Programa de radio “Muestra Lingua” – Todos los jueves

“Muestra Lingua”,un programa que se emite por Radio  J – 94.8 FM  de Francia y se puede oir en Paris y algunas ciudades cercanas, conducido desde hace cuatro años  por el señor Edmond Cohen.
 
 
Texto del programa del jueves 28/01/2010
 
 
 

 
TU BISHVAT.  LA MARCHA DE LA MUERTE

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves ke vyene 4 de fevrier, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.

Esto dicho, la aktualidad de estos ultimos diyas de janvier, me yeva a avlarvos de dos kozas kompletamente diferentes : de una parte, fue ayer myerkoles el dya mundyal del olokausto, komo dize la ONU, i tambyen el 65en aniversaryo de lo ke se yama la liberasyon del kampo de  Auschwitz, ke empeso el 27 de janvier 1945. De otra parte, el shabath ke vyene, 30 de janvier, vamos a fyestar Tu Bishvat, el Rosh ashana de los arvoles.

Mismo si Tu Bishvat vyene en el tyempo despues de los dos rekodros ke dishe en primero, vo empesar por Tu Bishvat, ke es una fyesta alegre, i vos avlare solo despues de esta koza terrivle ke fue lo ke se yamo la marcha de la muerte.

Por lo ke es de Tu Bishvat, no veo otra koza de dizirvos ke lo ke ya vos dishe los anyos pasados sovre esta ermoza fyestizika : komo ya vos dishe, en muestro kalendaryo, tenemos kuatro rosh ashana: el primo de Tishri, por siguro, ke es una mikra kodesh, una santa konvokasyon, el diya del djuzgo. Ama ay tambyen el primo de Nisan, en ke empesa el anyo en el tanah, el primo de Elul, a partir del kualo se empesa el anyo muevo de los animales para pagar la dima, i el kinze de shevat empesa el anyo muevo de los arvoles i dunke de sus frutas para kalkular la dima de las frutas.

Deke kinze se dize tu? Es porke los numeros en lashon son letras. Por egzemplo el trenta i treser dia del omer se dize lag ba omer, porke lag es lamed (trenta) i gimel (tres), dunke  lag es trenta i tres. De la misma manera, tu, es tet(mueve) i vav (sej) ,tu es mueve i sej, dunke kinze. Ama deke dizir mueve i sej, i no diez i sinko? Esto es porke si se eskriviya diez i sinko, kaliya tomar yod i he, lo ke es nombre del Dio. Para no yamar el Dio sin menester, dizimos mueve i sej en lugar de diez i sinko.

En Israel, ya savej ke el uzo se izo de sembrar arvoles en el diya de Tu Bishvat. En primero porke todas las okazyones son buenas en Israel de sembrar arvoles i de arrepushar el dezierto kada vez un poko mas leshos. Ama tambyen porke muestra relijyon tuvo syempre el respekto de los arvoles. El tanah, por egzemplo, defende de destruir los arvoles del enemigo. I muestros savyos adjuntaron ke si uno esta sembrando un arvole i le anunsyan ke ya vino el mashiyah, kale ke eskape de sembrar su arvole antes de irse delantre del mashiah. Agora ke estamos yorando sovre la destruisyon de la sharra de Amazoniya i de las grandes sharras del mundo, ke mos davan el buen ayre i ke serviyan de morada para tantos animales ke van a dezapareser, es bueno ke la fyesta de Tu Bishvat ambeze a muestras kriaturas el amor de los arvoles i de la natura en djeneral. Muestra relijyon es ekolojista.

En el galuth, no es el uzo de sembrar arvole, ama es el uzo de komer fruta, i a lo manko las syete frutas de Israel asigun el tanah, ke son el trigo, la sevada (l’orge)  , la uva, el igo, la agranada, la azituna i el datilé.

Esto dicho sovre Tu Bishvat, agora me tengo de aboltar a los dos rekodros ke vos dishe, i ke son mal nombrados los dos : ayer, komo vos dishe, era el diya mundyal de kommemorasyon del Olokausto, asigun la ONU, salvo ke para los djudyos, la matansina de los djudyos por los Almanes no teniya nada de ver kon un olokausto, ke es un sakrifisyo, i mozotros los djudyos, por lo manko en Fransya, no dizimos olokausto, i empleamos sin trasladarlo el byervo evreo schoa, ke kyere dizir katastrof.

