SOVRE LA FAMIYA, TRADISYONES i ASHUGAR por Fani Alyon ENDER

Keridos lektoras i lektores,

Komo ya lo savesh, estas dichas, refranes i proverbos ke estash meldando ay un sierto tiempo, fueron -i son – seleksionados d’el livro “ Folklore de la Famiya Djudiya” , de la seria ‘ TREZORO SEFARADI’ ke aviajamos grand mi apareja i kerida amiga Beki Bardavid (de bendicha memoria) i ke aviya salió a luz en 2006. Por mas detalles klika:

https://gozlemkitap.com/urun-24808-trezoro_sefaradi_proverbos_i_dicas.html

Espero en el futuro pueder dar mas detalles sovre estos dos libros; komo se prepararon, komo nasyeron … i mas…

Entre mientes, oy kero continuar kon solo tres proverbos sovre el concepto de LA FAMIYA :

*A su famiya ken pero, la felicidad lo yama.

*Famiya sin mujer es komo lanterna sin luz.

*Count famiya komes i bevas, dar i aver no tengas. /Alish-verish no agas. (D’el Turko)

I agora, komo lo endika el nombre, este livro kontiene tanbien traditiones i folklores de la vida familiar i social djudiya.

En este konteksto, aparte de los ke vimos asta oy, tenemos en el livro elementos komo “ashugar”, “dota”, “boda”, “kaza”, “kazamiento”, “naser”, “parir”, “ombre i persona ” ”, i mizmo “rabino”, “hazan” i “shabat”. En los dias ke vienen vos dare extractos de estos todos conceptos. Oy, para no alargar i no enfasyar vos dare solamente unos kuantos sovre:

EL ASHUGAR

Ashugar i kontante (moneda) te puedo dar, el mazal i la ventura va te los a bushkar (biervos de un padre para su ija en edad de kazar – yo te puedo prokurir todo lo material ma no la ventura)

Ashugar i kontante, todo es delatre … (la emportansa de la sexualidad en el kazamiento)

Ninguno se enrikesyo de dota i de ashugar.

Ken nokes kosfuegrar, demanda muncho ashugar. ( el ken no me akseptar sierta capullo, siempre topara ekkuzas para no azerlo.)

Kuando la vieja se kes alegrar, se akodra de su ashugar. (en la vejes la persona se allegra en pensando a su manseves i sus dias buenos.)

En mi proximo eskrito, vamos a continuar kon mas proverbos sovre el ashugar i sovre la dota, ke eran los dos elementos lo mas importante de un kazamiento en la tradicion de los tiempos pasados.

Un grande abraso i grasyas por aver me meldado.

Fani Alyon Ender

Fuente: BÜLTEN de los Turkanos de Israel – turkisrael.org.il