eSefarad Noticias del Mundo Sefaradi
Keridos amigos,
Mi emisyon de este djueves va ser sovre la parte djudiya de Serge Gainsbourg en su ovra, i tambyen sovre famozas mujeres djudiyas del siglo vente
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
SERGE GAINSBOURG. FAMOZAS MUJERES DJUDIYAS
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Mi emisyon se puede oir en el mundo entero sovre internet, al sityo de Radio J, http://www.radioj.fr ,sea en direkto (el djueves a las 4 i sesh, kale klikar arriva a la derecha, sovre Ecoutez Radio J en direct) sea en redifuzyon, indose al kavo de la redifuzyon de las emisyones de la medyudiya del djueves.
Vos akodro ke el proksimo atelye de konversasyon de Vidas Largas se tendra el martes 29 de marso, de las dos a las kuatro i medya, en el Centre Communautaire. Estos atelyes son avyertos a todos, mismo a los ke no saven avlar i ke vyenen solo para oir la lingua del papu i de la vava. Venid munchos.
El 3 de marso, tuve de kontarvos las seremoniyas para las djustas ke me salvaron, i el 10 de marso, de arresivir mi amigo Alain de Toledo para avlarvos de Muestros Dezaparesidos. Entremyentres, el 2 de marso, fueron los 25 anyos de la muerte de Serge Gainsbourg, i el 8 de marso fue el diya de las mujeres. Pensi ke seriya byen, oy, de avlarvos de la parte djudiya de estos dos evenimyentos, afillu si no tyenen de ver el uno kon el otro.
Empesaremos kon Serge Gainsbourg, ke se muryo el 2 de marso 1991, i ke en primero nasyo Lucien Ginsburg el 2 de avril 1928 en Paris.
Penso ke no tengo menester de ambezarvos ke este ombre fue konosido komo kantador i kompozitor de kantikas, ama fue tambyen pintor, pyanisto, aktor, senaristo i realizador de sinema.
Oy kyero solo avlarvos de la parte djudiya de esta persona.
Kale empesar por dizirvos ke su padre, Joseph Ginsburg, era ruso, ama nasido en Estambol en 1896, koza ke yo no saviya i ke me ambezi en aparejando esta emisyon. Era el tambyen pintor i muzikante, i por esto se fue en Rusiya ambezar muzika, i en Crimea konosyo a su mujer, una kantadera mezzo soprano yamada Brucha Golda Besman, dicha Olga. Se kazan en 1918, fuyen la Rusiya en gerra en 1919, i despues de pasar por Estambol, se topan en 1921 en Paris. Aya van a tener un ijiko ke no va bivir mas de 16 mezes, despues una ija, i despues dos buchukes, ermano i ermana, el ermano syendo el chiko Lucien, nasido, komo vos dishe, en 1928.
Kuatro anyos despues, en 1932, toda la famiya es echa franseza. El padre de Lucien le ambeza el piano i la pintura. Vyene la gerra. Lucien deve yevar la estreya amariya, «una estreya de sheriff», komo dize para burlarse. Despues dira: «Yo nasi basho una buena estreya…amariya».
Munchos anyos despues, va eskrivir i kantar una kantika intitolada en ingles Yellow star (estreya amariya) ama kon palavras fransezas ande dize: «Difficile pour un juif, la loi du struggle for life, quand il y a la yellow star, yellow star» (yuch para un djudyo, la ley de la lucha por la vida, kuando ay la estreya amariya)
https://www.youtube.com/watch?v=YdFWagsW0b4
Va eskrivir tambyen una kantika ande dize: Dieu est juif (el Dyo es djudyo)
https://www.youtube.com/watch?v=Lz3pUYG9ElU
Meldi ke disho en una entrevista: «Komo Einstein, Chaplin, Jésus, so djudyo. Djudyo en primero, ruso despues.» (Por lo ke es de Chaplin, parese ke se yerro, Chaplin no era djudyo).
