eSefarad Noticias del Mundo Sefaradi
FUYENDO
En mi pezgado suenyo
los arvoles estavan fuyendo.
Las kazas estavan korriendo.
Los rekordos me estavan manteniendo.
No estava mirando las montanyas,
ni las flores, ni las yervas vedres.
Tantela estavan las lagrimas kaentes
i komo ija chika
ke guadra la ridaika,
ensupito me desperto,
komo solombra ke no durmio
la noche ke no eskapo.
No se si despierta esto,
o esto sonyando.
——————————————————————————
Grasia Jak Albuhayre
Livro Nº 3 – 2012
Sofia – Bulgaria
Gracia Jak Albuhaire es de Karnobat- sivdad chika en Bulgaria. Era profesora, jurnalista. Eskrive poezia i proza en bulgaro i poezia en djudeo- espanyol. Eya partisipa aktivamente en el klub “Ladino” de Sofia, Bulgaria.
