Sefer Tora en Djudeo Espanyol – Transkrivida kon letras latinas del livro por Ye’huda Sidi / BAMIDBAR: 43 – MASE (33 a 36)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

43 – MASE

33

¹Estas son las movidas de los ijos de Yisrael, ke salyeron de la tyerra de Ayifto por sus fonsados, por mano de Moshe i A’haron. ²I Moshe eskrivyo sus salidas segun sus movidas por dicho de A’: estas son sus movidas segun sus salidas. ³I partyeron de Ramses en el mez primero, a los kinze dias del mez primero; al otro dia de la paskua salyeron los ijos de Yisrael kon mano alta a ojos de todos los Aisyanos. ⁴I los Aisyanos estavan enterrando los ke A’ avia erido entre eyos, a todo primodjenito; i en sus dyozes A’ avia echo djuisyos. ⁵Partyeron pues los ijos de Yisrael de Ramses, i pozaron en Sukot. ⁶I partyeron de Sukot, i pozaron en Etam, ke esta en el kavo del dizyerto. ⁷I partyeron de Etam, i se tornaron sovre Pi-Ahirot, ke esta delante de Baal-Tsefon, i pozaron delante de Migdol. ⁸I partyeron de delante de Ahirot, i pasaron por medyo de la mar al dizyerto, i anduvyeron kamino de tres dias en el dizyerto de Etam, i pozaron en Mara. ⁹I partyeron de Mara, i vinyeron a Elim; i en Elim avia dodje fuentes de agua, i setenta tamarales; i pozaron ayi. ¹⁰I partyeron de Elim , i pozaron djunto al mar ruvyo. ¹¹I partyeron del mar ruvyo, i pozaron en el dizyerto de Sin. ¹²I partyeron del dizyerto de Sin, i pozaron en Dofka. ¹³I partyeron de Dofka, i pozaron en Alush. ¹⁴I partyeron de Alush, i pozaron en Refidim, onde no avia agua para el puevlo para bever. ¹⁵I partyeron de Refidim, i pozaron en el dizyerto de Sinay. ¹⁶I partyeron del dizyerto de Sinay, i pozaron en Kivrot-‘Hataava. ¹⁷I partyeron de Kivrot-‘Hataava, i pozaron en Hatserot. ¹⁸I partyeron de Hatserot, i pozaron en Ritma. ¹⁹I partyeron de Ritma, i pozaron en Rimon-Perets. ²⁰I partyeron de Rimon-Perets, i pozaron en Livna, ²¹I partyeron de Livna, i pozaron en Risa. ²²I partyeron de Risa, i pozaron en Kehela. ²³I partyeron de Kehela, i pozaron en el monte de Shefer. ²⁴I partyeron del monte de Shefer, i pozaron en Harada. ²⁵I partyeron de Harada, i pozaron en Mak’helot. ²⁶I partyeron de Mak’helot, i pozaron en Tahat. ²⁷I partyeron de Tahat, i pozaron en Terah. ²⁸I partyeron de Terah, i pozaron en Mitka. ²⁹I partyeron de Mitka, i pozaron en Hashmona. ³⁰I partyeron de Hashmona, i pozaron en Moserot. ³¹I partyeron de Moserot, i pozaron en Bene-Yaakan. ³²I partyeron de Bene-Yaakan, i pozaron en Hor-‘Hagidgad. ³³I partyeron de Hor-‘Hagidgad, i pozaron en Yotvat. ³⁴I partyeron de Yotvat, i pozaron en Avrona. ³⁵I partyeron de Avrona, i pozaron en Etsiyon-Gever. ³⁶I partyeron de Etsiyon-Gever, i pozaron en el dizyerto de Tsin, ke ez Kadesh. ³⁷I partyeren de Kadesh, i pozaron en el monte de ‘Hor, en el kavo de la tyerra de Edom. ³⁸I suvyo A’haron el saserdote en el monte de ‘Hor, por dicho de A’, i muryo ayi, a los kuarenta anyos de la salida de los ijos de Yisrael de la tyerra de Ayifto, en el mez kinto, en el primer dia del mez. ³⁹I era A’haron de edad de syento i vente i tres anyos kuando muryo en el monte de ‘Hor. ⁴⁰I el rey Kenaanio de Arad, ke morava en el sud en la tyerra de Kenaan, oyo de la venida de los ijos de Yisrael. ⁴¹I partyeron del monte de ‘Hor, i pozaron en Tsalmona. ⁴²I partyeron de Tsalmona, i pozaron en Punon. ⁴³I partyeron de Punon, i pozaron en Ovot. ⁴⁴I partyeron de Ovot, i pozaron en Iyey-‘Haavarim, en el termino de Moav. ⁴⁵I partyeron de Iyim, i pozaron en Divon-Gad. ⁴⁶I partyeron de Divon-Gad, i pozaron en Almon-Divlatayim. ⁴⁷I partyeron de Almon-Divlatayim, i pozaron en los montes de Avarim, delante de Nevo. ⁴⁸I partyeron de los montes de Avarim, i pozaron en las yanuras de Moav, djunto al Yarden de Yeriho. ⁴⁹I pozaron djunto al Yarden, dezde Bet-‘Hayeshimot asta Avel-‘Hashitim en las yanuras de Moav.

