eSefarad Noticias del Mundo Sefaradi
Keridos amigos,
Komo kada anyo, mi primera emisyon del anyo, la del djueves a venir, sera un rekodro de las 34 emisyones ke ize en 2015. Por ser mas presizo, yo ize 33, i muestro amigo Renaud Souhami izo una. No es ke no le demando de azer mas, ama el me responde ke es haragan. I esto es una koza ke puedo entender muy byen!
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
UN ANYO DE RADYO 2015
Saludes i anyada sivil buena para todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Mi emisyon se puede oir en el mundo entero sovre internet, al sityo de Radio J, http://www.radioj.fr, ama, malorozamente, estos tyempos solo en direkto (el djueves a las 4 i sesh, kale klikar arriva a la derecha, sovre Ecoutez Radio J en direct)
De otra parte, vos akodro ke el proksimo atelye de konversasyon de Vidas Largas se va tener el martes 19 de janvier 2016, de las dos a las kuatro, en el Centre Communautaire. Estos atelyes son avyertos a todos, venid munchos.
La semana pasada, syendo ke de muevo tuve la palavra despues de mi empesijo de tyempo, no pude eskapar la emisyon ke aviya aparejado sovre Los amigos goyim de Israel. Tuve de kedarme kuando vos estava avlando de dos sityos fransezes dirijidos por goyim, i ke se yaman el uno: Ces goys qui défendent Israël, i el otro Dreuz.info.
I despues, kontinuando la meladura del tefter de la revista Yessod, vos keriya dizir esto:
Otro artikolo konsagrado a kristyanas ke ovran para el keren hayessod de Fransya: la una dize ke su amor para Israel i el puevlo djudyo le vino de suyo por sus meldaduras, komo el livro de Anna Frank i otros. I tuvo un tal asko de la manera ke las gazetas fransezas avlavan de Israel a propozito de Gaza, ke kijo irse en Israel, lo ke izo mas de diez vezes.
La otra kristyana, ke bive en Bretagne, teniya una kuryozita verso estos djudyos ke no ay en Bretagne. Se va munchas vezes en Israel para ambezarse el ebreo, i en Fransya se aze amiga kon su profesora israelyana de ebreo. Agora kuando se va en Israel, es orguyoza de entender lo ke se dize a 70%. Ande mora, tyene de luchar para defender los djudyos i Israel.
Otro artikolo de Florence i Francis Kaufmann, ke organizan viajes en Israel para los non-djudyos, kijo dizir los kristyanos. Estos eskriven para dizir sus kontentez de lo ke vyeron.
Otro artikolo sovre Frère Olivier, un papaz vestido de blanko ke bive desde 1977 en Israel, en la Abbaiya de Abu-Gosh (kazal arabo de Israel). El tomo la nasyonalidad israelyana ke resivyo, dize, kon muncha onor. El ovra para el aserkamyento entre kristyanos, djudyos i muzulmanos.
Otro i ultimo artikolo: una entrevista kon el kantador franses Michel Fugain, ke se dize «el goy el mas djudyo de Paris» porke kuando era mansevo fue muy amigo – i dainda lo keda – kon una famiya djudiya i se ambezo kon eyos todas las kostumbres i fyestas djudiyas. Mos dize todo el plazer ke tuvo de toparse de muevo en Israel en novyembre de este anyo i todo el byen ke pensa de este pais i de sus moradores.
Ansina se eskapa el tefter konsagrado por la revista Yessod a estos amigos goyim, ama yo no kyero eskapar mi emisyon sin akodrarvos la memorya de los ke vinyeron ayudar a Israel en 1948 kuando era atakado de todas partes por armadas enemigas. Kuando ize mi emisyon sovre los veluntaryos ajenos en Israel en oktovre 2011, vos avli de Thadée Diffre, un katoliko ke komando a los veluntaryos fransezes venidos komo el en 1948 para luchar al lado de Tsahal, i en vedra no al lado ama azyendo parte de Tsahal.
