eSefarad Noticias del Mundo Sefaradi
Ver todos los capítulos publicados en esta sección
Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873
Transkrivido por Ye’huda Sidi. Febrero 2015
47 – REE
26Mira yo pongo oy delante de vozotros bendisyon i maldisyon: 27bendisyon, si ovedesyeresh a las enkomendansas de A’ vuestro Dyo, ke yo vos enkomendo oy: 28i maldisyon, si no ovedesyeresh a las enkomendansas de A’ vuestro Dyo, sino ke vos apartaresh del kamino ke yo vos enkomendo oy, para andar detras de otros dyozes ke no konosistesh.
29I sera, ke kuando A’ tu Dyo te trushere a la tyerra a la kual entraras para eredarla, pondras la bendisyon sovre el monte de Grizim, i la maldisyon sovre el monte de Eval: 30los kuales estan de la otra parte del Yarden, detras del kamino del ponerse el sol, en la tyerra del Kenaanio, ke mora en la yanura enfrente de Gilgal, serka de las enzinas de More. 31Porke vozotros pasash el Yarden para entrar a eredar la tyerra ke A’ vuestro Dyo vos da; i la eredaresh, i moraresh en eya. 32Guardaresh pues para azer todos los fueros i los djuisyos ke yo pongo delante de vozotros oy.
12
1Estos son los fueros i los djuisyos ke guardaresh para azer en la tyerra ke A’ el Dyo de tus padres te da para eredarla, todos los dias ke bivyeresh sovre la tyerra. 2Destruir destruiresh todos los lugares onde las djentes ke vozotros eredaresh sirvyeron a sus dyozes, sovre los montes altos, i sovre las kuestas, i debasho de todo arvol reverdido. 3I derrokaresh sus aras, i kevraresh sus estansyas, i sus ashrot kemaresh kon fuego, i las figuras de sus dyozes tajaresh, i aresh deperder su nombre de akel lugar. 4No agash ansi a A’ vuestro Dyo. 5Ma al lugar ke A’ vuestro Dyo eskojyere de todos vuestros trivos, para poner ayi su nombre, a su morada bushkaresh, i ayi vendras. 6I ayi traeresh vuestras alsasyones, i vuestros sakrifisyos, i vuestros dyezmos, i la levantadura de vuestra mano, i vuestras promesas, i vuestros prezentes veluntaryos, i los primirezos de vuestras vakas i de vuestras ovejas. 7I komeresh ayi delante de A’ vuestro Dyo, i vos alegraresh, vozotros i vuestras famiyas, en toda koza ke estendyeresh vuestra mano en ke A’ tu Dyo te uvyere bendicho. 8No agash komo todo lo ke nozotros azemos aki oy, kada uno todo lo ke es derecho en sus ojos. 9Porke dainda no vinistesh al repozo i a la eredad ke A’ tu Dyo te da. 10Ma pasaresh el Yarden, i moraresh en la tyerra ke A’ vuestro Dyo vos aze eredar, i el vos dara repozo de todos vuestros enemigos al derredor, i moraresh a figuzya. 11I sera, ke al lugar ke A’ vuestro Dyo eskojyere para apozentar ayi su nombre, ayi traeresh todo lo ke yo vos enkomendo, vuestras alsasyones, i vuestros sakrifisyos, vuestros dyezmos, i la levantadura de vuestra mano, i todo lo eskojido de vuestras promesas ke prometyeresh a A’. 12I vos alegraresh delante de A’ vuestro Dyo, vozotros, i vuestros ijos, i vuestras ijas, i vuestros syervos, i vuestras syervas, i el Levita ke esta en vuestras [1]sivdades; porke no tyene parte ni eredad kon vozotros. 13Guardate ke no alses tus alsasyones en kualkyer lugar ke vyeres: 14ke salvo en el lugar ke A’ eskojyere en uno de tus trivos, ayi alsaras tus alsasyones, i ayi aras todo lo ke yo ke enkomendo. 15Empero en todas tus sivdades degoyaras i komeras karne segun todo el dezeo de tu alma, segun la bendisyon de A’ tu Dyo, ke el te avra dado; el enkonado i el limpyo la komera komo la del korso, komo la del syervo, 16solamente la sangre no komash; sovre la tyerra la verteresh komo agua. 17No podras komer en tus sivdades el dyezmo de tu sivera, o de tu mosto, o de tu azeyte, ni los primerezos de tus vakas i de tus ovejas, ni todas tus promesas ke prometyeres, ni tus prezentes veluntaryos, ni la levantadura de tu mano: 18ke salvo delante de A’ tu Dyo lo komeras, en el lugar ke A’ tu Dyo eskojyere, tu, i tu ijo, i tu ija , i tu syervo, i tu syerva, i el Levita ke esta en tus sivdades; i te alegraras delante de A’ tu Dyo en toda koza a ke estendyeres tu mano. 19Guardate, no sea ke deshes al Levita todos tus dias sovre tu tyerra.
