eSefarad Noticias del Mundo Sefaradi
Ver todos los capítulos publicados en esta sección
Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873
Transkrivido por Ye’huda Sidi. Febrero 2015
49 – KI TETSE
10Kuando salyeres a la gerra kontra tus enemigos, i A’ tu Dyo los entregare en tu mano, i tomares de eyos kativos; 11i vyeres entre los kativos una mujer ermoza de forma, i la kovdisyares, i la tomares para ti por mujer; 12la traeras adyentro de tu kaza, i eya traskilara su kavesa, i kortara sus unyas: 13i kitara de sovre si el vestido de su kativeryo, i se kedara en tu kaza, i yorara a su padre i a su madre un mez de dias; i despues de esto vendras a eya, i seras su marido, i eya sera tu mujer. 14I sera, ke si no enveluntares en eya, la soltaras a su veluntad; ma vender no la venderas por moneda, ni merkadearas kon eya, por kuanto la afriiste.
15Kuando un varon tuvyere dos mujeres, la una amada, i la otra aborresida, i la amada i la aborresida le paryeren ijos, i el ijo primodjenito fuere de la aborresida: 16sera, ke en el dia ke izyere eredar a sus ijos lo ke tuvyere, no podra dar el derecho de primodjenitura al ijo de la amada enfrente del ijo de la aborresida, ke es el primodjenito; 17sino ke al ijo de la aborresida konosera por primodjenito, para darle dos tantos de todo lo ke se le topare; porke el es el prinsipyo de su fuersa; el derecho de la primodjenitura es suyo.
18Kuando alguno tuvyere ijo atorsidor i revilyador, ke no eskuchare a la boz de su padre ni a la boz de su madre, i lo kastigaren, ma no les ovedesyere: 19entonses lo travaran su padre i su madre, i lo sakaran a los vyejos de su sivdad, i a la puerta de su lugar. 20I diran a los vyejos de su sivdad: este nuestro ijo es atorsidor i revilyador; no eskucha a nuestra boz; es tragon i borrachon. 21I todos los varones de su sivdad lo apedrearan kon pyedras, i murira; i eskombraras el mal de en medyo de ti, i todo Yisrael oiran i temeran.
22I kuando en alguno uvyere pekado de sentensya de muerte, i uvyere de murir, i lo kolgares sovre la forka: 23no kedara su kalavrina por la noche sovre la forka, sino ke enterrar lo enterraras en el mizmo dia; porke maldisyon del Dyo es el kolgado; i no enkones tu tyerra ke A’ tu Dyo te da por eredad.
22
1No veas el buey de tu ermano o su karnero perdidos, i te enkuvras de eyos; tornar los tornaras a tu ermano. 2I aunke tu ermano no sea tu vezino, o no lo konosyeres, los rekojeras en tu kaza, i estaran kontigo asta ke tu ermano los buhke, i se los tornaras. 3I ansi aras kon su azno, i ansi aras kon su vestido, i ansi aras kon toda koza perdida de tu ermano ke se le perdyere, i tu la topares. No podras enkuvrirte de eyo.
4No veas el azno de tu ermano o su buey kaidos en el kamino, i te enkuvras de eyos; levantar los levantaras kon el.
5No ponga la mujer sovre si vestido de ombre, ni vista el ombre vestido de mujer; porke aborresyon es a A’ tu Dyo kualkyera ke aze esto.
6Kuando se topare delante de ti en el kamino algun nido de ave en kualkyer arvol, o sovre la tyerra, kon poyos o guevos, i la madre asentada sovre los poyos, o sovre los guevos, no tomes la madre kon los ijos: 7soltar soltaras a la madre, i tomaras los ijos para ti, para ke te vaya byen, i alarges tus dias.
8Kuando fraguares kaza nueva, aras altecho para tu tejado, para ke no pongas sangre en tu kaza, si kayere de el alguno.
9No sembres tu vinya de mesklas, no sea ke se enkone el [1]fruto de la simyente ke sembraste, i el renuevo de la vinya.
10No ares kon buey i kon azno djuntos. 11No te vistas de mesklas de lana i lino auna.
12Tsitsiyot aras para ti sovre las kuatro aldas de tu kapa kon ke te kuvryeres.
