Muestra lingua: UN ANYO DE RADYO 2013 por Edmond Cohen

Keridos amigos,el djueves pasado no ize emisyon i dunke no embiyi aki un teksto, syendo ke a la ora djusta de mi emisyon me topava en la Mayoriya del 17en arrondissement de Paris por el kazamyento sivil de mi ijo. Alhad fueron el kazamyento relijiozo i la fyesta. Lunes, martes se tuvyeron aki i aya i oy myerkoles se van a tener las sheva berahot en mi kaza. I en medyo de esto todo yo no puediya olvidar ke Avraham se topava sovre un altar kon su ijo Itshak atado, i me demandava kualo le va afitar myentres ke yo esto kazando a mi ijo. Enfin, de esto todo vos kije avlar en mi emisyon de amanyana djueves..

El program se puede sintir por Internet kada djueves a las 4 H O6 PM, ora de Paris, indo al sityo  RADIO – la fréquence juive. Kale tener pasensya i asperar un poko, no se oye pishin.

Saludos a todos!
Edmond Cohen
Paris, Fransya

UN ANYO DE RADYO 2013

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Nelou en la kabina.

Komo a kada vez, vos akodro ke el proksimo atelye de konversasyon  de la Asosyasyon Vidas Largas se tendra el martes 7 de janvier, de las dos i un kuarto asta las sinko, en el Centre Communautaire, 119, rue Lafayette Paris (10°), métro Cadet o Poissonnière.

El anyo 2013 ya mos  s’eskapo, i komo a mi uzo desde unos kuantos anyos, vino el tyempo de akodrarmos en djuntos de las 35 emisyones ke vos ize durante este anyo 2013.

Deke 35  i no 52 ? En primero porke uvo un djueves, el  14 de fevrero, ande mi inyetiziko estuvo hazino i tuve de guadrarlo; en sigundo porke dos otros djueves, los 21 i 28 de marso, Radio J teniya menester de mi tyempo de avla para azer emisyones sovre Tsahal. De otra parte, no uvo emisyon el 16 de mayo por modo de Shavuot. Kale akodrarse tambyen ke no ize emisyones en  julyo i agosto por modo de las vakansas, lo ke mos aze 9 djueves ande pasaron redifuzyones. Despues uvo el djueves 5 de septyembre sin emisyon por modo de Rosh Ashana, i los djueves 19 i 26 de este mizmo mes de septyembre por modo de Sukot i Shemini Atseret. Enfin no uvo emisyon el 19 de desyembre porke este mizmo djueves estava yo kazando a mi ijo en la Mayoriya del 17en arrondissement de Paris.. Esto todo mos aze 17 djueves sin emisyones. De 52, kedan 35 emisyones.

Los ke son interesados de topar el teksto de mis emisyones pasadas de las kualas vos vo avlar agora las podran topar ( salvo una, la del 6 de djunyo, ke no fue preparada porke resivi a mi amigo Eliseo Pardo) sovre el sityo Ladinokomunita, ama kale ser myembro (la inskripsyon es de baldes) . Una vez en el sityo, kale ir sovre Files, i aya sovre Edmond Cohen. Mis emisyones se topan tambyen sovre el sityo eSefarad.com, aya no es menester de ser myembro. Kale meter mi nombre i klikar sovre Go. Ay tambyen unas kuantas de mis emisyones, ama no dainda las del anyo pasado, sovre sefarad.org. Kale bushkar djudeo-espanyol, i aya las emisyones de Edmond Cohen.

Kale dizir ke de vez en kuando, indome sovre sityos djudyos de Amerika del Sur, tengo la sorpreza muy agradavle de ver syertos de mis tekstos. Ansina es internet.

Esto dicho, la primera de mis emisyones de 2013, el 3 de janvier, fue para azer, komo oy, la rekapitulasyon de mis emisyones de 2012, salvo ke eran solo 32 en vez de 35.