20Kuando A’ tu Dyo ensancahare tu termino, komo el te avlo, i tu disheres: komere karne, porke dezea tu alma komer karne, segun todo el dezeo de tu alma komeras karne. 21Kuando estuvyere leshos de ti el lugar ke A’ tu Dyo eskojyere para poner ayi su nombre, entonses degoyaras de tus vakas i de tus ovejas, ke A’ te avra dado, komo yo te enkomendi, i komeras en tus [2]sivdades segun todo el dezeo de tu alma. 22Syerto komo se kome el korso i el syervo, ansi la komeras: tanto el enkonado komo el limpyo la komera. 23Solamente esforsate a no komer la sangre; porke la sangre es la vida, i no komas la vida kon la karne. 24No la komas; sovre la tyerra la verteras komo agua. 25No la komas, para ke te vaya byen a ti, i a tus ijos despues de ti, kuando izyeres lo derecho en ojos de A’. 26Empero tus kozas santas ke tuvyeres, i tus promesas, yevaras, i vendras al lugar ke A’ eskojyere. 27I aras tus alsasyones, la karne i la sangre, sovre el ara de A’ tu Dyo; i la sangre de tus sakrifisyos sera vertida sovre el ara de A’ tu Dyo, i la karne komeras. 28Guarda, i oye todas estas palavras ke yo te enkomendo, para ke te vaya byen a ti, i a tus ijos despues de ti para syempre, kuando izyeres lo bueno i lo derecho en ojos de A’ tu Dyo.
29Kuando A’ tu Dyo tajare de delante de ti las djentes onde tu vas para eredarlas, i las eredares, i morares en su tyerra; 30guardate ke no seas enkampdado detras de eyas despues ke fuereon destruidas de delante de ti; i ke no rekyeras a sus dyozes, dizyendo: komo servian akeyas djentes a sus dyozes, ansi are yo tambyen. 31No agas ansi a A’ tu Dyo; porke toda abominasyon de A’ ke el aborrese, izyeron eyos a sus dyozes; porke aun a sus ijos i a sus ijas kemavan en el fuego a sus dyozes.
[1] Ebreo: puertas
[2] Ebreo: puertas
13
1Toda koza ke yo vos enkomendo, akeya guardaresh para azer; no anyadas a eya, ni mengues de eya.
2Kuando se levantare en medyo de ti profeta, o sonyador de suenyo, i te dyere senyal o milagro, 3i akaesyere la senyal o el milagro de ke te avlo, dizyendo: vamos detras de otros dyozes, ke no konosiste, i les servamos: 4no oygas a las palavras del tal profeta, ni al tal sonyador de suenyo; porke A’ vuestro Dyo vos preva, para saver si amash a A’ vuestro Dyo kon todo vuestro korason, i kon toda vuestra alma. 5Detras de A’ vuestro Dyo andaresh, i a el temeresh, i sus enkomendansas guardaresh, i a su boz eskucharesh, i a el serviresh, i a el vos apegaresh. 6I akel profeta, o akel sonyador de suenyo, sera matado, porke avlo revilyo kontra A’ vuestro Dyo, ke vos sako de la tyerra de Ayifto, i ke te reskato de la kaza de syervos, para empusharte del kamino en el kual A’ tu Dyo te enkomendo de andar; i ansi eskombraras el mal de en medyo de ti.
