eSefarad Noticias del Mundo Sefaradi
Ver todos los artículos de esta sección
Kindertransport (4)
Barbara i Rudolf Wertheim, marido i mudjer djudyos de Almanya desidaron en 1907 de baptizarsen al kristianizmo i de emigrar a la ingletyerra. Este modo disheron «Va moz avrir una paja mueva en la vida». En 1909 nasyo Nicholas el chiko, se engrandesyo i empeso a lavorar en la banka. En seguida se izo komisyoner (broker) de borsa. En 1937, kuando muryo su padre Rudolf, troko su alkunya a Winton.
En 29/9/1938 se afirmo el «Pakto de munih» entre los Almanos i los Italyanos de una parte, los anglezes i los fransezes de la otra parte. En este pakto las partes kedaron de akordo ke la teritorya chekoslovaka yamade «Sudet» va pasar de las manos de los chekoslovakes a las manos de los Almanes i los Almanes no van a atakar a chekoslovakya (Ha.. Ha.. Lo ke izyeron en marso 1939). En 10/10/1938, el dia ke la rijyon Sudet paso ofisyalmente a las manos de los Almanes, mas de milyon refujidos se fuyeron de Sudet a la rijion de Prag. El governo chekoslovako dyo orden a liberar toda la armada en el pais, mando a todos los soldados a kaza i aresento en los kampos militaryos a una parte de los refujidos de Sudet. Lo mas de los refujidos eran djudyos dezmazalados ke estavan en las kayes, en tentas, sin vistimyentas apropreyadas, entezandosen del frio.
A los kavos del anyo 1938 resivyo Nicholas Winton una envitasyon de su amigo en Prag, Martin black, ke venga ayi a azer una vakansa de ski. Nicholas aksepto esta envitasyon i arivo a Prag. Su amigo estava okupado kon azer byenfezensyas a los refujidos ke vinyeron de Sudet. Kuando vido Winston a los ijikos refujidos en las kayes, se le estrecheyo el korason i desido de ayudar a su amigo. Estos eran los dias de «Kindertransport» ke el governo inglez dyo permisyon a ijikos Almanes a entrar a la Ingletyerra komo pasanjeros. Winston penso de tomar permisyones semejantes para los ijikos refujidos de Chekoslovakya. Esta misyon no era fasil. Los ijikos ke ya estavan en la Ingletyerra no estavan topando famiyas ke los abrigen. Los inglezes los estavan insultando, los estavan yamando «Almanes» i «Espiyones».
Bill Barazetti nasyo en Suis a una famiya rika. En 1933 se fue a meldar filozofia en la universita de Hamburg. Aya se ekspozo a la umiliasyon i la kruelidad ke estan sufriyendo los djudyos de parte de los nazistos. Esto le toko muncho i desido a kolaborar kon los servisyos intelijentes Chekoslovakos luchando kontra los nazistos. En 1936 los nazistos lo aferraron i lo aharvaron una haftona buena fin ke les paresyo ke ya esta muerto. Una kazalina (Anna) lo topo a Barazetti en los kampos, kaji muerto, lo arekojyo, lo tomo a su ombro, lo arrasto a su kaza i lo melezino (a la fin se kazaron).
En 1938 Barazetti enkontro en Prag a Nicholas Winton i los dos desidaron a kolaborar. Nicholas va tornar a la ingletyerra para tomar del governo permisyones para los ijikos de Prag i Barazetti va aranjar los transportos del «Kindertransport» Chekoslovako.
Nicholas trusho kon el, a la Ingletyerra, mas de 1000 fotografias de ijikos. El i su madre lucharon muncho para topar famias a estos ijikos. Imprimaron las fotografias 
en kartpostales, eskrivyeron «Eskoje ijiko!» i bushkaron famias inglezas ke esten de akordo a abrigar uno o dos de eyos. Fondaron el «British Committee For refugees from Czechoslovakia » (La komunita ingleza para refujidos de chekoslovakia), Nikolas «se izo» el prezidente i empesaron a mandar letras. Dyeron anunsos i bushkaron famiyas ke estan prontas de garantizar el abrigamyento de los ijikos de Prag, entregando un 
depozito de 50 Sterling para asigurar el tornamyento de los ijikos atras. Esta suma la ivan a tomar atras de los ijikos ke ivan a vinir. Una parte de esta suma fue pagado de la aldikera de Winton. En parallel, lucharon kontra el governo ke no keria dar mas permisyones. A la fin reushiron a obtener 900 permisyones. Barazetti, de su parte aranjo los transportos. Este modo empeso el Kindertransport de los ijikos de Prag a la ingletyerra. Las madres metyeron a kada ijiko un numero a la garganta i los entregaron al treno. En syete transportos se salvaron 669 ijikos. El ochen transporto, kon 251 ijikos rejistrados, malorozamente no pudo salir de 
Prag por kavzo de la gerra ke empeso en el mizmo dia. Munchos de eyos no kedaron en vida. Una ke kedo en vida, la sinyora Ruth Noemi Federman (La patrona de la kadena de los hoteles «Dan») reusho durante la gerra a arivar a Israel. Sus dos ermanos fueron asesinados en Auschwitz.
En el empesijo de la gerra los ijikos de Kindertransport no eran keridos en la Ingletyerra. Los yamavan «Almanos» i eran suspechados komo espiones. Kuando empesaron los bombardemanes Almanes fuertes a Londra (The Blitz) los inglezes desidaron de aleshar a los ijikos de londra 70 kilometros, por ke ya se saviya ke los aviyones bombardemanes Almanos no pudiyan alkansar a esta leshura. Kada ijiko resivyo una maska de gas. Famiya ke aksepto a abrigar ijiko de London aresivyo del governo 10 shilling i 6 penny. Este modo, se mesklaron los ijikos de Kindertransport kon los ijikos inglezes i empesaron a ser tratados en una forma igual.
A kontinuar…
