Sefer Tora en Djudeo Espanyol – Transkrivida kon letras latinas del livro por Ye’huda Sidi / DEVARIM: 45 – VAETHANAN (4 a 7)

[alert type=»success or warning or info or danger»][/alert]

Ver todos los capítulos publicados en esta sección

 

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

45 – VAETHANAN

²³I rogi a A’ en akel tyempo, dizyendo: ²⁴Senyor A’, tu empesaste a mostrar a tu syervo tu grandeza, i tu mano fuerte; porke ¿ke dyo ay en los syelos o en la tyerra ke puede azer komo tus echos, i komo tus barraganias? ²⁵Pase yo agora, i vea la buena tyerra ke esta al otro lado del Yarden, akel monte bueno, i el Levanon. ²⁶Ma se ensanyo A’ konmigo por kavza de vozotros, i no me oyo, sino ke me disho A’: bastete; no me avles mas de esta koza. ²⁷Suve a la punta de Pisga, i alsa tus ojos al oksidente, i al norte, i al sud, i al oryente, i mira kon tus ojos; porke no pasaras este Yarden. ²⁸I enkomenda a Ye’hoshua, i esfuersalo, i enforteselo porke el pasara delante de este puevlo, i el les ara eredar la tyerra ke veras. ²⁹I nos kedimos en el vaye enfrente de Bet-Peor.

4

¹I agora pues, ¡o Yisrael! oye los fueros i los djuisyos ke yo vos anbezo, para azerlos, para ke bivash, i entresh i eredesh la tyerra ke A’ el Dyo de vuestros padres vos da. ²No anyadiresh a la palavra ke yo vos enkomendo, ni menguaresh de eya, para guardar las enkomendansas de A’ vuestro Dyo, ke yo vos enkomendo. ³Vuestros ojos vyeron lo ke izo A’ por kavza de Baal-Peor; porke todo varon ke anduvo detras de Baal-Peor, lo destruyo A’ tu Dyo de en medyo de ti. ⁴Ma vozotros, ke vos apegastesh a A’ vuestro Dyo, todos estash bivos oy. ⁵Mirad, yo vos anbezi fueros i djuisyos, komo A’ mi Dyo me enkomendo, para ke agash ansi en la tyerra, en la kual entrash para eredarla. ⁶Los guardaresh pues, i los aresh; porke esta es vuestra savidoria i vuestro entendimyento a vista de los puevlos, ke oiran todos estos fueros, i diran: syertamente puevlo savyo i entendido es esta grande djente. ⁷Porke ¿ke djente ay tan grande ke tenga los dyozes serkanos a si, komo esta A’ nuestro Dyo en todo lo ke le yamamos? ⁸¿I ke djente ay tan grande ke tenga fueros i djuisyos djustos, komo toda esta ley ke yo pongo delante de vozotros oy? ⁹Solamente guardate, i guarda tu alma mucho, no sea ke te olvides de las kozas ke vyeron tus ojos, i no sea ke se kiten de tu korason todos los dias de tu vida; i las aras saver a tus ijos, i a los ijos de tus ijos; ¹⁰el dia ke estuviste delante de A’ tu Dyo en Horev, kuando A’ me disho: adjuntame el puevlo, i les are oir mis palavras, las kuales aprenderan para temerme todos los dias ke bivyeren sovre la tyerra, i las anbezaran a sus ijos. ¹¹I vos ayegastesh, i vos parastesh al pye del monte; i el monte ardia en fuego asta en medyo de los syelos, kon eskuridad, nuves, i tinyevlas. ¹²I avlo A’ a vozotros de en medyo del fuego. La boz de las palavras oistesh, ma semejansa no vistesh, ke salvo boz. ¹³I el vos denunsyo su firmamyento, ke vos enkomendo de azer, los dyez mandamyentos; i los eskrivyo sovre dos tavlas de pyedra. ¹⁴I a mi me enkomendo A’ en akel tyempo para anbezarvos fueros i djuisyos, para ke los izyerash en la tyerra, a la kual pasash para erederla. ¹⁵Guardad pues mucho vuestras almas, porke no vistesh ninguna semejansa en el dia ke avlo A’ a vozotros en Horev de en medyo del fuego: ¹⁶no sea ke vos danyesh, i agash para vozotros idolo, semejansa de algun imajen, semejansa de macho o de embra, ¹⁷semejansa de alguna kuatropea ke ay en la tyerra, semejansa de algun pasharo de ala ke bola en los syelos, ¹⁸semejanse de alguna removilya en la tyerra, semejansa de algun peshkado ke ay en las aguas debasho de la tyerra: ¹⁹i no sea ke alses tus ojos a los syelos, i veas el sol, i la luna, i las estreyas, todo el fonsado de los syelos, i seas empushado, i te enkorves a eyos, i les servas, los kuales aparto A’ tu Dyo a todos los puevlos debasho de todos los syelos. ²⁰Ma a vozotros A’ vos tomo, i vos sako del krizol de fyerro, de Ayifto, para ser a el por puevlo de eredad, komo sosh este dia. ²¹I A’ se ensanyo konmigo por kavza de vozotros, i djuro ke yo no pasaria el Yarden, ni entraria en la buena tyerra ke A’ tu Dyo te da por eredad. ²²Ansi ke yo tengo ke murir en esta tyerra, no pasare el Yarden; ma vozotros pasaresh, i eredaresh akeya buena tyerra. ²³Guardadvos, no sea ke vos olvidesh del firmamyento de A’ vuestro Dyo, ke el tajo kon vozotros, i agash para vozotros idolo, semejansa de kualkyer koza ke te devedo A’ tu Dyo. ²⁴Porke A’ tu Dyo es fuego kemante, Dyo zelozo.

