eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
____________________________________________________________
4. Los ermenis
Myentres ke se topava dainda prenyada, mi vava fue espertada una noche por gritos terrivles venidos de la kaye : eran turkos ke aziyan un pogrom de todos los vizinos ermenis ; estremesida, mi vava veiya de su ventana sus desmazaladas vizinas ermeniyas travadas por los. kaveyos i degoyadas en la kaye. Mi famiya espantada pensava ke los degoyadores vendriyan a malograrla eya tambyen… No fue el kavzo. Bushki en el Quid i topi : « 1896 : fin de agosto, rebueltas en Estambol (miles de Ermenis matados) »… komo se eskrive en pokos byervos la Istorya…
Estudyando de mas serka la kuestyon, me ambezi ke la matansina de Estambol (komo 6.000 Ermenis) se paso en la noche del 26 de agosto 1896, ke da muncho a akodrar a una famoza noche, esta del 24 de agosto, ma en Paris en 1572, tres siglos antes, mas konosida por el nombre de noche de la Saint-Barthélémy.
En vedra las matansinas teniyan empesado en todo el este de la Turkiya desde 1894, i izyeron entre 1894 i 1896 serka de 300.000 muertos en la totalidad del Imperyo. Por siguro, el shifro de 300.000 no es establesido, ma de toda manera la kantidad de viktimas fue konsideravle.
Avro aki una paranteza a propozito de los Ermenis. La matansina ke esto kontando se paso en 1896, dunke 19 anyos antes del grande jenosid de 1915. En 1896, estamos basho la otoridad del Sultan Abdulhamid, yamado el Sultan korolado (syendo ke lo korolado es la kolor de la sangre…) i las viktimas se kontan por miles. Miles, es imprechizo, ma ya es muncho. Portanto es solo el evenimyento anunsyador de lo ke va vinir despues. En 1915, son los Djovenes Turkos ke seran al poder, i se van a kontar las viktimas ermeniyas por syenes de miles (entre un milyon i un milyon i medyo, asigun los istoryanos).
Mi padre, ke teniya 18 anyos en Estambol en 1915, me konto ke el jenosid de los Ermenis era deshado enteramente sekreto i la povlasyon d’Estambol no saviya nada. Nada paresiya sovre esto en las gazetas. Ama mi vava Sultana teniya un ermano, Zeki Hayon, ke era alto funksyonaryo en la administrasyon osmanliya, kargado de la Posta, i por esto embiyado en misyon en las provinsyas del este de la Turkiya . Por el es ke la famiya se ambezo las orores ke se pasavan aya. « Lo ke vide aya trespasa todo lo ke se puede imajinar », teniya dicho a mi padre. Estos evenimyentos muncho pesgaron sovre su desizyon de emigrasyon syete anyos mas tadre, en 1922, porke despues de los Ermenis son los Gregos ke fueron aharvados, i las minoridades komo los djudyos empesavan a demandarse si sus torno no iva segir.
Ma esto antisipando. Serraremos por agora esta trajika paranteza ermeniya, i aboltaremos atras, kijo dizir al siglo 19, en 1897, al nasimyento de mi padre Albert.
A kontinuar…
Edmond Cohen
Paris, Fransya
Fuente: LK/eSefarad