El djueves de despues, 10 de janvier, empesi la meldadura, ke me tomo 3 semanas, del Meam Loez sovre los sares terrivles ke tuvo Avraham avinu kon el rey Nimrod. Para azer este djiz de meldadura, tengo menester de munchas kozas: en primero, por siguro, lo ke ay de meldar, ke esta eskrito en espanyol en karakteres rashi i se topa puvlikado por Hebrew books sovre internet. En mizmo tyempo, me ayudo de la transliterasyon en karakteres latinos echa por los profesores David Gonzalo Maeso i Pacual Pascual Recuero en un livro puvlikado en Espanya en 1969. El teksto sovre el kual lavoraron estos profesores vyene de una otra edisyon del Meam Koez ke tyene varyas diferensyas kon el teksto en karakteres rashi ke me vyene de internet, ama yene el lavoro de estos profesores es para mi un grande ayudo. Al lado de esto, tengo menester de un tanah en ebreo, en ladino (la Biblia de Ferrara), en franses (las traduksyones de Bereshit por Edmond Fleg i André Chouraqui), i de un diksyonaro ebreo-franses, un espanyol-franses, un djudeo-espanyol-franses (el Nehama) i afillu esto todo, el lavoro no es kolay para todo entender i dar a entender.

El djueves de despues estas tres meldaduras, ke kaiya el 31 de janvier, unos kuantos diyas despues del diya mundyal del olokosto (27 de janvier), tuve de avlar de la Shoa por kurshumes, ke mato a un milyon i medyo de djudyos en Evropa del Este, sovre todo Ukranya i paizes al lado. Es tan terrivle ke no pude kontarlo mas antes, i ke fue para mi una sufriyensa de solo estudyar los tekstos i ver a las fotos antes de aparejar mi emisyon. Es puede ser el mas preto de todos mis rekodros de las emisyones ke ize desde mas de ocho anyos.

Para trokar de este apretamyento de korason, ize el djueves de despues, 7 de fevrero, una emisyon sovre las reushitas de Israel, ke alsan este chikitiko pais al primer nivel internasyonal en munchas kozas, i no solo la informatika.  Saviyash, por egzemplo, ke son las vakas israelyanas ke dan lo mas de leche por vaka en el mundo? En Israel, ande no ay yerva ni agua, la vaka da muncho mas leche ke la de Normandiya o de Holanda! No tengo menester, al lado de esto, de avlar del nivel de la medikeriya israelyana, o de la industria militar.

El djueves 21 de fevrero, avli del proyekto de ley espanyola de permeter el ritorno a Espanya kon la nasyonalidad espanyola, a todos los sefaradim. El 22 de novyembre 2012, dos ministros del Governo Rajoy prezentaron a los gazeteros un proyekto de ley en esta direksyon. Por lo ke se, esta ley dainda no vino delantre del Parlamento espanyol (i puede ser no vendra nunka) ama aprovechi esta okazyon para kontar las relasyones entre los Espanyoles i los Sefaradim de 1492 asta oy.

El djueves de despues, 28 de fevrero , vos avli de un muy grande i importante haham lehli, el Gaon de Vilna. Es konosido por su lavoro i su savidurya, por su syonismo (si el mizmo penso irse a bivir en erets Israel, ama troko de idea a la ultima ora, sus elevos, eyos, se fueron i fundaron una eskola en Safed). Es konosido tambyen por aver sido un opozante  (mitnaged en ebreo) al hasidismo.

El djueves de despues, 7 marso 2013, empesi otra meldadura del Meam Loez, konsagrada esta vez a los aparejos de Yaakov para enkontrar i apasiguar su ermano Esav, ke lo kyere matar. Le va embiyar regalos i va azer todo su posivle para apasiguar a su ermano, i ya va reushir. Esta meldadura me tomo tres emisyones.

Il el djueves 11 de avril, troki para azervos otra meldadura, la del livriko eskrito en avril 1945, despues de la Liberasyon ama antes ke se eskape la gerra, por Jose Papo, el hazan del kal Saint-Lazare (el ke me izo kumplir minyan en 1949). Este livriko, intitolado «En attendant l’aurore» (asperando el amaneser) es un dokumento muy esmovyente i de primera importansya sovre la rezistansya spirituala de los djudeo-espanyoles de Paris durante la okupasyon. Zaten ize el 19 de marso una konferensya, eya en franses, en el Sentro Komunotaryo, sovre este livriko. Amostra el koraje inkreivle de estos hazanim, prezidentes i gabayim ke nunka desharon serrados los kales de Paris durante la Okupasyon, i lo pagaron muy karo. Munchos fueron deportados i remplasados uno despues de otro. Ashkulsun estos giborim deskonosidos…