13Kuando un ombre tomare mujer, i despues de venir a eya la aborresyere, 14i le puzyere achakes de palavras, i sakare sovre eya fama mala, i dishere: tomi a esta mujer, i me ayegi a eya , i no topi en eya eskosedad: 15entonses el padre de la mosa i su madre tomaran i sakaran las senyales de la eskosedad de la mosa a los vyejos de la sivdad a la puerta. 16I dira el padre de la mosa a los vyejeos: yo di mi ija a este ombre por mujer, 17i el la aborrese; i ek, el pone achakes de palavras, dizyendo: no topi en tu ija eskosedad. I estas son las senyales de la eskosedad de mi ija. I espandiran la savana delante de los vyejos de la sivdad. 18I los vyejos de akeya sivdad tomaran al ombre, i lo kastigaran. 19I lo apenaran en syen siklos de plata, i los daran al padre de la mosa, por lo ke sako fama mala sovre una eskosa de Yisrael; i eya sera su mujer; no podra kitarla todos sus dias.
20Ma si esta koza es verdad, i no se topare eskosedad en la mosa: 21entonses sakaran a la mosa a la puerta de la kaza de su padre, i la apedrearan kon pyedreas los varones de su sivdad, i murira, por lo ke izo vileza en Yisrael, eskarando en kaza de su padre; i eskombraras el mal de en medyo de ti.
22Kuando un ombre fuere topado echado kon mujer kazada kon marido, muriran ambos eyos, el ombre ke se echo kon la mujer, i la mujer mizma; i eskombraras el mal de Yisrael.
23Kuando fuere mosa eskosa despozada kon alguno, i algun otro la topare en la sivdad, i se echare kon eya: 24entonses sakaresh a ambos eyos a la puerta de la sivdad, i los apedrearesh kon pyedras, i muriran; a la mosa por lo ke no esklamo en la sivdad, i al ombre por lo ke afrio a la mujer de su komapanyero; i eskombraras el mal de en medyo de ti.
25Ma si el ombre topare en el kampo a la mosa despozada, i el ombre la forsare, i se echare kon eya, murira solo el ombre ke se echo kon eya: 26i a la mosa no ara nada; la mosa no tyene kulpa de muerte; porke komo kuando alguno se levanta kontra su kompanyero, i lo mata, ansi es esta koza: 27porke en el kampo la topo: la mosa despozada esklamo i no uvo kyen la salvara.
28Kuando un ombre topare una mosa eskosa, ke no fuere despozada, i la forsare, i se echare kon eya, i fueren topados: 29entonses el ombre ke se echo kon eya dara al padre de mosa sinkuenta siklos de plata, i eya sera su mujer, por lo ke la afrio; no podra kitarla todos sus dias.
[1] Ebreo: yena
23
1No tome ninguno la mujer de su padre, ni deskuvra la alda de su padre.
2No entre en la kompanya de A’ el yagado de guevos, ni el tajado de vertedero. 3No entre bastardo en la kompanya de A’; aun en su djerenansyo dezeno no entre en la kompanya de A’. 4No entre Amonita ni Moavita en la kompanya de A’, aun en su djerenansyo dezeno no entre en la kompanya de A’ para syempre: 5Por kuanto no vos salyeron a resivir kon pan i kon agua en el kamino, kuando salistesh de Ayifto i porke alkilo kontra ti a Bilam, ijo de Beor de Petor de Aram-Na’harayim para maldizirte. 6Ma no kijo A’ tu Dyo oir a Bilam; i A’ tu Dyo te demudo la maldisyon en bendisyon, porke A’ tu Dyo te amava. 7No bushkes la paz de eyos, ni el byen de eyos todos tus dias para syempre.
8No aborreskas al Edomio, porke tu ermano es. No aborreskas al Aisyano, porke pelegriono fuiste en su tyerra. 9Los ijos ke nasyeron de eyos. a; terser djerenansyo entraran en la kompanya de A’.
10Kuando salyeres en real kontra tus enemigos, te guardaras de toda koza mala. 11Kuando uvyere en ti alguno ke no fuere limpyo por akontesimyento de noche, saldra afuera del real; no vendra adyentro del real. 12I sera, ke al tyempo de la tarde se lavara kon agua; i al ponerse el sol, vendra adyentro del real. 13I tendras un lugar afuera del real, i saldras ayi afuera. 14I tendras una estaka sovre tus armas, i sera, ke kuando estuvyeres afuera, kavaras kon eya, i tornaras i kuvriras tu susyedad. 15Porke A’ tu Dyo anda por medyo de tu real, para eskaparte, i para entregar tus enemigos delante de ti. Por tanto sera tu real santo, para ke el no vea en ti koza verguensoza, i se torne de detras de ti.
