eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
20. El nasimyento i la prima chikez de Edmond
En la primavera 1936, Betty se topa prenyada, i Albert se da kuenta ke la famiya se va topar al estrecho en el apartamento del Faubourg Montmartre, i ke kale bushkar mas grande. Despues de la kriza de la morada ke aviya segido la primera gerra, mos topamos agora en medyo de una kriza a la rovez, i enfloresen en los balkones tabelas para apartamentos ofresidos a la kira (i no a la vendita : la kopropriedad es una koza dainda deskonosida en este tyempo).
Por lo ke se pasa en Evropa en estos tyempos, akodraremos que, en 1936, Hitler komanda desde ya tres anyos en Berlin, ande se pasan este anyo los Djuegos Olimpikos, markados por la viktorya arrebashante del preto Jesse Owens a los 100 metros i al salto en largura, Franco empesa la gerra de Espanya, i la syedra gana las eleksyones en Fransya : es la Frente Popular.
Es Leon ke topa i vijita un grande apartamento de ocho kamaretas a la tresera tabaka del 60 kaye Saint-Lazare. Mi nasimyento es asperado para el empesijo de desyembre 1936, el kontrato es firmado para empesar al primo de janvier 1937. Mis paryentes kedaran aya komo kiradjis durante 43 anyos, asta 1980.
Por lo ke es de mi, Edmond Cohen, yo nasi el primo de desyembre 1936 en Paris, 12 kaye Lamartine, ande la senyora Bourdier, « komadre de prima klasa » (lo sé por su faktura, i syempre me alegri ke mis paryentes pensaron mas negro de irse kon una komadre de sigunda o de tresera klasa) i pishin en el primo de janvier 1937 me vo a morar en el muevo apartamento de la kaye Saint-Lazare.
So sirkunsido por un moel (devriya dizir peritomisto, ama kyen disho una sola vez peritomisto ? La komputadera lo eskrive en korolado : ni tyene este byervo en su vokabularyo) yamado Braun, alkunya ke da grande konfyansa a Betty, afillu si no tyene dingun atadijo de famiya kon el. De vedra nunka tuve de kesharme de su lavoro.
No tengo, por siguro, dingun rekodro de los anyos 1937 i 1938.
En 1938 (el anyo de los akodros de Munich) tenemos de ir en vakansas en Deauville. En estos tyempos, irse en vakansas era komo una emigrasyon : los tapetes eran travados i guadrados en la naftalin, toda la mobilya era kuvyerta de enfundas, ets. A la ora de partir, al paso de la puerta, Albert se apersive ke se a olvidado su chapeo. Salir kavesa desnuda es tan inkongrudo komo si se kaminava en pijama en la kaye. Abolta en el apartamento, se arresvala sovre el tavlado sin tapet, kaye, i se rompe a la vez el ombro i la anka. No ay mas kuestyon de viaje ni de vakansas. Es vedra ke la villa alkilada en Dauville se topava kaye Albert Fracasse (Machuka). El nombre uvyera devido dar un syerto desfiyo a mi padre…
Despues de unas kuantas semanas pretas en el alchin i una reedukasyon byen echa por un kine ke se yamava Régitz, i del kual yo mismo tuve menester muncho mas despues, Albert kovra su mobilidad, i na ke mos topamos al enverano 1939. Esta vez, es en Royan ke mos vamos en vakansas. Yo teniya dos anyos i medyo, dunke mis rekodros son muy proves, ma no enteramente inegzistyentes. Aviya una uerta, i en la uerta de al lado, una ijika ke se yamava Marie-Paule, i su ermano. El saviya chaktear de la aluenga, yo no. Me akodro tambyen de un chiko tren. Flashes, por siguro.
A kontinuar…
Edmond Cohen
Paris, Fransya
Fuente: LK/eSefarad