El djueves de despues, 18 de avril, vos avli del Bund, esta organizasyon sosyalista djudiya nasida en Evropa del este, ke dainda egziste, ama muy aflakada por la shoa ke mato a la mayoriya de sus partisipantes. Ay poko tyempo muryo en Polonya Marek Edelman, ke kombatyo en el Ghetto de Varsovia al lado de Mordehay Anilevicz, ke el era syonisto del Hashomer Hatsair. Este Marek Edelman era el kapo del movimyento Bund en Polonya. Ya vos akodrash ke mozotros djudeo-espanyoles fuimos kombidados ande el Sentro Medem, ke es djustamente el sentro de los bundistos de Paris. Lo ke karakteriza los bundistos, es ke no son syonistos, pensando ke el sosyalismo se deve realizar ande estan lavorando los ovreros i no ande otro lugar. En mas de la shoa, es vedra ke ay menos i menos ovreros djudyos en Fransya, i ke lo mas de los djudyos de Fransya son syonistos. Por esto me parese ke el Bund no tyene agora la fuersa ke tuvo antes.

El djueves de despues, 25 de avril, avli de «Otros djudyos partikolares», esta vez sovre los Danites de la Côte d’Ivoire, pretos de una rejyon de Côte d’Ivoire ke pretenden ser desendyentes del trivo de Dan. Avli tambyen de otros pretos, los Lemba, ke biven a la frontera entre Zimbabwe i Sud-Afrika. I eskapi mi emisyon sovre los japonezes ke tyenen uzos relijyozos en ke se ven syertas asemejansas kon los uzos relijyozos de los djudyos. Kualo se puede travar de esto? Dainda nada, ama…kuryozo ya es!

El djueves de despues, 2 de mayo 2013, ize mi emisyon sovre la syedra i el antisemitismo. No para pretender ke el antisemitismo vyene solo de la syedra, todos se akodran de la fuersa del antisemitismo de derecha kontra el kual lucharon kon koraje los ombres de la syedra. Ama esto dicho, kale dizir ke uvo tambyen, en todas las epokas i tambyen oy, munchos antisemites ke no vinyeron de la derecha, ama de la syedra. Un solo egzemplo: Proudhon, eskrivyendo en su tefter: «Kale reembiyar esta rasa en Asia, o masakrarla…Por el fyerro o por el fuego, o por la ekspulsyon, kale ke el djudyo dezaparese…»

El djueves de despues 9 de mayo, ize mi emisyon sovre Jacob Kaplan i su livro Testimonyos sovre Israel. Este ombre ke fue uno de los mas altos hahambashis de Fransya, topo eskritos en favor de los djudyos, vinyendo de djente konosida komo syendo enemigos de los djudyos. Kuanto mas valen sus testimonyos!

El djueves 23 de mayo, avli de Napoleon i los Djudyos. Ay eskritos ke amostran ke Napoleon no teniya dinguna amistad para los djudyos. Por tanto, izo lo ke kaliya para organizarlos en Fransya, i darles afuera de Fransya, en los paizes ke konkistava, la libertad i los mizmos derechos ke los otros. Kual ke fueran los sentimyentos personales de Napoleon, se puede dizir ke su ovra, eya,  fue en favor de los Djudyos.

El djueves de despues, 30 de mayo, vos avli de los djudyos de Corsica. Lo mas interesante en la larga istorya de los djudyos de Corsica, es ke tuvyeron el mazal de kaji no ver a Almanes, o kuando los vyeron, era serka de sus Liberasyon. Uvo tambyen el ayudo de la povlasyon, de tal manera ke, en todo, uvo un solo djudyo deportado en la Corsica entera.

El djueves de despues, 6 de djunyo, tuve la alegriya de arresivir a la radyo a mi amigo Eliseo Pardo,  kristyano espanyol ke pasava por Paris, grande amigo del profesor Sephiha, i mas syonisto ke todos los djudyos de Vidas Largas aunidos. Dyo a entender komo, de katoliko ke era a su nasimyento, se izo de la vanda evanjelika, i, komo munchos de esta vanda, tyene un amor muy fuerte por el djudaismo i Israel.

