eSefarad Noticias del Mundo Sefaradi
Ver todos los capítulos publicados en esta sección
Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873
Transkrivido por Ye’huda Sidi. Febrero 2015
41 – PINHAS
10I avlo A’ a Moshe, dizyendo: 11Pinhas, ijo de Elazar, ijo de A’haron el saserdote, a echo tornar mi sanya de sovre los ijos de Yisrael, zelando mi zelo entre eyos, i no konsumi a los ijos de Yisrael en mi zelo. 12Por tanto di: ek, yo le doy firmamyento de paz. 13I tendra el, i su semen despues de el, el firmamyento del saserdosyo de syempre, por lo ke tuvo zelo por su Dyo, i izo ekspiasyon (kapara) por los ijos de Yisrael. 14I el nombre del varon de Yisrael, el erido ke fue erido kon la Midyanita, era Zimri ijo de Salu, mayoral de una kaza de padre del trivo de Shimon. 15I el nombre de la mujer erida, Midyanita, era Kozbi, ija de Tsur, kavesera de djentes, de una kaza de padre en Midyan.
16I avlo A’ a Moshe, dizyendo: 17angustyad a los Midyanitas, i erildos, 18porke eyos vos angustyaron kon sus artes kon ke vos enganyaron en el echo de Peor, i en el echo de Kozbi, ija del mayoral de Midyan, su ermana, ke fue erida en el dia de la mortaldad por kavza de Peor.
26
19[1]I akontesyo despues de la mortaldad, 1[]ke avlo A’ a Moshe, i a Elazar, ijo de A’haron el saserdote, dizyendo: 2tomad la suma de toda la kompanya de los ijos de Yisrael, de edad de vente anyos i arriva, por la kaza de sus padres, todos los ke pueden salir al fonsado en Yisrael. 3I avlo Moshe i Elazar el saserdote kon eyos en las yanuras de Moav, djunto al Yarden de Yeriho, dizyendo: 4kontaresh al puevlo de edad de vente anyos i arriva, komo A’ enkomendo a Moshe, i a los ijos de Yisrael, ke salyeron de la tyerra de Ayifto. 5Reuven primodjenito de Yisrael. Los ijos de Reuven, Hanoh del kual era el linaje de los Hanohitas; de Palu, el linaje de los Paluitas; 6de Hetsron, el linaje de los Hetsronitas; de Karmi, el linaje de los Karmitas. 7Estos fueron los linajes de los Reuvenitas; i sus kontados fueron kuarenta i tres mil i syetesyentos i trenta. 8I los ijos de Palu, Eliav. 9I los ijos de Eliav: Nemuel, i Datan, i Aviram. Estos Datan i Aviram fueron los konbidados de la kompanya, ke barajaron kontra Moshe i kontra A’haron kon la kompanya de Korah, kuando barajaron kontra A’: 10i la tyerra avryo su boka, i englutyo a eyos i a Korah, kuando muryo la kompanya, kuando konsumyo el fuego a dossyentos i sinkuenta varones, i fueron por senyal. 11Ma los ijos de Korah no muryeron.
12Los ijos de Shimon por sus linajes: de Nemuel, el linaje de los Nemuelitas; de Yamin, el linaje de los Yaminitas; de Yahin, el linaje de los Yahinitas; 13de Zerah el linaje de Zarhitas; de Shaul, el linaje de los Shaulitas. 14Estos fueron los linajes de los Shimonitas, vente i dos mil dossyentos.
15I los ijos da Gad, por sus linajes: de Tsefon, el linaje de los Tsefonitas; de Hagi, el linaje de los Hagitas; de Shuni, el linaje de los Shunitas; 16de Ozni, el linaje de los Oznitas; de Eri, el linaje de los Eritas; 17de Arod, el linaje de los Aroditas; de Areli, el linaje de los Arelitas. 18Estos fueron los linajes de los ijos de Gad por sus kontados, kuarenta mil i kinyentos.
19Los ijos de Ye’huda: Er i Onan; i muryeron Er i Onan en la tyerra de Kenaan. 20I fueron los ijos de Ye’huda por sus linajes: de Shela, el linaje de los Shelanitas; de Perets, el linaje de los Partsitas; de Zerah; el linaje de los Zarhitas. 21I fueron los ijos de Perets: de Hetsron, el linaje de los Hetsronitas; de Hamul, el linaje de los Hamulitas. 22Estos fueron los linajes de Ye’huda por sus kontados, setenta i sesh mil i kinyentos.