De la misma manera, el byervo liberasyon empleado para nombrar la yegada de los Rusos en el kampo de Auschwitz el 27 de janvier 1945, uvo djusto 65 anyos ayer, no es falso si se avla de unos 7.500 deportados hazinos ke los Almanes aviyan deshado en el kampo i ke toparon los Rusos, entre los kuales el famozo eskrivano italyano Primo Levi ; para eyos, o diremos para los ke sovrebivyeron entre eyos, fue una liberasyon. Ama para la grande mayoriya de los otros, no uvo liberasyon, syendo ke mueve diyas antes de la yegada de los Rusos, el 18 de janvier, los Almanes tomaron a todos los otros prezoneros, unos  syen mil, i les izyeron empesar lo ke se yamo la marcha de la muerte, kijo dizir kaminar a pie, solo vestidos de sus pijamas i de kolchas si puediyan, en la inyeve i el frio de este invyerno terrivle de 1945, sovre kaminos interminavles, i despues en trenos avyertos. Entre eyos aviya muestro Prezidente Haim-Vidal Sephiha, aviya Simone Veil, i munchos otros al empesijo. Al kavo fueron menos, porke munchos i munchos se muryeron en este viyaje.

Yo, komo ya lo savej, ni so un testigo syendo ke por mi mazal no tuve de bivir esta koza, ni so un istoryano. En vedra egziste un livro ke fue eskrito por un senyor Daniel Blatman, intitulado Les marches de la mort, ama esta semana, asperando el nasimyento de mi inyetizika, tuve de ser baby-sitter de mi inyetiziko, lo ke es un full time job, un lavoro de tyempo yeno,  impidyendome de ir en biblioteka para meldar este livro. Dunke, para avlar de esta marcha de la muerte, me refyero a lo ke oyi de los rekodros de muestro Prezidente Haïm-Vidal Sephiha, ke los konto aze poko en un dokumentaryo ke vimos ay unos kuantos diyas en el Memoryal de la Shoa, i tambyen a unos rekodros otros ke meldi sovre internet, por senyores yamados Robert Marcault i Serge Smulevic. En kuanto a los ke kedaron en el kampo, i ke eran 7.500, asigun lo eskrivyo el jeneral russo Petrenko, el ke entro en el kampo, eran tan hazinos ke solo unos 2.000 sovrebivyeron mas de unos kuantos diyas. Entre eyos, komo lo dishe, Primo Levi ke lo konto en un livro intitulado Si es un ombre.

Por lo ke es de Haïm-Vidal Sephiha, tengo de adjustar ke oy mismo esta kontando esto en el Memoryal delantre de elevos del liseo franses de Estambol, i ke lo va empesar por de muevo, esta vez en kasteyano, el martes 2 de fevrero delantre de juezes arjentinos antes ke se vaygan en Polonya.

El 18 de janvier 1945, la armada russa se aserka de Auschwitz. Desde el kampo se oye la artiyeriya. El kapo de la SS, Heinrich Himmler, da el orden a los komandantes de los kampos, no solo Auschwitz, todos los kampos al este, de fuirse kon los deportados. Se dize ke kaliya tomar los deportados para ke no sirvan de testigos de los krimenes nazis.  Komo ya lo savej, los zonderkommandos, los ke se okupavan de los puerpos muertos en las kamaretas de gaz, eran matados de manera sistematika por la misma razon. Por la misma razon las kamaretas de gaz fueron dinamitadas .  Ama si esto era la razon de las marchas de la muerte, me demando deke los SS no mataron a los ke no eran kapaches de kaminar, i los desharon bivos. Yo tengo una chika idea, ama no puedo estar siguro de nada, sovre todo ke para mozotros, orozamente, es koza imposivle de metermos en la kavesa de los SS. Mi chika idea es la sigyente : de uno, los SS teniyan adjile de fuir i , mismo kon kamaretas de gaz, toma tyempo de matar a 7.500 personas en duna i de eskonder los puerpos kemandolos, sino, del punto de vista del sekreto,  no sirve de nada de matarlos. I de otra vanda, pensavan ke de toda manera estos hazinos, en el estado ande se topavan, deshados sin komer, sin bever, sin sobas ni koza de kemar, sin doktores i sin medikamentos, ya se ivan morir de suyos sin menester de matarlos, i komo vos dishe, malorozamente teniyan razon en grande parte : pokos sovrebivyeron

Esto, el menester de eskonder los krimenes, es la primera eksplikasyon posivle a la mas marchas de la muerte. Ama se pueden tambyen topar dos otras explikasyones a las marchas de la muerte : la sigunda eksplikasyon seriya ke  syendo ke no se puede yevar kon si las kamaretas de gaz, la marcha de la muerte es otra manera de matar, komo lo izyeron los Turkos kon los Ermenis en 1915.

