eSefarad Noticias del Mundo Sefaradi
Keridos amigos,
Mi emisyon de djueves va ser sovre un amigo miyo, Salomon Franco, ke vyene de salir tres livros en d’una. Uno de estos se yama Je suis né à 70 ans (Nasi a los setenta).
Los ke van a kerer oirme en direkto lo podran indosen a las 4 h 06 PM, ora de Paris, sovre http://www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
SALOMON FRANCO
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet (http://www.radioj.fr/node/145) sea en direkto, sea kuando se kyere: mis emisyones (kuando el tekniko lo kyere byen) son enrejistradas a mi nombre.
De otra parte, vos tengo de dizir ke el proksimo atelye de konversasyon de la asosyasyon Vidas Largas se tendra el lunes primo de desyembre a las tres, al Centre Communautaire, 119 rue Lafayette Paris (9°) Métro Poissonnière o Gare du Nord. Komo lo dishe la ultima semana, el diya i la ora agora trokaron: lunes en vez de martes, i tres en vez de dos i un kuarto. Es el Sentre Komunitaryo ke mos a trokado por modo de los kursos de ebreo: puede ser ke ay munchos djudyos ke kyeren azer aliya, en todo kavzo ay muncho mas kursos de ebreo ke antes.
Esto dicho, oy vos kyero avlar de un amigo miyo porke pensi ke su istorya i sus ovras vos pueden interesar: eskrivyo tres livros i esta eskrivyendo tres otros; se yama Salomon Franco.
Ay unos 45 anyos de esto, i puede ser mas antes, kuando yo era un avokato de unos trenta anyos, tuve komo mushteri a su padre, un ombre djudyo venido de Ayifton. La primera koza ke se veiya de este mushteri es ke era muy godro, al punto ke le veniya yuch de asentarse sovre mis fotolyos de buro, demaziya chikos para el. Una vez vino a verme kon un manseviko ke me prezento komo syendo su ijo, era Salomon Franco. Kuando digo manseviko, es porke teniya 6 anyos de menos de mi, dunke deviya ser de menos de 25 anyos. Ama lo ke no supe pishin es ke el ya era kazado i mismo padre de famiya, kuando yo era dainda bekyar.
De ijo de mushteri, se izo el mismo mushteri por sus echos, i de mushteri se izo bastante presto amigo miyo, kombidandome a su kaza ande konosi su ermozika mujer ke aviya kazado en 1965 kuando el teniya 23 anyos.
No se komo se izo, ama me topi muy presto komo azyendo parte de su famiya, al punto ke su madre se dezesperava ke yo no sea kazado, i bushkava mujer patra mi!
Poko tyempo despues, el padre se muryo, a la edad de solo 58 anyos, i el ijo kedo mi mushteri asta ke el no tenga mas pleitos i ke yo me retire, ama amigo kedo asta oy.
El nasyo en Samanud, en el sentro del delta del Nil, el 9 de djulyo 1942, en Ayifton. No leshos del lugar de su nasimyento, ayegavan las armadas almana i italyana, terrivle amenaza para los djudyos de Ayifton. Salvo ke aviya empesado el primo de djulyo la primera bataya de El Alamein ande los inglezes eran dainda komandados por el jeneral Auchinleck, ke reusho a akedar el enemigo. Es solo en los primeros diyas de Novyembre 1942 ke los Inglezes, esta vez komandados por el jeneral Montgomery, van a obtener en El Alamein la viktorya entera i arrepushar los almanes leshos de Ayifton, en el mizmo tyempo ande los amerikanos van a debarkar en Algeria (8 de novyembre 1942).
En su livro Je suis né à 70 ans (Yo nasi a los setenta) Franco mos konta en ke kondisyones vino al mundo: su padre, viajador de komersyo, biviya en Samanud, i se aviya kazado en 1937 kon una lehliya. Kon eya tuvo dos ijas, ama despues su mujer no puediya tener mas kriatura, dunke no ijo. I para este ombre, un tal afito era un drama, al punto ke penso a divorsyar.
Atyo santo! La mujer era dezesperada. Se fue a demandar konsejo al haham del Grande Kal de Alexandria. El le akonsejo de kedarse en el kal i de durmir aya la noche, espandida sovre la laja d’embasho. Lo ke izo. I de kualo se sonyo? Se sonyo del profeta Eliau anavi ke le aprometyo ke tendriya un ijo en poko tyempo. A la demanyana se fue a kontar su suenyo al haham ke le respondyo: abolta en kaza, toma un banyo, i tenga relasyones esta misma noche kon tu marido.