23Los ijos de Yissahar por sus linajes: de Tola, el linaje de los Tolaitas; de Puva, el linaje del los Punitas; 24de Yashuv, el linaje de los Yashuvitas; de Shimron, el linaje de los Shimronitas. 25Estos fueron los linajes de Yissahar por sus kontados, sesenta i kuatro mil i tressyentos.
26Los ijos de Zevulun por sus linajes: de Sered, el linaje de los Sarditas; de Elon, el linaje de los Elonitas; de Yahleel, el linaje de los Yahleelitas. 27Estos fueron los linajes de los Zevulonitas por sus kontados, sesenta mil i kinyentos.
28Los ijos de Yosef por sus linajes: Menashe i Efrayim. 29Los ijos de Menashe: de Mahir, el linaje de los Mahiritas; i Mahir endjendro a Gilad. De Gilad, el linaje de los Giladitas. 30Estos fueron los ijos de Gilad: de Iezer, el linaje de de los Iezritas; de Helek,el linaje de los Helkitas; 31i de Asriel, el linaje de los Asrielitas, i de Shehem, el linaje de los Shihmitas; 32 i de Shemida, el linaje de los Shemidaitas; i de Hefer, el linaje de los Hefritas. 33I Tselafhad, ijo de Hefer, no tuvo ijos sino ijas; i los nombres de las ijas de Tselafhad fueron Mahla, i Noa, Hogla, Milka, i Tirtsa. 34Estos fueron los linajes de Menashe; i sus kontados sinkuenta i dos mil i syetesyentos.
35Estos fueron los ijos de Efrayim por sus linajes: de Shutalah, el linaje de los Shutalhitas; de Beher, el linaje de los Bahritas; de Tahan, el linaje de los Tahanitas. 36I estos fueron los ijos de Shutalah: de Eran, el linaje del los Eranitas. 37Estos fueron los linajes de los ijos de Efrayim por sus kontados, trenta i dos il i kinyentos. Estos fueron los ijos de Yosef por sus linajes.
38Los ijos de Binyamin por sus linajes: de Bela, el linaje de los Balitas; de Ashbel, el linaje de los Ashbelitas; de Ahiram, el linaje de los Ahiramitas; 39de Shefufam, el linaje de los Shufamitas; de Hufam, el linaje de los Hufamitas. 40I los ijos de Bela fueron Ard i Naaman; de Ard, el linaje de los Arditas; de Naaman, el linaje de los Naamitas. 41Estos fueron los ijos de Binyamin por sus linajes; i sus kontados, kuarenta i sinko mil i seshsyentos.
42Estos fueron los ijos de Dan por sus linajes: de Shuham, el linaje de los Shuhamitas; estos fueron los linajes de Dan por sus linajes. 43Todos los linajes de los Shuhamitas por sus kontados, sesenta i kuatro mil i kuatrosyentos.
44Los ijos de Asher por sus linajes: de Yimna, el linaje de los Yimnaitas; de Yishvi, el linaje de los Yishvitas; de Beria, el linaje de los Beriitas. 45Los ijos de Beria: de Hever, el linaje de los ijos de Hevritas; de Malkiel, el linaje de los ijos de Malkielitas. 46I el nombre de la ija de Asher fue Sarah. 47Estos fueron los linajes de los ijos de Asher por sus kontados, sinkuenta i tres mil i kuatrosyentos.
48Los ijos de Naftali por sus linajes: de Yahtseel, el linaje de los Yahtseelitas; de Guni, el linaje de los Gunitas; 49de Yetser, el linaje de los Yitsritas; de Shilem, el linaje de los Shilemitas; 50Estos fueron los linajes de Naftali por sus linajes; i sus kontados, kuarenta i sinko mil i kuatrosyentos.
51Estos fueron los kontados de los ijos de Yisrael, seshsyentos i un mil i syetesyentos i trenta.
52I avlo A’ a Moshe, dizyendo: 53a estos sera espartida la tyerra por eredad segun la kuenta de los nombres. 54A los muchos muchiguaras su eredad, i a los pokos apokaras su eredad. A kada uno segun sus kontados se le dara su eredad. 55Empero la tyerra sera espartida por suerte; por los nombres de los trivos de sus padres eredaran. 56Segun la suerte sera espartida su eredad entre los muchos i los pokos.