Ama por la ora, aboltaremos a la chikez de muestro Ginsburg. Su famiya fuye en zona non okupada, i en 1944 tyene de eskonderse en medyo de la Fransya. Troka de nombre, se aze yamar Guimbard. Lucien, ke tyene 16 anyos, es eskondido en un kolejyo de papazim, en la sivdadika de Saint Léonard de Noblat. Una noche, la Gestapo vyene mirar los papeles de kada uno, bushkando djudyos. Lucien tyene djusto el tyempo de korrer eskonderse solo en la sharra de al lado, ande pasa noche entera kon el espanto de ser topado i matado. De este tyempo le va kedar la sensasyon de ser un salvado, un sovrebivyente.
En 2010, 9 anyos despues de su muerte, se va topar ke una komisyon del governo de Petain baldo la nasyonalidad franseza de los Ginsburg. Por ke kulpa? «Sin interes nasyonal…» Parese ke los Ginsburg no lo supyeron nunka!
Kuando empesa de lavorar komo kantador, Lucien Ginsburg troka en 1957 su nombre en Serge Gainsbourg. Serge porke le parese mas ruso ke Lucien…
Diez anyos despues, vyene la krizis de Suez, en mayo 1907. Gainsbourg pensa irse en Israël. En una entrevista de 1981, el gazetero le demanda: «Keriyas ir para kombatir?» «-No, no por kombatir. Para azerme matar. Por instinkto; de por mis raises».
La embashada de Israel le demanda un kante militar para Tsahal. El kante es enrejistrado en dos minutos el 6 de junyo 1967, al empesijo de la gerra de los sesh diyas. Es intitolada «Le sable et le soldat» (la safra i el asker)
https://www.youtube.com/watch?v=VX2-PdYcOqs
Oui je défendrai le sable d’Israel
La terre d’Israel, les enfants d’Israel
Quitte à mourir pour le sable d’Israel
La terre d’Israel, les enfants d’Israel
(…)
Tous les Goliath venus des pyramides
Reculeront devant l’étoile de David
(Si, defendré la safra de Israel,
La tyerra de Israel, los ijos de Israel
Afillu si kale morir por la safra de Israel,
La tyerra de Israel, los ijos de Israel
Todos los Goliaths venidos de las piramidas
Se travaran delantre la estreya de David)
La kantika va ser trasladada en ebreo, ama va kedar 35 anyos en los arshivos de Kol Israel. Agora salyo, i es el ermozo kante del Magav, los ke guadran las fronteras.
https://www.youtube.com/watch?v=bnkhp1E7WrQ
Agora me vo kedar sovre esta parte djudiya de Serge Gainsbourg, i me vo interesar a las mujeres famozas del siglo vente. Kuando digo famozas, no es syempre ke se konosen sus nombres, ama syertas izyeron parte de grupos famozos, komo las ke kombatyeron en el ghetto de Varsovia o en el Palmah.
En primero vos kyero avlar de las djudiyas ke obtuvyeron el premyo Nobel. Si no me yerri en mi kuento, fueron syete. Puede ser vos pensash: 7 no es muncho. Vos respondré: 7 mujeres en un puevlo de 14 milyones de djudyos, es mas ke los 3 ombres muzulmanes (a parte los Nobel de la paz) i dinguna mujer sovre un milyarda i medyo.
Kyen fueron estas syete mujeres.
Tres fueron nobelizadas en literatura, i kuatro en syensyas (medikeriya i kimika)
Empesaremos por la literatura: Premyo 1966 (en mismo tyempo ke Samuel-Joseph Agnon) Nelly Sachs, nasida en Schöneberg, serka de Berlin, en Almanya en 1891, fuyida en Suede en 1940, ande se muryo en 1970, dunke solo kuatro anyos despues de su Nobel, a la edad de 78.
Su ovra, ke por dizir la vedra no meldi, eskrita entera en alman, es de poeziya, muncho inspirada por la shoah i la veluntad de arrebivir a todos estos muertos.
El premyo 1991, komo el de 2004, por dizir la vedra, no fueron a haliz djudiyas, ama solo a ijas de djudyo i de madre kristyana.