Izo de muevo asigun el konsejo del haham, i esta vez se topo prenyada, primer nes, i tuvo un ijo, sigundo nes. Sigundo nes porke fue un ijo i no una tresera ija, barminnan, i tambyen porke el nasimyento no fue ansina: el bebiko nasyo en el ochen mes, mas pronto ke era asperado, i la madre ke veniya de Alexandria por treno para ver a su marido fue tomada por las dolores en la estasyon de treno. Paryo en urjensya ande un doktor jeneralisto de Samanoud
I el mayor de Samanoud , ke era el ermano del primo ministro, izo a los paryentes la propozisyon de yamar el ijiko Soliman, komo Soliman el Magnifiko, lo ke achetaron. I el ijiko se yamo Soliman, dicho Soly. Es solo munchos anyos despues, una vez en Fransya, ke se troko de nombre para pasar de Soliman, ke es un nombre muzulmano (Suleyman) a Salomon, ke es nombre a la vez mas djudyo i mas franses. Amas todos kontinuan a yamarlo Soly, i es kon este diminutivo de Soly ke Salomon a eskrito sus livros. Ama dainda no estamos en esto.
Estamos en Ayifton, ande nase el chiko Soly ande una famiya djudiya ke tyene la nasyonalidad franseza desde 1791, afillu si mora en Ayifton i si su padre nasyo en Izmir i su papu en Creta.
Ensima de esto, syendo ke su padre nasido en Izmir se kazo kon una lehliya, en kaza se avlava franses i no espanyol.
En 1948, kuando el chiko tyene solo 6 anyos, empesa la gerra entre Ayifton i el muevo estado de Israel, gerra pedrida por los Ejipsyanos. El rey de Ayifton es Faruk, los inglezes estan dainda en Ayifton i tyenen el ojo sovre el kanal de Suez. Los djudyos son kyetos afillu la gerra kontra Israel. El chiko va azer sus estudyos en el kolejyo de Jesuitos Saint-Marc de Alexandria i despues en el liseo franses de Alexandria.
Ama en vedra no le agrada la eskola. El, ke desde chiko es bastante papon, lo ke kyere es azerse gizandero. Desde la edad de 9 anyos se mete a gizar varyos platos, i su nonna le ambeza rechetas ke uza asta oy.
Esta trankilidad de la famiya Franco en Ayifton va trokar a poko a poko a partir de 1952, kundo el rey Faruk es echado a basho i ke el poder va ser tomado por zabites, en primero Neguib, i ke poko tyempo despues, en 1954, Nasser va echar Negib a basho i tomar el entero poder.
En novyembre 1956, mueva gerra entre Israel i Ayifton: la armada israelyana entra en el Sinaï; los fransezes i los inglezes embiyan askeres i toman atras el Kanal de Suez ke Nasser aviya nasyonalizado.
Esta vez, la situasyon de los Franco va ser muy pezgada: son a la vez djudyos, i por esto sospechados de amistad kon Israel, i fransezes, dunke enemigos de Ayifton.
Por tanto, eskrive Soly Franco, «biviyamos en buen akodro kon los ejipsyanos i el rasismo no egzistiya, un respekto de las tradisyones de todas las relijyones era tenido por todos».
Esto no va surear. Los Franco son echados afuera de Ayifton en desyembre 1956, sin paras, sin lavoro. Soly tyene 14 anyos.
La famiya empesa una mueva vida en Fransya, i Soly, ke no kyere la eskola tradisyonala, avla a sus paryentes: kyere ir en una eskola profesyonala para ser gizandero espesyalizado en las salsas, la idea syendo despues de ir en Amerika ande son muy apresyados los gizanderos fransezes.
Los paryentes no dizen no al empesijo, ama la eskola ande kyere ir Soly se topa en Suisa, kosta paras i va desharlo leshos de su famiya. Al kavo su padre dize no; ke se aga kontavle komo el. I muestro Soly no va ser gizandero komo ofisyo, solo komo plazer al lado del ofisyo, i esto va ser una pena para su vida entera.
De toda manera, Soly se ambezo para ser kontavle ama nunka lo fue: syempre tuvo un aborresimyento para este ofisyo. Va lavorar de otra manera, en el negosyo.
Ama kuando vyene a la edad de azer el askerlik, va afitar a Soly un danyo ke manko de poko de kostarle la vida: azyendo un egzersisyo sekanozo kon un kapo bovanchon, se kaye de ocho metros de altura. Por siguro entra en el koma, manka de morir, es yevado al ospital ande el mediko lo salva de poko. Despues de munchos mezes de ospitalisasyon, puede aboltar a kaza: es eskapado por la armada, ama va guadrar de este aksidente dolores a la espalda ke lo van a azer sufrir asta oy.
Komo ya lo dishe al empesijo, el konosyo en 1965 a una ermozika mansevika lehliya de 18 anyos, amiga de una de sus ermanas, i fue pishin para los dos un grande amor. Se kazaron este mizmo anyo, i esta mujer va ser para el un grande ayudo en todas las penas de su vida, i va tener munchas.
Vos dishe ke se kazaron en 1965. Se van en viyaje de boda en el Portugal, i aya manka de morir tres vezes: la primera vez, en medyo de la noche, la araba manka de kaer a la mar del alto de una faleza. Es el arabadji de un kamyon ke vyene a travar la araba i ke los salva de la kaida.
