eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
16. La imigrasyon de Betty
Betty teniya 11 anyos en 1926, al kazamyento de su padre. Al empesijo del anyo 1933, tyene 17 anyos. Oye su padre ambezarle un muy negro haber : Hitler tomo el poder en Almanya, lo ke anunsya nada de bueno.
Eskapa sus estudyos. Su ermana, Mina, le propone de venir adjuntarse a eya en Fransya. Acheta, ma no se obtyene un permiso de morar en Fransya ansina. Va kaler munchos esfuersos en Estambol, la intervensyon de varyas personas ansi ke varyons kontrolos para ke, enfin, el Konsolado de Fransya en Estambol de su otorizasyon. Puede enfin embarkarse solika sovre un vapor ande, a lo ke me disho, los marineros se amostravan muy kuydadozos verso eya.
Ayega en Marsilya ande es akojida por una ermana de su madre, Tante (pronunsyar tante, a la manera almana) Tony. Lo ke impresyona lo mas Betty, kuryozamente, es la kantidad i el presyo bastante barato…de las bananas, frutas egzotikas, raras i karas en Estambol.
Despues de artarse de bananas, se va en Paris, ande es akojida por Mina i su marido sefardi Rodolphe. Moran en un chiko apartamento en Vincennes. Betty eskapa por topar un empyego de vendedora ande ande un djoyero de la kaye Rivoli. Es establesido en un kortijo, i su lavoro a eya es sovre todo de travar los muhteris de la kaye verso el kortijo…
Los alhades, se va en vezes a baylar en el Chalet du Lac, a la entrada del Bois de Vincennes.
Ama ansina es : estamos en un tyempo de kriz i de ksenofobiya. Mina no obtyene el renovimyento de su karta de lavoro, i a su grande dezespero, es ovligada de deshar las Galeries Lafayette. Para Betty, es mas peor : es su titolo de morada en Fransya ke no es renovado, i se topa basho la amenaza muy seryoza de una ekspulsyon del territoryo franses.
A kontinuar…
Edmond Cohen
Paris, Fransya
Fuente: LK/eSefarad