57I estos fueron los kontados de los Levitas por sus linajes: de Gershon, el linaje de los Gershunitas; de Ke’hat, el linaje de los Ke’hatitas; de Merari, el linaje de los Meraritas. 58Estos fueron los linajes de los Levitas: el linaje de los Livnitas, el linaje de los Hevronitas, el linaje de los Mahlitas, el linaje de los Mushitas, el linaje de los Korhitas. I Ke’hat endjendro a Amram. 59I el nombre de la mujer de Amram fue Yoheved, ija de Levi ke su madre paryo a Levi en Ayifto. I paryo de Amram a A’haron i a Moshe, i a Miryam su ermana. 60I a A’haron nasyeron Nadav i Avi’hu, Elazar i Itamar. 61I Nadav i Avi’hu muryeron kuando ayegaron fuego estranyo delante de A’. 62I sus kontados fueron vente i tres mil, todos machos de edad de un mez i arriva; porke no fueron kontados entre los ijos de Yisrael, porke no les fue dada eredad entre los ijos de Yisrael.
63Estos fueron los kontados por Moshe i Elazar el saserdote, ke kontaron a los ijos de Yisrael en las yanuras de Moav, djunto al Yarden de Yeriho. 64I entre estos no uvo ninguno de los kontados por Moshe i A’haron el saserdote, ke kontaron a los ijos de Yisrael en el dizyerto de Sinay. 65Porke A’ disho de eyos: murir muriran en el dizyerto; i no kedo varon de eyos, sino Kalev, ijo de Yefune, i Ye’hoshua, ijo de Nun.
27
1I se ayegaron las ijas de Tselofhad, ijo de Hefer, ijo de Gilad, ijo de Mahir, ijo de Menashe, de los linajes de Menashe, ijo de Yosef; i estos eran los nombres de sus ijas, Mahla, Noa, i Hogla, i Milka, i Tirtsa. 2I se pararon delante de Moshe, i delante de Elazar el saserdote, i delante de los mayorales i de toda la kompanya, a la puerta de la tyenda del plazo, dizyendo: 3nuestro padre muryo en el dizyerto, i el no estuvo entre la kompanya de los ke se adjuntaron kontra A’ en la kompanya de Korah, sino ke en su pekado muryo, i no tuvo ijos. 4¿ por ke sera menguado el nombre de nuestro padre de entre su linaje, porke no tuvo ijo? danos posesyon entre los ermanos de nuestro padre. 5I Moshe yevo su kavza delante de A’.
6I A’ respondyo a Moshe, dizyendo: 7byen avlan las ijas de Tselofhad; syerto les daras posesyon de eredad entre los ermanos de su padre, i aras pasar la eredad de su padre a eyas. 8I a los ijos de Yisrael avlaras, dizyendo: kuando un varon muayre, i no tuvyere ijo, aresh pasar su eredad a su ija. 9I si no tuvyere ija, daresh su eredad a sus ermanos. 10I si no tuvyere ermanos, daresh su eredad a los ermanos de su padre. 11I si su padre no tuvyere ermanos, daresh su eredad a su paryente mas serkano de su linaje, i el la eredara. I esto sera a los ijos de Yisrael por fuero de djuisyo, komo A’ enkomendo a Moshe.
12I disho A’ a Mohe: suve a este monte de Avarim, i ve la tyerra ke yo di a los ijos de Yisrael. 13I kuando la avras visto, tu tambyen seras apanyado a tus puevlos, komo fue apanyado A’haron tu ermano. 14Porke reveyastesh a mi dicho en el dizyerto de Tsin, en la baraja de la kompanya, no santifikandome a las aguas a ojos de eyos. Estas son las aguas de Meriva de Kadesh en el dizyerto de Tsin.
15I avlo Moshe a A’, dizyendo: 16ordene A’, Dyo de los espiritos de toda karne, varon sovre la kompanya, 17ke salga delante de eyos, i ke entre delante de eyos, i ke los aga salir, i ke los aga entrar, i no sea la kompanya de A’ komo ovejas ke no tyenen pastor. 18I disho A’ a Moshe: tomate a Ye’hoshua, ijo de Nun, varon en el kual ay espirito, i pondras tu mano sovre el; 19i lo aras estar delante de Elazar el saserdote, i delante de toda la kompanya; 20i le enkomendaras a vista de eyos. I meteras de tu loor sovre el, para ke ovedeskan toda la kompanya de los ijos de Yisrael. 21I se parara delante de Elazar el saserdote, i demandara a el por el djuisyo de los urim delante de A’. Por su dicho saldran i por su dicho entraran, el i todos los ijos de Yisrael kon el, i toda la kompanya. 22I Moshe izo komo A’ le enkomendo: i tomo a Ye’hoshua, i lo izo estar delante de Elazar el saserdote, i delante de toda la kompanya. 23I puzo sus manos sovre el, i le enkomendo komo A’ avlo por mano de Moshe.