La sigunda vez, en nadando en la mar, un koryente lo arrepusha leshos de la plaj sin ke pueda aboltar. Va ser su mujer ke se da kuenta de la sekana i de lo ke se esta pasando, i ke lo va salvar.
I la tresera vez, tyene un aksidente de araba en Barselona, chaptea una araba ke no aviya visto, i el i su mujer son firidos. Me demando si este arabadji de 23 anyos no era un poko adjami…
En su livro, Soly mos konta las reushitas i los fyaskos de su vida profesyonala todo el tyempo ande fue empyegado en varyas sosyetas. No lo vo kontar aki afillu si es interesante. Yo konosi mas los fyaskos, kijo dizir kuando fue echado, ke las reushitas, porke ansina es para un avokato komo para un mediko. Kuando todo va byen, la djente no tyene menester de eyos. Kuando uno va ver su avokato o su mediko, es ke ay una koza ke no va. En tanto ke avokato, tuve de luchar para sus derechos, i komo teniya razon, en jeneral reushi a ke gane a lo manko una indemnidad.
Al kavo, despues de tener lavorado munchos anyos en echos de papel, Soly se enfasyo de lavorar syempre para los otros, i tuvo la gana de lavorar para si mismo. Se metyo komo eksperto para las kompaniyas de seguridad en kuestyones de papel, kijo dizir mirar deke una parte de un papel transportado se gasto (umiditad, rovo, fuego, ets) a kuanta se suve la pedrita, ets. Ama tambyen, bushkar si el asigurado ke se kesha no esta aprovando de enganyar a la kompaniya. Vyendo el lavoro ke teniya, demando a su mujer de lavorar kon el, i esto es lo ke izo.
Ama dainda no savesh deke el primer livro de Soly tyene por titolo Nasi a los setenta, i es de esto ke vos kyero avlar agora. Kale solo ke vos diga antes ke Soly tuvo tres ijas, en 1966, 68 i 73.
Los dertes de salud de Soly empesaron kuando su doktor se apersivyo ke teniya una grave flakeza en el korason i ke kaliya operar a korason avyerto, komo se dize. Soly, oyendo esto, mete sus echos en regla, i se va dos mezes despues al ospital. La operasyon se pasa byen.
Yene Soly serra su echo, i es su mujer ke lo toma, syendo ke ya konose agora este lavoro.
Malorozamente, Soly es aharvado por un aksidente vaskularyo serebral, i se ve paralizado de toda la parte derecha de su puerpo. Los medikos se apersiven ke la proteza del korason ke aviya sido puesta kuando fue operado del korason se dezazyo. Esto es otra sekana a parte del avc. I por koronar el todo, su korason se toma un mikrob muy negro ke ovliga a los medikos de darle antibyotikos muy fuertes ke pueden salvarlo o matarlo. Durante una semana, los medikos lo meten en koma artifisyal, i despues sale bivo de esto todo. No dishe sano i kurado, solo dishe bivo.
A poko a poko Soly se topo un poko mijor, al punto de salir del ospital para aboltar a kaza. I en kaza, en medyo de la noche, le toman dolores terrivles de tripa. Una mueva hazinura, peritonit. De esto tambyen se salvo, ama vino un momento ande no pudo mas soportar esta vida. Se espanto de kedar un pezgo para toda su famiya i demando ofisyalmente al ospital la posibilidad de meter fin a sus diyas. El solo, paralizado en el ospital, no puediya azerlo sin ayudo. Demando el ayudo de un doktor. Vyendo esto, fue embiyado a un psy ke le demando de kontarle sus razones de kerer morir. I a poko a poko, avlando al psy, el pezgo de dezespero ke lo asyegava se dezazyo. I el psy le disho ke el mismo era un eskapado de la shoa i adjunto: «ya pedrimos sesh milyones de djente kon la shoah, deke meter un muerte de mas?»
De oir esto le troko su manera de pensar, se disho ke, al lado de lo ke aviyan pasado los otros, sus angusyas i hazinuras eran poko, i dechido de bivir, kuando seriya solo para su mujer, sus tres ijas i sus syete inyetos. Yo vide uno de estos inyetos: ya es asker en Israel.
Teniya setenta anyos i dechido de empesar una mueva vida, achetando la hazinura i amostrandose mas fuerte ke eya. Por esto dize ke nasyo a los setenta.
Komo se espantava de pedrer la memorya komo konsekuensa de su avc, se metyo a eskrivir su vida i la de sus avuelos i de los de su mujer. Se organizo una kozina para azer lo ke syempre kijo azer: gizar. En mismo tyempo ke Nasi a los setenta salyo dos otros livros kontando en forma de roman la vida de djente de su famiya. I en este tyempo arreune djente para avlar de su mueva vida i de sus livros. Yo me topi en una de estas reunyones el shabat pasado, i esto es ke me dyo la idea de azer esta emisyon, ke agora se deve eskapar porke ya vino la ora.
Al djueves ke vyene, si kyere el Dyo!
Edmond Cohen
Paris – Fransya