²⁵Kuando endjendrares ijos, i ijos de ijos, i uvyeresh envejesido en la tyerra, i vos danyaresh. i izyeresh idolo, semejansa de kualkyer koza, i izyeresh mal en ojos de A’ tu Dyo, para ensanyarlo: ²⁶yo ago atestiguar kontra vozotros oy a los syelos i a la tyerra, ke deperder vos deperderesh presto de sovre la tyerra a la kual pasash el Yarden para eredarla; no alargaresh dias sovre eya, porke destruir seresh destruidos. ²⁷I A’ vos esparzira entre los puevlos, i kedaresh pokos en numero entre las djentes a las kuales A’ vos gerra. ²⁸I serviresh ayi a dyozes echos de manos de ombre, palo i pyedra, ke no ven, ni oyen, ni komen, ni guelen. ²⁹Ma si de ayi bushkares a A’ tu Dyo, lo ayaras, kuando lo rekeryeres kon todo tu korason, i kon toda tu alma. ³⁰Kuando estuvyeres en angustya, i te alkansaren todas estas kozas, en la postrimeria de los dias, se te tornares a A’ tu Dyo, i oyeres a su boz; ³¹Porke Dyo piadozo es A’ tu Dyo; no te deshara, ni te destruira, ni se olvidara del firmamyento de tus padres, ke les djuro. ³²Porke pregunta agora de los dias antiguos, ke fueron antes de ti, dezde el dia ke krio el Dyo al ombre sovre la tyerra, i dezde el un kavo de los syelos asta el otro, se uvo koza komo esta gran koza, o se fue oida otra komo eya. ³³¿a oido puevlo la boz del Dyo, ke avlava de en medyo del fuego, komo tu oiste i bivyo? ³⁴¿o a prevado el Dyo a venir a tomar para si djente de en medyo de otra djente kon prevas, kon senyales, i kon maraviyas, i kon pelea, i kon mano fuerte, i kon braso estendido, i kon espantos grandes, segun todo lo ke izo a vozotros A’ vuestro Dyo en Ayifto delante de tus ojos? ³⁵A ti te fue mostrado, para ke supyeras ke A’ el es Dyo; no ay otro afuera de el. ³⁶De los syelos te izo oir su boz, para kastigarte; i sovre la tyerra te mostro su gran fuego, i oiste sus palavras de en medyo del fuego. ³⁷I por lo ke el amo a tus padres, eskojyo su semen despues de eyos, i te sako delante de si de Ayifto kon su gran poder: ³⁸para desterrar de delante de ti djentes grandes i mas fuertes ke tu, para traerte, para darte su tyerra por eredad, komo se ve en este dia. ³⁹Por tanto save oy, i pensa en tu korason ke A’ el es el Dyo en los syelos por arriva, i sovre la tyerra por abasho; no ay otro. ⁴⁰Guardaras pues sus fueros, i sus enkomendansas, ke yo te enkomendo oy, para ke sea byen a ti, i a tus ijos despues de ti, i para ke alarges tus dias sovre la tyerra, ke A’ tu Dyo da para syempre.

