Sefer Tora en Djudeo Espanyol – Transkrivida kon letras latinas del livro por Ye’huda Sidi / DEVARIM: 44 – DEVARIM (1 a 3)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

44 – DEVARIM

1

¹Estas son las palavras ke avlo Moshe a todo Yisrael de esta parte del Yarden en el dizyerto, en la yanura, enfrente de Suf, entre Paran i Tofel, i Lavan, i Hatserot, i Di-Zaav. ²Onze dias dezde Horev por el kamino del monte de Seir asta Kadesh-Barnea. ³I fue, ke a los kuarenta anyos, en el mez onzeno, en el primer dia del mez, avlo Moshe a los ijos de Yisrael segun todo lo ke A’ le enkomendo para eyos: ⁴despues ke eryo a Sihon, rey de los Emorios, ke morava en Heshbon, i a Og, rey de Bashan, ke morava en Ashtarot en Edrei. ⁵De esta parte del Yarden, en tyerra de Moav, empeso Moshe a deklarar esta ley, dizyendo: ⁶A’ nuestro Dyo nos avlo en Horev, dizyendo: vos basta estar en este monte: ⁷bolvedvos, i movedvos, i andad al monte del Emorio, i a todos sus vezindades en la yanura, en la montanya, i en la bashura, i en el sud, i en la kosta de la mar, la tyerra del Kenaanio, i el Levanon, asta el gran rio, el rio Eufrates. ⁸Mirad, yo di la tyerra delante de vuestros; entrad i tomad en posesyon la tyerra ke A’ djuro a vuestros padres, a Avra’ham, a Yitshak, i a Yaakov, ke daria a eyos, i a su semen despues de eyos.

⁹I yo vos avli en akel tyempo, dizyendo: yo no puedo soportarvos solo. ¹⁰A’ vuestro Dyo vos a muchiguado, i ek, sosh oy vozotros komo las estreyas de los syelos en muchedumbre. ¹¹¡A’ Dyo de vuestros padres anyada sovre vozotros komo sosh mil vezes, i vos bendiga, komo vos avlo! ¹²¿Komo soportare yo solo vuestros travajos, i vuestras kargas, i vuestros pleytos? ¹³Dad de vozotros varones savyos, i entendidos, i konosidos, de vuestros trivos, i yo los pondre por vuestras kaveseras. ¹⁴I me respondistesh, i dishistesh: bueno es azer la koza ke avlaste. ¹⁵I tomi las kaveseras de vuestros trivos, varones savyos i konosidos, i los puzi por kaveseras sovre vozotros, mayorales de miles, i mayorales de syentos, i mayorales de sinkuentas, i mayorales de dyezes, i ofisyales a vuestros trivos. ¹⁶I enkomendi a vuestros djuezes en akel tyempo, dizyendo: oid entre vuestros ermanos, i djuzgar djustamente entre el varon i su ermano, i su pelgrino. ¹⁷No konoskash fases en el djuisyo; tanto el pekenyo komo el grande oiresh: no tengash temor delante de ninguno: porke el djuisyo es del Dyo; i la koza ke vos fuere difisil, trayeresh a mi, i yo la oire. ¹⁸I vos enkomendi en akel tyempo todas las kozas ke aviash de azer.

¹⁹I partimos de Horev, i anduvimos por todo akel grande i temerozo dizyerto, ke avesh visto, por el kamino del monte del Emorio, komo A’ nuestro Dyo nos enkomendo; i vinimos asta Kadesh-Barnea. ²⁰I vos dishe: vinistesh al monte del Emorio, ke A’ nuestro Dyo nos da. ²¹Mira, A’ tu Dyo a dado delante de ti la tyerra; suve, toma posesyon, komo te avlo A’ el Dyo de tus padres; no temas, ni te kevrantes.

