Sefer Tora en Djudeo Espanyol – Transkrivida kon letras latinas del livro por Ye’huda Sidi / BAMIDBAR: 36 – BE’HAALOTEHA (8 a 12)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

36 – BE’HAALOTEHA

8

 ¹I avlo A’ a Moshe, dizyendo: ²avla a A’haron, i dilo: kuando ensendyeres los kandeles, eskuentara las fases de la almenara alumbraran los syete kandeles. ³I A’haron izo ansi: eskuentara las fases de la almenara ensendyo sus kandeles, komo A’ enkomendo a Moshe. ⁴I esta era la echura de la almenara: de oro batido era; dezde su tronko asta sus flores era de ovra batida. Segun su muestra ke A’ mostro a Moshe, ansi izo la almenara.

⁵I avlo A’ a Moshe, dizyendo: ⁶toma a los Levitas de entre los ijos de Yisrael, i alimpyalos. ⁷I ansi les aras para alimpyarlos: esteya sovre eyos agua de limpyeza, i aran pasar navaja sovre toda su karne, i lavaran sus vestidos, i se alimpyaran. ⁸I tomaran un toro ijo de vaka, i su prezente de semola enbuelta en azeyte; i tomaras otro toro ijo de vaka por sakrifisyo por pekado. ⁹I ayegaras a los Levitas delante de la tyenda del plazo; ¹⁰i adjuntaras a toda la kompanya de los ijos de Yisrael. I ayegaras a los Levitas delante de A’; i pondran los ijos de Yisrael sus manos sovre los Levitas. ¹¹I mesera A’haron a los Levitas delante de A’ por mesedura de parte de los ijos de Yisrael, para ke sean para servir el servisyo de A’. ¹²I los Levitas pondran sus manos sovre la kavesa de los toros; i aras el uno por sakrifisyo por pekado, i el otro por alsasyon a A’, para azer ekspiasyon (kapara) por los Levitas. ¹³I prezentaras a los Levitas delante de A’haron ,i delante de sus ijos. I los meseras por mesedura a A’. ¹⁴I apartaras a los Levitas de entre los ijos de Yisrael, i los Levitas seran mios. ¹⁵I despues de esto vendran los Levitas a servir en la tyenda del plazo. Ansi los alimpyaras, i los meseras por mesedura. ¹⁶Porke dados, dados son a mi de entre los ijos de Yisrael; en lugar de todo akel ke avre bulba, es a saver, de todo primodjenito en los ijos de Yisrael, los tomi para mi. ¹⁷Porke mio es todo primodjenito en los ijos de Yisrael, tanto de ombres komo de kuatropeas: en el dia ke yo eri a todo primodjenito en la tyerra de Ayifto, los santifiki para mi. ¹⁸I tomi a los Levitas en lugar de todo primodjenito en los ijos de Yisrael. ¹⁹I tengo dado los Levitas, dados a A’haron i a sus ijos, de entre los ijos de Yisrael, para servir el servisyo de los ijos de Yisrael en la tyenda del plazo, i para azer ekspiasyon (kapara) por los ijos de Yisrael; para ke no ayga yaga en los ijos de Yisrael, en ayegandose los ijos de Yisrael al santuvaryo. ²⁰I Moshe, i A’haron, i toda la kompanya de los ijos de Yirael, izyeron a los Levitas segun todo lo ke A’ enkomendo a Moshe tokante a los Levitas; ansi izyeron a eyos los ijos de Yisrael. ²¹I se alimpyaron los Levitas, i lavaron sus vestidos, i A’haron los mesyo por mesedura delante de A’; i A’haron izo ekspiasyon por eyos para alimpyarlos. ²²I despues de esto vinyeron los Levitas para servir su servisyo en la tyenda del plazo delante de A’haron, i delante de sus ijos. Komo A’ enkomendo a Moshe tokante a los Levitas, ansi izyeron a eyos.

²³I avlo A’ a Moshe, dizyendo ²⁴esto sera lo ke toka a los Levitas: de edad de vente i sinko anyos i arriva entraran a [1]azer su ofisyo en el servisyo de la tyenda del plazo: ²⁵i de edad de sinkuenta anyos tornaran del [2]ofisyo del servisyo, i no serviran mas. ²⁶Empero ministraran kon sus ermanos en la tyenda del plazo para guardar guardya, ma no serviran servisyo. Ansi aras a los Levitas tokante a sus guardyas.