Todos konosemos a amigos ke non son djudyos i ke son al lado de mozotros. Ke sean aki todos rengrasyados.
Ansina se teniya de eskapar mi emisyon de la semana pasada i en mismo tyempo del anyo pasado…
I agora ke 2015 ya mos s’eskapo, i komo a mi uzo desde unos kuantos anyos, vino el tyempo de akodrarmos en djuntos de las 34 emisyones ke vos ize durante este anyo 2015. Los ke son interesados de topar el teksto de mis emisyones lo podran (salvo una, la del 12 de marso, ke fue aparejada i meldada por mi amigo Renaud Souhami) indosen sovre los sityos de Ladinokomonita (por esto kale ser myembro i bushkar los files a mi nombre Edmond Cohen) o de eSefarad (i tambyen aya bushkar los eskritos a mi nombre).
Esto dicho, la primera de mis emisyones de 2015, el 1 de janvier, fue para azer, komo oy, la rekapitulasyon de mis 30 emisyones de 2014.
El djueves de despues, 8 de janvier, kontinui la meldadura de varyos pedasos del livro intitolado «Para ke no se olvide», eskrito por algunos de muestros amigos djudyos sefaradim de Bulgariya.
El djueves de despues, 15 de janvier, rizin eskaldado por la matansina, sesh diyas antes, del Hypercacher, ize una emisyon intitolada «Terrorismo kontra djudyos (kontinuasyon, malorozamente)», i malorozamente, tendré un diya de azer una tresera emisyon sovre la misma kuestyon, syendo ke el terrorismo kontra djudyos no se kedo el 9 de janvier: Copenhague 14 de fevrero kontra el grande kal, sin avlar de los atentados en Israel, kon kuchiyo, arabas, o armas de fuego. Ama yene, para dizir la vedra, agora el terrorismo (syempre islamiko) aharvo muncho mas a los muzulmanes i kristyanos ke a los djudyos.
El djueves de despues 22 de janvier, ize mi emisyon sovre el kazal de Djustos fransezes yamado Le Chambon sur Lignon. Por una vez, es el kazal entero, yevado por su pastor protestante, ke obtuvo la medaya, syendo ke kaji kada famiya del kazal eskondyo a djudyos, sovre todo kriaturas ama no solo.
El djuyes de despues 29 de janvier, avli de los scouts djudyos, i sovre todo de lo ke izyeron durante la gerra sea komo salvadores de kriaturas, sea komo rezistantes.
El djueves de despues 5 de fevrero, vos avli de los djudyos de Argentina, la mas grande komunita de Amerika latina.
El djueves de despues, ke fue el 19 de fevrero, vos trasladi del franses una de las mas ermozas poeziyas, asigun mi por siguro, de Victor Hugo, intitolada Le Crapaud (el sapo).
El djueves de despues 5 de marso, ke kaiya diya de Purim, vos ize la meldadura del komentaryo del Meam Loez, eskrito esta vez en 1864 por el haham izmirli Rafael Hiya Pontremoli, sovre el pasuk 8 del kapitulo 2 de la Megila de Ester sovre el rekojimyento de Ester para el rey Ahashverosh.
El djueves de despues, 12 de marso, no pude aparejar mi emisyon, syendo ke, a la mitad de lo ke aviya aparejado, mi komputadera se bozdeyo, i fue mi bendicho amigo Renaud Souhami ke lavoro noche entera para aparejar un teksto suyo ke pudo vinir a meldar en mi lugar, i ke era la letra de Yossel Rakover. Los ke son interesados de meldar este teksto i ke son myembros de Ladinokomunita, lo toparan en el mesaj 52435 de Renaud Souhami a Ladinokomunita, del 13 de marso.
El djueves de despues, 19 de marso, pude eskapar la meldadura del Meam Loez sovre Ester ande el rey, i komo izo para kedar djudiya a eskondidas i komer kasher.
