerra los dichos de mi boka.

²Goteara komo la luvya mi doktrina,

esteyara komo el rosio mi dicho;

komo luvya minuda sovre el ermoyo,

i komo gotas sovre la yerva.

³Porke el nombre de A’ apregonare;

dad grandeza a nuestro Dyo.

⁴El es el fuerte, perfekta es su ovra;

porke todos sus kaminos son djuisyo;

Dyo de verdad, i sin tortura;

djusto i derecho es.

⁵Si danyo a si; su makula no es la de sus ijos;

djerenansyo tuerto i retuerto.

⁶¿Ansi pagas a A’?

puevlo vil i no savyo

¿No es el tu padre ke te kompro?

el te izo i te kompozo

⁷Akordate de los dias antiguas.

Parad myentes a los anyos de djerenansyo i djerenansyo;

pregunta a tu padre, i el te denunsyara;

a tus vyejos, i eyos te diran.

⁸Kuando el Altisimo izo eredar a las djentes,

kuando izo espartir los ijos del ombre,

Establisyo los terminos de los puevlos

segun el numero de los ijos de Yisrael.

⁹Porke la parte de A’ es su puevlo,

Yaakov la suerte de su eredad

¹⁰Lo ayo en tyerra de dizyerto,

i en lugar desolado de alguaya;

Lo izo rodear, lo izo entender,

lo guardo komo la ninyeta de su ojo.

¹¹Komo el agila despyerta su nido,

abola sovre su poyos,

Espande sus alas, los toma,

los yeva sovre sus plumas;

¹²A’ solo lo gio,

i no uvo kon el Dyo estranyo.

¹³Lo izo kavayar sovre las alturas de la tyerra,

para ke komyera los renuevos del kampo;

i lo izo chupar myel de la penya,

i azeyte del pyedregal del penyasko:

¹⁴Manteka de vakas, i leche de ovejas,

kon grosura de karneros,

i barvezes ijos de Bashan, i kavrones,

kon grosura de rinyones de trigo;

i sangre de uvas beviste, vino puro.

¹⁵i engordose Yeshurun, i akoseo

Te engordaste, te engrosaste, te kuvriste de sevo;

i desho al Dyo ke lo izo,

i menospresyo al fuerte de su salvasyon.

¹⁶Lo izyeron zelar kon dyozes estranyos,

kon abominasyones lo ensanyaron.

¹⁷Sakrifikaron a los diablos, no al Dyo;

a dyozes ke no konosyeron;

a dyozes nuevos ke de serka vinyeron,

ke vuestros padres no los temyeron.

¹⁸Del fuerte ke te krio te olvidaste,

i te olvidaste del Dyo tu Kriador.

¹⁹I vido A’, i los desecho,

porke lo ensanyaron sus ijos, i sus ijas.

²⁰I disho: eskondire de eyos mis fases,

vere ke sera su postrimeria;

porke son djerenansyo de trastornamyentos,

ijos ke no ay fieldad en eyos.

²¹Eyos me izyeron zelar kon lo ke no es dyo,

me izyeron ensanyar kon sus vanidades;

i yo los are zelar kon los ke no son puevlo;

kon djente vil los are ensanyar.

²²Porke fuego se ensendyo en mi fulor.

i kemara asta el fondo de shaul,

i konsumira la tyerra i su ermoyo,

i enflamara los simyentes de los montes.

²³Amontanare males sovre eyos;

mis saetas atemare en eyos.

²⁴Konsumidos seran de ambre, i komidos de fyevre ardyente,

i de tajamyento amargo;

i dyentes de bestyas enbiare sovre eyos,

kon veneno de serpyentes del polvo.

²⁵Por afuera desijara la espada,

i en las kamaras espanto;

tanto el mansevo komo la eskosa,

el ke mama kon el ombre kano.

²⁶Dishe: los esparzire,

are baldar de entre los ombres la membrasyon de eyos:

²⁷Sino temyera la sanya del enemigo,

no sea ke nyegen sus angustyadores,

no sea ke digan: nuestra mano alta

ovro todo esto, i no A’.