⁴¹Entonses aparto Moshe tres sivdades de esta parte del Yarden, onde esklarese el sol, ⁴²para ke fuyira ayi el matador ke matara a su kompanyero sin saver, i ke no lo aborresia ayer ni anteayer, i ke fuyendo a una de estas sivdades, bivyera: ⁴³a Betser en el dizyerto, en la tyerra de la yanura, de los Reuvenitas, i a Ramot en Gilad, de los Gaditas; i a Golan en Bashan, de los de Menashe.

⁴⁴I esta es la ley ke Moshe puzo delante de los ijos de Yisrael: ⁴⁵estos son los testimonyos, i los fueros, i los djuisyos ke avlo Moshe a los ijos de Yisrael, despues ke salyeron de Ayifto: ⁴⁶de esta parte del Yarden, en el vaye enfrente de Bet-Peor, en la tyerra de Sihon, rey de los Emorios, ke morava en Heshbon, al kual eryo Moshe i los ijos de Yisrael, despues ke salyeron de Ayifto. ⁴⁷I tomaron en posesyon su tyerra, i la tyerra de Og, rey de Bashan, dos reyes de los Emorios, ke estavan de este parte del Yarden, onde esklarese el sol: ⁴⁸dezde Aroer, ke esta sovre la oriya del arroyo de Arnon, asta el monte de Sion, ke es Hermon; ⁴⁹i toda la yanura de esta parte del Yarden al oryente asta la mar de la yanura, debasho de los vertederos de Pisga.

5

¹I yamo Moshe a todo Yisrael, i les disho: oye, Yisrael, los fueros i los djuisyos ke yo avlo oy en vuestros oidos, i aprendelos i guardaldos para azerlos. ²A’ nuestro Dyo tajo firmamyento kon nozotros en Horev. ³No kon nuestros padres tajo A’ este firmamyento, sino kon nozotros, nozotros mizmos ke estamos aki oy todos bivos. ⁴Kara a kara avlo A’ kon vozotros en el monte de en medyo del fuego, ⁵(yo estava entre A’ i vozotros en akel tyempo, para denunsyarvos la palavra de A’; porke temestesh por kavza del fuego, i no suvistesh en el monte.) dizyendo:

⁶Yo soy A’ tu Dyo, ke te saki de la tyerra de Ayifto, de la kaza de syervos. ⁷No tengas otros dyozes delante de mi.

⁸No agas para ti idolo, ni ninguna semejansa de lo ke ay en los syelos por arriva, ni de lo ke ay en la tyerra por abasho, ni de lo ke ay en las aguas debasho de la tyerra. ⁹No te enkorves a eyos, ni les servas, porke yo A’ tu Dyo soy Dyo zelozo, ke vijito el delito de los padres sovre los ijos, i sovre los terseros i sovre los kuartos djerenansyos a los ke me aborresen, ¹⁰i ke ago mersed a miles a los ke me aman, i ke guardan mis enkomendansas.

¹¹No tomes el nombre de A’ tu Dyo en vano; porke no livrara A’ al ke tomare su nombre en vano.

¹²Guarda el dia del shabat para santifikarlo, komo te enkomendo A’ tu Dyo. ¹³Sesh dias travajaras, i aras toda tu ovra: ¹⁴ma el dia seteno es shabat a A’ tu Dyo; no agas ninguna ovra, tu, ni tu ijo, ni tu ija, ni tu syervo, ni ti syerva, ni tu buey, ni tu azno, ni ninguna de tus kuatropeas, ni tu pelegriono ke esta adyentro de tus puertas; para ke deskanse tu syervo i tu syerva, komo tu. ¹⁵I akordate ke fuiste syervo en la tyerra de Ayifto, i ke A’ tu Dyo te sako de ayi kon mano fuerte, i kon braso estendido; por tanto te enkomendo A’ tu Dyo de azer el dia del shabat.