7Kuando tu ermano, ijo de tu madre, o tu ijo, o tu ija, o la mujer de tu seno, o tu amigo ke sea komo tu alma, te sombayere en sekreto, dizyendo: vamos i servamos a otros dyozes, ke no konosiste tu, ni tus padres: 8de los dyozes de los puevlos ke estan en vuestros derredores, serkanos ati, o leshanos de ti, dezde el un kavo de la tyerra asta el otro kavo de la tyerra: 9no konsyentas kon el, ni le oygas, ni le tenga lastima tu ojo, ni tengas piadad, ni lo enkuvras: 10sino ke matar lo mataras; tu mano sera primera sovre el para matarlo, i despues la mano de todo el puevlo. 11I lo apedrearas kon pyedras, i murira; porke buhko de empusharte de A’ tu Dyo, ke te sako de la tyerra de Ayifto, de la kaza de syervos. 12I todo Yisrael oiran, i temeran, i no tornaran a azer komo esta mala koza en medyo de ti.
13Kuando oyeres en alguna de tus sivdades, ke A’ tu Dyo te da para morar ayi, ke se dize: 14salyeron varones [1]muy malos de en medyo de ti, i emphusharon a los moradores de su sivdad, dizyendo: vamos i servamos a otros dyozes ke no konosistesh: 15entonses rekeriras, i peskuzaras, i preguntaras byen, i ek, si fuere verdad, koza syerta, ke tal abominasyon se izo en medyo de ti: 16erir eriras a tajo de espada a los moradores de akeya sivdad, destruyendola kon todo lo ke ay en eya, i a sus kuatropeas a tajo de espada. 17I todo su espojo akojeras en medyo de su plasa, i kemaras kon fuego la sivdad i todo su espojo, todo eyo, para A’ tu Dyo; i sera monton para syempre; nunka mas sera fraguada. 18I no se apege a tu mano nada de la koza enheremada; para ke A’ se torne del eresimyento de su fulor, i te de piadades, i tenga piadad de ti, i te muchigue, komo djuro a tus padres, 19kuando ovedesyeres a la boz de A’ tu Dyo, para guardar todas sus enkomendansas ke yo te enkomendo oy, para azer lo ke es derecho en ojos de A’ tu Dyo.
[1] Ebreo: ijos de Beliyael
14
1Ijos sosh a A’ vuestro Dyo, no vos raskunyesh, ni pongash peladura entre vuestros ojos por muerto: 2porke tu eres puevlo santo a A’ tu Dyo, i te eskojyo A’ para ser a el por puevlo santo a A’ tu Dyo, i te eskojyo A’ para ser a el por puevlo de tezoro, mas ke todos los puevlos ke estan sovre las fases de la tyerra.
3No komas ninguna abominasyon. 4Estas son las kuatropeas ke komeresh: el buey, la oveja, i la kavra, 5el syervo, i el korso, i el gamo, i el kavron-montes, i el pigargo, i el oriks, i el kameyo-pardal. 6I toda kuatropea ke tyene pesunya, i ke tyene la pesunya endida en dos partes, i ke alsa rumya entre las kuatropeas, akeya komeresh. 7Empero esto no komash de los ke alsan la rumya, o ke tyenen la pesunya endida: el kameyo, i la lyevre, i el konejo; porke alsan la rumya, ma no tyenen la pesunya endida; enkonados vos seran. 8I el puerko, porke tyene la pesunya endida, ma no rumya; enkonado vos sera. De la karne de eyos no komash, ni tokesh sus kalavrinas.
9Esto komeresh de todo lo ke ay en las aguas: todo lo ke tyene alas i eskamas komeresh: 10ma todo lo ke no tyene alas i eskamas no komash, enkonado vos sera.
11Toda ave limpya komeresh. 12I estas son de las kuales no komeresh: el agila, i el osifrago, i el esmerejon, 13i el buitre, i el milano, i el falkon segun su manera, 14i todo kuervo segun su manera, 15i el avestruz, i la lechuza, i el laro, i el gavilan segun su manera, 16el buo, i el ibis, i el sisne, 17i el pelikano, i el buitre de karonya, i el somorgujo, i 18la siguenya, i la garza segun su manera, i la abubilya, i el mursyegalo. 19I toda syerpe de ave vos sera enkonada; no se koman. 20Toda ave limpya komeresh. 21No komash ninguna kalavrina. Al pelegrino ke esta en tus [1]sivdades la daras, i el la komera; o vendela al estranjero; porke tu eres puevlo santo a A’ tu Dyo. No kozines el kavrito kon la leche de su madre.