16No entreges a su senyor el syervo ke se eskapare a ti de su amo. 17More kontigo, en medyo de ti, en lugar ke eskojyere en una de tus [1]sivdades, onde le agradare; no lo oprimas.
18Ni ayga eskarada de las ijas de Yisrael, ni ayga sedomita de los ijos de Yisrael. 19No traygas dadiva de eskarada, ni presyo de perro en la kaza de A’ tu Dyo por kualkyer promesa; porke abominasyon es a A’ tu Dyo tanto lo uno komo lo otro.
20No tomes logro de tu ermano; logro de moneda, logro de komida, ni logro de kuakyer koza ke se da kon logro. 21Del estranjero tomaras logro, ma de tu ermano no tomes logro, para ke te bendiga A’ tu Dyo en todo akeyo a ke estendyeres tu mano sovre la tyerra a la kual vyenes para eredarla.
22Kuando prometyeres promesa a A’ tu Dyo, no tardes de pagarla; porke rekerir lo rekerira A’ tu Dyo de ti, i avria en ti pekado. 23Ma kuando te detuvyeres de prometer , no avra en ti pekado. 24Lo ke sale de tus lavyos guardaras i aras, komo prometeste a A’ tu Dyo, el prezente veluntaryo ke avlaste kon tu boka.
25Kuando entrares en la vinya de tu kompanyero, podras komer uvas segun tu gusto asta artarte; ma no metas en tu atuendo. 26Kuando entrares en la myes de tu konpanyero, podras kortar espigas kon tu mano; ma no mesas oz sovre la myes de tu kompanyero.
[1] Ebreo: puertas
24
1Kuando un ombre tomare mujer, i se kazare kon eya, i akontesyere ke no ayare grasya en sus ojos, por aver topado en eya alguna koza verguensoza, le eskrivira karta de kitamyento, i se la dara en su mano, i la enbiara de su kaza. 2I si despues ke salyo de su kaza, eya anduvyere i se kazare kon otro varon: 3i se la aborresyere el varon postrero, i le eskrivyere karta de kitamyento, i se la dyere en su mano, i la enbiare de su kaza; o se muryere el postrer varon ke la tomo para si por mujer: 4su primer marido, ke la enbio, no podra tornar a tomarla para ser su mujer, despues ke fue enkonada; porke abominasyon es delante de A’; i no agas pekar a la tyerra, ke A’ tu Dyo te da eredar.
5Kuando un ombre tomare mujer nueva, no salga en el fonsado, [1]ni se okupe en ninguna koza; livre estara en su kaza un anyo i alegrara a su mujer ke tomo.
6Ninguno tome en prenda la muela de molino, la de abasho ni la de arriva; porke tomaria en prenda la vida.
7Kuando fuere ayado alguno ke ayga rovado persona de sus ermanos de los ijos de Yisrael, i uvyere merkadeado kon eya, o la uvyere vendido, akel ladron murira, i eskombraras el mal de en medyo de ti.
8Guardate en la yaga de la lepra, guardando mucho, i azyendo segun todo lo ke vos anbezaren los saserdotes los Levitas; komo les enkomendi, gurdaresh para azer. 9Akordate de lo ke izo A’ tu Dyo a Miryam en el kamino, kuando salistesh de Ayifto.
10Kuando emprestares a tu kompanyero alguna koza, no entres en su kaza para tomar su prenda: 11afuera estaras i el ombre a kyen emprestaste te sakara afuera la prenda. 12I si fuere ombre povre, no duermas kon su prenda: 13tornar le tornaras la prenda al ponerse el sol, para ke duerma en su ropa, i te bendiga: i te sera djustedad delante de A’ tu Dyo.
14No sovreforses al alkiladizo povre i menesterozo, sea de tus ermanos o de tus pelegrinos ke estan en tu tyerra en tus [2]sivdades. 15En su dia le daras su djornal, i no se ponga sovre eyo el sol; porke povre es, i a eyo alsa su alma; no sea ke esklame kontra ti a A’, i sea en ti pekado.