El djueves de despues, ke fue el 2 de avril, fue una emisyon un poko espesyala, porke no me topava yo solo en el studyo de radyo, teniya a mi lado de una parte Lior, mi inyetiziko de 8 anyos ke disho unos dos byervos, i de otra parte muestro amigo Miguel Velazquez, de Mexico. En primer parte de emisyon avli del renasimyento del famozo grande kal de Edirne, en Turkiya, i en sigunda parte fue una entrevista kon Miguel.
El djueves de despues, ke fue solo el 23 de avril por modo de Pesah i del yom aShoa, ize mi emisyon sovre dos numeros de la revista franseza Le Crapouillot konsagrados enteramente a los djudyos, el primero en 1936, el sigundo en 1985, unos sinkuenta anyos mas despues: entre los dos, la gerra, la shoa, el renasimyento del estado de Israel, i la venida en Fransya de los djudyos de Afrika del norte.
El djueves de despues, 30 de avril, despues de dizirvos dos byervos en memorya de Meir Rosenne, ke aviya sido embashador de Israel en Fransya i veniya de morir, vos avli de Simon Wiesenthal i de su ovra.
El djueves de despues, 7 de mayo, ize mi emisyon sovre el Templo de Yerushalayim, en ebreo Bet Amikdash.
El djueves de despues, 14 de mayo, de las alytras de Yerushalayim i de su templo, abashi a la kozina para avlar de la berendjena ande mozotros, los djudyos sefaradim, ke la guizamos de tantas maneras diferentes, i ke la kantamos tambyen.
El djueves de despues, 21 de mayo, ize una meldadura travada del Meam Loez, esta vez de Yakov Huli, sovre Cain i Hevel.
El djueves de despues, 28 de mayo, ize mi emisyon sovre el livro ke eskrivyo muestra amiga Rivka Abiry, ke mora en Haifa en Israel, intitolado «Una lagrima una riza, lo ke mos konta Rivka», un arrekojimyento de unos syen de los tekstos suyos eskritos en pajina 10 de la gazeta El Amaneser. Ke mos biva 120 anyos!
El djueves de despues, ke fue el 11 de djunyo, ize mi emisyon sovre los Diez Mandamyentos, eskritos de la mano misma del Dyo, a lo manko la primera vez.
El djueves de despues, 18 de djunyo, (ke kaiya 200 anyos despues de la bataya de Waterloo, ama esto es otra istorya), vos avli de dos ombres, el uno djudyo: Bernard Natan, el otro protestante, Jean Zay, kazado kon una mujer protestanta, ama el de padre djudyo, i esto fue bastante para ke los dos, Natan i Zay, sean los dos asasinados komo djudyos, Natan en 1942 por los almanes, Zay en 1944 por los fransezes.
El djueves de despues, 25 de junyo, avli de la mueva ley espanyola propozando a los Sefaradim, kon kondisyones ke a mi me paresen inakseptavles, la nasyonalidad espanyola ke les fue arrovada en 1492.
El primer djueves despues de las vakansas del enverano, ke era el 3 de septyembre, avli de los ke mos desharon durante el enverano: Sir Nicholas Winton, Raphaël Draï, Samuel Pisar i Benno Gross.
El djueves de despues, 10 de septyembre, vos konti la terrivle istorya de Massada, asigun la konosemos por Flavius Josephe i por las deskuvyertas arkeolojikas de Ygal Yadin.
El djueves de despues, 17 de septyembre, meldi dos artikolos travados del numero de septyembre de El Amaneser, el uno de Karen Gerson Sarhon sovre «El mesaje sekreto en la agua», inspirado de la ovra de un japones, Masaru Emoto, el otro de Matilda Koen Sarano sovre sus rekodros sovre Rosh Hashana en la kaza de sus djenitores. I eskapi la emisyon kon la meldadura de los rekodros de Rachel Bortnick sovre Rosh ashana en Izmir.