[1] Ebreo: afonsadear fonsado

[2] Ebreo: fonsado

9

¹I avlo A’ a Moshe en el dizyerto de Sinay, en el segundo anyo de su salida de la tyerra de Ayifto, en el mez primero, dizyendo: ²agan los ijos de Yisrael la paskua en su plazo. ³A los katorze dias de este mez entre las tardes la aresh en su plazo; segun todos sus fueros, i segun todas sus ordenansas la aresh. ⁴I avlo Moshe a los ijos de Yisrael ke izyeran la paskua. ⁵I izyeron la paskua en el mez primero, a los katorze dias del mez entre las tardes, en el dizyerto de Sinay. Segun todo lo ke enkomedo A’ a Moshe, ansi izyeron los ijos de Yisrael.

⁶I uvo algunos ke estavan enkonados por kavza de ombre muerto, i no pudyeron azer la paskua en akel dia; i se ayegaron delante de Moshe, i delante de A’haron en akel dia. ⁷I le disheron akeyos varones: nozotros estamos enkonados por kavza de ombre muerto; ¿porke seremos defendidos de ayegar la ayegasyon de A’ en su plazo entre los ijos de Yisrael? i Moshe les disho: ⁸esperad, i oire lo ke enkomendara A’ tokante a vozotros.

⁹I avlo A’ a Moshe, dizyendo avla a los ijos de Yisrael, dizyendo: ¹⁰kualkyer varon de vozotros, o de vuestros djerenansyos, kuando fuere enkonado por kavza de muerto, o estuvyere leshos en viaje, ara paskua a A’. ¹¹En el mez segundo, a los katorze dias del mez entre las tardes la aran; kon sensenyas i yervas amargas la komeran. ¹²No deshen nada de eya asta la manyana, ni kevren gueso en eya, segun todo fuero de la paskua la aran. ¹³Ma el varon ke esta limpyo, i no esta en viaje, si deshare de azer paskua, akeya persona sera tajada de sus puevlos; por lo ke no ayego la ayegasyon de A’ en su plazo, akel varon yevara su pekado. ¹⁴I kuando pelegrinare kon vozotros pelegrino, i izyere la paskua a A’, segun el fuero de la paskua, i segun su ordenansa, ansi la ara: un mizmo fuero tendresh, tanto para el pelegrino komo para el nativo de la tyerra.

¹⁵I en el dia ke fue levantado el tavernakulo, la nuve kuvryo el tavernakulo, la tyenda del Testimonyo; i a la tarde avia sovre el tavernakulo komo una aparyensya de fuego asta la manyana. ¹⁶Ansi era de kontino: la nuve lo kuvria de dia, i de noche la aparyensya de fuego. ¹⁷I segun ke se alsava la nuve de sovre la tyenda, despues de esto se movian los ijos de Yisrael; i en el lugar onde la nuve se kedava, ayi pozavan los ijos de Yisrael. ¹⁸Al dicho de A’ los ijos de Yisrael se movian, i al dicho de A’ pozavan: todos los dias ke la nuve se kedava sovre el tavernakulo, eyos estavan kedos. ¹⁹I kuando la nuve se detenia sovre el tavernakulo muchos dias, entonses los ijos de Yisrael guardavan la guardya de A’, i no se movian. ²⁰I era ke kuando la nuve estava pokos dias sovre el tavernakulo, al dicho de A’ se kedavan, i al dicho de A’ se movian. ²¹I era, ke kuando la nuve estava dezde la tarde asta la manyana, i ke la nuve se alsava a la manyana, entonses se movian; o si estava un dia i una noche i la nuve se alsava, entonses se movian. ²²O si dos dias, o un mez, o un anyo, kuando la nuve se detenia sovre el tavernakulo kedandose sovre el, los ijos de Yisrael se kedavan, i no se movian; ma kuando eya se alsava, eyos se movian. ²³Al dicho de A’ pozavan. I al dicho de A’ se movian; guardavan la guardya de A’, segun el orden de A’ por mano de Moshe.

