Sefer Tora en Djudeo Espanyol – Transkrivida kon letras latinas del livro por Ye’huda Sidi / DEVARIM: 51 – NITSAVIM (30)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

51 – NITSAVIM

⁹Vozotros estash oy todos prezentes delante de A’ vuestro Dyo, vuestras kaveseras de vuestros trivos, vuestros vyejos, i vuestros alguaziles, todos los varones de Yisrael; ¹⁰vuestros ninyos, vuestras mujeres, i tu pelegrino ke esta adyentro de tu real, dezde el ke korta tu lenya asta el ke akarrea tus aguas: ¹¹para ke pases en el firmamyento de A’ tu Dyo, i en su djura, ke A’ tu Dyo taja kontigo oy: ¹²para afirmarte oy por puevlo para si, i ke el te sea a ti por Dyo, komo te avlo, i komo djuro a tus padres, a Avra’ham, a Yitshak, i a Yaakov. ¹³I no kon vozotros solos tajio yo este firmamyento i esta djura, ¹⁴sino kon el ke esta aki prezente kon nozotros oy delante de A’ nuestro Dyo, i kon el ke no esta aki oy kon nozotros: ¹⁵porke vozotros savesh komo estuvimos en la tyerra de Ayifto, i komo pasimos por medyo de las djentes ke pasastesh: ¹⁶i vistesh sus abominasyones, i sus idolos, palo i pyedra, plata i oro, ke tenian konsigo: ¹⁷no sea ke ayga entre vozotros varon, o mujer, o linaje, o trivo, ke su korason se bolte oy de kon A’ nuestro Dyo, por andar a servir a los dyozes de akeyas djentes; no sea ke ayga entre vozotros raiz ke aga kreser tosigo i adefla: ¹⁸i sea, ke kuando el tal oyere las palavras de esta maldisyon, el se bendiga en su korason, dizyendo: paz tendre, aunke ande en la dureza de mi korason, para anyadir la borraches a la sed. ¹⁹A’ no kera perdonarle, sino ke entonses umeara el fulor de A’ i su zelo kontra akel varon, i yazera sovre el toda maldisyon eskrita en este livro, i A’ arrematara su nombre de debasho de los syelos. ²⁰I A’ lo apartara para mal de todos los trivos de Yisrael, segun todas las maldisyones del firmamyento eskrito en este livro de la ley. ²¹I dira el djerenansyo venidero, vuestros ijos ke se levantaran despues de vozotros, i el estranjero ke vendra de tyerra leshana, kuando vyeren las yagas de akeya tyerra, i sus enfermedades de ke A’ la izo enfermar; ²²ashufre i sal, kemada toda su tyerra, no sera sembrada, i no ermoyesera, ni kresera en eya ninguna yerva, komo la trastornadura de Sedom i Amora, de Adma i Tsevoyim ke trastorno A’ en su fulor i en su sanya: ²³i diran todas las djentes: ¿porke izo A’ ansi a esta tyerra? ¿ke es el eresimyento de este fulor grande? i responderan: ²⁴por lo ke desharon el firmamyento de A’ el Dyo de sus padres, ke el tajo kon eyos kuando los sako de la tyerra de Ayifto: ²⁵i anduvyeron i sirvyeron a otros dyozes, i se enkorvaron a eyos, dyozes ke no konosyeron, i ke el no les avia apartado: ²⁶i se ensendyo el fulor de A’ kontra esta tyerra, para traer sovre eya todas las maldisyones eskritas en este livro: ²⁷i A’ los arranko de sovre su tyerra kon fulor, i kon sanya, i kon ira grande, i los echo a otra tyerra, komo se ve en esta dia. ²⁸Las kozas enkuvyertas pertenesen a A’ nuestro Dyo; ma las deskuvyertas son para nozotros i para nuestros ijos para syempre, para ke agamos todas las palavras de esta ley.

30

¹I sera, ke kuando vinyeron sovre ti todas estas kozas, la bendisyon i la maldisyon ke yo puzi delante de ti, i tornares a tu korason entre todas las djentes a las kuales A’ tu Dyo te avra empushado: ²i te tornares a A’ tu Dyo, i eskuchares a su boz segun todo lo ke yo te enkomendo oy, tu i tus ijos, kon todo tu korason i kon toda tu alma: ³entonses A’ tornara tus kativos, i se apiadara de ti. I tornara i te rekojera de todos los puevlos, a los kuales te avra esparzido A’ tu Dyo. ⁴Si uvyeres sido empushado asta el kavo de los syelos, de ayi te rekojera A’ tu Dyo, i de ayi te tomara. ⁵I te traera A’ tu Dyo a la tyerra ke eredaron tus padres, i la eredaras; i te ara byen, i te muchiguara mas ke a tus padres. ⁶I sirkunsira A’ tu Dyo tu korason, i el korason de tu semen, para ke ames a A’ tu Dyo kon todo tu korason, i kon toda tu alma, para tu vida. ⁷I pondra A’ tu Dyo todas estas maldisyones sovre tus enemigos, i sovre tus aborresedores, ke te persegyeron. ⁸I tu tornaras, i eskucharas a la boz de A’, i aras todas sus enkomendansas, ke yo te enkomendo oy, ⁸i A’ tu Dyo te ara abundar en toda ovra de tu mano, en el fruto de tu vyentre, i en el fruto de tu kuatropea, i en el fruto de tu tyerra, para byen; porke A’ tornara a gozarse sovre ti para byen, komo se gozo sovre tus padres: ¹⁰Kuando eskuchares a la boz de A’ tu Dyo, para guardar sus enkomendansas i sus fueros eskritos en este livro de la Ley, kuando te tornares a A’ tu Dyo kon todo tu korason, i kon toda tu alma.

¹¹Porke esta enkomendansa ke yo te enkomendo oy, no es enkuvyerta de ti, ni esta leshos. ¹²No esta en los syelos, para ke digas: ¿kyen suvira por nozotros a los syelos, i la tomara para nozotros, i nos ara oirla, para ke la agamos? ¹³Ni esta de la otra parte de la mar, para ke digas: ¿kyen pasara por nozotros a la otra parte de la mar, i la tomara para nozotros, i nos ara oirla, para ke la agamos? ¹⁴Sino ke muy serka de ti esta la palavra, en tu boka i en tu korason, para ke la agas.

¹⁵Mira, yo puzi delante de ti oy la vida i el byen, i la muerte i el mal: ¹⁶en lo ke yo te enkomendo oy ke ames a A’ tu Dyo, ke andes en sus kaminos, i ke guardes sus enkomendansas, i sus fueros; i sus djuisyos, para ke bivas i te muchigues, i ke A’ tu Dyo te bendiga en la tyerra a la kual entras para eredarla. ¹⁷Ma si tu korason se bolvyere, i no oyeres, i fueres empushado, i te enkorvares a otros dyozes, i les sirvyeres: ¹⁸vos aseguro oy ke deperder vos deperderesh; no alargaresh dias sovre la tyerra, a la kual tu pasas el Yarden para ir a eredarla. ¹⁹A los syelos i a la tyerra yamo por testigos oy kontra vozotros, ke yo puzi delante de ti la vida i la muerte, la bendisyon i la maldisyon; eskoje pues la vida, para ke bivas tu i tu semen: ²⁰ke ames a A’ tu Dyo, ke oygas a su boz, i ke te apeges a el; porke esto es tu vida, i la longura de tus dias; para ke mores sovre la tyerra ke djuro A’ a tus padres, a Avra’ham, a Yitshak, i a Yaakov, ke les avia de dar.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.