eSefarad Noticias del Mundo Sefaradi
Kuando Marcelo i yo vijitamos Estambol en 2008, mos topimos kon la istoria de Nesim Benbanaste z’l de la boka misma de su ermano Daniel.
Por siguro en kada pais tenemos personas dedikadas a la komunidad de korason i echo, a mas de intelidjentes i sensivles, ma no son konosidas mas ke por sus amigos i parientes.
El 12 de djulio se kumplió el aniversario numero 17 de su partida de este mundo, ke en Ganeden esté, i komo un omenaje a este Benadam kero kontar su istoria.
Al karar de kozas ke izo, esto no es muncho, ma vos dara una idea de su persona i de su penserio.
Nesim Benbanaste nasió en Estambol en el anyo 1939, fue diplomado del liseo djudio i 
despues kontinuo los estudios en la Fakultad de Derecho de Estambol. Durante su servisio militar aktuo komo profesor en la armada, ensenyo en las eskolas de Diyarbakur. Fue también profesor en las eskolas djudias i Direktor en la eskola de Ortaköy.
Nesim era un djoven atado a las tradisiones djudias i era al mezmo tiempo un sinsero dishiplo de los prensipios de Atatürk, prensipios ke los ensenyava i los azia konoser a todos sus elevos.
Era miembro de la Sosiedad de la Prensa Turka i mizmo tenia partesipasión en algunas organisasiones kon fines umantiarios.
En el anyo 1963 Nessim Benbanaste espeso a eskrivir en la prensa djudia. En primero en “La vera luz” del senyor Eliezer Menda i despues en el “Shalom” de Avran Leyon. Tiene eskritos i publikados munchos artikolos, poemas, ensayos, estudios i traduksiones
KEN MUERE, KEN KEDA
En el anyo 1982 Nesim Benbanaste eskrivió en la publikasion “Shalom” de Estambol un artíkolo entitulado “KEN MUERE, KEN KEDA” (“Kim ölür, kim kalir” el títolo orijinal) rekodrando a los dirijentes de la komunidad djudía de fiestar el Sinken Sentenario del resivo kalorozo a los djudios ekspulsados de Espanya.
La mano salvadora ke los turkanos dieron a lo ancho de los siklos a los djudios ke tuvieron sufrienza de krueldad i fanatismo esmovio el pensamiento de Nesim i el kreia kalorosamente ke esto devia tener un omenaje.
1992 markó el 500 aniversario del arrivo de los djudios sefaradíes a las tierras turkanas.
Ansí ke la historia djudía esta yena de konmemorasiones i funerales, ma esta okasión devia ser día de fiestar. Selebrar los 500 anyos de la bienvenida de los djudios sefaradíes al Imperio Otomano.
La Fondasion del “QuintoSentenario” fue kreada en 1989 por un grupo de sivdadanos turkanos, djudios i musulmanos entre los ke estava Nesim Benbanaste.
Esta Fondasion izo un program kultural i akademiko para adientro de la Turkia i mizmo para otros paises, en prinsipal para los Estados Unidos de la Amerika, Canadá, Meksiko, Fransia, Ingletierra i otros paises de Evropa.
Este program se avia echo para difusar la rika kultura del puevlo djudio turkano a una grande kantidad de djente.
En 1992 el edifisio ke era de la Sinagoga Zülfaris durante el siglo XVII fue dado por su propietario, la Fondasion Neve Shalom, a la Fondasion de los 500 Anyos por mor ke estos agan ahí un muzeo.
Este muzeo avrio sus puertas en septiembre de 2001.
Ma el promotor i miembro de la Fondasion del “QuintoSentenario” no tuvo la suerte de estar prezente en la grande fiesta ke tuvo lugar el 16 de djulio de 1992, en prezensia del prezidente de la Republika de Turkia i del Prezidente del Estado de Israel, en el Palasio de Dolmabahche, ni en la kreasion del muzeo de los kinientos anyos.
Nesim Benbanaste rendio su ultimo reflo el 12 de djulio de 1992 a la prematura edad de 53 anyos.
NESIM BENBANASTE: 500 YIL KUTLAMALARININ ONUNCU YILINDA.
Daniel Benbanaste, su ermano, sintió menester de no dejar desapareser la memoria de este ombre tan valutozo i su lavaro.
Edjunto kon importantes personas de la kultura i de mezmo amigos keridos publikó el livro «500. Yil Kutlamalarinin Onuncu Yilinda. NESIM BENBANASTE» en su omenaje, por onorar la memoria de este ombre djusto i de grande valor moral i intelektual, i por mantener biva su prezensia espiritual por siempre.
En este mes ke se kumple anyversario de su desparisión, keremos desde eSefarad partajar este rekodro sinsero de Nisim Benbanaste kon todos vozotros i darle un abraso kaloroso a muestro amigo Daniel Benbanaste.
Liliana Benveniste