10

¹I avlo A’ a Moshe, dizyendo: ²azte dos trompetas de plata; de ovra batida las aras; i te seran para yamar la kompanya, i para la movida de los reales. ³I kuando tanyeren kon eyas, toda la kompanya se adjuntaran a ti a la puerta de la tyenda del plazo. ⁴I si tanyeren kon la una, entonses se adjuntaran a ti los mayorales, las kaveseras de los miles de Yisrael. ⁵Kuando tanyeresh aulasyon , entonses se moveran los reales ke pozan a oryente. ⁶Kuando tanyeresh aulasyon segunda vez, entonses se moveran los reales ke pozan al sud: aulasyon tanyeran a sus movidas. ⁷Ma kuando se a de adjuntar la kompanya, tanyeresh, ma no aularesh. ⁸I lo ijos de A’haron, los saserdotes, tanyeran kon las trompetas; i seran a vozotros por fuero de syempre por vuestros djerenansyos. ⁹I kuando vinyeresh a la gerra en vuestra tyerra kontra el angustyador ke vos angustyare, entonses aularesh kon las trompetas, i seresh membrados delante de A’ vuestro Dyo, i seresh salvos de vuestros enemigos. ¹⁰I en el dia de vuestra alegria, i en vuestros plazos, i en los prinsipyos de vuestros mezes, tanyeresh kon las trompetas sovre vuestras alsasyones, i sovre los sakrifisyos de vuestras pases; i vos seran por membrasyon delante de vuestro Dyo: yo A’ vuestro Dyo.

¹¹I fue en el anyo segundo, en el mez segundo, a los vente del mez, ke la nuve se also sovre el tavernakulo del Testimonyo. ¹²I se movyeron los ijos de Yisrael por sus movidas del dizyerto de Sinay; i kedo la nuve en el dizyerto de Faran. ¹³I se movyeron la primera vez al dicho de A’ por mano de Moshe. ¹⁴I la bandera del real de los ijos de Ye’huda se movyo primero por sus fonsados; i sovre su fonsado era Nahshon, ijo de Aminadav. ¹⁵I sovre el fonsado del trivo de los ijos de Yissahar era Natanel, ijo de Tsuar. ¹⁶I sovre el fonsado del trivo de los ijos de Zevulun era Eliav, ijo de Helon. ¹⁷I el tavernakulo era abashado, i se movyeron los ijos de Gershon i los ijos de Merari yevando el tavernakulo. ¹⁸I se movyo la bandera del real de Reuven por sus fonsados; i sovre su fonsado era Elitsur, ijo de Shedeur. ¹⁹I sovre el fonsado del trivo de los ijos de Shimon era Shelumiel, ijo de Tsurishaday. ²⁰I sovre el fonsado del trivo de los ijos de Gad era Elyasaf, ijo de Deuel. ²¹I se movyeron los Ke’hatitas yevando el santuvaryo; i los otros levantaron el tavernakulo myentras ke venian. ²²I se movyo la bandera del real de los ijos de Efrayim por sus fonsados; i sovre su fonsado era Elishama, ijo de Ami’hud. ²³I sovre el fonsado del trivo de los ijos de Menashe era Gamliel, ijo de Pedatsur. ²⁴I sovre el fonsado del trivo de los ijos de Binyamin era Avidan, ijo de Gidoni. ²⁵I se movyo la bandera del real de los ijos de Dan por sus fonsados, rekojyendo todos los reales; i sovre su fonsado era Ahiezer, ijo de Amishaday. ²⁶I sovre el fonsado del trivo de los ijos de Asher era Pagiel, ijo de Ohran. ²⁷I sovre el fonsado del trivo de los ijos de Naftali era Ahira, ijo de Enan. ²⁸Estas fueron las movidas de los ijos de Yisrael por sus fonsados, kuando se movian.

²⁹I disho Moshe a Hovav, ijo de Reuel el Midyanita, suegro de Moshe: nozotros nos partimos para el lugar del kual A’ a dicho: yo vo lo dare; ven kon nozotros, i te aremos byen; porke A’ a avlado byen sovre Yisrael. ³⁰I el le disho: no me ire, sino ke a mi tyerra, i a mi parentesko me ire. ³¹I le disho: te rogo ke no nos deshes, porke syendo ke tu saves nuestra pozada en el dizyerto, nos seras por ojos. ³²I sera, ke vinyeres kon nozotros, kuando tuvyeremos akel byen ke A’ nos a de azer, nozotros te aremos byen a ti.

