eSefarad Noticias del Mundo Sefaradi
Ver todos los artículos de esta sección
YITSHAK (EL BARITON) LEVI
por Albert Israel
Yitshak (el bariton) Levi nasyo en 1919 en la sivdad Manisa, serka de la sivdad Izmir, en Turkiya. Kuando teniya 3 anyos los turkos reokuparon la sivdad de las manos de la arma grega. Los gregos, retirandosen, kemaron kaji la sivdad entera. Miles de personas se muryeron. La famiya levi, fuyendose de esta desgrasya, se metyo en kamino i arivo a Erets Israel. El chiko Yitshak se engrandesyo en la mahalle Ohel Moshe, vizinos kon la famiya Navon.
Yitshak estudyo, en primero, en el Talmud tora del haham Meir Antebi, aya se ambezo el djudaizmo i las orasyones djudias. Dospues kontinuo su estudyo en la eskola Alians i aya se ekspozo a la kultura oksidental. Su lingua natal de kaza era ladino, ansi ke se ambezo el franses rapidamente. Teniya una boz maraviyoza. Las tadres, dospues de la eskola, se iva a developar su boz i ambezar a tanyar piano.
Kuando eskapo sus estudyos empeso a lavorar en la posta. En mizmo tyempo era el avlante (דובר) de la organizsyon klandestino «Etsel». Azyendo todo esto, kontinuo a estudyar muzika. Meldo en el konservatuar Shulamit en Tel Aviv i a la fin en la akademi de muzika en Yerushalayim. Se ambezo a kantar kon los ayudos del kompozitor i kantador famozo Yitshak Eliyahu Navon, el kantador famozo de opera Herman Yadlovker i el famozo Pablo Kazales.
Yitshak Levi teniya boz bariton i todos lo yamavan «El bariton». Kuando kantava en el radio, en las kazas se oyiyan las bozes de las madres ke diziyan: «Kayades!! Kayades!!! El bariton esta kantando!!». Yithak era kantador demandado en Israel i en los paizes de afuera. Era el Primer ke kanto romanseros en ladino. El kantava en los kales, en el radio, en salas de sinama, en kampos de la armada, en los kibutses i en salas de opera afuera del paiz. Kundo kantava en los kales la djente se arekojiyan en el doredor del kal para oyir su boz.
En munchos kavzos preferava de ser rekompensido kon livros en luguar de paras.
En el empesijo de los anyos 1950 empeso a lavorar en «Kol Israel» en posto de direktor de la «Seksyon Sefaradi». Aya se dediko a la kultura sefaradi, se travo de kantar, i empeso su «ovra de su vida» ke es «Arekojimyento de kantes, melodias, orasyones, romanseros i poetikos sovre la kultura sefaradi». Tomava su teyprekorder vyejo i pezgado de bobinas kon el i se iva de kaza a kaza para tomar en la banda todo lo ke se akodravan los ladinoavlantes, los mas de eyos ayedados. Kuando tornava a su kaza oyiya los kantes arekojidos, endevinava la melodiya djusta, las palavras djustas i rejistrava los byervos i las notas muzikalas. Esta ovra ekstraordinarya kontinuo mas de vente anyos. A la fin se enkacharon 10 livros tituleados en nombre «La antolojia de hazanut sefaradi» i 4 livros de «Romanseros sefaradi». Esta koleksyon enorme de kantes fue un trezoro ke no tyene presyo para todos los kantadores famados. Los kantadores viniyan a su kaza i le rogavan kantikas de el. Entre eyos Yehoram Gaon, Rivka Raz, Eti Grotas, Lolik, Ran eliran, Mayk Burshteyn, Aleksandra, Ilanit, Shimon Kohen, Ariye Libanon, Mark Labri, Paul Ben Hayim, Shlomo Artsi i mas…
En su punto de vista el puevlo de Israel era puevlo oriental, kuando la lingua «Ladino» es uno de los komponentes rezyos en su kultura. Por esta razon, en el fin de kamino, la muzika en Israel se va estabilizar en el stil oriyantalo.
El sinken prezidente del Israel el sinyor Yitshak Navon, ke este en gan eden, i Yitshak Levi ke este en gan eden tambien, eran amigos de chikes. Navon lo keriya muncho a Levi, sintiya sus kantikas i teniya sentimyentos de eskarinyo por el. Levi ayudo a Navon en la ovra grande de «Bustan Sefaradi» i Navon ayudo a Yitshak en topar remedyos para pueder publikar sus livros.
Yitshak levi se kazo dos vezes. De la primera mujer Malka, tuvo un ijo Yeruham. De la sigunda mujer Kohava, ke i eya es una kantadera famoza, tuvo 5 kreyaturas: Yehuda, Yuval, Iris, Smadar i Yasmin. Iris, malorozamente se muryo de un anyo i medyo, de puntada. Yasmin, ke biva munchos anyos, es kantadera muy famoza en el mundo entero.
Yitshak Levi se aranko de la vida en 1977, manseviko de 58 anyos. Moz desho un patrimonyo kultural enorme ke puediya ser un trezoro por kada instituto akademiko en el mundo. Achakes de el se deskuvriyo el kante sefaradi kon toda su glorya i se izo la propriedad del puevlo entero. Yitshak levi alkanso en su kurta vida lo ke no alkansaron institutos akademikos grandes en 500 anyos.
En 1978, dospues de su muerte, aresivyo el «Premyo De Yerushalayim».
En su sivdad de nasido Manisa i en Yerushalayim se topan dos plasas nombradas a su nombre.
Su alma ke repose en gan eden.
Aki puedemos oyir a su ija Yasmin, azyendo duet kon la boz de su padre:
