eSefarad Noticias del Mundo Sefaradi
Selevramos kon un programa espesial el muevo anyo 5783 en el kalendario evreo. Partajamos kon los oyentes notisias de la aktualitá en el mundo por entero. Ofresemos eksplikasiones sovre la anyada mueva, su signifikado, el modo de selevrar kon el seder o kumida festiva, el toke del shofar, las orasiones i tradisiones de una de las fiestas más importantes de muestro kalendario.
Sentimos kantes festivos komo el litúrjiko «Alabar quiero al Dió», el kante en lingua ivrit «Libi Bamizrach» de la autoría de Yehudá Halevi i el alegre kante «Una tarde de verano» en la versión de Judy Frankel, de su CD Playa & Oro. Un alegre programa para una mueva anyada kon los oyentes. ¡Kaminos de leche i miel!
________________________________________________
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
