Sefer Tora en Djudeo Espanyol – Transkrivida kon letras latinas del livro por Ye’huda Sidi / DEVARIM: 50 – KI TAVO (26 a 29)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

50 – KI TAVO

26

¹I sera, ke kuando vinyeres a la tyerra ke A’ tu Dyo te da por eredad, i la eredares, i morares en eya; ²tomaras de las primisyas de todos los frutos de la tyerra, ke trusheres de tu tyerra ke A’ tu Dyo te da, i las pondras en un kanastiyo, i andaras al lugar ke A’ tu Dyo eskojyere para apozentar ayi su nombre. ³I vendras al saserdote ke fuere en akeyos dias, i le diras: atorno oy a A’ tu Dyo, ke yo entri en la tyerra ke A’ djuro a nuestros padres ke nos avia de dar. ⁴I el saserdote tomara el kanastiyo de tu mano, i lo pondra delante del ara de A’ tu Dyo. ⁵I responderas i diras delante de A’ tu Dyo: un Aramio deperdido era mi padre, i desendyo a Ayifto, i pelegrino ayi kon pokos ombres, i se izo ayi djente grande, fuerte, i mucha. ⁶I los Aisyanos nos maltrataron, i nos afrieron, metyeron sovre nozotros servisyo duro. ⁷I esklamimos a A’ Dyo de nuestros padres, i oyo A’ nuestro boz, i vido nuestra afriisyon, i nuestra lazerya, i nuestro apreto. ⁸I nos sako A’ de Ayifto kon mano fuerte, i kon braso estendido, i kon espanto grande, i kon senyales, i kon maraviyas: ⁹i nos trusho a este lugar, i nos dyo esta tyerra, tyerra ke mana leche i myel. ¹⁰I agora, ek yo trushe las primisyas del fruto de la tyerra ke me diste, ¡o A’! i lo desharas delante de A’ tu Dyo, i te enkorvaras delante de A’ tu Dyo. ¹¹I te alegraras kon todo el byen ke A’ tu Dyo te uvyere dado a ti i a tu kaza, tu, i el Levita, i el pelegrino ke esta en medyo de ti.

¹²Kuando uvyeres akavado de dyezmar todo el dyezmo de tu renuevo en el anyo tersero, el anyo del dyezmo, daras tambyen al Levita, al pelegrino, al guerfano, i a la bivda, i komeran en tus [1]sivdades, i se artaran. ¹³I diras delante de A’ tu Dyo: yo kiti la koza santa de mi kaza, i tambyen la di al Levita, i al pelegrino, al guerfano, i a la bivda, segun toda tu enkomendansa ke me enkomendaste; no pasi de tus enkomendansas, ni me olvidi de eyas. ¹⁴I No komi de eya en mi luto, no kiti de eya para uzo enkonado, ni di de eya para muerto; eskuchi a la boz de A’ mi Dyo, i ize segun todo lo ke me enkomendaste. ¹⁵Mira de tu morada santa, de los syelos, i bendize a tu puevlo Yisrael, i a la tyerra ke nos diste, komo djuratse a nuestros padres, tyerra ke mana leche i myel.

¹⁶En este dia A’ tu Dyo te enkomenda de azer estos fueros i djuisyos. Los guardaras pues, i los aras kon todo tu korason, i kon toda tu alma. ¹⁷A A’ prometeste oy para ser a ti por Dyo, i para andar en sus kaminos, i para guardar sus fueros, i sus enkomendansas, i sus djuisyos, i para oir a su boz. ¹⁸I A’ te prometyo oy para ser a el por puevlo de tezoro, komo el te avlo, i para guardar todas sus enkomendansas: ¹⁹i para ponerte alto sovre todas las djentes ke izo, por loor, i por fama, i por glorya; i para ke seas puevlo santo a A’ tu Dyo, komo el avlo.