El djueves de despues, 13 de djunyo, ize mi emisyon sovre las gazetas sefaradiyas, ke empesaron sovre papel en karakteres rashi en todo el Imperyo osmanli en el siglo 19, ama en el siglo 20 se izyeron mas i mas poko asta kaji dezapareser. I agora ke muestra lingua esta en peligro de muerte, salen mas i mas gazetas, no solo sovre papel, komo El Amaneser en Turkiya, o Los Muestros en Beljika, ama tambyen sovre internet, komo eSefarad en Arjentina por egzemplo , sin avlar de los foros komo Ladinokomunita.

El djueves de despues, 20 de djunyo, vos avli de varyas amistades ke me ize grasyas a internet, i por empesar vos konti komo ize la konosensya de una mujer, bizinyeta de la mujer ande fui eskondido en 1944, ke me bushko durante tres anyos antes de eskapar por toparme grasyas a internet i a Moshe Rahmani. Konti tambyen komo me topi unos trenta primos i primas en Australya. Los topi grasyas a un sityo amerikano de jenealojiya sovre internet. Mi madre biviya dainda i fue tresalida luando le dishe ke le aviya topado una prima ermana…en Sydney!

El djueves despues, 27 de de djunyo, vos avli de vedra, mintira, silensyo i lashon ara. El djudaismo se intereso muncho a esta kuestyon, i  de esto sale ke si no es para avlar de estudyos en jeneral, lo mijor es el silensyo, por espanto, kon la avla, de danyar al otro mizmo sin kererlo o sin pensar. La avla es de plata i el silensyo de oro, i yo me kayi dos mezes (djulyo i agosto) por modo de las vakansas de enverano.

I a la buelta, en medyo de las fyestas de tishri, pude azer una sola emisyon en septyembre, el djueves 12, i avli de los djudyos de Sud-Afrika, ke dyeron djente importante komo Barney Barnato i Sammy Marks. Avli tambyen de Nelson Mandela, ke a la vez avlo bueno para los djudyos, i muy negro kontra el estado de Israel. Agora veremos komo van a ser las kozas para los djudyos ke kedaron aya.

El djueves 3 oktovre , avli de la matansina de Munich, ke se paso el 5 de septyembre 1972, i se eskapo por la muerte de 17 ombres (11 djudyos, 5 arabos i un alman). Todos se akodran de esta matansina de los atletos israelyanos en los djugos olimpikos de Munich por terroristos palestinyanos de la organizasyon de Yasser Arafat i de Mahmud Abbas. Golda Meir embiyo en el mundo entero ombres del Mossad para kastigar a estos terroristos.

El djueves de despues, 10 de oktovre, vos di unos komplementos ke me ambezi sovre syertos diplomatos o otros ke salvaron a djudyos, i en partikolar sovre varyos muzulmanos, entre los kuales syertos arabos.

I despues, en la mizma emisyon, vos avli de los gauchos djudyos, estos lehlis de Evropa del Este, ke kon el ayudo del Baron de Hirsh, se fueron a fraguar asyendas en Arjentina.

El djueves de despues, 17 de oktovre, vos avli de los djudyos de Praga, i sovre todo de dos de los mas konosidos, kyero avlar del Maharal de Praga de una parte, i de Franz Kafka de otra parte. Avli tambyen del proseso de Praga, en 1952, ande 11 komunistos kaji todos djudyos i de alto nivel komo Slansky, fueron djusgados, munchos kondenados a muerte i egzekutados.

I el djueves de despues, 24 de oktovre, empesi una muy larga meldadura ke dainda no eskapi, del Meam Loez, ke me tomo ocho semanas de meldadura, kortadas solo por una emisyon ke ize el 5 de desyembre sovre las Djustas ke me salvaron en 1944, i por las kualas esto aprovando de obtenerles la medaya de los Djustos. Me fui a Bedarieux el 29 de novyembre i lo konti en mi emisyon.

Veo ke agora ya vino el tyempo de eskapar esta emisyon i vos desho dezeandovos una buena anyada sivil 2014, i al djueves ke vyene, si kyere el Dyo!

Edmond Cohen