eSefarad Noticias del Mundo Sefaradi
Meldar todos los artíkolos de esta seksión
LA MEGILA DE SARAY
PREZENTASION
En el livro ke tenemos delantre istoria, lejenda i fantasía se mesklan intimamente, para formar una Saray únika, una Saray de todos los tiempos, ande el autor riushe a ekspresar la alma de la komunidad djudía, de los evenimentos mas sovresalientes, komo la ‘Megilá de Saray’ mizma, asta la vida de kada día.
Pasado, prezente i futuro se topan uno adientro del otro, komo un kuento se topa adientro del otro, ma la mas grande parte de la narrasión es echa, en manera sorprendiente, kaje toda através el diálogo. Un diálogo en puro estilo djudió-sefaradí, sigún la klásika tradisión djudía: el diálogo rabíniko kon pilpul(1). Porké lo ke enteresa el autor es de prezentar las dos partes en manera simétrika i deshar al lektor la desifrasión del mesaje ke sale de este diálogo.
Sus personajes, de Avraam i Rut a la nona ke konta sus konsejas, a los djovenes ke diskuten sovre la existensia del Dio, reprezentan en manera biva no sólo la Komunitá de Saray, ma todas las komunidades djudías de todos los tiempos. Mizmo si no savemos nada de eyos, a parte lo ke mos dizen sus palavras, eyos rezultan tan bivos a kavza de la hohmá i la umor fina ke el autor aze salir de sus palavras – hohmá i umor de las kualas está embevesido todo el livro. En realidad eyos son protótipos, ideas de personajes, de los kualos el autor ekspresa las dudas, los miedos, las sertitudes, los kuentos, de la ekspulsión de la Espanya asta muestros días, para ke la Saray djudía no venga ulvidada. En el mizmo tiempo tenemos personajes komo el echado a la buena parte i el partizán viejo, ke no pueden reprezentar otro ke la Komunitá de Saray. I todos son personajes ideales, ke reprezentan personajes reales del galut.
Ma la intelektualidad del livro no empide al lektor de emosionarse, en meldando la istoria de la alilá de la sangre, o de exilararse en meldando la epizoda del enrejistramiento.
Además el livro trae a la luz, evenimientos i personajes verdaderos, kantes, kuentos i poezías ke otramente serían olvidados, i ke akí topan mueva vida.
En días en los kualos kedó biva sólo la lingua oral, este livro está eskrito en lingua rabínika embevesida de kultura ebrea tradisional. Además él konserva uno de los dialektos ladinos en su totalidad: la lingua de la Saray djudía, ke sin este livro no iva a tener una tan emportante reprezentasión. Aún kon esto se siente akí ke mos topamos delantre de la lingua eskrita del autor mizmo, ke en realidad es únika.
El livro se eskapa sin terminar porké, komo disho el autor: ‘Se trata de la vida mizma, de la kuala fue tomado un minuto, i ke tiene su kontinuasión’, ke él ya está eskriviendo en la sigunda parte de la istoria de la Komunitá de Saray. I en verdá, Eliezer Papo sólo puede azerlo, porké la alma djudía de Saray está en él.
‘La Megilá de Saray’ es un livro de meldar kon muncha atansión, ke kedará entre muestras ovras mas emportantes.
Matilda Koén-Sarano
Yerushálayim, 10.1.1999
(1) pilpul: kazuístika rabínika
Nota sovre el autor
A lado de las oriyas del rio Milyatzka ke korre por el centro de Saray, se topa un kal viejo de kolor de roza. Aya me enkontri, algo komo diez anyos atras, kon Eliezer Papo por primera vez.
Intonses ya, su singularidad era evidente. Sus talentos numerozos ya se rekonosian. Aparentemente studiante de derechos en la Universdad de Saray, durante la larga kaminada en la kval bashimos i suvimos por las kalejas estrechas i torsidas de la sivdad, reaparesyo komo un eksperto en la istoria de la sivdad – mizmo komo en la de sus Djudios. Durante ke stuvimos parados en el viejo Bet a-Hayim djudio en el monte, mirando de aya abasho – al rio, el espartyo konmigo la panorama de la vida djudia de la sivdad.
Independente de pensamiento komo de akto, s’ambizo Ebreo de si para si, solamente por medio de maldar la Tora. Kvando moz enkontrimos por primera vez – su lengva, todavia, stava ornamentada kon anakronizmos aparentes de la avla biblika. Me konto komo, durante su primera vijita a Israel – non muncho antes de este enkuentro, utilizo a las viejas formas de vayomer i vayeleh para ekspresarse.
Proviniendo de la kultura multietnika i totalmente sekular de Saray de antes de esta ultima gera, Eliezer s’izo striktamente ortodokso – i sta perzistamente kritiko de las influensias de la manera de vida i del penserio oksidental sovre la tradision i sovre la praktika djudia. Todavia, el mantiene una manera muy atraktiva de mesklar lo sakro i lo profano. En la komunidad djudia de Saray el era more de lashon, maestro de Tanah, de istoria djudia – i, afilu, de Ladino. En ultimos anyos, el torna de Israel a Bosna para kondusir servisios sinagogales en Pesah i Yamim Noraim, mizmo komo para dar lisiones en la filosofia djudia. Agora, mizmo komo intonses, el avla en avierto i direktamente – alkansando de non perder ni su sentido de umor, ni su seriozidad serka el Propozito – afilu ni por un momento.