[1] Ebreo: puertas

27

¹I enkomendo Moshe i los vyejos de Yisrael al puevlo, dizyendo: guarda todas las enkomendansas ke yo vos enkomendo oy. ²I sera ke en el dia ke pasaresh el Yarden a la tyerra ke A’ tu Dyo te da, levantaras para ti pyedras grandes, i las enkalaras kon kal: ³i eskriviras sovre eyas todas las palavras de esta ley, kuando uvyeres pasado, para ke entres en la tyerra ke A’ tu Dyo te da, tyerra ke mana leche i myel, komo A’ el Dyo de tus padres te avlo. ⁴I sera, ke kuando uvyeres pasado el Yarden, levantaresh estas pyedras, ke yo vos enkomendo oy, en el monte de Eval, i las enkalaras kon kal. ⁵I fraguaras ayi ara a A’ tu Dyo, ara de pyedras; no mesas sovre eyas fyerro. ⁶De pyedras enteras fraguaras el ara de A’ tu Dyo; i alsaras sovre eya alsasyones a A’ tu Dyo: ⁷i sakrifikaras sakrifisyos de pases, i komeras ayi, i te alegraras delante de A’ tu Dyo. ⁸I eskriviras sovre las pyedras todas las palavras de esta ley muy klaramente.

⁹I avlo Moshe i los saserdotes los Levitas a todo Yisrael, dizyendo: eskucha i oye Yisrael; en este dia te iziste puevlo a A’ tu Dyo. ¹⁰Oiras pues a la boz de A’ tu Dyo, i aras sus enkomendansas i sus fueros, ke yo te enkomendo oy.

¹¹I enkomendo Moshe al puevlo en akel dia, dizyendo: ¹²estos estaran para bendizir al puevlo sovre el monte de Grizim, kuando uvyeresh pasado el Yarden: Shimon, i Levi, i Ye’huda, i Yissahar, i Yosef, i Binyamin. ¹³I estos estaran [1]para maldizir en el monte de Eval: Reuven, Gad, i Asher, i Zevulun, Dan, i Naftali. ¹⁴I gritaran los Levitas, i diran a todo varon de Yisrael en boz alta:

¹⁵Maldicho el varon ke izyere doladizo, o imajen de fundisyon, abominasyon de A’, ovra de manos de maestro, i lo puzyere en lugar enkuvyerto. I responderan todo el puevlo, i diran, amen. ¹⁶Maldicho el ke desonrare a su padre o a su madre. I dira todo el puevlo, amen. ¹⁷Maldicho el ke esmovyere el termino de su kompanyero, i dira todo el puevlo, amen. ¹⁸Maldicho el ke izyere yerrar al syego en el kamino. I dira todo el puevlo, amen. ¹⁹Maldicho el ke atorsyere el djuisyo del pelegrino, del guerfano, i de la bivda. I dira todo el puevlo, amen. ²⁰Maldicho el ke se echare kon la mujer de su padre, porke deskuvre la alda de su padre, i dira todo el puevlo amen. ²¹Maldicho el ke se echare kon kualkyer kuatropea. I dira todo el puevlo, amen. ²²Maldicho el ke se echare kon su ermana, ija de su padre, o ija de su madre. I dira todo el puevlo, amen. ²³Maldicho el ke se echare kon su suegra. I dira todo el puevlo, amen. ²⁴Maldicho el ke iryere a su kompanyero en le enkuvyerta. I dira todo el puevlo, amen. ²⁵Maldicho el ke tomare koecho para erir de muerte al [2]inosente. I dira todo el puevlo, amen. ²⁶Maldicho el ke no afirmare las palavras de esta ley para azerlas. I dira todo el puevlo, amen.

