No ay komo madre por Nissim Ashkenazi

Karos todos

Mi madre, d.b.m, se enbivdo al anyo 1950, dos anyos detras ke mi padre fue tirrado en la gerra de la independensia, i ospitalizado dos anyos.

Era epoka preta en mi famiya, onde mi madre deviya korrer dos anyos al ospital para ayudar a mi padre ke estava gravamente ferido, kon medio puerpo paralizado, i mas de esto engrandeser una ija i tres ijos…(mision imposivle).

Mi madre, komo muchas mujeres ke vinieron de Salonik, no ambezaron en las eskolas, ama teniyan intelijensia i kapachidad de konfrontar las difikultades de las vidas. Mi madre saviya refranes, pensava en forma lojika i topava selusyones en kavzos komplikados.

Mi madre reusho i desho la vida buena detras ke vido ke estamos todos estudiados, kazados i aresentados, i kon ijos i ijas.

Vos konto un ekzemplo de los aktividades de mi madre.

El paes estava en los pasos primeros, okupado en la absorbsion de miles de djudios reskapados del holokosto i aresentarlos ke empesen vida normala. La problema sentrala era la mankeza de batimientos. No aviyan kazas ke den abasto a la demanda de las famiyas ke vinyeron i las famiyas ke dainda no estavan aresentadas. Las fraguas de kazas muevas tomo mucho tiempo i kazas para arkilar no dieron abasto.

Yo ya era askieriko jovino. Mi madre me yamo i me disho: deves de avansar para merkar kaza, i me konto ke el ministerio de la absorbasion i de la abitasion, salieron kon una programa de fraguar kazas muevas, de tres kamaretas (udas) i espandirlas asigun la loteria ke faziyan de vez en kuando. Mi madre kon su senso lojiko, me enkorajo ke me entre a esea programa.

Yo acheti i empesi a dar pagamientos en kada mez. Teniya un tefteriko onde eskrivieron los pagamientos, ke turan en vezes muchos anyos. Kada primo del mez, mi madre komo un polis, demandava, metites para el Shikun (kaza)? Eskrivieron al tefter ? siempre kon el buto de verme aresentado.

Pasaron dos anyos, i estuve envitado al enkontro de la loteria, onde salen los ke ganan a eskojer apartamento en las kazas prontas. Parese ke kon la tefilla de mi madre salio mi nombre. Para realizar este sonyo kale ke aigan tres partes: uno los pagamientos, dos el empresto de la banka (בנק משכנתאות), i tres  el resto del kosto de la kaza, para tomar la yave…

Me fue a mi madre i mi ermana, i les konti. Kon alegriya me disheron: no te preokupes, de aki i de aya vamos arekojer el sumo nesesario. Toda la famiya ayudo, los ermanos, los tiyos i amigos, i la yave la tomi. Seguro ke todos los emprestos fueron pagados kon pasensia i sin entereso.

Achakes de este kierer fuerte de mi madre, yo komo jovino, inda no kazado, ya teniya la yave de mi kaza en mis manos.

Las madres son komo Leonas, para protejar i adelantar los ijos i ijas. Eyas son kapaches de pasar todos los trompesos.

En Gan -Eden ke arepozen las almas de las madres ke desharon la vida buena.

Kon amista.