16No sean matados los padres por los ijos, ni sean matados los ijos por los padres; kada uno sera matado por su propyo pekado.
17No atuersas el djuisyo del pelegrino o del guerfano; ni tomes por prenda la ropa de la bivda. 18Ma te akordaras ke fuiste syervo en Ayifto, i ke A’ tu Dyo te regmyo de ayi; por tanto yo te enkomendo ke agas esta koza.
19Kuando segares tu segada en tu kampo, i olvidares una gaviya en el kampo, no tornes a tomarla; para el pelegrino, para el guerfano, i para la bivda sera; para ke te bendiga A’ tu Dyo en toda ovra de tus manos. 20Kuando sakudyares tu olivar, no rebushkes detras de ti, para el pelegrino, para el guerfano, i para la bivda sera. 21Kuando vendimyares tu vinya, no [3]rebushkes detras de ti; para el pelegriono, para el guerfano, i para la bivda sera. 22I te akordaras ke fuiste syervo en la tyerra de Ayifto, por tanto yo te enkomendo ke agas esta koza.
[1] Ebreo: ni se pase sovre el
[2] Ebreo: puertas
[3] Ebreo: rames
25
1Kuando uvyere baraja entre algunos, i se ayegaren al djuisyo, i los djuzgaren, djustifikaran al djusto, i kondenaran al malo. 2I sera, ke si el malo mersyere ser asotado, el djuez lo ara echar, i le ara asotar delante de si, segun su malisya, por kuenta. 3Kuarenta asutes le ara dar, no mas; no sea ke, se lo iryere kon muchos asotes afuera de estos, tu ermano sea desonrado en tus ojos.
4No emboses al buey kuando triyare.
5Kuando ermanos moraren djuntos, i muryere uno de eyos, i no tuvyere ijo, la mujer del muerto no se kazara afuera kon varon estranyo; su kunyado vendra a eya, i la tomara a si por mujer, i la kunyadara. 6I sera, ke el primodjenito ke paryere, se levantara en nombre de su ermano el muerto,para ke su nombre no sea arrematado de Yisrael. 7I si el varon no enveluntare a tomar a su kunyada, entonses suvira su kunyada a la puerta a los vyejos, i dira: mi kunyado no kyere levantar nombre en Yisrael a su ermano; no kere akunyadarme. 8Entonses los vyejos de su sivdad lo yamaran, i le avlaran; i si el se parare, i dishere: yo no envelunto a tomarla: 9entonses su kunyada se ayegara a el delante de los vyejos i le deskalsara su sapato de sovre su pye, i eskupira en su kara, i respondera i dira: ansi sea echo al varon ke no fraguare la kaza de su ermano. 10I su nombre sera yamado en Yisrael, la kaza del deskalsado del sapato.
11Kuando ombres barajaren djuntos el uno kon otro, i se ayegare la mujer del uno para eskapar a su marido de mano de su eridor, i estendyere su mano, i le travare de sus verguensas: 12entonses le kortaras su palma, no se apiade tu ojo.
13No tengas en tu bolsa pezo i pezo, grande i chiko. 14No tengas en tu kaza mezura i mezura, grande i chika. 15Pezo kumplido i djusto tendras, mezura kumplida i djusta tendras; para ke se alargen tus dias sovre la tyerra ke A’ tu Dyo te da. 16Porke abominasyon es a A’ tu Dyo todo el ke aze esto, todo el ke aze tortura.
17Akordate de lo ke te izo Amalek en el kamino, kuando salistesh de Ayifto: 18komo te enkontro en el kamino, i [1]te kurto los postreros, todos los flakos detras de ti, kuando tu estavas laso i kansado; i no temyo al Dyo. 19I sera, ke kuando A’ tu Dyo te uvyere dado repozo de todos tus enemigos al derredor, en la tyerra ke A’ tu Dyo te da por eredad, para ke la poseas, arremataras la membrasyon de Amalek de debasho de los syelos; no te olvides.
[1] Ebreo: deskulo en ti
Ver todos los capítulos publicados en esta sección
————————————————————————
About Yehuda Sidi
I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.
A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.
So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.
The transcription was not reviewed by the Ladino scholars. Please report the errors that you find.
