eSefarad Noticias del Mundo Sefaradi
Kreado atras serka unos trenta anyos i perfeksyonado dia por dia el “Smartphone” komo el nombre ke le metieron mos mostra ke es un telefon intelijente, enerjiko i elegante ke entra en las aldikeras ma ke en mizmo tiempo pejorativamente avlando, ke es ramay i ke aze sufrir en silensio. No mos espartimos mas de el ke de echar a echar i ke en el mundo aktual chikos komo grandes la mayoriya tiene uno. Esto me akodra ke en mi chikes en Estambol en los anyos kuarenta i sinkuenta mos ivamos a ver filmos Western de kovboyes ,los kualos no kaminavan sin plomos en la sintura, se echavan kon eyos i mizmo en tomando banyo en una bota de tavla los guadravan aryento la agua, por ke se espantavan de ser atakados. En akeya epoka jugando entre mozotros i imitándolos por ke era moda, mos plazia trokarmos en kovboyes kon plomos de plastik atakados a la sintura. Imposible de espartirse. El plomo de los viejos días de los kovboyes lo ramplasimos kon el telefon.
Las konsekuensas de esta mueva uzansa de depender del telefon de mano, todo en fasilitando la komunikasyon orala i eskrita i la transmisyon de la informasyon a una presteza ekstrema mos akaparra muncho tiempo i se ve sus efetos malos en transformandomos la vida de kada dia. Mos izimos sedentarios, no nesesitamos de korrer i ir a bushkar personas o mizmo kozas, un telefon basta. Ademas mos izimos amigos leshanos ,de poka kara ,entre mozotros i el malavladero(dedikodu) de las damas, al lugar ke sea echo en los kurtijos, en vijitas o en los kafes, se azen de kuzina a kuzina kon telefon. Esta individualidad de muevo tipo dyo raizes en las muevas jenerasyones i es ansi ke la djuventud aktuala pasa la mayoriya de su tiempo o kon su komputadora o kon su telefon de mano. Mizmo noche de shabat verlos asentados al torno de la meza la kavesa abokada mirando sus telefones sovre sus piernas mos deranjan munchos a mozotros los mayores .
Me pensi kualo dizirles a mis inyetas para ke se dezuzen de esta manera de komportamiento, para ke no uzen sus telefones en la meza de shabat, i detchidi de mandarles un SMS.
“ Keridas miyas ,
Ya se ke vos gusta vijitarmos i estar kon mozotros noche de shabat, ma toma en konsiderasyon ke a los nonos les gusta ke les avlen i ke los oygan, por esto vos rogo de no mirar a vuestros telefones kuando estach asendadas en la meza kon mozotros. Ya se ke adorash ke vuestro instrumento, ke malgrado todo lo ke vos dire, vash a kedar atadas a el. Solo ke sepash ke este atadijo es riskado ke se puede transformar en adiksyon. Ya se ke vuestra lingua eskrita es mesklada kon biervos en inglez, i aparejar un teksto sin un biervo en esta lingua se izo difisil. Ansi vozotros dezvelopash una lingua ibrida entre el ebreo i el inglez ke mozotros los ayedados apenas entendemos. Ya se lo ke pensarash de mi, ma vos asiguro ke no so kontra el progreso i los instrumentos modernos ke revolusyonaran vuestra vida. El solo punto ke me preokupa es el atadijo ke tenesh i tiendrash a los instrumentos al lugar de los umanos.
Si keridas, lo acheto so ayedado i no apartengo a vuestra jenerasion . Nasi i kresi en una diferente epoka, i puede ser ke so demodado para vozotras, ma ke sepash ke mi buto komo el vuestro es de ser orozo, unido al seno de la familya ; me gusta asentarme kon vozotros a kontarvos mis estorias i a oyer las vuestras.
Vos esto eskriviendo este mesaje porke ya se ke las fotos i las eskritas kedaran kon vozotros despues ke va despareser, i ken save podran servirvos un dia.”
Ke pensash, keridos lektores, será bien de embiyar mi eskrita a los inyetos? Si estarash de akordo, traduizilda en la lingua ke entienden, i purfia de enkorajarlos a kultivar relasyones umanas i no solo atraverso tekstos.
Selim Salti
Fuente: BÜLTEN de los turcanos de Israel – turkisrael.org.il