²²I vos ayegastesh a mi todos vozotros, i dishistesh: enbiamos varones delante de nozotros, i nos eskulken la tyerra, i nos traygan avizo del kamino por el kual tenemos ke suvir, i de las sivdades a las kuales tenemos ke venir. ²³I me agrado la koza, i tomi dodje varones de vozotros, un varon por trivo. ²⁴I bolvyeron, i suvyeron al monte, i vinyeron asta el arroyo de Eshkol, i eskulkaron la tyerra. ²⁵I tomaron en su mano del fruto de la tyerra, i lo trusheron a nozotros, i nos dyeron respuesta, i disheron: buena es la tyerra ke A’ nuestro Dyo nos da. ²⁶I no kejistesh suvir, sino ke reveyastesh al dicho de A’ vuestro Dyo. ²⁷I murmurastesh en vuestras tyendas, i dishistesh: porke A’ nos aborresea, nos sako de la tyerra de Ayifto, para entregarnos en mano del Emorio para destruirnos. ²⁸¿Onde suviremos? nuestros ermanos izyeron desleir nuestro korason, dizyendo: el puevlo es mas grande i mas alto ke nozotros; las sivdades grandes i enkastiyadas asta los syelos; i tambyen vimos ayi ijos de los Anakim, ²⁹i vos dishe : no vos kevrantesh, no tengash myedo de eyos. ³⁰A’ vuestro Dyo, ke va delante de vozotros, el peleara por vozotros, segun todo lo ke izo kon vozotros en Ayifto delante de vuestros ojos; ³¹i en el dizyerto en ke viste komo te yevo A’ tu Dyo komo yeva un varon a su ijo, por todo el kamino ke anduvistesh asta ke vinistesh a este lugar. ³²I aun en esta koza no kreistesh a A’ vuestro Dyo, ³³el kual iva delante de vozotros en el kamino para [1]bushkarvos lugar por vuestra pozada, kon fuego de noche para mostrarvos el kamino en ke aviash de andar, i kon nuve de dia.

³⁴I oyo A’ la boz de vuestras palavras, i se ensanyo, i djuro, dizyendo: ³⁵no vera ninguno de estos varones de este mal djerenansyo la buena tyerra ke djuri de dar a vuestros padres: ³⁶afuera de Kalev, ijo de Yefune, el la vera, i dare la tyerra ke pizo a el i a sus ijos, porke anduvo kumplidamente detras de A’. ³⁷Tambyen kontra mi se ensanyo A’ por kavza de vozotros, dizyendo: ni tampoko tu entraras aya. ³⁸Ye’hoshua, ijo de Nun, ke esta delante de ti, el entrara aya; esfuersalo, porke el la ara eredar a Yisrael. ³⁹I vuestros chikitos, de los kuales dishistesh ke seran por prea, i vuestros ijos ke no saven oy bueno ni malo, eyos entraran aya, i a eyos la dare, i eyos la eredaran. ⁴⁰I vozotros bolvedvos, i movedvos al dizyerto por el kamino del mar ruvyo.

⁴¹I respondistesh i me dishistesh: pekimos kontra A’; nozotros suviremos i pelearemos segun todo lo ke nos enkomendo A’ nuestro Dyo. I senyistesh kada uno sus armas de pelea i vos atrivistesh a suvir al monte. ⁴²I A’ me disho: diles: no suvash, ni peleesh, porke yo no estoy entre vozotros; i no seash eridos delante de vuestros enemigos. ⁴³I vos avli, i no oistesh sino ke reveyastesh al dicho de A’, i sobervyastesh i suvistesh al monte. ⁴⁴I el Emorio, ke morava en akel monte, salyo a vuestro enkuentro i vos persigyeron, komo azen las abizbas, i vos majaron en Seir, persigyendovos asta Horma. ⁴⁵I tornastesh, i yorastesh delante de A’; ma A’ no oyo vuestra boz, ni vos eskucho. ⁴⁶I estuvistesh en Kadesh muchos dias, segun los dias ke estuvistesh.

[1] Ebreo: eskulkarvos

2

¹I bolvimos, i partimos al dizyerto por el kamino del mar ruvyo, komo A’ me avlo; i rodeimos el monte de Seir muchos dias. ²I A’ me avlo, dizyendo: ³vos basta rodear este monte; bolvedvos al norte. ⁴I enkomenda al puevlo, dizyendo: vozotros pasaresh por el termino de vuestros ermanos los ijos de Esav, ke moran en Seir, i tendran myedo de vozotros; ma guardadvos mucho. ⁵No kombatash kon eyos; porke no vos dare de su tyerra ni aun la pizada de la planta de un pye; porke tengo dado por posesyon a Esav el monte de Seir. ⁶Komida merkaresh de eyos por moneda, i komeresh; i tambyen agua merkaresh de eyos por moneda i beveresh: ⁷porke A’ tu Dyo te bendisho en toda ovra de tu mano; el save tu andar por este gran dizyerto; estos kuarenta anyos A’ tu Dyo fue kontigo, i no te falto ninguna koza. ⁸I pasimos de nuestros ermanos los ijos de Esav, ke moran en Seir, por el kamino de la yanura de Eilat, i de Etsion-Gever, i bolvimos i pasimos por el kamino del dizyerto de Moav.

