SOVRE LA İJA por Fani Alyon ENDER – BÜLTEN de los turkanos de Israel

Keridos lektores komo vos aprometi la vez pasada, oy vamos a konoser siertos proverbos sovre la İja.

En tiempos pasados, nasimientos de ijas no eran tan bienvenidas en las famiyas por diferentes razones. La primera i la mas importante razon era la ekonomiya.

Vini echaremos un ojo a lo ke pensavan i diziyan sovre las ijas :

*İja, tanyedor i guerta, ande el vizino (porke todos los tres son kozas difisil a mantener i kavzan problemes i ansyas)

*Rozas I ijas ande el vizino. (lo mismo ke el de antes)

*La mujer ke es parida de ija no echa kortinas (no adorna su kaza) i no aze rijos (aparejos) – (la paridura de una ija no se aresive kon fiestas i allegriyas)

*Ande ay ija de kazar, el Dio deve ayudar.

*İja de kazar, fierro de mashkar.

*İja de kazar, nave de enkargar.

*Ken tiene ija de kazar, i en Shabat deve de lavorar.

*Buen mazal tengas ija, ke el saver poko te apresta ( el mazal es mas importante ke los estudios)

*Kuando ija nase, yoran mizmo las piedras de la kaye.

*Una ija: klavina, dos ijas: konjura, tres ijas: guay de akel padre.

*Kaza a tu ijo komo keres, a tu ija komo puedes. ( al poder de tu situasyon material)

*Ken ijo kriya oro enfila, ken ija kriya ansiyas enfila.

*La ija en la fasha, la dota i el ashugar en la kasha. ( Se deve de aparejar desde el nasimiyento).

*La ija kere buen fado, el ijo tresdoblado. (El ijo nesesita mas grande mazal i ventura)

*Ni pesah sin tomar / sin matsa, ni ija sin kazar. (ke no mos de el Dio !)

*Ni ija sin amor, ni vieja sin dolor.

*La lumbre i la ventana kitan a la ija hiragana ( en mirando por la ventana, se asenta i no aze echo)

*Mas vale ija kon maniya (kon profesyon) ke ijo por la marina (en lugares leshanos).

*İja kazada sien novyos a la puerta. ( Munchas buenas propozisyones vienen despues ke la ija ya se kazo)

*İjas i aziendas ( fortunas, kapital ) no se deshan en manos ajenas. ( se deve de bien konoser kon ken kazar la ija)

*Bueno giza mi ija, kon la alkuza (el bokal de azeite) yena . (es fasil de gizar bueno kuando tienes todos los mijores produktos).

*Eskoje tela de buena oriya ( borde) i ija de buena famiya.

*Ande tu ija no vaygas en kada diya.

*Mi ija aze i dezaze, sin azer nada no keda. ( se dize por ijas ke en paresyendo lavorar, en fakto no azen kozas util i non produisen nada )

*Nunka kamina mi ija, solo en diya de luvya. ( aze kozas a l’arroves i no util)

* Por buen tiempo, por mal tiempo, a tu ija ambeza bueno. ( no se save en la vida… la edukasyon es importante)

*Vo lo digo a vos ijas, para ke lo sienta mi ermuera ( del turko)

Keridos lektores, malgrado ke las ijas eran visto kon menos ardor, tenemos tanbien proverbos ke las alavan :

*Ken no tiene ija no tiene amiga.

*No ay mijor amiga ke la madre kon la ija.

*Siempre kon la ija, de la fasha asta la mortaja. (una ija nunka se Alesha de sus parientes)

Ke tengaj buenas semanadas i al vermos kon proverbos sovre los IJOS

Fani alyon Ender

Fuente: BÜLTEN de los Turkanos de Israel – turkisrael.org.il