eSefarad Noticias del Mundo Sefaradi
Ver todos los artículos de esta sección
Kindertransport (5)
Israel Wilfrid
Komo ya mensyonimoz, Kaufhaus N.Israel kontinuo a funksyonar en la pozisyon de Wilfrid toda la epoka del rejim nazisto, fin a el empesijo de la sigunda gerra mondial. Esto fue achakes la suditansya Ingleza ke obteniya Wilfrid. Los Almanes se detuvyeron de azer danyo a los byenes etranjeros. En 1939 liberaron los frenos. En Avril 1939 los Almanes konfiskaron finalmente el Kaufhaus, dospues de 124 anyos de lavoro. Wilfrid kedo sin bienes ama reusho a salvar la koleksyon de arte oriental i la trusho a la Ingletyerra. En ogusto 1939 vino yene a Berlin para okuparse de los ultimos transportos de los ijikos, i torno a Londra.
Albert Einstein le iva eskrito:
«Me gusti muncho de oyir ke finalmente estas en luguar seguro. Lo ke izites fue una bravura alta i no me puedo liberar de mis sentimyentos ke sos una persona demaziya buena para este mundo i para el doredor ke ovrates por el, tyempo tan largo.»
Kuando Wilfrid torno a la Ingletyerra gano un posto de investigador en la universita Oxford i kontinuo azer sus esforsos para salvar djudyos de evropa. Entre otros, organizo una ovra de salvasyon, obtenyendo 600 sertifikates ke permiten el entrar a Israel, para los djudyos de Espanya i Portugal.
Durante su vida Wilfrid ayudo a Margot Klausner para trayer el teatro «Habima» a Israel, ayudo a Reha Freier en la fondasyon de «Aliyat Hanoar» en 1932 (muvimyento ke ovra fin a oy para trayer mansevos djudyos a Israel) i en el mandamiemto de los 12 mansevos primeros a Israel, ayudo a la fondasyon del «Kazal De Mansevos Ben Shemen» i fue el prezidente de este kazal fin a ke se muryo, akompanyo la fondasyon del kibuts «Hazorea» i lo vijito durante la gerra.
Malorozamente, Wilfrid peryo su vida, en 1/6/1943, tornandose a Londra de su misyon en Lisbon, aya ovro para salvar djudyos. Su aviyon sivil fue golpeado i destruido de parte de los aviyones de gerra Almanos. En el mizmo aviyon se muryo tambien el artisto Inglez de sinema Leslie Howard i 15 personas mas.
Wilfrid desho por erensya su koleksyon de arte oriental para el kibuts Hazorea. En 1951 se fondo en el kibuts «Muzeo Wilfrid De Arte» i esta koleksyon esta guadrada aya.
La ultima misyon de Wilfrid era misyon de la «Ajensiya Djudia – Hasohnut Hayehudit». Por esta razon Wilfrid es konosido komo soldado ke kayo en las gerras de Israel i es nombrado kada anyo en las seremoniyas del «Dia De Memoria» por los soldados ke kayeron en las gerras de Israel.
Un anyo dospues de su muerte, se dekoro Wilfrid kon un sinyo de «Djudyos Salvante», de parte del sentro mondial de «Bney Brit».
Los kriteryos para ser «Djusto Entre Las Nasyones» son:
- No es djudyo
- Risko su vida i ayudo a salvar a lo manko un djudyo.
Wilfrid era djudyo i no se pudo konoserse komo «Djusto Entre Las Nasyones». Esto, malgrado ke salvo de muerte miles i miles de djudyos.
En 2016 se kompleto un filmo dokumentaryo kon el nombre «El ombre desparesido – La istorya de Israel Wilfrid» ke se puede ver en los sinematekes.
A kontinuar…