³³I partyeron del monte de A’ kamino de tres dias: i el arka del firmamyento de A’ se movia delante de eyos kamino de tres dias, bushkandoles lugar de olgansa. ³⁴I la nuve de A’ estava sovre eyos de dia, kuando se movian del real. ³⁵I fue, ke en movyendose el arka, Moshe dizia: levantate, A’, i sean esparzidos tus enemigos, i fuygan delante de ti los ke te aborresen. ³⁶I kuando pozavan dizia: tornate, A’, a los miyares de los miles de Yisrael.

11

¹I fue el puevlo komo achakantes mal en oidos de A’, i lo oyo A’, i se ensendyo su fulor; i se ensendyo en eyos fuego de A’, i konsumyo los ke estavan en el kavo del real. ²I esklamo el puevlo a Moshe; i Moshe izo orasyon a A’, i el fuego se amato. ³I yamo el nombre del akel lugar Tavera; porke se ensendyo en eyos el fuego de A’. ⁴I la djente mesklada ke avia entre eyos, dezearon dezeo; i tornaron i yoraron tambyen los ijos de Yisrael, i disheron: ¿kyen nos dara a komer karne? ⁵nos akordamos del peshkado ke komiamos en Ayifto de baldes, de los kogombros, i de los melones, i de los puerros, i de las sevoyas, i de los ajos: ⁶i agora nuestra alma se seka; no ay nada sino man delante de nuestros ojos. ⁷I el man era komo simyente de kulantro, i su kolor komo kolor de bedelio. ⁸Se espandian el puevlo, i lo akojian, i lo molian en molinos, i lo majavan en morteros, i lo kozian en kalderas, i azian de el tortas, i su savor era komo savor de azeyte fresko. ⁹I kuando desendia el rosio sovre el real de noche, el man desendia sovre el.

¹⁰I oyo Moshe al puevlo yorar por sus linajes, kada uno a la puerta de su tyenda; i el fulor de A’ se ensendyo en gran manera; i en los ojos de Moshe desplazyo. ¹¹I disho Moshe a A’: ¿por ke iziste mal a tu syervo? ¿i por ke ayi grasya en tu ojos, ke puziste la karga de todo este puevlo sovre mi? ¹²¿me ensinti yo de todo este puvlo? ¿lo endjendri yo, para ke me digas: yevalo en tu seno, komo yeva el ke kria al ke mama, a la tyerra ke djuraste a sus padres? ¹³¿de onde tengo yo karne para dar a todo este puevlo? porke yoran a mi, dizyendo: danos karne ke komamos. ¹⁴No puedo yo solo soportar a todo este puevlo, porke es demaziado pezgado para mi. ¹⁵I si ansi tu azes konmigo, te rogo, matar matame, si ayi grasya en tu ojos, i no vea yo mi mal.

¹⁶I disho A’ a Moshe: adjuntame setenta varones de los vyejos de Yisrael, ke tu saves ke son vyejos del puevlo, i sus ofisyales; i traelos a la tyenda del plazo, is esten ayi kontigo. ¹⁷I desendere i avlare kontigo ayi; i tomare del espirito ke esta sovre ti, i pondre sovre eyos; i yevaran kontigo la karga del puevlo, i no la yevaras tu solo. ¹⁸I al puevlo diras: santifikadvos para manyana, i komeresh karne; porke yorastesh en oidos de A’ dizyendo: ¿kyen nos dara a komer karne? porke mejor nos era en Ayifto. A’ pues vos dara karne, i komeresh. ¹⁹No komeresh un dia, ni dos dias, ni sinko dias, ni dyez dias, ni vente dias; ²⁰sino asta un mez de dias, asta ke salga por vuestra nariz, i voz sea por asko, syendo ke menospresyastesh a A’, ke esta entre vozotros, i yorastesh delante de el, dizyendo: ¿para ke salimos de Ayifto? ²¹I disho Moshe: seshsyentos mil a pye es el puevlo entre el kual yo estoy; i tu dishiste: yo les dare karne, i komeran un mez de dias. ²²¿seran degoyadas para eyos las ovejas i las vakas, para ke les basten? ¿seran akojidos para eyos todos los peshkados de la mar, para ke les basten? ²³I disho A’ a Moshe: ¿se akurto la mano de A’? agora veras si te akontesera mi palavra o no.

