Muestra lingua por Edmond Cohen: PENSAMYENTOS SOVRE LA VIDA

Keridos amigos

Esta semana, komo tuve mi aniversaryo, i a esta okazyon rengrasyo a los ke me embiyaron aki sus buenos dezeos, me pensi un poko mas ke kadal diya a la vida i a la muerte. I deke no azer una emisyon sovre la kuestyon? No asperesh topar repuestas. No las tengo. Solo unas kuantas kuestyones…

Saludes a todos

Edmond Cohen
Paris – Fransya

——————————————————————————————

PENSAMYENTOS SOVRE LA VIDA

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora las emisyones de Radio J se pueden oir sovre internet sea en direkto, el djueves a las 4 h 06 despues de mediudiya, ora de Fransya, sea kuando se kyere, kale klikar en el sityo de Radio J, i irse sovre las emisyones de despues de medyudiya. http://www.radioj.fr/node/55

De otra parte, vos akodro ke el proksimo atelye de konversasyon de Vidas Largas se va tener el martes ke vyene 11 de desyembre, en el Centre Communautaire, a las dos i medya (asta solo las tres, porke despues va ser la Siduta djenerala de Vidas Largas).

El shabath pasado tuve 82 anyos, i los yelekes amariyos se disheron ke por esta okazyon kaliya azer la revolusyon en Paris. Savyendo de antes ke uvyera manifestasyones en Paris, i kombidado ande uno de mis dos ijos para fyestar mi aniversaryo (si tanto es ke kale fyestarlo, esto veremos mas leshos) me fui ande el  kon mi araba en evitando de pasar por el arko de triumfo, i , komo lo konti en Ladinokomunita, ize komo Djoha ke para tokar su oreja derecha, toma su mano syedra i pasa por detras de la kavesa. Ama ansina todo se paso muy byen.

Ande mi ijo, no oyimos la radyo, no mirimos la televizyon, i a las mueve de la noche mos fuimos para aboltar a kaza. Esta vez, me dishe, las manifestasyones ya se eskaparon, i muy kyeto tomi la avenida Foch en direksyon del arko de triumfo. Kale dizir ke este diya la radyo era bozdeada, i solo keriya pasar diskos, ke oyimos kon plazer, ama sin oir los haberes del diya. El GPS ? Ya tengo un GPS, ma esta guadrado, no se uzarlo…

I me topi kon mi mujer avenida Foch, mirando enkantado i espantado, las arabas kemadas, los arvoles kortados i serrando la mas grande parte de la kaye, fuegos dainda kemando aki i aya malgrado los tulumbadjis…Pyedras en medyo de la kaye, ramos de arvoles, asta ke ayegar al arko de triunfo yeno de pulizes serrando los Champs Elysees, yo tomi la avenida de Friedland, i de muevo las arabas kemadas, las botikas derrokadas…Mi mujer mirava por todas partes, yo no, demaziya okupado de mirar lo ke se pasava delantre de mi, i aprovando de pasar entre los fuegos.

Me akodraré de mi aniversaryo. Ayegimos a kaza muertos i bolados, i esta vez mirimos la televizyon, i entendimos ke lo ke vimos no era nada al lado de lo ke se paso.

Bueno. Desharemos esta fyesta ke me izyeron los yelekes amariyos, para avlar de mis penseryos de ombre de 82. Ya di a entender a mis inyetizikos ke 82 no es vyejo, solo 83 es vyejo, i ya saven ke kada anyo troko el shifro…

Ama yene, kuando uno ayega a 82, ya save, mizmo si todos le dezean de bivir asta 120, ke pokos son son los ke, komo Moshe Rabenu, ayegan a esta edad.

Es vedra ke, en Fransya, tuvimos a Jeanne Calment, ke bivyo asta 122 anyos, 5 mezes i 14 diyas. Es vedra tambyen, ke yene en Fransya, tenemos a Robert Marchand ke, a los 106 anyos, dechido de retirarse de la kompetisyon siklista, despues de tener obtenido el rekord de la ora de los mas de 105 anyos.

Kuando era dainda mansevo, kyero dizir a los 101, batyo el rekord de los 100 kilometros de los mas de syen anyos, en mas de 4 oras. Fue resivido komo un gibor por los gazeteros, lo puedesh ver si keresh sovre youtube, abasta de klikar Robert Marchand vivement dimanche :

Si azesh dikat, parese ke sus dyentes son halizes !

La semana pasada, fue su aniversaryo de 107, ke fyesto korryendo 20 kilometros por su plazer…

Esto todo para dizir ke la vejez en si no es negra, lo ke la aze negra son las hazinuras, este lento aflakamyento ke aze renunsyar a poko a poko a los plazeres de la vida; asigun lo ke diziya mi madre, ke se muryo a los 95, la vejez es una lenta agoniya…

Por lo ke es de mi, no me kesho, porke vo i vengo, nada me endjidea, me echo kuando kyero, me alevanto kuando kyero, syerto tengo agora un alay de doktores diferentes, espesyalistos de kada parte de mi puerpo, kada uno preskrivyendome una melezina diferente, de tal manera ke tengo de tomar kadal diya un alay de melezinas, durmo kon una karatula de respirar ke me aze pareser, por lo ke es de la kavesa, a un piloto de avyon de kasa ; ama solo la kavesa, mas abasho kon el pijama eskaygo un poko…

Esto dicho, hazino o sano, ya se ke el tyempo ke me keda de bivir se va eskapar de toda manera sin ke sepa kuando, ma puede ser amanyana…o no.

