Pedrimos a un grande haham i muy kerido amigo: Yehuda Hatsvi, bendicha sea su memoria

Oy konosimos ke muestro kerido amigo Yehuda Hatsvi mos desho la buena vida el dia de oy. Aze pokos dias, el 21 de oktobre, el tuvo su aniversario de 93 anyos.

Yehuda fue un haham muy grande, un estudiozo de la tradision, del penamiento djudio i de la Ley, durante muncho tiempo el partajo kon mozotros aki en eSefarad munchos eskritos dezde su punto de vista djudio i sefaradí en su seksion LA BOZ DE YEHUDA.

Yehuda era aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo Aki Yerushalayim i El Amaneser, i fue uno de los moderadores de Ladinokomunita.

Trezlado las parashot al ladino kada semana para Ladinokomunita i publiko un livro kon esto yamado LA PERASHA DE LA SEMANA kon akdama de Moshe Shaul, dbm.

Tuvimos grande onor de toparmos kon el algunas vezes, mizmo ke moramos tan leshos uno de otro, alguna vez en su kaza i la dalkavo en kaza de su ija.

Siempre lo guadraremos en muestro korason kon grande karinyo i amistad.

Estamos en dolio tambien mozos por muestro kerido amigo.

Mandamos a su mujer, su ija i toda su famiya senseras kondoleasas i un fuerte abraso en este tiempo de grande dolor. Mas por dinguno no!

Liliana i Marcelo Benveniste
eSefarad