⁹I A’ me disho: no angustyes a Moav, ni kombatas kon eyos en pelea; porke no te dare posesyon de su tyerra; porke tengo dado a Ar por posesyon a los ijos de de Lot. ¹⁰Los Emim moraron en eya antes, puevlo grande, i mucho, i alto komo los Anakim. ¹¹Por djigantes eran kontados tambyen eyos, komo los Anakim; ma los Moavitas los yamavan Emim. ¹²I en Seir moraron antes los Horios; i los ijos de Esav los desterraron, i los destruyeron de delante de si, i moraron en su lugar, komo izo Yisrael a la tyerra de su posesyon, ke A’ les dyo. ¹³Agora levantadvos, dishe, i pasad el arroyo de Zered. I pasimos el arroyo de Zered. ¹⁴I los dias ke anduvimos de Kadesh-Barnea asta ke pasimos el arroyo de Zered, fueron trenta i ocho anyos, asta ke se akavo todo el djerenansyo de los varones de gerra de entre el real, komo A’ les avia djurado. ¹⁵I tambyen la mano de A’ fue kontra eyos para konsumirlos de entre el real, asta akavarlos.

¹⁶I akontesyo, ke kuando todos los varones de gerra fueron akavados por muerte de entre el puevlo, ¹⁷A’ me avlo, dizyendo: ¹⁸tu pasaras oy el termino de Moav, ke es Ar. ¹⁹I te aserkaras enfrente de los ijos de Amon; no los angustyes, ni kombatas kon eyos; porke no te dare posesyon de la tyerra de los ijos de Amon; porke a los ijos de Lot la tengo dado por posesyon. ²⁰Por tyerra de djigantes fue kontada tambyen eya; djigantes moraron en eya antes; ma los Amonitas los yamavan Zamzumim: ²¹puevlo grande, i mucho, i alto komo los Anakim; i A’ los destruyo de delante de eyos, i los desterraron, i moraron en su lugar: ²²komo izo a los ijos de Esav, ke moravan en Seir, kuando destruyo a los Horios de delante de eyos, i los desterraron, i moraron en su lugar asta oy: ²³i a los Avim, ke moravan en aldeas asta Aza, los Kaftorim ke salyeron de Kaftor los destruyeron, i moraron en su lugar. ²⁴Levantadvos, movedvos, i pasad el arroyo de Arnon. Mira, tengo dado en tu mano a Sihon, rey de Heshbon, el Emorio, i a su tyerra. Empesa a tomar posesyon, i kombate kon el en gerra. ²⁵Oy empesare a poner tu myedo i tu espanto sovre los puevlos ke estan debasho de todo el syelo, los kuales oiran tu fama, i se estremeseran, a si adoloryaran por kavza de ti.

²⁶I enbii mensajeros dezde el dizyerto de Kedemot a Sihon, rey de Heshbon, kon palavras de paz, dizyendo: ²⁷pasare por tu tyerra; por el kamino, por el kamino andare; no me apartare a la derecha ni a la izkyerda. ²⁸Komida me venderas por moneda, i komere; i agua me daras por moneda, i bevere; solamente pasare kon mis pyes; ²⁹komo izyeron a mi los ijos de Esav, ke moran en Seir, i los Moavitas ke moran en Ar, asta ke pasare el Yarden, a la tyerra ke A’ nuestro Dyo nos da. ³⁰Ma Sihon, rey de Heshbon, no kijo desharnos pasar por el; porke A’ tu Dyo enduresyo su espirito, i enfortesyo su korason, para entregarlo en tu mano, komo se ve oy.

³¹I me disho A’: mira empesi a dar delante de ti a Sihon i a su tyerra; empesa, toma posesyon, para ke eredes su tyerra. ³²I salyo Sihon a nuestro enkuentro, el i todo su puevlo, para pelear en Ya’hats. ³³I A’ nuestro Dyo lo entrego delante de nozotros; i erimos a el i a sus ijos, i a todo su puevlo. ³⁴I prendimos todas sus sivdades en akel tyempo, i destruimos toda sivdad, varones, i mujeres, i ninyos; no deshimos a ninguno. ³⁵Solamente preimos para nozotros las kuatropeas, i el espojo de las sivdades ke prendimos. ³⁶Dezde Aroer, ke esta djunto a la oriya del arroyo de Arnon, i la sivdad ke esta en el arroyo, asta Gilad, no uvo sivdad ke enaltesyo mas ke nozotros; todo lo entrego A’ nuestro Dyo delante de nozotros. ³⁷Solamente a la tyerra de los ijos de Amon no te ayegaste, ni a toda la oriya del arroyo de Yabok, ni a las sivdades del monte, ni a todo lo ke A’ nuestro Dyo avia devedado.