Por esto es ke eskapo kada una de mis emisyones dizyendovos : al djueves ke vyene…si kyere el Dyo ! Mi amigo Jose Molho me disho un diya ke avlo ansina porke me espanto de la muerte. Por siguro no tengo impasensya de irme, ma no puedo dizir ke tengo espanto de la muerte…solo ke, komo disho Woody Allen, prefyero no estar ayi kuando va afitar…

Muncho mas me espanta la sufriyensa, o la pedrita de meoyo.

I despues? La muerte ? Komo no so ni mediko, ni filozofo, ni teologo, no tengo dinguna kompetensya para avlar de esto. Ma Michel Audiard diziya ke no es porke uno no tyene nada de dizir ke tyene de serrar su boka ! Estonses vos vo dizir mis penseryos sovre la muerte.

La muerte del otro, ya savemos lo ke es ; ya la vimos. Savemos ke uno ke se muryo no abolta mas. Es ke su alma kontinua de bivir ? Esto no lo savemos. Los materyalistos pyensan ke la alma es fraguada por el meoyo. Kuando se dezaze el meoyo, no ay mas alma.

Los ke entyenden el fransez seran interesados de ir sovre youtube i klikar sovre En conscience :

El dokumentaryo tura ora i medya, ma lo mas interesante es la primera medya ora, ande muncha djente konta komo fueron kuando eran entre vida i muerte, i mismo ya eran muertos porke no solo el korason se teniya kedado, ma mismo el elektroensefalograma era yano. Son los reanimadores ke travan syerta djente de la muerte ya venida.

I lo ke kontan estos sovrebivyentes en la primera medya ora es kaji lo mismo para kada uno : salir de su puerpo, bolar ensima del puerpo i viyajar, a traves de las paredes, i oir lo ke se dize en otra kamareta. Alusinasyon, dizen los rasyonalistos. Ama komo una alusinasyon puede permeter de oir lo ke se dize  en otra kamareta ?

Despues lo ke kontan los sovrebivyentes es ke ven una luz fuerte ke los trava verso un lugar de grande amor i felisidad. Un amigo miyo ke paso por esto me disho ke nunka se espantara de la muerte porke ya save lo ke es.

Es ke esto todo mos da una idea vedradera sovre lo ke es la sovrebivyensa de la alma despues de la muerte ? Dizirlo me parese  ir un poko presto. Kualo kyere dizir la sovrebivyensa de la alma de un hazino de Alzheimer ke ya se olvido todo ? o la sovrebivyensa de la alma de Hitler ?

Ay munchas kozas ke dainda no savemos, ma es vedra ke oy los reanimadores alkansan en vezes a travar uno de una muerte ya afitada, i ke esto es koza mueva. Antes dinguno puediya venir a kontarmos lo ke se paso kuando era muerto. I lo ke kontan es interesante, i asigun mi no se puede, komo se dize en franses, « echar el bebiko kon la agua del banyo ».

Mozotros djudyos tenemos una relijyon ke, a la diferensya del kristyanismo , no es fraguada entera sovre la kreensa en la eternidad de la alma. El djudaismo insista muncho mas sovre la obedensya sovre esta tyerra a las mitsvot, ke sovre la sovrebivyensa de la alma, ke no deve ser un salaryo asperado. No so yo ke lo digo, es Antigonos de Soho en el Pirke Avot.

En kuanto a Flavius Josephe, el mos ambeza ke los Saduseanos, ke no solo eran djudyos, ma ensima eran lo mas Cohanim (mis antepasados), no kreiyan a la sovrebivyensa de la alma, i yene eran djudyos.

Esto dicho, para los ke no kreen en esta immortalidad, vyene una otra kuestyon: Si muestra vida es solo aki i despues no ay mas nada, ke es el sentido, la signifikasyon, el eskopo, de muestra vida sovre esta tyerra ?

Me hayay ? Kualo es mi vida ? dizimos en las orasyones de Kipur. A kada uno su repuesta. La miya es de azer lo mijor para si, su famiya i los otros. Ma no pretyendo kumplir todas las mitsvot, i, diya de shabat, para entrar en el han ande moro, sin asperar ke alguno salga, avro la puerta del han kon el boton elektriko (lo ke nunka aze mi vizina i amiga, ke eya es shomeret shabat).

A mi amigo Renaud Souhami le toma la birra kontra los hahamim ke izyeron de la interdiksyon de azer fuego en diya de shabat la de no apegar sovre un boton elektriko, i mismo de no avrir la puerta del refrijerador porke aze asender una luz aryentro, i mizmo si no ay luz, el ayre kayente ke entra en el refrijerador puede azer kaminar el motor otomatiko de friyo.

