eSefarad Noticias del Mundo Sefaradi
Haim Vitali Sadacca, que escribió y publicó poesía en turco en sus años jóvenes, ahora compone sólo la poesía en ladino, su amada lengua ancestral. Los poemas, elegidos por el propio autor, expresan las aspiraciones universales del alma humana para el amor, el afecto, la compasión, la generosidad, la paz y la armonía.
Disfrutaremos en esta sección la habilidad de Haim como poeta y su dominio de la lengua ladina.
UN MUNDO DIFERENTE
En mis esfuenyos mundo nuevo kero azer naser
Todos puedran desir» A kualo te vale? ke va ser?
Un mundo ke se djuzgara todo por fuersa divina
Para ke todos bivan plasientes d’una vida fina.
Ay munchos ke son de korason d’andjelos …Inosentes
Son sin kulpa, ma akuzados sin ser meresientes.
Flakos en dinero, sin tener unos arimos fuertes,
Son kastigados sin korason, les trokan las suertes.
Ay otros ke kometen kulpas i biven komo reyes,
No respektan al humanismo, no respektan las leyes.
Los tribunales no pueden ver siempre las derechuras.
Dinero fuerte, siertos faktos, i las falsas djuras
Azen trokar el destino d’akeyos de negra fama.
El kulpante inosente, el otro keda en flama.
Si este mundo se transformava en djuzgo divino
Ivamos ver en la kaye lo k’el pekador devino.
Sin ser djuzgado supito se va ver siego o kosho,
O sin avla,o kaminandose kon un braso flosho.
Si alguno rova,o si algun malo kalomniya,
Nunka tenera repozo,no tenera un buen diya.
El ke rovo estara hazino kon tremblor de mano,
El otro se va verse ke su boka se hue de lado.
Si mato,savera ke por una kulpa tanto fuerte
El kastigo de los sielos sera supito su muerte.
*****
Ken es ke tenera koraje a unos faktos feyos?
Ken son los ke echaran pasos yerrados ken de eyos?
Una sivilizasion reynara el mundo entero,
Seremos andjelos d’este paradiso verdadero.
SO KULPAVLE? O HUMANO ?
Eramos un grupo de una juventud floresida,
En las edades ke la distraksyon era meresida.
Las reunyones se aziyan los shabades solo,
Un akordeon mos dava gozo…. era un konsolo.
Estos dias eran konsiderados komo fiestas,
Para nuestros padres eran komo tiempos de siestas.
Esperavamos los rankontros kon grande alegriya
Esta distraksyon mos dava la mas grande enerjiya.
Baylar, reyir i ralamente karesos eskondidos,
I en vezes unos delikados jestos defindidos.
Los tangos santimantales mos envitavan a baylar
Todos kon prisa mos alevantavamos por angajar.
De un lado al otro kon alegriyas korriyamos
Para eskojer la mas vistoza ke dezeyavamos.
Las siyas eran vaziyas, solo una okupada
De una ijika ke se viya desafortunada.
Yo en baylando echava una ojada a eya
Era de aparensya sansible,de kara no feya.
Mirava los ke baylavan kon mirada dezganoza
Un revolto kayado se viya, era desgustoza.
El ser desapresyada o de su grupo desdenyada
Pensi a l’alegriya de su vida ke era danyada.
En los bayles proksimos biviya kon la esperansa
Ke uno azera una reverensya por la dansa.
De la vista se remarkava su grande dezespero
Yo sentiya su deseyo i ardor en su aspero….
La musika empesava, siempre mismas eskojidas,
Eran yenos de alegriyas, kon las mismas korridas.
Eya en su siya… Dramo triste ke me deritiya .
Keriya darle mi kerensya, solo para ke riya.
Me aserki kon sonriza, ize una reverensya
Remarki el gozo i su emosyon en l’aparensya.
Sentiya su mano en mi ombro un poko tremblando
Keriya saver su vida i lo ke estava pensando.
Dezeyava baylar fin la manyana por kontentarla
Para tomar vengansa de sus penas i kompensarla.
Kon ojos humidos en la ora de la espartisyon
En mis karas senti dos bezos kayentes de afeksyon.
M’espanti d’alguna senteya d’amor si kavzariya
Si hue yerro el espertarla…. la kulpa era miya.
Puedeser ke so el kavzante de meterla en risko
Salvandola de la luvya la arondji al piedrisko.
Perdoname Senyor de ser esklavo de mis sentidos,
Pensando a los de malas suertes i a los sin nidos.
Haim Vitali Sadacca
Montreal.