[1] Ebreo: sovre la maldisyon

[2] Ebreo: sangre inosente

28

¹I sera, ke si oir oyeres a la boz de A’ tu Dyo, guardando para azer todas sus enkomendansas ke yo te enkomendo oy, A’ tu Dyo te pondra alto sovre todas las djentes de la tyerra: ²i vendran sovre ti todas estas bendisyones i te alkansaran, kuando oyeres a la boz de A’ tu Dyo. ³Bendicho seras en la sivdad, i bendicho seras en el kampo: ⁴bendicho el fruto de tu vyentre, i el fruto de tu tyerra, i el fruto de tu kuatropea. La kria de tus vakas, i los revanyos de tus ovejas: ⁵bendicho tu kanastiyo i tu amasadera: ⁶bendicho seras en tu entrar, i bendicho seras en tu salir. ⁷A’ dara tus enemigos, ke se levantan kontra ti, eridos delante de ti; por un kamino saldran a ti, i por syete kaminos fuyiran delante de ti. ⁸Enkomendara A’ kontigo a la bendisyon en tus siyeros, i en todo akeyo a ke estendyeres tu mano; i te bendizira en la tyerra ke A’ tu Dyo te da. ⁹Te levantara A’ para si por puevlo santo, komo el te djuro, kuando guardares las enkomendansas de A’ tu Dyo, i anduvyeres en sus kaminos. ¹⁰I veran todos los puevlos de la tyerra ke el nombre de A’ es yamado sovre ti, i te temeran. ¹¹I te aventajara A’ para byen, en el fruto de tu vyentre, i en el fruto de tu kuatropea, i en el fruto de tu tyerra, sovre la tyerra ke djuro A’ a tus padres ke te daria. ¹²Te avrira A’ su siyero bueno, los syelos, para dar luvya a tu tyerra en su tyempo, i para bendizir toda ovra de tu mano; i emprestaras a muchas djentes, ma tu no tomaras emprestado. ¹³I te dara A’ por kavesa, i no por kola; i estaras solamente arriva, i no estaras abasho, kuando ovedesyeres a las enkomendansas de A’ tu Dyo, ke yo te enkomendo oy, para guardar i para azerlas. ¹⁴I no te apartes de todas las palavras ke yo vos enkomendo oy, a la derecha ni a la izkyerda, para andar detras de otros dyozes para servirles.