Tresera eksplikasyon posivle: a la rovez, los Almanes ke estan pedriyendo la gerra tyenen menester de estos esklavos ke son los deportados, si tyenen bastante fuersa para no murir.

Se puede tambyen pensar ke las tres eksplikasyones son buenas en djunto : kaliya tomar los deportados para eskonder los testigos, kaliya matarlos por la misma razon, i si aviyan ke yene sovrebivyeran, mijor era ke lavoren para los Almanes ke abandonarlos a los Rusos.

Kual ke sean las razones de los SS, una tadre del 18 de janvier, kon un frio desgrasyado,los deportados son arrekojidos  para empesar la fuida a pye. Serge Smulevic moskonta komo deviya ser,visto del syelo, un enorme guzano salyendo de Monowitz (Auschwitz III) de kaji sej metros de ancho sovre unos mil i kinyentos metros de largo. Aze muncho friyo i una inyeve muy fina kaye desde oras. Los deportados kaminan en silensyo, guadrados por los SS ke travan i matan a kada uno ke no kamina bastante presto. No deshan mismo tyempo para pishar, mos konto Sephiha ; kale pishar sovre si. Robert Marcault, otro testigo, mos dize : « la dizenteriya me vazya ;el friyo es tan fuerte ke yela lo ke korre de mi i lo aze kuchiyos i algujas ke me arrasgan el puerpo. Mis kalsados son bolados i kamino pyezes desnudos sovre la inyeve. Mis pachas no kyeren mas kaminar ama yo keriya tanto bivir. Kuando los SS mo azen kedar, toparon muevo djugo para englenear : ovligar unos kuantos deportados eskojidos al safek de deshar el kamino i korrer en la inyeve profunda, i los SS travan sovre los deportados , i yaman este djugo  « la kasa de taushanes »,  kon grandes rizas de matadores bovanchones.

Esta marcha a turado diyas i noches para Robert Marcault, asta ke yege en el campo de Gross Rosen, ande se va kedar un poko, i despues de aya se va yene partir a pye asta un treno  no mos dize ande, ama mos konta ke los meten en vagones avyertos – todos los testigos dizen la misma koza : vagones avyertos kon un frio de entezador, tan munchos en kada vagon ke no se puediya asentar ni mismo mover, de tal manera ke mismo los muertos kedavan en pye, los ke se aresvalavan eran pizados i aogados. Sephiha mos konta ke el era el ultimo de suvir en el vagon, ande ya eran unos 160, i ke  pudo entrar solo echandose ensima de los otros. Sephiha toma la kolcha de los muertos, tyene 22 anyos i no kyere murir el diya de su aniversaryo, i durme ansina, luchando kontra el frio kon las kolchas i los puerpos de los muertos, sin nada de komer ni de bever. I mos dize ke ansina era tanto kansado ke durmyo, i durmyendo izo los suenyos los mas ermozos de toda su vida. Marcault mos konta la misma koza. Una vez, en una estasyon, unos ke los vyeron aprovaron de echarles pedasos de pan. Syertos ke izyeron esto fueron pishin fuzilyados.

Lo ke se ve kuando se melda esto todo, es ke no uvo, mismo avlando solo de los de Auschwitz, una sola marcha, la misma para todos. Uvo syertos ke ayegaron a pye a Gleiwitz i suvyeron aya en los trenos, otros suvyeron en Loslau, i Marcault mos konta ke suvyo solo despues de Gross Rosen. Kale pensar ke eran , asigun lo ke meldi, entre 60.000 i 98.000. Un treno yevando en jeneral entre 1.000 i 1.300 personas, lo savemos por las listas de Klarsfeld, kaliya en janvyer 1945 topar mas de sinkuenta trenos, i es siguro ke no era posivle ke se vayan todos en djuntos de la misma estasyon. Por esto, asighun mi,  uvo ke kaminaron mas ke otros. Por la otra vanda, todos no se fueron en el mismo kampo. Asigun lo ke meldi, uvo deportados de Auschwitz embiyados  en kaji todos los kampos de Almanya, de tal manera ke es normal ke kada uno tyene de esta marcha de la muerte  una istorya diferente de kontar.