Nadine Gordimer, ke obtuvo el premyo en 1991, nasyo en 1923 i muryo en 2014 (a los 90) en Afrika del Sur. Su padre era un djudyo de Lituaniya i su madre una ingleza. Eya misma kresyo kon la relijyon kristyana. Toda su istorya literarya se konfunde kon su lucha kontra el apartheid. Kuando no uvo mas apartheid, eya se intereso a la situasyon politika i sosyala de su pais.
El premyo 2004 fue atribuido a Elfriede Jelinek, nasida en Austria en 1946, de un padre djudyo tcheko, ke va morir loko en una kaza de lokos, i de una madre katolika de Rumaniya. Tyene odyo por su padre, por su madre i por su pais, la Austria, asigun eya antisemit i mismo fasista, eya syendo a la syedra de la syedra, komo se dize agora. Eya tampoko no la meldi, ama es konosida por tener eskrito, entre otros, el livro La pyanista, del kual va ser travado el film kon el mismo titolo.
Elfriede Jelinek parese no ser una eskrivana kolay. Tyene una manera de eskrivir, asigun lo ke se dize, muy moderna i personala, i muy dura.
Agora avlaremos de las Nobel de syensyas:
La primera djudiya, si no me yerro, a obtener un premyo Nobel es Gerty Cori, nasida Radnitz en 1896 en Praga, oy kapitala de la Tchekia. Kuando nasyo, aziya parte del imperyo ostro-ungareze. Su famiya, djudiya, era de orijen austriaka. Gerty se konvirtyo al katolisismo para pueder kazarse en la iglesya kon un estudyante austriako, Carl Cori. Eya i su marido se fueron a instalarse en los Estados Unidos en 1922, i obtuvyeron la nasyonalidad amerikana en 1928. Gerty sufriyo muncho del seksismo de los savyos, i su marido tuvo de pelear para guadrarla a su lado i puvlikar kon eya.
Lavoraron en djuntos sovre el siklo del glikojen, ke va kon la sangre del ligado al musklo, ande se troka en asido laktiko, i despues abolta al ligado, ande el asido laktiko se troka de muevo en glikojen, i ansina da bueltas la makina (si entendi byen. No vos olvidesh ke yo fui avokato i ke ni yo ni los gazeteros ke meldi i ke eskrivyeron sovre la koza semos medikos…) En djuntos marido i mujer obtuvyeron el premyo Nobel en 1947, i tambyen kon eyos un arjentino, Bernardo Houssay.
Gerty lucho diez anyos kon una negra hazinura, i se muryo en 1957, a la edad de 61.
En 1986, es una italyana, Rita Levi-Montalcini, ke obtuvo el Nobel, en mismo tyempo ke Stanley Cohen (Levi i Cohen? Si si, no es una shaka) .Vyene aze unos tres anyos de morir a la edad, mashalla mashalla, de 103. Nasyo en Torino en 1909, en una famiya dicha sefardiya. Su padre es injenyor i su madre pintor. Eya kyere ser mediko, sin marido ni kriaturas, para pueder konsagrarse a la syensya. Obtyene su diplomo de doktor en 1936, ama dos anyos mas despues vyenen las leyes rasistas de 1938, i es ovligada de lavorar solika en su kozina i su kamareta. Se okupa de las selulas nerviozas del poyiko dainda en el uevo.
Kuando vyene la gerra, i sovre todo kuando ayegan los almanes, en septyembre1943, deve eskonderse en una kava de Firenze, asta la Liberasyon.
Despues de la gerra se va ir unos trenta anyos en Amerika, lavorando medyo en Amerika, medyo en Italya. En 1986, obtyene, komo lo dishe, el premyo Nobel de medikeriya por sus lavoros sovre el kresimyento de las selulas nervyozas.
Va ser echa en 2001 senadora a vida, i de vez en kuando se va ir al senato para las leyes ke djuzga importantes. En 2010, esta en el kal de Roma para resivir la vijita del papa Benedikto XVI.
Va lavorar asta su muerte en desyembre 2012, afillu si se kayo a la edad de 100 anyos i se rumpyo la pacha. 4 mezes despues se aboltava al lavoro, dizyendo ke se sentiya byen i ke nunka aviya lavorado kon un tal entuzyasmo.
