eSefarad Noticias del Mundo Sefaradi
Ver todos los artículos de esta sección
Yafo 86
No ay ken de mozotros ke no paso dyezes de veses de la kaye Yafo numero 86 en Yerushalayim, serka del charshi de Mahane Yehuda, i no se admiro del adifisyo ermozo kon la entrada splendida, ke funksyona desde la independensya del estado de Israel komo la «Ofisina de Salud Rejional». El fronte de este adifisyo es por la vanda de Yafo. De atras tyene un kortijo grande, kon dos pozos de agua ke eran muy emportantes i ke oy son tapados. Enriva de la entrada aviya una tarasa ermoza (ke no egziste mas) kon eskaleras arodeadas en su dos partes.
Entre 1891-1917 el adifisyo fue utulizado de parte de los Osmanos komo Ospital Munisipal, yamado «El musteshfe». Enriva de la puerta se puede ver, dayinda, el sinbol de la imperya osmana.
Durante la gerra mondial primera, el ospital se incho de hazinos de Tifus i fue definido komo el ospital de Tifus.
Dospues de la gerra, en 1919, los inglezes situaron en el luguar la «Ofisina Prensipal de Salud», el «Laboratoryo de Medisina legala» i otros laboratoryos medisinos diferentes.
Si notamoz ke este adifisyo se empeso a fraguar en 1881, naturalmente vash a demander:
«Ke afito kon este adifisyo durante 10 anyos, entre 1881-1891?».
La repuesta de esta kesyon es muy enteresante i surprendente:
Baharat E-Saadya era ijo de una famiya hristiana katolika, konosida i rika en Yerushalayim. Kuando Baharat desido a kazarse, su famiya desidaron a fraguarle una kaza ermoza para ke more aya dospues del kazamyento. Este modo se empeso a fraguar el adifisyo en Yafo 86. El primer etaj se fraguo, todo estava pronto para la boda i las famias estavan emosyonadas. En supito, leshos de aki, se muryo Baharat. No demandesh ke dolyo grande les vino en las kavesas de las dos famiyas. En estas soflamas de este haber preto, la madre del novyo tomo una desizyon muy shokante. Todos los doliantes se arekojyeron en kaza, lo vistyeron al muerto vistido de novyo i lo asentaron a una siya. La novya vino kon el fostan riko i elegante de boda, djoyas i buketo de rozas, los ojos tapada kon el velo de la korona i empeso la boda. La madre del novyo empeso a baylar el bayle tradisyonal de boda kon una kandela en kada mano, gritando: «So ovligada de baylar, so ovligada de baylar…». Los envitados le gritaron: «Es tu dover, es tu dover…». Kuando eskapo de baylar echo un chiyo fuerte de muerte, travo el velo de los ojos de la novya, el kadavre se metyo en la kasha de muertos i empeso la seremonia de funeral.
La madre del novyo se muryo de angusya, poko tyempo dospues de la muerte de su ijo. El fraguamiento se areto por munchos anyos. Un riko ke kontinuo a fraguar este adifisyo se muryo pishin, dospues ke paso a morar aya. Un anyo dospues se muryeron su ijo i uno otro de su famiya.
Asta ke vinyeron los Osmanos i se apatronaron del lugar.
Keridos! si en estos dias tenesh de entrar a este adifisyo, emprimero toma la desizyon djusta: Ke vistido es apropriado de vistir?
Vistido de boda o vistido de funeral…
Albert Israel
