eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
10 La imigrasyon en Fransya
I ansina es ke en novyembre 1922, la famiya Cohen embarka verso la Fransya sin idea de aboltar. El destino tyene de estas ironiyas, ke Jacques Deval a amostrado en su pyesa « Esta tadre en Samarkanda » : kreendo fuir la sekana, en vedra te echas delantre de eya : vente anyos despues esta fuida, mos vamos a topar en 1942. La Fransya, antes protektrisa de los Israelitos del Levante, los da en masa al okupante nazi, myentres ke los djudyos kedados en Turkiya, pais neutro i non okupado, se alegren de no tener tomado el partido de la emigrasyon, i de toparse ansina al abrigo de los Almanes.
Ma antisipo…
Kuando la famiya ayega en Paris, mi padre la trae a la sola male ke konoska mas o menos, la male latina. I todos moran unos kuantos diyas en un otel de la kaye Racine, asta ke mi padre tope un apartamento guarnido, kaye de Nemours, en el 11en arrondissement, serka del metro Parmentier, a unos kuantos syenes de metros del kruazimyento de las kayes Sedaine i Popincourt, sentro nevraljiko de lo ke era yamado « la chika Turkiya ». Era la male ande veniyan arrekojerse todos los djudyos del imperyo osmanli, al derredor del kal situado 7 kaye Popincourt.
No keda mas ke topar lavoro. Mi padre lo topa en una sosyeta de kontensyo en los trasportes, la Liga de Defensa kontra los shemen de fer, dirijida por Marcel Lamy. Es esta empreza ke va salir despues la empreza Lamy, ke oy edita livros de derecho en munchos dominyos i no solo el derecho de los trasportes. Mi padre kedara aya kuatro anyos, asta 1926, kuando alkilara un buro kaye de Astorg para meterse a su kuenta komo konsilyo juridiko, syendo ke no puede azerse avokato en Fransya, por esto kale ser fransez.
El echo de konsilyo juridiko le permite, desdel mes de desyembre 1927, de mudarse de kaza kon su famiya, i de alkilar un apartamento en el 45 kaye del Faubourg Montmartre, en el 9en arrondissement. Ya es mas shik… La famiya se va kedar aya asta mi nasimyento en fin 1936.
En kuanto a mi papu Nissim, syendo ke su dominyo es los dyamantes, se aze simsar (courtier) en dyamantes, lo ke lo dispensa de lokal: su lavoro, lo aze en los kafés de la male de los dyamanteros , al kruazimyento de la kaye Cadet i de la kaye Lafayette.
La mas desmazalada es mi vava Sultanza, enteramente arrankada leshos del sol i de la mar, leshos tambyen de sus amigas i de su grupo familyal kon el sentido ancho, en esta sivdad ajena, yelada i luvyoza ke es Paris, ande la djente se enserra, serrando los pandjures a las sesh de la tadre, ande eya topa dinguno de las frutas i zarzavates ke alegriyan la mas prove de las mezas de Estambol.
Kale dizir tambyen ke el Paris de 1922 no tyene nada de ver kon el Paris kosmopolit de oy. Las frenkes (tomates) son una zarzavat rara. Las berendjenas son kaji deskonosidas, las bamyas no kale avlar, dainda lo son… Las kalavasas son kodja boy, el misir sirve solo para dar a komer a los puerkos. La sola zarzavat ke se tope kuanto se kyere es la patata, ke los Fransezes gizan de mil maneras, komo lo azen los djudeo-espanyoles de la berendjena.
Los pishkados ke se vende en Paris vyenen del Atlantiko, poko de la Mediterranea. Munchos son deskonosidos de mi vava ke los mira kon deskonfiensa…
Es solo mas despues ke, a poko a poko, munchas personas de la famiya imigran eyas tambyen, travadas por esta Fransya por siguro muy aflakada despues de una gerra ke teniya sozde de ser la ultima, ma, djustamente porke falta de brasos, ande ay lavoro para todos.
A kontinuar…
Edmond Cohen
Paris, Fransya
Fuente: LK/eSefarad