Kale dizir tambyen ke, asigun el deportado, el mismo rekodro sona diferente. Avlando de Buchenwald ande ayego, Marcault mos konta su vida aya komo un infyerno, i ya se puede kreer syendo ke todos vimos por los filmos en ke estado eran aya los deportados. I por tanto, vyendo ke aya no aviya kamaretas de gaz ni seleksyon, un amigo miyo, Leon Lewkowicz, me disho : « Para mi, komparado a Auschwitz, Buchenwald era komo el Hilton ». Manera de avlar, no tengo menester de dizirvos. Ama ansina me avlo.

Sovre los ke se fueron de Auschwitz el 18 de janvier 1945, kuantos se muryeron ? Kuantos se kurtarearon ? No es kolay de responder. Lo ke es siguro, es ke dezenas de miles se muryeron en esta marcha.

Antes de eskapar esta emisyon, vos kyero avlar de estos pokos, ama yene 7.500, asigun el jeneral Petrenko ke los libero, ke eran tan hazinos ke no pudyeron irse kon los otros en la marcha de la muerte. Por esto vos vo meldar unos kuantos byervos ke eskrivyo Primo Levi, uno de eyos, ke aferro la skarlatin el 11 de janvier i se topa ospitalizado en el KB Infektionabteilung.

El 17 de janvier, el mediko grego vyene a ver los hazinos i les dize ke todos los hazinos ke pueden kaminar van a resivir kalsados i vestimyenta, i se van a ir el diya de despues por una marcha de 25 kilometros. Los otros van a kedar. Dos Ungarezos ke kaji no son mas  hazinos ama muy flakos se demandan kualo azer. Se espantan de kedar, siguros ke van a ser matados. Topan solo vyejos kalsados burakados. Es lokura de fuyir, en este estado de flakeza, nunka podran kaminar. Ama yene se van kon los otros. Levi no los vido mas, i se ambezo muncho mas despues ke al kavo de pokas oras fueron matados por los SS porke no pudiyan kaminar kon los otros.

En kuanto a Levi i sus amigos hazinos, van a empesar para eyos diez diyas afuera del mundo i afuera del tyempo.

La manyana del 18 de janvier, despues de la evakuasyon ke se paso durante le noche, Levi resive su ultima supa. No ay mas kalor. Afuera aze unos 20 basho zero, i los hazinos ke son vestidos tyenen solo una kamiza. Kedan solo unos kuantos SS. A las dodje, un zabit SS vyene para azer una lista separada de los djudyos i de los ke no son. Los djuddyos estan siguros ke eyos van a ser matados. Ama no. Al kontraryo resiven pan. Levi se va a bushkar kolchas ande los hazinos ke se fueron . Vyene la noche. Un SS se keda al lado de la baraka. I en supito, en medyo de la noche, todas las luzes se amatan, empesa un bombardamyento. No son matados , ama el vidro de la ventana se rumpyo. El friyo entra, kale pishin topar de kaentar : una soba, i lenya o kimur. I tambyen de bever i de komer.

Al amaneser del 19 de janvier Levi kon dos fransezes non djudyos dechidan de salir de la infirmeriya, afillu ke es proibido , syendo ke no ven mas a los Almanes. Almanes no ven, ama un alay de deportados hazinos, ke bushkan komo eyos, i ke kagan por dizenteriya sovre la inyeve ke es por tanto la sola fuente de agua de bever. Algunos toparon patatas, i las kozen kon el fuego de las lenyas kemadas por el bombardamyento. Levi i sus amigos topan unas kuantas patatas, i tambyen lo ke bushkavan lo mas : una soba.

Ansina va bivir Levi, grasyas a la kalor de la soba i de la lenya de las barakas destruidas por el bombardamyento, komyendo unas kuantas patatas pudridas i bevyendo inyeve fundida i suzya.

Vyendo ke los Almanes se fueron, el 23 de janvier Levi i sus amigos se atriven de salir del kampo bor un burrako de los barbelados, porke oyeron ke ay patatas en un lugar afuera. No es la libertad ke bushkan, son patatas. Las topan, i se aboltan al kampo…ande los deportados, todos hazinos, se mueren por miles sin kalor, sin de komer, sin de bever, sin medikos i sin melezinas.

Ansina van a kedar en el kampo asta la venida de los Rusos el 27 de janvier :ay 65 anyos ayer.

Lo ke vengo de kontar es travado del livro de Primo Levi Si c’est un homme (si es un ombre) Julliard 1987.

Ansina me vo kedar de mi emisyon, i para el djueves ke vyene, me vo esforsar de topar de dizirvos kozas ke sean menos apretamyento de korason.

Dunke al djueves ke vyene, si kyere el Dyo

Fuente: Ladinokomunita