En vedra, la primera kuestyon, antes de todas las otras, es la sigyente: es ke el mundo, el universo, el ombre, i de toda manera todo lo ke egziste i egzistyo, es solo el fruto de « el azardo i la nesesita », komo lo penso i eskrivyo, en un livro famozo de 1970, el premyo Nobel franses Jacques Monod, sitando el filozofo grego Demokrito (a lo manko asigun el, syendo ke Demokrito no desho dingun eskrito, i ke la sitasyon fue kontestada).  Asigun Demokrito tal ke sitado, byen o mal, por Monod, « todo lo ke egziste en el mundo es el fruto del azardo i de la nesesidad ».

Monod es muy klaro : eskapa su livro dizyendo : « La vyeja alyansa es rompida ; el ombre save enfin ke esta solo en la immensidad indiferente del Universo de ande salyo por azardo. No mas ke su destino, su dever no es eskrito en dingun lugar. A el de eskojer entre el Reyno i las tinyevlas » (fin de sitasyon).

En jeneral, los syentifikos no se mesklan de teolojiya, i bushkan solo de saver lo ke se paso para ke tal koza sea la konsekuensa de tal otra, i nada mas. Es ke ay un espiritu detras, esto no es sus dominyo. Monod va mas leshos : no kale bushkar, porke no ay. El universo es indiferente, sin espiritu detras.

Ma los syentifikos bushkan i bushkan, i bushkando salen la teoriya del big bang, asigun la kuala una koza muy chika, muy kalyente  i muy pezgada (el pezgo de todo el universo ) se patladeo ay de esto unos 13,8 milyardas de anyos, i en un milyardemo de sigunda los pedasos se izyeron kuarkos, los kuarkos se izyeron atomos, los atomos se auniron en molekulas, i de estas nuves de molekulas salyeron estreyas aunidas en galaksiyas, i de una de estas estreyas ke yamamos sol salyeron planetas, sea demaziya leshos del sol, sea demaziya serka, salvo una ke se topava a la buena distansya i ke yamamos tyerra. Esta tyerra es una bola de fuego ke se va arrefreskar a poko a poko.

Bueno. Si meldi byen lo poko ke entendi de esto todo, es ke si la tyerra es la konsekuensa del azardo i de la nesesidad, la probabilidad para ke del big bang salga la tyerra es de una sovre milyones o milyardas. Un poko mas kaldo, un poko si un poko l’otro, i la tyerra no puediya egzistir. I una vez la tyerra, de esta bola de fuego la probabilidad ke salga el ombre es tambyen de uno sovre milyones o milyardas. Un poko mas de esto, un poko manko de esto, i no ay mar. Un poko mas de sal, i no ay vida. Ets. Esto es lo ke mos ambezan los syentifikos oy.

Komo se paso ansina ? El azardo i la nesesidad. La nesesidad, bueno, ama kuando la probabilidad es de uno sovre milyardas, es ke dainda se puede avlar de azardo ?

En los Estados Unidos, ay savyos, en jeneral protestantes, ke pyensan ke detras de esto todo ay una veluntad intelijente ke no yaman el Dyo, porke se kyeren syentifikos i ke el Dyo no se estudya por la syensya, ama yene lo pensan tan fuerte ke ya se entyende. Gran arkitekto, Ser Supremo, es el Dyo de syertos filozofos, el Elohim ke, asigun muestra relijyon, « kriyo al syelo i a la tyerra ».

En muestra relijyon, el Dyo ke yamamos Adonay mos kyere, se okupa de mozotros en las kozas de kadal diya, i es el mismo ke Elohim. No ay diferensya, i al kavo de Kipur lo dizimos syete vezes en sira (i mismo 14 en vedra) : Adonay hou aElohim . Adonay i Elohim son el mismo Dyo. El ke kriyo los syelos i la tyerra es el mismo ke mos salyo de Aifton i mos dyo su ley.

I los hahamim ke eskrivyeron la Hagada munchos siglos antes de la shoa, mos dizen dos kozas : la primera ke malorozamente kontinuo se ser vedra munchos siglos despues de ser eskrita : « En cada jeneransio i jeneransio se paran sovre nos por atemarnos » i la sigunda, muy yuch de dizir despues de la shoa : « y el Santo Bendicho El nos escapa de sus manos ».  Es por esta sigunda parte ke munchos djudyos se alesharon del djudaismo, dizyendo : sea el Dyo es todopoderozo, i si desho azer es negro, sea desho azer porke no lo puediya impedir, i en este kavzo no es todopoderozo. Esto vale no solo por las desgrasyas echas por los ombres, ma tambyen por las desgrasyas vinyendo de la natura sola : terremotos, tsunamis, ets, ke matan a miles de inosentes.

El livro de Iyov ya se konsagra a esta kuestyon, i responde ke el Dyo es todopoderozo, ama mozotros no puedemos entenderlo.

Muncho kedariya de dizir, ama ya vino el tyempo de eskapar mi emisyon, i vos digo : al djueves ke vyene, si kyere el Dyo !

Edmond Cohen
Paris, Fransya