¹⁶Onra a tu padre i a tu madre, komo te enkomendo A’ tu Dyo, para ke se alargen tus dias, i para ke sea byen a ti sovre la tyerra ke A’ tu Dyo te da.

¹⁷No mates.

I no fornikes.

I no roves.

I no atestigues kontra tu kompanyero testimonyo falso.

¹⁸I no kovdisyes la mujer de tu kompanyero, ni dezees la kaza de tu kompanyero, su kampo, ni su syervo, ni su syerva, su buey, ni su azno, ni ninguna koza ke es de tu kompanyero.

¹⁹Estas palavras avlo A’ a toda vuestra kompanya en el monte de en medyo del fuego, de la nuve, i de la eskuridad, kon boz grande, i no anyadyo; i las eskrivyo sovre dos tavlas de pyedra, i me las dyo a mi. ²⁰I akontesyo, ke komo oistesh la boz de en medyo de la eskuridad, i vistesh el monte arder en fuego, vos ayegastesh a mi, todas las kaveseras de vuestros trivos, i vuestros vyejos. ²¹I dishistesh: ek, A’ nuestro Dyo nos a mostrado su onra, i su grandeza, i oimos su boz de en medyo del fuego; este dia vimos ke el Dyo avla al ombre, i el ombre bive. ²²Agora pues, ¿por ke muriremos? porke este gran fuego nos konsumira; si nozotros oiremos mas la boz de A’ nuestro Dyo, muriremos. ²³Porke ¿kyen ay de toda karne ke oyo la boz del Dyo bivo avlar de en medyo del fuego, komo nozotros, i bivyo? ²⁴Ayegate tu, i oye todo lo ke dishere A’ nuestro Dyo; i tu nos avlaras todo lo ke A’ nuestro Dyo te avlare, i oiremos, i aremos. ²⁵I oyo A’ la boz de vuestras palavras, kuando me avalavash a mi, i me disho A’: oi la boz de las palavras de este puevlo, ke te avlaron; byen disheron todo lo ke avlaron. ²⁶¡Kyen dyese ke tuvyeran tal korason, ke me temyeran, i guardaran todas mis enkomendansas todos los dias, para ke fuera byen kon eyos i kon sus ijos para syempre! ²⁷Va, diles: bolvedvos a vuestras tyendas. ²⁸I tu estate aki konmigo, i te avlare todas las enkomendansas, i los fueros, i los djuisyos, ke le anbezaras para ke los agan en la tyerra ke yo les doy para eredarla. ²⁹Guardaresh pues para azer komo vos enkomendo A’ vuestro Dyo; no vos apartesh a la derecha ni a la izkyerda. ³⁰En todo el kamino ke vos enkomendo A’ vuestro Dyo, andaresh, para ke bivash, i vos sea byen, i alargesh dias en la tyerra ke eredaresh.

6

¹I esta es la enkomendansa, los fueros, i los djuisyos, ke A’ vuestro Dyo enkomendo de anbezarvos, para ke los agash en la tyerra a la kual pasah para eredarla; ²para ke temas a A’ tu Dyo, guardando todos sus fueros, i sus enkomendansas, ke yo te enkomendo, tu, i tu ijo, i el ijo de tu ijo, todos los dias de tu vida, i para ke se alargen tus dias. ³Oye pues, Yisrael, i guarda para azerlos, para ke te sea byen, i ke vos muchiguesh mucho, komo te avlo A’ el Dyo de tus padres, en la tyerra ke mana leche i myel.

⁴Oye, Yisrael, A’ nuestro Dyo, A’ es uno. ⁵I amaras a A’ tu Dyo kon todo tu korason, i kon toda tu alma, i kon todo tu poder. ⁶I estas palavras, ke yo te enkomendo oy, estaran sovre tu korason. ⁷I las repeteras a tus ijos, i avlaras de eyas estando en tu kaza, i andando por el kamino, i kuando te echares, i kuando te levantares. ⁸I las ataras por senyal sovre tu mano, i seran por frentales entre tus ojos. ⁹I las eskriviras sovre los postes de tu kaza, i en tus puertas.

