eSefarad Noticias del Mundo Sefaradi
Keridos amigos i amigas
El fuego ke tomo lugar en la Katedral de «Notre Dame» en Paris fue un dezastre grande i no solamente el Puevlo Franses estava en choke pero kaji el mundo entero. En el Daily Telegraph de oy avia munchos artíkolos i tomo en mano el ke fue presentado por «Stephen Drill i Chloe Lyons».
Saludes a todos
——————————————————————————-
NOTRE DAME SE VA EN FLAMAS I DESHA UNA FAKTURA GRANDE
Se esta arekojiendo fondos a traves el mundo para la rekonstruksión de Notre Dame, a la fin del insendio. El fuego aranko al techo de la katedral de 850 anyos i destruyo 2 tiersos del imoble. Se sentia ayer la golor del umo en el aire. Sienes de djente estavan a lo largo del Rio Seine. Los bomberos (tulumbadjis) lucharon por 12 oras para salvar las torres en frente. Las autoridades no pensan ke era un akto de terrorismo. Viene del lavoro de la restaurasion del techo. El anyo pasado los offisiales de la Iglesia Katólika disheron ke la iglesia estava en un estado malo i ke era nesesario de gastar 150 milliones de Dolares. El governo kijo dar solamente 50 milliones en una dekada, forsandolos a resivir ayudo del estranjero. La djente estava yorando i aziendo orasiones en kanto. El Presidente Macron disho «Vamos a rekonstruir. Esto es parte de muestro destino en Fransia para los anyos vinientes. Notre Dame es nuestra historia, nuestra literatura i sentro de muestra vida i kon tantos livros i pinturas es la katedral de todo el Puevlo Franses. Vamos a servirnos de los talentos los mas grandes, porke es esto ke aspera el Puevlo Franses. Muestra istoria lo merese i es muestro destino» Ovras de arte i objetos relijiosos fueron salvados. Mismo La Korona de espinas de Jesus el Kristo. Los saserdotes en tiempo de peligro entraron a la katedral, formando una kadena umana para salvar unos de los tresorios. Los bomberos fueron alavados por sus esforsos bravos. Los rikos izieron kontribusiones en milliones i las autoridades lavoraron en prisa para evakuar al puevlo atrapado al dentro. Puedia ser 1000 personas..
LUGAR DE TODOS LOS TIEMPOS.
La konstruksion de Notre Dame empesó en 1163 en tiempo del Rey Louis VII i se kompleto en 1345. Despues izieron innovasiones GOTHIC a todas las iglesias a traves la Europa. Henry VI de Ingletierra a la edad de 10 anyos fue koronado komo Rey de Fransia basho el Tratado de Troyes en 1431. La katedral fue vandalizada i konvertida al «Templo de Razón» por los Ateos en la Revolusion Fransesa de 1790. Fue restaurada por Napoleon Bonaparte a una Iglesia Katólika i en segido el mismo se korono komo imperador de Fransia en 1804. «Victor Hugo» avlo de la dekadensia del imoble en su livro «El Korkovado de Notre Dame». Fue su manera de atirar la atensión a esta kestion. En 1905 el governo se apodero de la katedral i deklaro ke era una Iglesia Katólika. «Joan de Arc» fue beatifikada en 1909 por el Papa Pius X. Tropas Amerikanas i Fransesas liberaron a Paris de los Alemanes en la Segunda Gerra. Notre Dame atira a 14 milliones de vijitores kada anyo i forma la mas grande atraksión turístika. Los servisios de seguridad toparon un karro yeno de bombas en 2016 afuera de la katedral. Antes del insendio se avia gastado 7 milliones de Dolares sovre la restaurasión.
Trezladado por Shimon Geron.
Sydney, Australia
Fuente: Ladinokomunita