Tuviendo ke suspender temporamente sus studios rabinikos, Eliezer sta de skapar su karera del avokado para kortes rabinikos, sta planiando de segir estudiando en la Universidad – esta vez la filosofia djudia; tambien puede ser ke, todavia, segira en la direksion de obtener la semiha. Ultimamente el edito un livro, en Bosniako, sovre los derechos umanos en el konteksto del Djudaizmo (Ortodoksa) – asta ke en estos diyas sta lavorando sovre un Sidur tefila kon instruksiones para los Djudios ke kedaron in Saray. Todavia, topo tiempo para echarse en las profunduras de Ladino de sus antesesores i de la kutara sefaradi de Balkan.
En la tradsion sefaradi esta muchidumbre de formas diderentes de ekspresion kontienen tanbien i una instruksion divina introkable. En la Espanya de siglo de oro, los giyas de la Djuderia eran, en mizmo tiempo: rabinos i filosofos, edukatores i interpretadores, diplomatas i poetas, ombres de sinensia i darshanim. En su tiempo, esta aviertud a la sosiedad djeneral, i esta diversidad de profesiones stuvieron una de las maneras para ekspresar su loyalidad fundamentala a la Tora. Todo el tiempo ke eran atados a unidad autentika de los prinsipales de su Fe, los Djudios Sefaradis podieron entrar i salir por todos los aspektos de la vida umana sin tener ke sakrifikar su integridad.
Kontinuando en su propia persona esta tradsion Sefaradi de ribuy mitoh ahdut (la muchidumbre provieniendo de la unidad), el autor sta una personifikasion de las temas ke eskojyo por su romanse.
En el kavso de los Djudios de Saray, esta unidad en el fondo de muchos interesos i profesiones empeso a dezapareserse kon la asimilasion i desimasion del ultimo siglo. El Ladino partikulario por esta sivdad agora sta entendible solamente a unos kvantos viejezitos ke kedaron.
Loke Eliezer alkanso eskriviendo La Megila de Saray ez de arikujer de muevo a muchos de los eslabones de esta tradision. En una forma konsentrada, el sta kreyando de muevo la vitalidad istorika de los Djudios de Saray en la mizma lengva en ke bivieron.
En Talmud (Baba Batra 9a) sta dicho ke un maase sta mas grande ke akel ke lo izo. Aki, todavia, tenemos una paralela egzakta entre el autor i su kreasion literaria. En su fokus i en su konviksion los dos stan uno, los dos stan lo mizmo.
Yechiel Bar-Chaim
JDC Country Director
for the Nations of the Former Yugoslavia
May 1999
Dedikasion:
En memoria de mi kerida i inulvidable nona Milena, sin la kval mi mundo interno seria inimajinable.
Oy sto biviendo solamente para Ti,
i konosiento komo si biviera solamente oy.
Stuvites un momento en kval enbivi todo.
Stuvites todo – ma turates un momento.
Danas živim samo za Tebe,
i osjećam da samo danas živim.
Bila si tren u kome sam proživjeo sve.
Bila si sve – a trajala si tren.
Esta kandela la ensiendo en Tu memoria,
ma ya se ke mil kandelas non tienen
fuego de una palavra Tuya,
ke mil kandelas non tienen la luz de Tu ojo.
Palim ovu svijeću za spomen tebi,
a znam da ni hiljadu svijeća nema
plamen jedne Tvoje riječi.
Znam da ni hiljadu svijeća
nema svjetlo Tvog oka.
Sea komo sea, kero ke esta kandela arelumbre para Ti –
i Tu para siempre arelumbraras dientro de mi.
Svedno, neka ova svijeća gori za Tebe –
a Ti – Ti ćeš vječno gorjeti u meni.
Los personajes de esta ovra non tienen ninguna relasion kon la realidad – mizmo komo no la tuvieron kvando las kozas akontesieron.
Los akontesimientos istorikos mensionados en este roman no stan manipulados menos ke en kvalkier livro de istoria.
el Autor
—————————
De el livro ke fue publikado kon el ayudo i estimulo de:La Autoridad Nasionala del Ladino i su Kultura i de The American Jewish Joint Distribution Committee. Yerushalayim 5759 . Estampado en Israel 5759, 1999.
Edision del Autor, 1999.
© Copyright
Eliezer Papo
Hayim Vital 35/12,
Yerushalayim,
ISRAEL
הוצאת המחבר, תשנ»ט
© כל הזכויות שמורות
א ל י ע ז ר פ א פ ו
חיים ויטאל 35/12,
ירושלים,
י ש ר א ל
053 – 827064
E-mail: Andaluz@pob.huji.ac.il
Printed in Israel 5759, 1999.
————————————————————–
Eliezer Papo es nasido en Sarajevo, Bosnia i Hercegovina i mora en Israel. Es avokado, rabino, eskritor i profesor en el Departamento de Literatura Ebrea en Ben-Gurion University of the Negev, Beer Sheva, Israel annde ensenya foklor i literatura popular, espesialmente literatura i kultura sefaradi. Tiene eskritos i artikolos en ladino, puvlikasiones i prezentasiones el kongresos i simposios.
Es protagonista del dokumental El ultimo Sefaradi (2003) una produksion de Alea / Televisión Española (TVE) / ARTE G.E.I.E
