eSefarad Noticias del Mundo Sefaradi
Ver todos los artículos de esta sección
Kindertransport (6)
Nicholas Winton
Nicholas Winton lucho no solo kon el governo inglez para tomar permisyones de emigrasyon para los 
ijikos de chekoslovakya. El tambyen eskrivyo letras a lideres de otros paises. Uno de estos fue el prezidente de los Estados Unidos, Franklin Delano Roosevelt, ke le respondyo: «El governo de los estados Unidos no puede permeter esta emigrasyon por la mankura de la lojistika menesteroza…».
Winton salvo 669 ijikos. Los 251 de alkavo no puedyeron partir de la chekoslovakya achakes la gerra. Todos estos ijikos estavan rejistrados es su defter kon todos los detaylos i las fotografias. El defter fue metido en el yukri de kaza i Nicholas kontinuo su vida.
Durante la gerra winton lavoro volontaryamente en el «Kruz Korolado», se izo ofisyer en «Royal Air Force» i ensenyo pilotes el «Primer Ayudo Mediko». Dospues de la gerra lavoro Winton en la «Organizasyon Internasyonal Para Los Refujidos» i en la «Banka Internasyonal Por reabilitasyon i Developamyento De Paris», en Paris. Aya konosyo a Grete Gjelstrup vinida de Danimarka i se kazaron. Les nasyeron tres ijikos: Nick, Barbara i Robin. Robin nasyo kon «Down Syndrome» i muryo de 6 anyos de menenjit. La muerte de Robin toko muncho a Winton ke en seguida fondo el «Maidenhead Mencap Society» (organizasyon de ayudo a los invalidos i sus famiyas) i el «Winton House-the Abbeyfield society», kadena ke apartyene 3 kazas de rezidensya protejada, en la rijyon de Maidenhead, para los aedados.
Pasan kaji 50 anyos. 1988.
Los ijikos salvados por Winton ya estan padres, madres, nonos i nonas. Biven en diferentes partes del mundo. Munchos de eyos no enkontraron a sus famiyas, ke fueron undidas en los krimatoryos, no saven komo arivaron a la ingletyerra, no saven ken organizo i komo se organizo estos transportos. Grete ke suve al yukri de kaza topa un defter vyejo kon fotografiyas de ijikos i yeno de detaylos. No save kualo es. Su marido no le aviya kontado nada. Avla kon su marido, entyende lo ke es este defter i desida de azerle una surpriza.
Winston i su mujer resiven una envitasyon de Esther Rantzen, la prezentadora del program «That’s Life!» (Esto es la vida!) en el kanal BBC de la televizyon inglez. Rantzen les «frega una hohenta» por la razon de la envitasyon. Winston esta asentado en el rango primero. En la sala ay mas de 100 personas. Rantzen kita el defter i melda un nombre de mujer, Vera (Diamant) Gissing. Eksplika ke esta mujer es una de los ijikos de Kindertransport i demanda si eya esta en la sala. Vera esta asentada al lado de Winton. Se empesan a abrasar. Dospues demanda Rantzen si ay en la sala otros ijikos de kindertransport i roga de eyos ke se alevanten empies. Todos los asentados en la sala se alevantan…
Este modo, dospues de 50 anyos, se save en el mundo ken es Nicholas Winton.
En 1983, Winton aresive el titolo «Member of the Order of the British Empire (MBE)» (Miembro del Orden del Imperyo Britaniko) por sus ovras kon personas aedadas.
En 1998 aresive el titolo el mas valorozo de la chekoslovakya «Miembro del orden Tomas Garigue Masaryk».
En 2002 aresive de la reyna titolo de kavayero «Sir», por su ovra en Kindertransport.
En 2003 aresive el «Premyo de Orgolyo» por sus «Alkansos de Vida».
En 2010 el governo Inglez le da el titolo «British Hero of the Holocaust» (Eroiko Britaniko del Holokosto).
En 2014 aresive la medalya del sentro Raoul Wallenberg.
Winton vino a Israel en 2005. «Sus ijikos», entre eyos Hugo Marom, prekuraron a obtenerle el titolo de «Djusto Entre Las Nasyones». El primer kriteryo, ya savesh, es ke no seya djudyo. Winston no era relijyozo. Se kreiya en los valores de etika. Saviya ke era kristyano. Todo en estando asentado en el buro de Yad Vashem azen un telefon a su ermana ke los informa ke sus paryentes eran djudyos baptizados 2 anyos antes ke nasyo Winton. Komo ya se save djudyo syempre keda djudyo i Winton de 96 anyos entendyo ke es djudyo. Naturalmente no se pudo dekorar komo «Djusto Entre Las Nasyones».
En 2009, Winston kumple 100 anyos. «Sus ijikos» i «sus inyetos» desidan de repetar uno de estos transportos, de Prag a Londra. Se enkolgan a sus gargantes sus numeros i salen a kamino kon un treno vaporado. Este viaje kontinuo 4 dias. Winton los aresivyo en la istasyon del treno en Londra. Se abrasaron i partyeron la torta de aniversaryo kon la eskriturya de 100 anyos.
Nicholas Winton moz desho la vida Buena en 2015, i el de 106 anyos.
En «You Tube» puedesh ver munchos filmos travados kon Nicholas Winton. Entre eyos:
https://www.youtube.com/watch?v=c0aoifNziKQ
https://www.youtube.com/watch?v=HxkCeVtwHl8
https://www.youtube.com/watch?v=9hrmc2q7FbM
https://www.youtube.com/watch?v=65bHQ6RdC7c
I un filmo largo yamado «Nicky’s Family» en el link:
https://www.youtube.com/watch?v=Qba7sA7Fkbc
A kontinuar…