¹⁵I sera, ke si no oyeres a la boz de A’ tu Dyo, guardando para azer todas sus enkomendansas i sus fueros, ke yo te enkomendo oy, vendran sovre ti todas estas maldisyones, i te alkansaran. ¹⁶Maldicho seras en la sivdad, i maldicho en el kampo: ¹⁷maldicho tu kanastiyo i tu amasadera: ¹⁸maldicho el fruto de tu vyentre, i el fruto de tu tyerra, la kria de tus vakas, i los revanyos de tus ovejas: ¹⁹maldicho seras en tu entrar, i maldicho seras en tu salir. ²⁰A’ enbiara en ti la maldisyon, alboroto i amenazo en todo akeyo a ke estendyeres tu mano i izyeres, asta ke seas destruido, i asta ke te depyerdas presto por kavza de la maldad de tus ovras, por las kuales me deshaste. ²¹A’ ara ke te se apege la mortaldad, asta ke te konsuma de sovre la tyerra, a la kual entras para eredarla. ²²Te erira A’ kon la konsumasyon, i kon la fyevre, i kon la enflamasyon, i kon la kayentura, i kon la espada, i kon el batimyento, i kon el amariyor; i te persegiran asta ke seas deperdido. ²³I tus syelos ke estan sovre tu kavesa seran de alambre, i la tyerra ke esta debasho de ti sera de fyerro. ²⁴A’ dara por luvya a tu tyerra polvorina i polvo; de los syeleos desendera sovre ti, asta ke seas destruido. ²⁵A’ te dara erido delante de tus enemigos; por un kamino saldras a eyos, i por syete kaminos fuyiras delante de eyos; i seras arrojado a todos los reynos de la tyerra. ²⁶I sera tu kalavrina por komida a toda ave de los syelos, a la bestya de la tyerra, i no avra kyen las espante. ²⁷Te erira A’ kon la sarna de Ayifto, i kon almoranas, i kon sarna verde, i kon sarna seka, de ke no podras ser melezinado. ²⁸Te erira A’ kon lokura, i kon syegedumbre, i kon espanto de korason. ²⁹I palparas al medyo dia komo palpa el syego en la tinyevla, i no prosperaras en tus kaminos; i seras solamente sovreforsado i rovado todos los dias, i no avra kyen te salve. ³⁰Te despozaras kon mujer, i otro varon yazera kon eya; fraguaras kaza, i no moraras en eya; plantaras vinya, i no la vendimyaras. ³¹Tu buey sera degoyado delante de tus ojos, i no komeras de el; tu azno sera rovado de delante de ti, i no te se tornara; tus ovejas seran dadas a tus enemigos, i no avra kyen te las salve. ³²Tus ijos i tus ijas seran dados a otro puevlo, i tus ojos miraran, i se turviaran por eyos todo el dia; i no avra poder en tu mano. ³³El fruto de tu tyerra i toda tu lazerya komera puevlo ke nos konosiste; i seras solamente sovreforsado i kevrantado todos los dias. ³⁴I seras enlokesido por la vista de tus ojos ke veras. ³⁵Te erira A’ en las rodiyas i en las pyernas kon sarna mala de ke no podras ser melenizado, dezde la planta de pye asta tu meoyera. ³⁶A’ te yevara a ti, i a tu rey, ke levantares sovre ti, a djente ke no konosiste tu ni tus padres; i ayi serviras a otros dyozes, palo i pyedra. ³⁷I seras por maraviya por enshemplo i por burla entre todos los puevlos a los kuales A’ te giara. ³⁸Mucha simyente sakaras al kampo, i poko akojeras; porke la langosta lo konsumira. ³⁹Vinyas plantaras i lavraras, ma no beveras vino, ni akojeras uvas; porke el guzano las komera. ⁴⁰Olivares tendras en todo tu termino, ma no te untaras kon azeyte; porke tu azeytuna se kaera. ⁴¹Ijos i ijas engrandeseras, ma no seran para ti; porke andaran en kativeryo. ⁴²Todos tus arvoles i el fruto de tu tyerra [1]konsumira el langostino. ⁴³El pelegrino ke esta en medyo de ti suvira sovre ti arriva arriva, i te desenderas abasho abasho. ⁴⁴El emprestara a ti, i tu no emprestaras a el; el sera por kavesa, i tu seras por kola. ⁴⁵I vendran sovre ti todas estas maldisyones, i te persegiran, i te alkansaran, asta ke seas destruido; por lo ke no eskuchaste a la boz de A’ tu Dyo, guardando sus enkomendansas i sus fueros ke el te enkomendo. ⁴⁶I seran en ti por senyal i por maraviya, i en tu semen para syempre: ⁴⁷por kuanto no serviste a A’ tu Dyo kon alegria, i kon gusto de korason por la abundansya de todo. ⁴⁸I serviras a tus enemigos ke A’ enbiara kontra ti, kon ambre i kon sed, i kon desnudez, i kon falta de todo; i el pondra yugo de fyerro sovre tu serviz asta destruirte. ⁴⁹A’ traera sovre ti djente de leshos, del kavo de la tyerra, komo bola el agila, djente ke su lingua no entyendas: ⁵⁰djente desverguensoza de fases, ke no respetara las fases del vyejo, ni se apiadara del mansevo. ⁵¹I komera el fruto de tu kuatropea i el fruto de tu tyerra, asta ke seas destruido, ke no te deshara sivera, ni mosto, ni azeyte, ni la kria de tus vakas, ni los revanyos de tus ovejas, asta deperderte. ⁵²I te asedyara en todas tus [2]sivdades, asta ke kaygan tus murayas altas i enkastiyadas en ke enfiguzyas, en toda tu tyerra; i te asedyara en todas tus sivdades en todas tu tyerra, ke A’ tu Dyo te dyo. ⁵³I komeras el fruto de tu vyentre, la karne de tus ijos i de tus ijas, ke A’ tu Dyo te dyo, en el asedyo i en el apreto kon ke te apretara tu enemigo. ⁵⁴El varon tyerno en ti, i el muy visyozo, su ojo sera malo kon su ermano, i kon la mujer de su seno, i kon el resto de sus ijos ke le kedare: ⁵⁵para no dar a ninguno de eyos de la karne de sus ijos, ke el komera; porke no le avra kedado nada en el asedyo i en el apreto kon ke tu enemigo te apretara en todas tus [3]sivdades. ⁵⁶La mujer tyerna en ti, o la visyoza, ke nunka prevo a poner la planta de su pye sovre la tyerra de delikadez i de ternura, su ojo sera malo kon el marido de su seno, i kon su ijo, i kon su ija, ⁵⁷i kon su chikito ke sale de entre sus pyes, i kon sus ijos ke paryere; porke los komera a eskondidas por falta de todo en el asedyo i en el apreto kon ke tu enemigo te apretara en tus [4]sivdades. ⁵⁸Si no guardares para azer todas las palavras de esta ley, ke estan eskritas en este livro, temyendo este nombre onrado i temerozo, a A’ tu Dyo; ⁵⁹A’ ara maraviyozas tus yagas, i las yagas de tu semen. Yagas grandes i firmes, i enfermedades malas i firmes: ⁶⁰i ara tornar en ti todos los dolores de Ayifto, delante de los kuales temeste, i se apegaran a ti. ⁶¹Tambyen toda enfermedad i toda yaga, ke no esta eskrita en el livro de esta ley, A’ las ara suvir sovre ti, asta ke seas destruido. ⁶²I kedaresh kon pokos ombres en lugar de aver sido komo las estreyas de los syelos en muchedumbre; por kuanto no eskuchaste a la boz de A’ tu Dyo. ⁶³I sera, ke komo A’ se gozo sovre vozotros para azervos byen, i para muchiguarvos; ansi se gozara A’ sovre vozotros para deperdervos, i para destruirvos; i seresh arrankados de sovre la tyerra a la kual entras para eredarla. ⁶⁴I A’ te esparzira entre todos los puevlos, dezde el un kavo de la tyerra asta el otro kavo de la tyerra; i ayi serviras a otros dyozes ke no konosiste tu ni tus padres, palo i pyedra. ⁶⁵I ni aun entre akeyas djentes deskansaras, ni la planta de tu pye tendra repozo; i ayi A’ te dara korason temblante, i deskaimyento de ojos, i tristeza de alma. ⁶⁶I estara tu vida kolgada delante de ti, i tendras myedo de noche i de dia, i no te konfiaras de tu vida. ⁶⁷Por la manyana diras: ¡kyen dyese ke fuera tarde! i a la tarde diras ¡kyen dyese ke fuera manyana! por el myedo de tu korason kon ke te espantaras, i por la vista de tus ojos ke veras, ⁶⁸i A’ te ara tornar a Ayifto en naveos, por el kamino del kual te dishe ke nunka mas lo verias. I ayi seresh vendidos a tus enemigos por esklavos i por esklavas, i no avra kyen vos kompre.