3

¹I bolvimos, i suvimos por el kamino de Bashan; i salyo Og, rey de Bashan, a nuestro enkuentro, el i todo su puevlo , para pelear en Edrei. ²I me disho A’: no tengas temor de el, porke en tu mano entregi a el i a todo su puevlo, i a su tyerra; i aras a el komo iziste a Sihon, rey de los Emorios, ke morava en Heshbon. ³I A’ nuestro Dyo entrego en nuestra mano tambyen a Og, rey de Bashan, i a todo su puevlo; i lo erimos asta ke no lo kedo ninguno. ⁴I prendimos todas sus sivdades en akel tyempo; no uvo sivdad ke no les tomimos, sesenta sivdades, toda la komarka de Argov, el reyno de Og en Bashan. ⁵Todas estas sivdades eran fortifikadas kon muraya alta, kon puertas i serraderos; afuera de muy muchas sivdades sin muraya. ⁶I las destruimos komo izimos a Sihon, rey de Heshbon, destruyendo toda sivdad, varones, mujeres, i ninyos. ⁷I todas las kuatropeas, i el espojo de las sivdades preimos para nozotros. ⁸I tomimos en akel tyempo de mano de los dos reyes de los Emorios la tyerra ke esta de esta parte del Yarden, dezde el arroyo de Arnon, asta el monte de Hermon; ⁹los Tsidonitas yaman a Hermon, Siryon, i los Emorios lo yaman Senir: ¹⁰todas las sivdades de la yanura, i todo Gilad, i todo Bashan asta Salka i Edrei, sivdades del reyno de Og en Bashan. ¹¹Porke solamente Og, rey de Bashan, avia kedado del remanesimyento de los djigantes; ek, su lecho era un lecho de fyerro; ¿no esta en Rabat de los ijos de Amon? nueve kovdos era su longura, i kuatro kovdos su anchura, al kovdo de un varon. ¹²I esta tyerra ke eredimos en akel tyempo, dezde Aroer, ke esta djunto al arroyo de Arnon, i la mitad del monte de Gilad kon sus sivdades, yo di a los Reuvenitas i a los Gaditas. ¹³I el resto de Gilad, i todo Bashan, reyno de Og, yo di al medyo trivo de Menashe, toda la komarka de Argov, kon todo Bashan, ke se yamava la tyerra de los djigantes. ¹⁴Yair, ijo de Menashe, tomo toda la komarka de Argov asta el termino del Geshurio i del Maahatio, i las yamo por su nombre Bashan-Havot-Yair, asta oy. ¹⁵I a Mahir yo di a Gilad. ¹⁶I a los Reuvenitas i a los Gaditas yo di dezde Gilad asta el arroyo de Arnon, el medyo del arroyo i el termino asta el arroyo de Yabok, el termino de los ijos de Amon: ¹⁷i la yanura, i el Yarden i el termino, dezde Kineret asta la mar de la yanura, el mar salado, debasho de los vertederos de Pisga al oryente.

¹⁸I vos enkomendi en akel tyempo, dizyendo: A’ vuestro Dyo vos dyo esta tyerra para eredarla; pasaresh armados delante de vuestros ermanos los ijos de Yisrael todos los vayentes. ¹⁹Solamente vuestras mujeres, i vuestros ninyos, i vuestro ganado (yo se ke tenesh mucho ganado,) kedaran en vuestras sivdades, ke yo vos di, ²⁰asta ke A’ de repozo a vuestros ermanos, komo a vozotros, i ereden tambyen eyos la tyerra ke A’ vuestro Dyo les da a la otra parte del Yarden; entonses tornaresh kada uno a su eredad ke yo vos di. ²¹I enkomendi a Ye’hoshua en akel tyempo, dizyendo: tus ojos vyeron todo lo ke A’ vuestro Dyo izo a estos dos reyes; ansi ara A’ a todos los reynos onde tyenes ke pasar. ²²No los temash; porke A’ vuestro Dyo, el es ke pelea por vozotros.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.