KERIDO MUNDO, NO ME IMPORTA LO KE PENSAN trezladado por Simon Geron

Keridos amigos i amigas.

En el Jewish News de esta semana tenemos el artikolo de «Avi Lewis» ke izo Aliya a Israel i el mos presenta un mesaje fuerte para los ke kritikan a israel. Kopilado por «The Times of Israel.»
Saludes a todos.

KERIDO MUNDO, NO ME IMPORTA LO KE PENSAN
Avi Lewis

No me importa si tu simpatizas kon Hamas. Ya se ke no lo tolerarias si lo mismo se azia a ti. No me importa si la repuesta de israel no te plaze. Ya se ke tu no akseptarias si este mal era echo a ti. Pensas ke Israel es el agresor i ke los Palestinos son los viktimes. Ke pensas ke la kulpa es muestra.

No me importa si se azen yamadas para meter fin al fuego de manera prematura. Si dizes ke mos kaye de aprovizionar agua, elektrisidad i meter fin a la gerra por razones umanitarias. ¿Ke se pasa kon los 230 i mas de israelies tomados en rehen? ¿A los bebes i viejos?

No me importa si las demonstrasiones son en favor de los Palestinianos, echos por razon de LGBT, los derechos de los Trans, por el klima i por los derechos de los lavoradores. Si se dize «Black Lives matter» o se lucha kontra Islamofobia. Esto no existe en Hamas i es una boveria. No me importa si tu amas a los djudios i detestas a Israel. Ke tienes mismo amigos djudios. O si tu sos djudio, siendo de akordo kon el mal ke se dize de los judios.

Las palavras kontan i terminan en aksion. Kuando una mentira se repeta munchas vezes, se aksepta a la fin komo la verdad. Sos tu responsavle de esto. Poko me importa ke tu tomes la bandiera de justisia umana o ke seas un experto en relasiones internasionales en la ley. Tu umanidad es selektiva.

Se dize ke los derechos umanos no se aplikan a mozotros porke no los meresemos. Pero tu no avlates kuando matavan a muestras mujeres i kriaturas.

No me importa si tu pensas ke somos kolonialistos, imperialistos i ke tenemos ke ir atras de donde venimos. No me importa si tu krees en la solusion de un estado o dos, aziendo de Yerushlayim una sivdad internasional. No vamos a meter muestras vidas en peligro por el plazer de otros.

No me importa si sos un Anti-Sionisto o Anti-Antisemite. Vimos bastante djudios ke fueron atakados en las ultimas semanas. No me importa ke tu penses ke somos fuertes en demzia i avansados en la teknolojia i muy sofistikados. Si no aviamos echo esto, seriamos komidos bivos por Hamas, Islamic Jihad, Iran i el Terror Palestino.

No me importa si tu mos echas la kulpa por los refujiados de 1948, ke digas ke no tienen un estado i ke tienen el derecho de tornar atras. Lo vimos lo ke seria si eyos se tornavan atras.

No me importa si mos dizes ke no somos los «dudios verdaderos» i ke el Sionismo no tiene nada de azer kon el djudaizmo. Ke los djudios son una relijion i no una nasion. Ansi ke no tenemos menester de un estado. No me importa si me dizes ke no respektamos las rezolusiones de las Nasiones Unidas. Ni me importa la Media kon sus mentiras i ekivokasiones. Esto es una otra arma en el arsenal de Hamas.

No me importa ser akuzados del bombardeo del ospital. No vos tomó tanto tiempo para topar el simbolo de maldad de Israel kuando en realidad islamic jihad era responsavle. No me importa ser visto komo un estado kriminal o de terror ke mato a Jesus el Kristo. de ser akuzados de jenosidio. Si Hamas tenia la otra mano se veria lo ke son kapaches de azer.

No me importa si estash yenos de kolera i si sosh lokos. O si vos ven en las kayes kon bandieras palestinas echando gritos. Por la primera vez en 2000 anyos somos organizados i motivados i vamos a defender muestros derechos. Luchamos por la luz sovre la oskuridad, por la moralidad sovre el malo.

Kisas esto no vos importa, pero guadraremos a las reglas porke no son solamente asperadas de mosotros, ma porke les damos valor en siendo El Puevlo De La Biblia. Nesesitamos tener esta fuersa si no el alternativo seria «Be-eri, Kafar Aza, Pittsburg, Touluse, Farhud, Hebron, Birkenau, Belzec, Babi Yar, Kielce, Kishinev.

¿Es ke pensan ke no vamos a tornar a esto para azerles plazer? Te yerras Mundo. Asta oy tomi kudiado para ser akseptado, ser un modelo, ser una luz en un kuartier duro. La mas vieja minoridad del mundo se izo una mayoritá aki. En medio de una realidad komplikada. Lo ke keren los Palestinianos no es parte del pais ma el pais entero.

A la fin tengo ke akseptarlo ke no vos importa. Ke nunka vos importo. No se ve i no se oye. No tienes el mejor interes en el korason. Poko importa lo ke ago, no vas a trokar. Azere todo para ganar esta gerra.

Trezladado por Simon Geron de Sydney

Fuente: Ladinokomunita