Vos dishe ke tuvo su Nobel en 1986. Dos anyos despues de eya, en 1988, es otra djudiya ke va obtener el Nobel: Gertrude Elion.
Nasida en 1918 en Amerika, se va morir aya en 1999, a la edad de 81. Sus padre i madre eran los dos djudyos de Lituaniya, Robert Elion i Berta, nasida Cohen. Kijo azer estudyos para ser mediko, i por esto lavoro diya i noche, el diya para ganar paras i la noche estudyando. Ama a la fin no pudo nunka obtener el diplomo de mediko, solo el premyo Nobel, ama esto fue mas tadre.
Gertrude Elion, komo Rita Levi Montalcini, nunka se kazo ni tuvo kriaturas. Sola o kon George Hitchings i James Black, lavoro sovre munchos remedyos ke topo, uno de los mas importantes syendo el AZT, contra el Sida. Los tres obtuvyeron el Nobel en djuntos en 1988.
Para eskapar kon los premyos Nobel, mos keda una israelyana, Ada Yonath, ke obtuvo el Nobel en 2009.
Nasyo en Yerushalayim en 1939, de padre i madre venidos de Polonya. Su padre, haham, lavorava komo bakal kon su mujer, ama se muryo kuando la chika Ada teniya solo 10 anyos. La famiya se fue a Tel Aviv, ande su madre topo lavoro en la administrasyon de los vergis. La chika izo estudyos i se ambezo la kristalografiya.
En 1970, funda en Israel el primer laboratoryo de kristalografiya, i en mismo tyempo, va lavorar durante 17 anyos en Almanya, en el instituto Max Planck.
Son sus lavores sovre el ribosomo ke le van a valer el premyo Nobel en 2009, en mismo tyempo ke Thomas Steitz i Venkatraman Ramakrishnan. El interes de su lavoro es ke avre puertas para deskuvrir muevos antibyotikos.
Aki me kedo kon estas syete mujeres, ama esto siguro ke la lista no se eskapo, i ke Ishalla otras savyas djudiyas van a azer ke muestra salud se va mas i mas enderechar, i muestra esperansa de vida mas i mas alargarse.
Esto dicho, no kyero eskapar mi emisyon kon solo estas syete mujeres. Kyero tambyen avlar de munchas munchas otras, i por empesar las ke kombatyeron kontra los nazis durante la gerra: las korajozas mansevikas del ghetto de Varsovia, ke afrentaron a los nazis kaji sin armas, ama kon lo poko de armas ke teniyan izyeron korrer la sangra almana («ke plazer de ver korrer das doiche blut, la sangre almana, kontava en yidisch una sovrebivyente a la televizyon) . Otras mujeres kombatyeron los nazis no kon las armas ama para salvar kriaturas, komo Marianne Cohn, esta djudiya almana aferrada por la Gestapo azyendo pasar a kriaturas por la frontera de Suisa, salvandoles ansina la vida, ama eya fue torturada i matada, komo lo fue Hanna Szenes, venida de Palestina kon parachut, i aferrada kuando aprovava de salvar los djudyos ungarezos.
Kale pensar tambyen a estas mansevikas del Palmach, en los anyos 1947-1948, ke defendyeron Erets-Israel kon armas livyanas, ama un koraje de leon, kontra arabos armados de kanones i de tankes. Kale akodrarse ke no aviya diferensya, en el Palmach, entre ombres i mujeres, i ke el lavoro era el mismo. No se si aviya tantas mujeres komo ombres, ama lo ke se, es ke eran una parte muy numeroza de los kombatantes del Palmach.
Despues de la gerra, uvo munchas bivdas djudiyas, sovrebivyentes kon kriaturas ke tuvyeron de mantener, kaji sin dingun ayudo. Mathilde Pessah, en el livro La robe couleur abricot, el fostan de pitagra, ke eskrivyo kon su amiga Evelyne Nahmias, topo byervos muy ermozos en onor de estas bivdas. No kale tampoko olvidarlas el diya de las mujeres.
Saludes a todos
Edmond Cohen Paris Fransya