²⁸Porke son djente perdida de konsejo,

i no ay en eyos entendimyento.

²⁹¡Kyen dyese ke fueron savyos, ke entendyeran esto,

ke pararan myentes a su postrimeria!

³⁰¿komo persegeria uno a mil,

i dos arian fuir a dyez mil,

si su fuerte no los uvyera vendido,

i A’ no los uvyera entregado?

³¹Porke el fuerte de eyos no es komo nuestro fuerte,

i de esto nuestros enemigos sean djuezes.

³²Porke de la vid de Sedom es su vid,

i de los kampos de Amora;

sus uvas son uvas de tosigo,

razimos amargos tyenen.

³³Veneno de dragones es su vino,

i tosigo kruel de bivoras.

³⁴¿No es esto guardado konmigo,

siyado en mis siyeros?

³⁵Mia es la vengansa i la paga;

a su tyempo resfuira su pye;

Porke serkano es el dia de su kevranto,

i se apresuran las kozas aparejadas para eyos.

³⁶Porke A’ djuzgara a su puevlo,

i sovre sus syervos se arrepentira,

kuando vyere ke se anduvo el poder de eyos,

i ke no ay detenido ni deshado.

³⁷I dira: ¿onde estan sus dyozes,

el fuerte en ke se abrigaron:

³⁸ke komian el sevo de sus sakrifisyos,

i bevian el vino de sus templasyones?

se levanten i vos ayuden,

i sean vuestro mamparo.

³⁹Mirad agora ke yo, yo soy,

i no ay dyo konmigo;

yo mato, i yo abidiguo;

yo yago, i yo melezino;

i no ay kyen eskape de mi mano.

⁴⁰Porke yo also a los syelos mi mano,

i digo: bivo yo para syempre.

⁴¹Kuando agozare mi reluzyente espada,

i mi mano travare de djuisyo,

tornare vengansa a mis angustyadores,

i pagare a los ke me aborresen.

⁴²Emborrachare mis saetas de sangre,

i mi espada tragara karne;

de la sangre de los matados i de los kativos,

de la kavesa de los prinsipes del enemigo.

⁴³Alavad djentes a su puevlo;

porke el vengara la sangre de sus syervos,

i tornara vengansa a sus angustyadores,

i se afalagara kon su tyerra, kon su puevlo.
⁴⁴I vino Moshe, i avlo todas las palavras de esta kantiga en oidos del puevlo, el i Ye’hoshua, ijo de Nun. ⁴⁵I akavo Moshe de avlar todas estas palavras a todo Yisrael. ⁴⁶I les disho: poned vuestro korason a todas las palavras ke yo atestiguo entre vozotros oy, las kuales enkomendaresh a vuestros ijos para guardar para azer, todas las palavras de esta Ley. ⁴⁷Porke no es koza vana para vozotros, sino ke es vuestra vida, i por esta koza alargaresh dias sovre la tyerra a la kual pasash el Yarden para eredarla.

⁴⁸I avlo A’ a Moshe en akel mizmo dia, dizyendo: ⁴⁹suve a este monte de Avarim; el monte de Nevo, ke esta en la tyerra de Moav, ke esta enfrente de Yeriho; i mira la tyerra de Kenaan, ke yo doy a los ijos de Yisrael por posesyon: ⁵⁰I muere en el monte al kual suves, i se apanyado a tus puevlos komo muryo A’haron tu ermano en el monte de ‘Hor, i fue apanyado a sus puevlos: ⁵¹por lo ke falsastesh kontra mi entre los ijos de Yisrael a las aguas de Meriva de Kadesh, en el dizyerto de Tsin; porke no me santifikastesh en medyo de los ijos de Yisrael. ⁵²Empero de enfrente veras la tyerra ma no entraras ayi, a la tyerra ke yo doy a los ijos de Yisrael.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.