eSefarad Noticias del Mundo Sefaradi
“Absinthe” es un jurnal dedikado a literatura mundial en trezlado publikada en el departamento de literatura komparativa en la Universidad de Michigan. Kada anyo, elevos i profesores lavoran djuntos para preparar una koleksión de tekstos trezladados de alguna lingua o de alguna rejión. En 2023, el jurnal anual fue dedikado a literaturas djudias i fue editado por mi kon la profesora Maya Barzilai. Muestro tema era “Trezladar Multilingualizmo Djudio” (Translating Jewish Multilingualism). El jurnal kontiene tekstos en djeneros diferentes – proza, poezía, ensayos – trezladados de siete linguas: Ladino, Ebreo, Yiddish, Judio-Arabí, Check, Espanyol, i Portugez.
En esta koleksión, ay tres tekstos trezladados del Ladino. El primero es la novela “La agua de la sota” eskrita por Viktor Levi (1865-1940) i publikada en Istanbul en 1889. La istorya akontese en los tiempos bíblikos, durante el reino del rey Shlomo. El gran koén del templo, un ombre nombrado Aser, es envidiozo de un otro ombre, Ofen, por kavza de su mujer, ke el mizmo keria kazar. El koén tenta azer Ofen desfiado i dubiozo a su ermoza mujer, partikularmente porke ay un ninyo ke eyos aperfijaron i ke engrandesia i devenia un ermozo mansevo. Mizmo ke la istorya se pasa en tiempos antigos, es una kritika fuerte sovre el establesimiento relijiozo en los tiempos modernos. La novela fue trezladada a Ingles por Nesi Altaras, un elevo de doktorat en Stanford.
El Segundo teksto es una parte del romanso “Refael i Miriam,” publikado en Istanbul en 1910 por Ben Yitzhak Saserdote. No temenos ningun informasión sovre este eskritor i su nombre era, probavlemente, un seudonimo. “Refael i Miriam” es una istorya de amor entre dos jovenes Judios ke apartenesen a klasas sosiales diferentes. Refael es un prove pintor ke kere dedikar su vida a arte. Miriam es la ija de un riko negosiante ke no atorga su dezeo a espozarse kon un ombre prove ke, segun el, no tiene aspirasiones serias i no sera kapache de kuidar a su ija regalada. Los namorados duyeron djuntos a Evropa, ama no es klaro si eyos poderian obtener la vida ke eyos keren. El romanso fue trezladado a Ingles por Devi Mays, una profersora de istorya Sefardi en la Universidad de Michigan.
El terser teksto ke fue trezladado de Ladino es la primera parte del romanso “La socheta pudrida,” eskrito por Shemtov Revah i publikado en Salonika serka 1930. Es una istorya muy trajika sovre una ija prova ke sufre abuzo de su padre i ermano, ke estan alkolikos. En esta traduksion, se topa una kantika ermoza ke la protagonista, Sarika, kanta a su otro ermano kuando el estava muriendo. Mozos tambien adjuntamos una karta postal muy linda ke mostra el bedahayim Judio en Salonika. El romanso “La socheta pudrida” fue trezladado por Amanda Schwartz, una estudiante de doktorat en matemátika en Michigan, i por mi.
Ay tambien una ovra poétika en Ladino. En 1994, el poeta Arjentino djudio Juan Gelman (1930-2014) publiko un livro de poezía eskrita en dos linguas – Ladino i Espanyol. Gelman era Ashkenazi (sus djenitores imigraron a Argentina de Ukraina) i su primera lingua era Espanyol. Ama, kuando el se topa ekspulsado de su pais durante la “Gerra Suzia,” el adopto Ladino porke la veia komo una lingua ke podia ekspresar sus sentimientos de sufriensa i estranyedad. El presenta la poezía en Ladino alado de sus versiónes Espanyolas para azer a los lektores de Espanyol tambien sentir un poko de estranyedad de su propia lingua. La poezía bilingual de Gelman fue trezladada por Arianna Afsari, una estudiante de doktorat en literatura komparativa en Michigan.
Aparte de estos tekstos, ay en este livro poezía de poetas djudios Amerikanos trezladadas del Yiddish, algunos kapitolos del romanso autobiográfiko Portugez dela eskritora Brazilena sovre su vida en una kolonia djudia de agrikultura, kuentos sovre la vida en Rusia Sovietika por una eskritora Israeliana, i otros tekstos interesantes.
“Absinthe: Trezladar Multilingualizmo Judio” se topa aki: https://journals.publishing.umich.edu/absinthe/
Fuete: Marina Mayorsky