28
1I avlo A’ a Moshe, dizyendo: 2enkomenda a los ijos de Yisrael, i diles: mi ayegasyon, mi pan por mis ofrendas kemadas, por guezmo a mi resivivle, guardaresh, ayegandolo a mi en su plazo. 3I les diras: esta es la ofrenda kemada ke ayegaresh a A’, dos karneros sanos de edad de un anyo, kada dia, por alsasyon kontinua. 4El un karnero aras a la manyana, i el otro karnero aras entre las tardes: 5i el dyezmo de un epa de semola, enbuelta en la kuarta parte de un ‘hin de azeyte majado, por prezente. 6Es alsasyon kontinua, ke fue echa en el monte de Sinay por guezmo resivivle, ofrenda kemada a A’. 7I su templasyon sera la kuarta parte de un ‘hin para el un karnero; en el santuvaryo templaras templasyon de sidra a A’. 8I el karnero segundo aras entre las tardes; segun el prezente de la manyana, i segun su templasyon aras, ofrenda kemada de guezmo resivivle a A’.
9I en el dia de shabat, dos karneros sanos de edad de un anyo, i dos dyezmos de semula enbuelta en azeyte por prezente, i su templasyon. 10 Esta sera la alsasyon del shabat en kada shabat, afuera de la alsasyon kontinua, i su templasyon.
11I en los prinsipyos de vuestro mezes ayegarash por alsasyon a A’, dos toros ijos de vaka, i un barvez, i syete karneros sanos de edad de un anyo; 12i tres dyezmos de semola, enbuelta en azeyte, por prezente kon kada toro, i dos dyezmos de semola, enbuelta en azeyte por prezente kon kada barvez; 13i un dyezmo de semola, enbuelta en azeyte, por prezente kon kada karnero, alsasyon de guezmo resivivle, ofrenda kemada a A’. 14I sus templasyones seran medyo ‘hin de vino por el toro, i la tersera parte de un ‘hin por el barvez, i la kuarta parte de un ‘hin por el karnero. Esta sera la alsasyon de kada mez por los mezes del anyo. 15I un kavrito de la kavras por sakrifisyo por pekado a A’, afuera de la alsasyon kontinua, sera echo, i su templasyon.
16I en el mez primero, a los katorze dia del mez sera la paskua a A’. 17I a los kinze dias de este mez la fyesta; por syete dias se komeran sensenyas. 18En el primer dia avra yamadura santa; no agash ninguna ovra de servisyo. 19I ayegaresh por ofrenda kemada, por alsasyon a A’ dos toros ijos de vaka, i un barvez, i syete karneros de edad de un anyo; sanos vos seran: 20i su prezente de semola enbuelta en azeyte; tres dyezmos por el toro, i dos dyezmos por el barvez aresh: 21un dyezmo aras por kada karnero de los syete karneros: 22i un kavrito por sakrifisyo por pekado, para azer ekspiasyon (kapara) por vozotros. 23Afuera de la alsasyon de la manyana, ke es por alsasyon kontinua aresh estos. 24Tales kozas aresh kada dia, por los syete dias, el pan de la ofrenda kemada de guezmo resivivle a A’; afuera de la alsasyon kontinua sera echo, i su templasyon. 25I en el dia seteno tendresh yamadura santa; no agash ninguna ovra de servisyo.
26I el dia de las primisyas kuando ayegaresh prezente nuevo a A’, al kavo de vuestras semanas, tendresh yamadura santa; no agash ninguna ovra de servisyo. 27I ayegaresh alsasyon por guezmo resivivle a A’, dos toros ijos de vaka, un barvez, syete karneros de edad de un anyo: 28i su prezente de semola enbuelta en azeyte, tres dyezmos por kada toro, dos dyezmos por kada barvez, 29un dyezmo por kada karnero de los syete karneros: 30un kavrito de las kavras para azer ekspiasyon por vozotros. 31Esto aresh afueara de la alsasyon kontinua, i su prezente, i sus templasyones. Sanos vos seran.
29
1I en el mez seteno, en el primer dia del mez tendresh yamadura santa, no agash ninguna ovra de servisyo; dia de aulasyon vos sera. 2I aresh alsasyon por guezmo resivivle a A’, un toro ijo de vaka, un barvez, syete karneros sanos de edad de un anyo: 3i su prezente de semola enbuelta en azeyte, tres dyezmos por el toro, dos dyezmos por el barvez, 4i un dyezmo por kada karnero de los syete karneros; 5i un kavrito de las kavras por sakrifisyo por pekado para azer sakrifisyon por vozotros: 6afuera de la alsasyon del mez i su prezente, i la alsasyon kontinua i su prezente, i sus templasyones, segun su ordenansa, por guezmo resivivle, ofrenda kemada a A’.
