eSefarad Noticias del Mundo Sefaradi
Con esta carta al lector, Moshe Shaul encabeza la edición número 85 de Aki Yerushalayim que ya desde su portada (kacha) se ve que es de fiesta ya que tiene una hermosa ilustración.
Los invitamos a recorrer Aki Yerushalayim en su página web que tiene una gran parte del material publicado y como siempre, colaborar suscribiéndose a la publicación que es un emblema para la defensa del ladino. Su dirección es www.aki-yerushalayim.co.il
Keridos lektores,
El primer numero de Aki Yerushalayim, publikado 30 anyos atras, en Avril 1979, era una publikasion muy modesta, una broshura de 20 pajinas, imprimida de manera muy amatora, sin grafika ni fotografias en kolor…
Si malgrado esto eya fue muy bien resivida i kon el tiempo yego a ser el portabandiera de la lucha para la konservasion i promosion del ladino i de su kultura, la razon es ke esta revista respondio a un verdadero menester de los sefaradis ladinoavlantes en Israel i otras partes del mundo: No deshar ke sus lengua i kultura despareska i sea pedrida enteramente.
Oy podemos dizir ke esta lucha ya dio buenos rezultados i ke podemos ser mas optimistas ke antes en lo ke toka el futuro de muestra kultura: la kreasion de la Autoridad Nasionala del Ladino, del Sentro Naime i Yeoshua Salti ansi ke del Sentro Moshe David Gaon, en Israel, i del Sentro de Investigasion de la Kultura Sefaradi Turko-Otomana en Turkia; enfin la konvokasion de un grande numero de kongresos i enkontros nasionales i internasionales, la publikasion de sienes de livros i miles de artikolos i la produksion de filmos i programas de televizion sovre los diversos aspektos de la kultura djudeo-espanyola, son una prova del grande intereso konsentido oy en el mundo entero enverso esta kultura i de los esforsos ke son echos para su konservasion i promosion.
Este es un dezvelopamiento muy enkorajante ke mos permete de esperar ke el ladino no esta tan serka de ser deklarado “lengua muerta” sigun lo pensavan munchos, asta pokos anyos atras. Kreo ke podemos dizir ke kontribuimos a este alkanse kon muestro “graniko de arena’, kon la publikasion perseverante, durante 30 anyos sin interupsion, de una revista militante, instruktiva i interesante – sigun puede ser visto de la seleksion de artikolos ke eskojimos para este numero espesial de Aki Yerushalayim – markando al lado de kada artikolo la data i el numero en el kual fueron publikados.
Esta es una seleksion ke puede dar una buena idea de la gran diversidad de los temas de los kualos tratimos i de la mizura en la kuala eyos ayudaron a tener un mijor konosimiento de muestra kreasion kulturala, a apresiar su valor i ermozura i luchar para su mantenimiento. Los alkanses de Aki Yerushalayim son devidos, naturalmente, a muestros lektores tambien, sin el apoyo de los kualos no uvieramos reushido a publikar esta revista durante tanto tiempo. – apoyo sovre el kual esperamos poder kontar en el futuro tambien i ke es importante oy mas ke siempre. Keremos agradeser aki a todos i aun mas espesialmente a los ke se djuntaron ultimamente a muestro “Klub de Amigos de Aki Yerushalayim”, ayudandomos a superar las difikultades finansiarias de la revista.