El djueves de despues, 24 de septyembre, mi emisyon fue sovre un djudyo muy riko de Bayonne, Daniel Ifla (1825 – 1907) ke se aziya yamar Osiris, i ke desho sus paras para un alay de ovras, entre las kualas la fragua del kal Buffault en Paris.
El djueves de despues, ke fue el 8 de oktovre, vos avli de Albert Einstein, ke no era solo un gran savyo, sino tambyen un filozofo, un syonisto, sin olvidar ke era tambyen un vyolonisto.
El djueves de despues, 15 de oktovre, ize mi emisyon sovre migrantes i migrasyones, i sovre todo los djudyos i sus migrasyones. No es por nada ke se avlo de la leyenda del «djudyo errante»…
El djueves de despues, 22 de oktovre, avli de los Veluntaryos ajenos en Fransya, estos djudyos ke, sin tener la nasyonalidad franseza, entraron komo veluntaryos en la armada franseza, i konti de ke manera tan suzya la Fransya de Vichy los dyo despues a los almanes. Ke asko. Esto kedara syempre komo una mancha ke nada podra alimpyar.
El djueves de despues, 29 de oktovre, konti la muy triste istorya de estos eskrivanos o artistos djudyos i komunistos de Rusiya (Babel, Mikhoels, Peter Markish i dodje otros), ke lucharon durante la gerra kontra los nazis, i fueron matados poko despues de la gerra por orden de Staline.
El djueves de despues, 5 de novyembre, avli de Netanyau i del Gran Mufti de Yerushalayim, a propozito de una palavra de Netanyau asigun el kual fue el Mufti ke akonsejo de kemar a todos los djudyos a un Hitler ke dainda, asigun Netanyau, no aviya dainda tomado esta desizyon. Esto es un yerro de Netanyau, syendo ke Hitler ya aviya empesado de matar en masa a los djudyos kuando enkontro al Mufti.
Ama yene el Mufti era un perro ijo d’otro, i esto es lo ke akodri en mi emisyon del djueves de despues, 12 de novyembre. Este Mufti fue un kriminal de gerra ke no fue kastigado komo tal.
Mi emisyon de despues, ke fue el djueves 26 de novyembre, vos konti la istorya muy vyeja de los djudyos de Italya, i komo esta istorya es muy larga, la kontinui el djueves de despues 3 de desyembre.
I de avlarvos de los djudyos de Italya me dyo la gana, el djueves de despues 10 de desyembre, de avlarvos de Primo Levi, de su ovra, sovre todo su livro Si este es un ombre, i de su muerte (suisidyo? aksidente? o puede ser matado, asigun Renaud Souhami?)
El djueves de despues, 17 de desyembre, vos avli de Leon Pinsker, syonisto ke se muryo en 1891, el anyo ande salyo el byervo syonismo, i sinko anyos antes del Judenstaat de Herzl.
El djueves de despues, 24 de desyembre, kije avlarvos de la politika de Poutine de una parte, i de Erdogan de otra parte, verso Israel, demandandome lo ke va salir de los ultimos haberes ke resivimos sovre estas dos kuestyones.
I enfin, el djueves 31 de desyembre, eskapi el anyo 2015 sovre un haber de astrofizika al kual partisipo un savyo israelyano (Yehuda Hoffman) i depues sovre un tefter en la revista Yessod, editada por el Keren Hayessod de Fransya, sovre los amigos goyim de Israel i de los djudyos. Empesi djustamente mi emisyon de oy en eskapando esta.
Ansina lavori este anyo; si guadro la salud i la fuersa, i si mis emisyones vos interesan, keridos oyentes, las kontinuare kon plazer, i por esto vos digo: al djueves ke vyene, si kyere el Dyo!
Edmond Cohen
Paris – Fransya