7I a los dyez de este mez seteno tendresh yamadura santa; i afriiresh vuestras almas; i no agash ninguna ovra. 8I ayegaresh alsasyon a A’ por guezmo resivivle, un toro ijo de vaka, un barvez, syete karneros de edad de un anyo; sanos vos seran: 9i su prezente de semola enbuelta en azeyte, tres dyezmos por el toro, dos dyezmos por el un barvez, 10un dyezmo por kada karnero de los syete karneros: 11un kavrito de las kavras por sakrifisyo por pekado, afuera del sakrifisyo por pekado por las ekspiasyones (kipurim), i de la alsasyon kontinua, i sus templasyones.
12I a los kinze dias del mez seteno tendresh yamadura santa; no agash ninguna ovra de servisyo, i aresh fyesta a A’ syete dias. 13I ayegaresh alsasyon, ofrenda kemada de guezmo resivivle a A’, tredje toros ijos de vaka, dos barvezes, katorze karneros de edad de un anyo; sanos seran; 14i su prezente de semola enbuelta en azeyte, tres dyezmos por kada toro de los tredje toros, dos dyezmos por kada barvez de los dos barvezes, 15i un dyezmo por kada karnero de los katorze karneros: 16i un kavrito de las kavras por sakrifisyo por pekado, afuera de la alsasyon kontinua, su prezente, i su templasyon.
17I en el segundo dia, dodje toros ijos de vaka, dos barvezes, katorze karneros sanos de edad de un anyo: 18i su prezente i sus templasyones por los toros, por los barvezes, i por los karneros segun su numero, segun la ordenansa: 19i un kavrito de las kavras por sakrifisyo por pekado, afuera de la alsasyon kontinua, i su prezente, i sus templasyones.
20I en el dia tersero, onze toros, dos barvezes, katorze karneros sanos de edad de un anyo: 21i su prezente i sus templasyones por los toros, por los barvezes, i por los karneros segun su numero, segun la ordenansa: 22i un kavrito por sakrifisyo por pekado, afuera de la alsasyon kontinua, i su prezente, i su templasyon.
23I en el kuarto dia, dyez toros, dos barvezes, katorze karneros sanos de edad de un anyo: 24i su prezente i sus templasyones por los toros, por los barvezes, i por los karneros segun su numero, segun la ordenansa: 25i un kavrito de las kavras por sakrifisyo por pekado, afuera de la alsasyon kontinua, su prezente, i su templasyon.
26I en el kinto dia, nueve toros, dos barvezes, katorze karneros sanos de edad de un anyo: 27i su prezente i sus templasyones por los toros, por los barvezes, i por los karneros segun su numero, segun la ordenansa: 28i un kavrito por sakrifisyo por pekado, afuera de la alsasyon kontinua, i su prezente, i su templasyon.
29I en el dia sesheno, ocho toros, dos barvezes, katorze karneros sanos de edad de un anyo: 30i su prezente i sus templasyones por los toros, por los barvezes, i por los karneros segun su numero, segun la ordenansa: 31i un kavrito por sakrifisyo por pekado, afuera de la alsasyon kontinua, su prezente, i su templasyon.
32I en el dia seteno , syete toros, dos barvezes, katorze karneros sanos de edad de un anyo: 33i su prezente i sus templasyones por los toros, por los barvezes, i por los karneros segun su numero, segun la ordenansa: 34i un kavrito por sakrifisyo por pekado, afuera de la alsasyon kontinua, su prezente, i su templasyon.
35I en el dia ochavo tendresh detenimyento; no agash ninguna ovra de servisyo. 36I ayegaresh alsasyon, ofrenda kemada de guezmo resivivle a A’, un toro, un barvez, syete karneros sanos de edad de un anyo: 37su prezente i sus templasyones por el toro, por el barvez, i por los karneros segun su numero, segun la ordenansa: 38i un kavrito por sakrifisyo por pekado, afuera de la alsasyon kontinua, i su prezente, i su templasyon. 39Estas kozas aresh a A’ en vuestros plazos, afuera de vuestras promesas, i vuestras ofrendas veluntaryas, por vuestras alsasyones, i por vuestros prezentes, i por vuestras templasyones, i por vuestros sakrifisyos de pases.
30
1I Moshe disho a los ijos de Yisrael segun todo lo ke A’ enkomendo a Moshe.
Ver todos los capítulos publicados en esta sección
————————————————————————
About Yehuda Sidi
I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.
A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.
So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.
The transcription was not reviewed by the Ladino scholars. Please report the errors that you find.