22Dyezmar dyezmaras todo el renuevo de to simyente, ke sale del kampo en kada anyo. 23I komeras delante de A’ tu Dyo, en el lugar ke el eskojyere para apozentar ayi su nombre, el dyezmo de tu sivera, de tu mosto, i de tu azeyte, i los primerezos de tus vakas i de tus ovejas, para ke aprendas a temer a A’ Dyo todos los dias. 24I kuando el kamino fuere tan largo ke no puedas yevarlo, , por ser leshos de ti el lugar ke A’ tu Dyo eskojyere para poner ayi su nombre, kuando A’ tu Dyo te bendishere: 25entonses lo daras por moneda, i ataras la moneda en tu mano, i andaras al lugar ke A’ tu Dyo eskojyere: 26i daras la moneda por todo lo ke dezeare tu alma, por vakas, o por ovejas, o por vino, o por sidra, o por kualkyer koza ke te demandare tu alma, i komeras ayi delante de A’ tu Dyo, i te ayegraras tu i tu kaza. 27I al Levita ke esta en tus [2]sivdades, no lo deshes, porke no tyene parte ni eredad kontigo.
28Al kavo de kada tres anyos sakaras todo el dyezmo de tu renuevo en akel anyo, i lo meteras en tus [3]sivdades: 29I vendra el Levita, porke no tyene parte ni eredad kontigo, i el pelegrino, i el guerfano, i la bivda, ke estan en tus [4]sivdades, i komeran i se artaran; para ke A’ tu Dyo te bendiga en toda ovra de tu mano ke izyeres.
[1] Ebreo: puertas
[2] Ebreo: puertas
[3] Ebreo: puertas
[4] Ebreo: puertas
15
1El kavo de kada syete anyos aras soltura. 2I esta es la manera de la soltura: ke solte todo akreedor lo ke uvyere emprestado a su kompanyero; no aprete a su kompanyero, o a su ermano; porke la soltura de A’ es apregonada. 3Al estranjero apretaras; ma lo ke fuere tuyo kon tu ermano, lo soltara tu mano: sino kuando no uvyere en ti menesterozo; 4porke bendizir te bendizira A’ en la tyerra ke A’ tu Dyo te da por eredad para ke la poseas: 5solamente se eskuchar eskuchares a la boz de A’ tu Dyo, para guardar para azer todas estas enkomendansas ke yo te enkomendo oy. 6Porke A’ tu Dyo te bendizira, komo A tu Dyo te bendizira, komo te avlo; i emprestaras a muchas djentes, ma tu no tomaras emprestado; i podestaras sovre muchas djentes, ma sovre ti no podestaran.
7Kuando uvyere en ti menesterozo de alguno de tus ermanos en alguna de tus [1]sivdades, en tu tyerra ke A’ tu Dyo te da, no endureskas tu korason, ni serres tu mano a tu ermano menesterozo: 8sino ke avrir avriras tu mano a el, i emprestar le emprestaras lo ke le basta, lo ke tyene de menester. 9Guardate ke no ayga pensamyento en tu korason [2]tuerto, dizyendo: se aserka el anyo seteno, el anyo de la soltura; i se enmaleska tu ojo sovre tu ermano menesterozo, i no le des nada; i el yame kontra ti a A’, i sea en ti pekado. 10Dando le daras, i no se enmaleska tu korason kuando le dyeres; porke por esta koza te bendizira A’ tu Dyo en todos tus echos, i en todo lo a ke estendyeres tu mano. 11Porke no faltaran menestorozos de entre la tyerra; por tanto yo te enkomendo, dizyendo: avrir avriras tu mano a tu ermano, a tu povre, i atu menesterozo en tu tyerra.
12Kuando se vendyere a ti tu ermano Ebreo o Ebrea, i te uvyere servido sesh anyos, al anyo seteno lo soltaras forro de kontigo. 13I kuando lo soltaras forro de kontigo, no lo enbiaras vazio. 14Kargar le kargaras, dandole de tus ovejas, i de tu era, i de tu lagar; en lo ke A’ tu Dyo te uvyere bendicho de eyo le daras. 15I te akordaras ke syervo fuiste en la tyerra de Ayifto, i ke A’ tu Dyo te regmyo; por tanto yo te enkomendo esta koza oy. 16I sera, ke si el te dishere: no saldre de kontigo; porke te ama a ti i a tu kaza, porke le va byen kontigo: 17entonses tomaras una lezna, i daras en su oreja i en la puerta, i te sera syervo para syempre. I tambyen a tu syerva aras ansi. 18No te pareska duro kuando lo soltares forro de kontigo, porke doble del presyo de alkiladizo te sirvyo sesh anyos; i A’ tu Dyo te bendizira en todo lo ke izyeres.