⁵⁰I avlo A’ a Moshe en las yanuras de Moav, djunto al Yarden de Yeriho, dizyendo: ⁵¹avla a los ijos de Yisrael, i diles: kuando uvyeresh pasado el Yarden a la tyerra de Kenaan, ⁵²desterraresh a todos los moraderos de la tyerra de delante de vozotros, i deperderesh todas sus pinturas, i deperderesh todos sus imajenes de fundisyon, i destruiresh todos sus altares. ⁵³I desterraresh a los moradores de la tyerra, i moraresh en eya; porke yo vos di la tyerra para erederla. ⁵⁴I eredaresh la tyerra por suerte por vuestros linajes; a los muchos muchiguaresh su eredad, i a los pokos apokaresh su eredad; onde le salyere la suerte, ayi la tendra kada uno; por los trivos de vuestros padres eredaresh. ⁵⁵Ma si no desterraresh a los moradores de la tyerra delante de vozotros, sera, ke los ke desharesh de eyos seran por punchones en vuestros ojos, i por espinos en vuestros lados, i vos angustyaran sovre la tyerra en le vozotros morash. ⁵⁶I sera, ke komo pensi de azer a eyos, are a vozotros.

34

¹I avlo A’ a Moshe, dizyendo: ²enkomenda a los ijos de Yisrael, i diles: kuando vinyeresh a la tyerra de Kenaan, esta es la tyerra ke vos a de kaer por eredad, la tyerra de Kenaan por sus terminos, ³tendresh el lado del sud dezde el dizyerto de Tsin, serka de los terminos de Edom, i vos sera el termino de sud del kavo del mar salado al oryente: ⁴i vos rodeara el termino dezde el sud a la suvida de Akrabim, i pasara a Tsin; i sus salidas seran del sud a Kadesh-Barnea, i saldra a Hatsar-Adar, i pasara a Atsmon. ⁵I rodeara el termino dezde Atsmon asta el arroyo de Ayifto, i seran sus salidas al mar. ⁶I el termino del oksidente vos sera el mar grande, i su termino: este vos sera el termino del oksidente. ⁷I este vos sera el termino del norte: dezde el mar grande vos senyalaresh el monte de ‘Hor: ⁸del monte de ‘Hor senyalaresh a la entrada de Hamat, i seran las salidas del termino a Tsedad: ⁹i saldra el termino a Zifron, i seran sus salidas a Hatsar-Enan: este vos sera el termino del norte. ¹⁰I vos senyalaresh el termino del oryente dezde Hatsar-Enan asta Shefam: ¹¹i desendera el termino de Shefam a Rivla al oryente de Ayin; i desendera el termino, i yegara al lado del mar de Kineret al oryente: ¹²i desendera el termino al Yarden, i seran sus salidas al mar salado. Esta sera vuestra tyerra por sus terminos al derredor.

¹³I enkomendo Moshe a los ijos de Yisrael, dizyendo: esta es la tyerra ke eredaresh por suerte, la kual enkomendo A’ ke se dyera a los nueve trivos, i al medyo trivo: ¹⁴porke el trivo de los ijos de Reuven por la kaza de sus padres, i el trivo de los ijos de Gad por la kaza de sus padres, tomaron su eredad, i el medyo trivo de Menashe ya tomaron su eredad: ¹⁵Los dos trivos i el medyo trivo tomaron su eredad de esta parte del Yarden de Yeriho al oryente, al Levante.