¹⁰I sera, ke kuando A’ tu Dyo te trushere a la tyerra ke djuro a tus padres, a Avra’ham, a Yitshak, i a Yaakov, ke te daria sivdades grandes i buenas, ke no fraguaste, ¹¹i kazas yenas de todo byen, ke no inchiste; i pozos kavados, ke no kavaste; vinyas i olivares ke no plantaste; i komyeres i te artares: ¹²guardate, no sea ke te olvides de A’, ke te sako de la tyerra de Ayifto, de la kaza de syervos. ¹³A A’ tu Dyo temeras, i a el serviras, i por su nombre djuraras. ¹⁴No andaresh detras de otroz dyozes, de los dyozes de los puevlos ke estan en vuestros derredores; ¹⁵porke Dyo zelozo es A’ tu Dyo en medyo de ti; no sea ke se ensyenda el fulor de A’ tu Dyo kontra ti, i te destruyga de sovre las fases de la tyerra.

¹⁶No prevesh a A’ vuestro Dyo, komo lo prevastesh en Masa. ¹⁷Guardar guardaresh las enkomedansas de A’ vuestro Dyo, i sus testimonyos, i sus fueros, ke te enkomendo. ¹⁸I aras lo derecho i lo bueno en ojos de A’, para ke te sea byen, i vengas i eredes la buena tyerra ke A’ djuro a tus padres: ¹⁹por empushar a todos tus enemigos de delante de ti, komo avlo A’.

²⁰Kuando manyana te preguntare tu ijo, dizyendo: ¿ke kyeren dizir los testimonyos, i los fueros, i los djuisyos, ke A’ nuestro Dyo vos enkomendo? ²¹Entonses diras a tu ijos: syervos eramos a Paro en Ayifto, i A’ nos sako de Ayifto kon mano fuerte: ²²i dyo A’ senyales i maraviyas, grandes i malas en Ayifto, sovre Paro, i sovre toda su kaza, delante de nuestros ojos: ²³i nos sako de ayi, para traernos para darnos la tyerra ke djuro a nuestros padres. ²⁴I A’ nos enkomendo de azer todos estos fueros, para temer a A’ nuestro Dyo, por byen a nozotros todos los dias, para abidiguarnos, komo se ve en este dia. ²⁵I sera djustedad a nozotros, se guardaremos para azer toda esta enkomendansa delante de A’ nuestro Dyo, komo el nos enkomendo.

7

¹Kuando A’ tu Dyo te trushere a la tyerra a la kual tu vyenes para eredarla, i desterrare muchas djentes de delante de ti, al Hitio, i al Girgashio, i al Emorio, i al Kenaanio, i al Perizio, i al Hivio, i al Yevusio, syete djentes muchas i fuertes mas ke tu; ²i A’ tu Dyo las entregare delante de ti, i las eryeres, destruir los destruiras, no tajes kon eyos firmamyento, ni tengas piadad de eyos: ³i no konsugres kon eyos; no des to ija a su ijo, ni tomes su ija para tu ijo. ⁴Porke tirara a tu ijo de detras de mi, i serviran a otros dyozes; i se ensendera el fulor de A’ en vozotros, i te destruira presto. ⁵Ma ansi aresh a eyos; sus aras derrokaresh, i sus estansyas kevraresh, i sus ashrot tajaresh, i sus idolos kemaresh en el fuego. ⁶Porke puevlo santo eres tu a A’ tu Dyo; A’ tu Dyo te eskojyo para ser a el por puevlo de tezoro, mas ke todos lo puevlos ke estan sovre las fases de la tyerra. ⁷No por ser vozotros mas ke todos los puevlos vos kovdisyo A’, ⁸i vos eskojyo; porke vozotros erash los mas pokos de todos los puevlos: sino porke A’ vos amo, i kijo guardar la djura ke djuro a vuestros padres, vos sako A’ kon mano fuerte, i te regmyo de la kaza de syervos, de mano de Paro, rey de Ayifto. ⁹Sepas fues ke A’ tu Dyo, el es el Dyo, el Dyo fiel, ke guarda el firmamyento i la mersed a los ke lo aman, i ke guardan sus enkomendansas, asta mil djerenansyos; ¹⁰i ke paga en su kara a los ke lo aborresen, azyendolos deperder; no detardara al ke lo aborrese; en su kara le pagara. ¹¹Guardaras pues la enkomendansa, i los fueros, i los djuisisos, ke yo te enkomendo oy para azerlos.

 

Ver todos los capítulos publicados en esta sección

 

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.