eSefarad Noticias del Mundo Sefaradi
Ver todos los artículos de esta sección
«Abachata…»
(La idea tomada de Karen Sharhon)
Esta bela (este mal) empeso kon la ley mueva del governo espanyol ke permityo a darmoz, a los djudyos ekspulsados de Espanya, la suditansa espanyola. I mozotros, kon nombre del Dyo, izimoz los pasos menesterozos para tomarla. Dospues ke pasimoz todos los yesurines ke saven azer los espanyoles (i sanos ke esten ya saven azer), parvinimoz, en el fin del kamino, a tomar los pasaportos espanyoles.
Todo estava bueno asta ke un dia mi ija eskapo el askerlik, vino i me disho: «Papa, pensi muncho komo azerte ekonomiya de paras (??), ke no gastes muncho (??), i topi la solusyon». No se deke, kuando mi ija me dize ke me kere azer ekonomiya de paras yo empeso a sudar… Dospues kontinua i me dize: «Agora ke semos espanyoles me va ir a Madrid i va meldar los estudyos mios en la universita de aya. Ya saves ke los espanyoles en Espanya no pagan eskolaje. Este modo te va ekonomizar miles i miles de shekalim ke tenias de pagar a la universita en Israel…». Kualo voz dishe? Sudar no es, me estan kayendo chorros… Le empesi a rogar: «Ija mia, manseva de 20 anyos, en tyerra ajena, sin famiya, sin amigos, sin saver la lingua, sin kaza de morar, sin arevenido, komo te vas a mantener, komo te vas a dirijar??» Me responde: «No te estrecheyes papiko, los primeros tres mezes moz van a ambezar la lingua, dospues yo va meldar i lavorar. Todo se va a enderechar. No te sikileyes!!»
No ay ke dizir ke kuando la mujer, indimas manseva, mete una koza en el tino esto no se kita de aya ni kon kerpeten. Este modo fue ke antes 8 mezes la yevimoz a la madmuazela a Madrid, le alkilimoz kaza, la akompanyimoz a la universita, le augurimoz reushita buena i tornimoz a kaza.
Antes dos semanas dishe me ire a verla, mirare komo se esta dirijando. Me meti en el aviyon i vine a Madrid. Ya moz enkontrimoz. Bezos, abrasos, komo estas komo no estas, komo te estes desbolvyendo? Mashallah, ya la topi buena. Ya se ambezo un poko en espanyol i un poko ke ya saviya de las telenovelas, esta estudyando, esta lavorando komo garsona en un restorante… Si no avlamoz de la «ekonomiya» ke me iva azer, todo esta bueno. Me dize: «Papiko, me empesi a ir a un kurso de bayle ke aki esta en moda. Todos los mansevos se estan ambezando este bayle. Se yama «Bachata». Oy tenemoz enkontro. Ven kon mi ke veygas…». Bueno dishe, me ire i vere. Si es Bueno, le ambezo i a mi mujer en Yerushalayim, moz vamoz a baylar.
Arivimoz al luguar. En el empesijo todo estava ermozo. Un mansevo i una manseva, aleshados una del otro, en los dos kantones de una shena alta, estan azyendo syertos pasos i los estudyantes abasho los estan suivando.
Dospues de medya ora se dyo el sinyo! Los maestros abasharon abasho, todos los estudyantes se areglaron en kuples i empesaron a baylar. Mi ija se tomo a baylar kon un estudyante preto kon dos eskuralichas en el oyido, una en la seja i una en la naris… No se kualo vos dizere. Un bayle sensual… Apegados una al otro… Mi ija tyene la naris eryentro de la boka del preto… Las pyernas meskladas una aryentro de la otra, ke no se save kuala pyerna es de eya i kuala es de el… Unos muvimyentos seksuales… La mano de eya esta en el kulo del preto… Si las mansevas no kedan prenyadas dospues de este bayle es un miraklo!! Na, lo pudesh ver aki:
Emprimero me vino dolor de tripa. Dospues me tomo una titirme (tremblamyento) en las pyernas. La kavesa me se esta aboltando, me empesi a chapetear… Kurto vo lo azere, no me esto akodrando lo ke afito dospues. Me esperti en la kaza de mi ija oyendola en el telefon ke esta kontando a su madre: «No te estrecheyes mama, esto es un virus espanyol ke se yama «Abachata», fin a la demanyana ya le va pasar… I kuando va tornar a Yerushalayim te va ambezar a ti un bayle maraviozo…»
Albert Israel
