eSefarad Noticias del Mundo Sefaradi
Ver todos los artículos de esta sección
La otra ekspulsion
por Albert Israel
En 1996, en la sivdad de Guildford (mas de 40 km afuera de Londra) i durante una renovasion, se topo debasho del suelo de un magazen de ropas yamado Monsoon, restos de una sinagoga medieval del anyo 1180. Parese ke esta es la sinagoga la mas vieja en toda la Ingletierra. Asegun los arkeologos, la sinagoga fue abandonada en 1270. Se toparon eskalones de piedra ke abashan del nivel de la kaleja medieval al nivel de la sinagoga, lo ke amostra ke esta sinagoga fue siempre un lugar sekreto en el bodrum.
La sala adornada kon kuatro kolonas, banko de piedra en el deredor entero i un taban (suelo) de lajas, lo ke da sinyos de lugar importante. Al este de la sala ay un nicho i una kolona kon sinyos de kemaduras mostrando ke ayi kemava una flama. Se supoza ke ayi estava el «Aron Hakodesh» i ke las kemaduras son del «Ner Tamid.» Dospues del deskuvrimiento de esta sinagoga, pensaron a meter en el magazen un suelo de vidro para ke se puedan ver los restos, ma no se izo. Oy solo se pueden ver fotografias, i algunos artefaktos del kavakamiento.
Este dekuvrimiento moz aze demander komo bivyeron los djudyos en la Ingletierra ke oy es konosida komo un pais adelantado, pais de puevlo humano, pais ke aya nasyo la demokrasia?
No ay ke dizir ke moz vamoz a surprendar kuando vamoz a meldar, entre otras, ke la ovra de «Ekspulsyon» no es un invento espesyal de los Espanyoles.
Desde el kavo del siglo XI, la komunidad djudía en la Ingletyerra tomava una parte esansiel de la ekonomía ingleza. Los djudyos eran permetidos a emprestar moneda kon intereso, koza ke para los kristianos era defendido. Sus negosyos en Londra, Norwich i Lincoln prosperavan. Lavoravan komo médikos, djoyeros i poetas, ma emprestar moneda, mezmo a los reyes, era sus negosyos prinsipal. Tenian rolo grande en la funksyon de la ekonomía ingleza.
De la otra vanda los anyos ke vinyeron no fueron una perioda fasil para los djudyos de la Ingletierra. Desde el medyo del siglo XII, uvo un kresimyento de antisemitismo en Ingletierra i en la Evropa entera. No mankaron pogromes, kalomnias de sangre (akuzasiones fabrikadas ke los djudíos asesinan ijikos kristianos para uzar sus sangres en rituales mágikos), asesinasyones, iftiras, taksos governales i mas.
En el anyo 1144 mos enkontramoz kon la kalomnia de sangre dospues ke se topa un ijiko kristiano muerto en Norwich.
En 1189 semoz testigos a pogromes kontra los djudyos de London i en 1190 kontra los djudios de York. En los pogromes de York mueren mas de 100 djudios.
En 1255 se enforkaron 18 djudios en Lincoln, kuando se topo otro ijiko kristiano muerto en un pozo.
En 1275 se lejislo la «ley de djudyos» i se defendyo el emprestamiento de moneda.
En 1278 los djudyos fueron akuzados por falsifikasyon de moneda, mas de 300 djudios fueron aprezados i matados. Los otros djudios fueron ovligados de kuzir en en sus vistidos sinyo amariyo (???) en forma de las tavlas de ley.
El kavzo enteresante afito en Ingletierra en el anyo 1290. 202 anyos antes de la ekspulsion de los djudyos de Espanya.
En 18 de julyo (ke era dia de tisha beav) afirmo el rey, Edward uno, al edikto de ekspulsion por todos los djudios ke bivian en la Ingletierra. La razon ofisyal era ke los djudyos no estan mantenyendo las leyes espesyalas lejisladas kontra eyos. 16,000 djudios, fueron forsados de salir el pais fin a el 1/11/1290. Djudyo ke va kedar dospues de esta data va ser matado. Los djudios, ke no tenian remedyo, emigraron a la Fransya i a la Hollanda. Todo el bien ke los djudyos no puedian tomar kon eyos, komo kazas terrenos i otros, fueron konfiskados de parte del governo. Una de las barkas, yena de djudyos ke partyo de la Ingletyerra, se enfinko en una roka por kavzo de la depresyon de la mar. Los emigrantes abasharon de la barka para deskansarsen. Kuando la mar suvyo atras, el kapitan se fuyo kon la barka i los abandono a los emigrantes, dizyendoles: «Yamaldo a Moshe ke vos arazge la mar».
Solo dospues de 365 anyos, en 1655, Oliver Cromwell, ke era el primer lider Inglez dospues de la gerra sivil i ke lucho por la independensia del parlamento, dyo la permisyon ke los djudyos tornen al estado, en kontraparte de moneda.
Ke sepamoz ke los espanyoles ya teniyan de ken ambezar este ofisyo…
Dizeremoz i esto:
Al kontraryo de la Espanya ke anulo el edikto de ekspulsion en el anyo 1968, la Ingletierra nunka anulo el edikto suyo de ekspulsion fin a oy en dia.
Seguro ke este artikolo fue bazado en parte sovre uno de Ladinokomunita de Febrero, 2018.