²⁴I salyo Moshe, i avlo al puevlo las palavras de A’; i adjunto setenta varones de los vyejos del puevlo, i los izo estar al derredor de la tyenda. ²⁵I A’ desendyo en la nuve, i le avlo, i aparto del espirito ke estava sovre el, i puzo sovre los setenta varones vyejos; i fue, ke komo repozo sovre eyos el espirito, profetizaron, i no anyadyeron. ²⁶I kedaron en el real dos varones, el nombre del uno Eldad, i el nombre del otro Medad; i repozo sovre eyos el espirito; i estavan eyos entre los eskritos ma no salyeron a la tyenda, i profetizaron en el real. ²⁷I korryo un moso, i dyo avizo a Moshe, i disho: Eldad i Medad profetizan en el real. ²⁸I respondyo Ye’hoshua, ijo de Nun, ministro de Moshe, uno de sus eskojidos, i disho: mi senyor Moshe empedelos. ²⁹I Moshe le disho: ¿tyenes tu zelo por mi? ¡ma kyen dyese ke todo el puevlo de A’ fueran profetas, i ke A’ puzyera su espirito sovre eyos! ³⁰I Moshe se rekojyo en el real, el i los vyejos de Yisrael.

³¹I salyo un vyento de kon A’, i izo bolar kodornizes de la mar, i las desho sovre el real komo un dia de kamino de la una parte, i komo un dia de kamino de la otra parte, al derredor del real, i komo dos kovdos sovre las fases de la tyerra. ³²I se levanto el puevlo todo akel dia, i toda la noche, i todo el otro dia, i akojyeron las kodornizes. El ke akojyo menos, akojyo dyez homaros; i se las espandyeron espandyendo al derredor del real. ³³Dainda estava la karne entre sus dyentes, antes ke fuera mashkada, kuando el fulor de A’ se ensendyo en el puevlo, i eryo A’ al puevlo kon erida muy grande. ³⁴I yamo el nombre de akel lugar Kivrot ‘Hataava; porke ayi enterraron al puevlo ke tuvyeron dezeo. ³⁵De Kivrot ‘Hataava se movyeron el puevlo a Hatserot, i estuvyeron en Hatserot.

12

¹I avlo Miryam i A’haron kontra Moshe por kavza de la mujer Kushita ke tomo; porke avia tomado mujer Kushita. ²I disheron: ¿es verdad ke solamente por Moshe avlo A’? ¿no avlo tambyen por nozotros? i lo oyo A’. ³I el varon Moshe era muy umilde, mas ke todos los ombres ke avia sovre las fases de la tyerra. ⁴I disho A’ en subito a Moshe, i a A’haron, i a Miryam: salid vozotros tres a la tyenda del plazo. I salyeron eyos tres. ⁵I desendyo A’ en el pilar de la nuve, i se paro a la puerta de la tyenda, i yamo a A’haron i a Miryam. I salyeron ambos eyos. ⁶I disho: oid agora mis palavras: si uvyere entre vozotros profeta, yo A’ me dare a konoser a el en vizyon, en suenyo avlare kon el. ⁷No ansi a mi syervo Moshe, ke es fiel en toda mi kaza. ⁸Boka a boka avlo kon el, i a las klaras, i no kon enigmas; i la semejansa de A’ el ve; ¿por ke pues no temestesh de avlar kontra mi syervo Moshe? ⁹i el fulor de A’ se ensendyo en eyos, i se fue. ¹⁰I la nuve se kito de sovre la tyenda; i ek; Miryam era leproza, blanka komo la nyeve. I miro A’haron a Miryam, i ek, era leproza. ¹¹I disho A’haron a Moshe: ¡o senyor mio! te rogo ke no pongas sovre nozotros pekado: porke nos enlokesimos, i porke pekimos. ¹²No sea eya agora komo el muerto, ke en salyendo de la bulba de su madre, es konsumida la mitad de su karne. ¹³I esklamo Moshe a A’, dizyendo: te rogo ¡o Dyo! ke la sanes agora.

¹⁴I disho A’ a Moshe: si su padre eskupir uvyera eskupido en su kara, ¿no serea averguensada syete dias? sea enserrada syete dias afuera del real, i despues sea adjuntada. ¹⁵I Miryam fue enserrada afueara del real syete dias; i el puevlo no se movyo asta ke fue adjuntada Miryam. ¹⁶I despues se movyeron el puevlo de Hatserot, i pozaron en el dizyerto de Faran.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.