¹⁶I avlo A’ a Moshe, dizyendo: ¹⁷estos son los nombres de los varones ke vos daran a eredar la tyerra: Elazar el saserdote, i Ye’hoshua, ijo de Nun. ¹⁸I tomaresh un mayoral de kada trivo, para dar a eredar la tyerra. ¹⁹I estos son los nombres de los varones: del trivo de Ye’huda, Kalev, ijo de Yefune. ²⁰I del trivo de los ijos de Shimon, Shemuel, ijo de Ami’hud. ²¹Del trivo de Binyamin, Elidad, ijo de Kislon. ²²I del trivo de los ijos de Dan, el mayoral, Buki, ijo de Yogli. ²³De los ijos de Yosef, del trivo de los ijos de Menashe, el mayoral ,Haniel, ijo de Efod. ²⁴I del trivo de los ijos de Efrayim, el mayoral, Kemuel, ijo de Shiftan. ²⁵I del trivo de los ijos de Zevulun, el mayoral, Elitsafan, ijo de Parnah. ²⁶I del trivo de los ijos de Yissahar, el mayoral, Paltiel, ijo de Azan. ²⁷I del trivo de los ijos de Asher, el mayoral, Ahi’hud, ijo de Shelomi. ²⁸I del trivo de los ijos de Naftali, el mayoral, Peda’hel, ijo de Ami’hud. ²⁹Estos son los ke enkomendo A’ ke izyeran eredar a los ijos de Yisrael en la tyerra de Kenaan.

35

¹I avlo A’ a Moshe en las yanuras de Moav, djunto al Yarden de Yeriho, dizyendo: ²enkomenda a los ijos de Yisrael, ke den a los Levitas de la eredad de su posesyon sivdades para morar; i arraval para las sivdades al derredor de eyas daresh a los Levitas. ³I las sivdades les seran para morar; i sus arravales seran para sus kuatropeas, i para su azyenda, i para todas sus bestyas. ⁴I los arravales de las sivdades ke daresh a los Levitas, seran dezde la muraya de la sivdad i afuera mil kovdos al derredor. ⁵I mezuraresh de afuera de la sivdad a la parte del oryente dos mil kovdos, i a la parte del sud dos mil kovdos, i a la parte del oksidente dos mil kovdos, i a la parte del norte dos mil kovdos, i la sivdad en medyo: esto les sera por los arravales de las sivdades. ⁶I de las sivdades ke daresh a los Levitas avra sesh sivdades de akojimyento, las kuales daresh para ke el matador fuyga aya; i afuera de eyas daresh kuarenta i dos sivdades. ⁷Todas las sivdades ke daresh a los Levitas seran kuarenta i ocho sivdades, eyas i sus arravales. ⁸I las sivdades ke daresh de la posesyon de los ijos de Yisrael, del ke tyene mucho tomaresh mucho, i del ke tyene poko tomaresh poko; kada uno dara de sus sivdades a los Levitas segun su eredad ke eredara.