⁶⁹Estas son las palavras del firmamyento ke A’ enkomendo a Moshe de tajar kon los ijos de Yisrael en la tyerra de Moav, afuera del firmamyento ke tajo kon eyos en Horev.

[1] Ebreo: tomara posesyon

[2] Ebreo: puertas

[3] Ebreo: puertas

[4] Ebreo: puertas

29

¹I yamo Moshe a todo Yisrael, i les disho: vozotros vistesh todo lo ke A’ izo delante de vuestros ojos en la tyerra de Ayifto a Paro, i a todos sus syervos, i a toda su tyerra: ²las prevas grandes ke vyeron tus ojos, las senyales, i akeyas grandes maraviyas. ³I A’ no vos dyo korason para saver, ni ojos para ver, ni orejas para oir, asta el dia de oy. ⁴I yo vos yevi kuarenta anyos en el dizyerto: no se envejesyeron vuestros vestidos sovre vozotros, ni se envejesyo tu sapato sovre tu pye. ⁵Ni komistesh pan, ni bevistesh vino ni sidra, para ke supyerash ke yo soy A’ vuestro Dyo. ⁶I vinistesh a esta lugar, i salyo Sihon, rey de Heshbon, i Og rey de Bashan, a nuestro enkuentro para pelear, i los erimos. ⁷I tomimos su tyerra, i la dimos por eredad a Reuven, i a Gad, i al medyo trivo de Menashe. ⁸Guardaresh pues, las palavras de este firmamyento i las aresh, para ke seash prosperados en todo lo ke izyeresh.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.