eSefarad Noticias del Mundo Sefaradi
Ver todos los artículos de esta sección
El egzamen de alkavo
Ahmet sherif izgoren – Traduizado (libre) por Albert Israel
Eskola de travajo sosyal. Yo so el profesor de relasyones humanas i komunikasyon interpersonal. Este es el egzamen de alkavo. Los elevos ke vana pasar el egzamen vana ganar el derecho de resivir el grado B.A. en travaho sosyal. Vana ganar el derecho de establizar relasyones humanas, de komunikar i de giar personas desmazaladas. Ayudar a personas ke tyenen problemas grandes en sus vidas i ke estan bushkando ayudo.
Me esto konsintyendo una responsabilita muy pezgada enriva de mis ombros. Ya ay 6 mezes ke esto pensando kualo demandarles en este egzamen…
A la fin les demandi 3 demandas. Las dos demandas primeras eran demandas muy fasiles. Aviya menester de eskrivir solo 3 linyas para dar repuesta korekta a kada demanda. Kada una de de estas dos demandas fueron estimadas por 25 puanes.
La demanda tresera la estimi por 50 puanes. El ken va dar repuesta yerada a esta demanda no va pueder pasar el egzamen. La demenda fue:
«La kualidad la mas emportante i la karakteristika prensipal de un travajador sosyal es la posibilidad de ser persona humana, de pueder identifikarse kon el ke tyene delantre i ke puede konsintir los sentimyentos de el.
Kuatro anyos estash entrando i salyendo de este adifisyo. Kuatro anyos, diya por diya, estash pasando al lado de una lavoradera ayedada ke vos barre i espondja las klasas, ke vos alimpya las ventanas, ke voz alimpya los servisyos etc… La demanda es: Kualo es el primer nombre de esta sinyora?»
Todos se enkantaron. Esto mirando a las karas de los elevos… Si tyenen revolver me vana tirar… Sali de la klasa por dos minutos para ver si ay ken save la repuesta i la va relevar a los otros. Los esto oyendo de la puerta… Dingunoz no saven…
Ya voz puedesh imajinar ke todos los elevos dyeron la repuesta korekta de las dos demandas primeras i dingunoz de eyoz no supyeron el nombre primero de la lavoradera. Todos resivyeron la nota 50 i no pasaron el egzamen. Solo uno de eyoz fue eksepsyonel. Me eskrivyo esta repuesta:
«Kerido maestro. El nombre de la lavorante no se. Klaro ke no pasi el egzamen. Pensi muncho demi para mi deke no se el nombre de eya? Entendi ke no do valor a personas ke no me azen provecho. Si era manseva ermoza, si era unas de las profesoras miyas, si era la patrona miya d’el echo siguro ke saviya el nombre. De esta alimpyadera no tengo provecho. Tyenez muncha razon. Dainda no esto pronto a tener la responsabilita de un travajodor sosyal. Oy me ambezi una leson muy emportante.»
Este elevo resivyo la nota 100 i paso el egzamen. Se ambezo lo ke kije ke se ambeze i no reushi a ambezarle durante los 4 anyos.
Dospues de dos semanas vino la sinyora Kohen al buro miyo. Me disho «Vine a regresarte, sinyor profesor. Yo lavoro aki 15 anyos, dingunoz de los elevos no me miran en la kara no se konsyenten de mi egsistensya. Ya ay una semana ke todos los elevos tuyos me estan yamando kon mi nombre, me estan saludando i se estan enteresando de mi. Me esto konsintyendo Ben Adam. Vine a disirte Munchas Grasyas!!»
De tu bolsa no me arti de tus palavras me kontenti.