⁹I avlo A’ a Moshe, dizyendo: ¹⁰avla a los ijos de Yisrael, i diles: kuando uvyeresh pasado el Yarden a la tyerra de Kenaan, ¹¹senyalaresh para vozotros sivdades; sivdades de akojimyento vos seran, para ke fuyga aya el matador, ke eryere a alguno por yerro. ¹²I vos seran las sivdades por akojimyento del regmidor, para ke no muera el matador asta ke este delante de la kompanya a djuisyo. ¹³I de las sivdades ke daresh, tendresh sesh sivdades de akojimyento. ¹⁴Las tres sivdades daresh de esta parte del Yarden, i las otras tres sivdades daresh en la tyerra de Kenaan; sivdades de akojimyento seran. ¹⁵Estas sesh sivdades seran por akojimyento a los ijos de Yisrael, i al pelegrino, i al moradizo entre eyos, para ke fuyga aya kualkyera ke eryere a alguno por yerro. ¹⁶I si kon instrumento de fyerro lo eryere, i muryere, matador es; matar sera matado el matador. ¹⁷I si kon pyedra de mano, de ke pueda murir, lo eryere, i muryere, matador es; matar sera matado el matador. ¹⁸I si kon instrumento de palo de mano, de ke pueda murir, lo eryere, i muryere, matador es; matar sera matado el matador. ¹⁹El regmidor de la sangre, el matara al matador; kuando lo enkontrare, el lo matara. ²⁰I si kon aborresyon lo empushare, o echare sovre el alguna koza kon aselada, i muryere, ²¹o kon malkerensya lo eryere kon su mano, i muryere, matar sera matado el eridor; matador es; el regmidor de la sangre matara al matador, kuando lo enkontrare. ²²Ma si a kaso sin malkerensya lo empushare, o echare sovre el kualkyer instrumento sin aselada; ²³o echare sovre el alguna pyedra de ke pueda murir, sin verlo, i muryere, el no syendo su enemigo, ni bushkando su mal; ²⁴entonses la kompanya djuzgaran entre el eridor i el regmidor de la sangre segun estos djuisyos. ²⁵I la kompanya eskaparan al matador de mano del regmidor de la sangre, i la kompanya lo aran tornar a la sivdad de su akojimyento, onde avia fuido; i si estara en eya asta la muerte del gran saserdote (ko’hen gadol), ke fue untado kon el azeyte santo. ²⁶Ma si salir salyere el matador afuera del termino de la sivdad de su akojimyento, onde avia fuido, ²⁷i el regmidor de la sangre lo topare afuera del termino de la sivdad de su akojimyento, i el regmidor de la sangre matare al matador, no sera kulpozo de sangre: ²⁸porke en la sivdad de su akojimyento avia de estar asta la muerte del gran saserdote; i despues de la muerte del gran saserdote, tornara el matador a la tyerra de su posesyon. ²⁹I estas kozas vos seran por fuero de djuisyo por vuestros djerenansyos en todas vuestras moradas, ³⁰kualkyera ke eryere a alguno, por dicho de testigos mataran al matador; ma un testigo solo no atestiguara kontra una persona para ke muera. ³¹I no tomesh presyo por la vida del matador, el kual es kondenado a murir; porke matar sera matado. ³²I no tomesh presyo por el ke fuyo a la sivdad de su akojimyento para ke se torne a morar en su tyerra antes de la muerte del saserdote. ³³I no enkonesh la tyerra onde estaresh; porke sangre es la ke enkona la tyerra, i la tyerra no sera [1]alimpyada de la sangre ke fue vertida en eya, sino kon la sangre del ke la vertyo. ³⁴No enkonesh pues la tyerra en ke estaresh, en medyo de la kual yo moro; porke yo A’ moro en medyo de los ijos de Yisrael.

[1] Ebreo: ekspiada

36

¹I se ayegaron las kaveseras de los padres del linajes de lo ijos de Gilad, ijo de Mahir, ijo de Menashe, de los linajes de los ijos de Yosef, i avlaron delante de Moshe, i delante de los mayorales, kaveseras de padres de los ijos de Yisrael. ²I disheron: A’ enkomendo a mi senyor de dar la tyerra por eredar a los ijos de Yisrael, por suerte; i mi senyor fue enkomendado por A’ de dar la eredad de Tselofhad nuestro ermano a sus ijas. ³I si fueren kazadas a alguno de los ijos de los otros trivos de los ijos de Yisrael, la eredad de eyas sera menguada de la eredad de nuestros padres, i sera anyadida a la eredad del trivo al kual seran adjuntadas; i sera menguada de la suerte de nuestra eredad. ⁴I kuando los ijos de Yisrael tuvyeren el yovel, la eredad de eyas sera anyadida a la eredad del trivo al kual seran adjuntadas; i la eredad de eyas sera menguada de la eredad del trivo de nuestros padres. ⁵I Moshe enkomendo a los ijos de Yisrael por dicho de A’, dizyendo: byen avlan el trivo de los ijos de Yosef. ⁶Esta es la koza ke A’ enkomendo tokante a las ijas de Tselofhad, dizyendo: ke se kazen kon kyen les agrade, kon tal ke se kazen en el linaje del trivo de su padre. ⁷I no vaya rodeando la eredad de los ijos de Yisrael de trivo en trivo; porke kada uno de los ijos de Yisrael se apegara a la eredad del trivo de sus padres. ⁸I toda ija ke eredare eredad de los trivos de los ijos de Yisrael, kon alguno del linaje del trivo de su padre se kazara, para ke los ijos de Yisrael ereden kada uno la eredad de sus padres. ⁹I no vaya rodeando eredad de un trivo a otro trivo; ma kada uno de los trivos de los ijos de Yisrael se apegara a su eredad. ¹⁰Komo A’ enkomendo a Moshe, ansi izyeron las ijas de Tselofhad. ¹¹I Mahla, Tirtsa, i Hogla, i Milka, i Noa ijas de Tselofhad, se kazaron kon ijos de sus tios. ¹²Kon los de los linajes de los ijos de Menashe, ijo de Yosef, fueron kazadas, i su eredad kedo en el trivo del linaje de su padre. ¹³Estas son las enkomendansas i los djuisyos ke enkomendo A’ por mano de Moshe a los ijos de Yisrael en las yanuras de Moav djunto al Yarden de Yeriho.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.