19Todo primerezo ke nasyere en tus vakas i en tus ovejas, el macho santifikaras a A’ tu Dyo; no te servas del primerezo de tu buey, ni traskiles el primerezo de tus ovejas. 20Delante de A’ tu Dyo lo komeras de anyo en anyo en el lugar ke A’ eskojyere, tu i tu kaza. 21I kuando uvyere en el makula, komo kosho, o syego, o kualkyer otra mala makula, no lo sakrifikes a A’ tu Dyo. 22En tus [3]sivdades lo komeras; tanto el enkonado komo el limpyo komeran de el, komo del korso i komo del syervo. 23Solamente ke no komas su sangre; sovre la tyerra la verteras komo agua.
[1] Ebreo: puertas
[2] Ebreo: Beliyael
[3] Ebreo: puertas
16
1Guarda el mez de Aviv, i az paskua a A’ tu Dyo; porke en el mez de Aviv te sako tu Dyo de Ayifto de noche. 2I sakrifikaras paskua a A’ tu Dyo de ovejas i de vakas en el lugar ke A’ eskojyere para apozentar ayi su nombre. 3No komas kon eya levdo; syete dias komeras kon eya sensenyas, pan de afriisyon; porke kon apresuransa saliste de la tyerra de Ayifto: para ke te akordes del dia en ke saliste de la tyerra de Ayifto todos los dias de tu vida. 4I no sea vista levadura en todo tu termino por syete dias; i de la karne ke degoyares a la tarde en el primer dia, no kede nada asta la manyana. 5No podras sakrifikar la paskua en kualkyera de tus [1]sivdades, ke A’ tu Dyo te da: 6sino en el lugar ke A’ tu Dyo eskojyere para apozentar ayi su nombre, sakrifikaras la paskua a la tarde al ponerse el sol, al tyempo ke saliste de Ayifto. 7I la kozinaras i komeras en el lugar ke A’ tu Dyo eskojyere; i por la manyana te bolveras i andaras a tus tyendas. 8Sesh dias komeras sensenyas i en el dia seteno avra detenimyento a A’ tu Dyo; no agas ovra en el.
9Syete semanas te kontaras; dezde ke empesare la oz en la myes empesaras a kontar las syete semanas. 10I aras la fyesta de las semanas a A’ tu Dyo de la abundansa veluntarya de tu mano, la kual daras segun ke A’ tu Dyo te bendishere. 11I te alegraras delante de A’ tu Dyo, tu i tu ijo, i tu ija, i tu syervo, i tu syerva, i el Levita ke esta en tus [2]sivdades, i el pelegrino, i el guerfano, i la bivda, ke estan en medyo de ti, en el lugar ke A’ tu Dyo eskojyere para apozentar ayi su nombre, 12i te akordaras ke fuiste syervo en Ayifto; i guardaras i aras estos fueros.
13La fyesta de las kavanyas te aras syete dias, kuando uvyeres akojido [3]tu grano i tu vendimya. 14I te alegaras en tu fyesta, tu, i tu ijo, i tu ija, i tu syervo, i tu syerva, i el Levita, i el pelegrino, i el guerfano, i la bivda, ke estan en tus [4]sivdades. 15Syete dias aras fyesta a A’ tu Dyo en el lugar ke A’ eskojyere; porke te bendizira A’ tu Dyo en todo tu renuevo, i en toda ovra de tus manos, i seras syertamente alegre.
16Tres vezes en el anyo se aparesera todo macho tuyo delante de A’ tu Dyo en el lugar ke el eskojyere: en la fyesta de la sensenyas, i en la fyesta de las semanas, i en la fyesta de las kavanyas; i no se apareska delante de A’ vazio: 17kada uno kon la dadiva de su mano, segun la bendisyon de A’ tu Dyo ke el te uvyere dado.
[1] Ebreo: puertas
[2] Ebreo: puertas
[3] Ebreo: tu era i tu lagar
[4] Ebreo: puertas
Ver todos los capítulos publicados en esta sección
————————————————————————
About Yehuda Sidi
I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.
A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.
So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.
The transcription was not reviewed by the Ladino scholars. Please report the errors that you find.
