eSefarad Noticias del Mundo Sefaradi
En estos dias salyo a luz un livro muevo: «Sovre LA PERASHA DE LA SEMANA.»
El livro, eskrito por Yehuda Hatsvi, kompletamente en Ladino, es una koleksion de komentarios sovre los kapitolos de la Tora, ke se publikavan, semana por semana,
en el foro de Ladinokomunita, i ayinda -asta oy en dia- durante mas de 5 anyos, estan publikados en los foyetones de las kehilot de sefaradis en Sud America.
El prefasio al livro fue echo por el Sr. Moshe Shaul, el vise-prezidente de la Autoridad Nasionala del Ladino.
El presio de este nuevo livro es:
65 Shekel en Israel
15 EUR en Evropa
22 USD en todas otras partes del mundo.
El livro se vende en el Bet Avot Recanati en Petah Tikva, i tambien es posivle de resivirlo por la posta eskrivir a eSefarad@eSefarad.com
PREFASIO
La kreasion de LadinoKomunita, el Foro de Internet de Konversasiones en Ladino, ya tuvo unos kuantos rezultados muy pozitivos para el futuro de muestra lengua – entre eyos la puja muy apresiable en el numero de personas ke partisipan a este foro no solo kon kurtos mesajes, sino ke tambien kon kuentos, rekuerdos de sus vida, poemas i mas, kontribuyendo ansi al esforso ke es echo en diversas partes del mundo para un renovamiento de la kreasion literaria en ladino.
Uno de los ke partisipan aktivamente a este esforso es Yehuda Hatsvi ke, en desparte de ser uno de los moderadores del foro, eskrive tambien una seria de komentarios sovre la Perasha de la Semana – inisiativa ke el empeso anyos atras en unas kuantas publikasiones djudias latinoamerikanas i esta kontinuando agora en LadinoKomunita, renovando en una sierta manera la tradision de «darsar» en ladino sovre temas de la relijion djudia, en el korso de las orasiones ke eran echas en muestros kales en las tadres o dias de shabat i de fiesta.
Algunos de estos sermones yegaron asta muestros dias, de manuskritos ke los darsadores avian guadrado entre sus dokumentos, o de las rubrikas espesiales, kon komentarios sovre la Perasha de la Semana, publikadas en algunos periodikos de la prensa en ladino. Regretablamente, solo pokos de estos komentarios fueron publikados en forma de livros i sus falta se konsiente aun mas i mas en muestros dias, kuando la tradision de darsar en ladino en los kales kaje i ya desparesio enteramente.
Es djustamente para remediar a esta falta ke la Autoridad Nasionala del Ladino desidio de apoyar la publikasion de este livro kon los komentarios de Yehuda Hatsvi, ke kontribuiran no solo a ke los ladinoavlantes puedan mijor konoser i apresiar la Biblia, sino ke tambien a los esforsos para ke el ladino no kede de ser una lengua biva i ke no sea relegado a los sirkolos de investigasion akademika solamente.
Moshe Shaul
Viseprezidente
Autoridad Nasionala del Ladino
«Livros en Ladino»
Comite para la difusion de libros en Ladino
PO Box 1057
Ramat Hasharon 47110 (Israel).
El plazer ke tomo de meldar los komentarios de Yehuda en este livro, nunka lo topi de otros komentadores. No solo ke mos ensenya, ma mos aze pensar de la sinyifikasion de la perasha para muestros dias.
Grasias a Yehuda por este tresoro en ladino.
Rachel