eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
____________________________________________________________
Una chikez djudiya basho la Okupasyon
Amigo meldador, vas a meldar – a lo manko si tyenes la pasensya i la gana – rekodros de chikez ke solo destinava a mi famiya. Ma algunos los toparon interesantes , i me enkorajaron a puvlikarlos. Dunke aki estan…
I para empesar, un poko de jenealojiya.
1 Los antepasados Cohen
El primer antepasado de mi famiya yevando la alkunya de Cohen sovre el kual tengo informasyones siguras es mi bispapu Abram Cohen, ke no konosi porke se muryo muncho antes mi nasimyento, ma ke mi padre, el, konosyo muy byen. Malorozamente, nunka tomi el tyempo de peshkuzar a mi padre sovre el, i agora es demaziya tadre. De tal manera ke se pokas kozas sovre el. Se ke era ijo regalado, koza rara en esta epoka, ke era merkader de teshidos, ke nasyo al derredor de 1835 en Estambol, en una famiya de sefaradim djudeo-espanyoles, desendyentes de djudyos arrondjados de Espanya en 1492 por los Reyes Katolikos Isabel de Castilla i Fernando de Aragon, ma akojidos en el Imperyo Osmanli por el Sultan Beyazid II , i ke konservaron durante siglos, en medyo de los Turkos, sus lingua espanyola del siglo XV, adjuntando kon el tyempo byervos turkos, munchas vezes trasbokandolos para azer de eyos byervos a la espanyola. Verso 1865, Abram Cohen se kazo kon Calo Ortas, de tres anyos mas manseva. Tuvyeron kuatro kriaturas, entre las kuales dos ijos arrodeados por dos ermanas, una bohora i una chika. El bohor de los dos ijos se yamava Joseph, el mas mansevo era mi papu Nissim Cohen. Este Abram Cohen, padre de mi papu Nissim, se muryo en Estambol en 1907, dos anyos despues su mujer Calo, ke por razones ke no se, lo teniya deshado en el kavo de su vida para ir adjuntarse a su ijo Joseph en Alexandria en Ayifto. Aya es ke se muryo mi bisvava en 1905.
Suvir mas arriva de Abram Cohen mos yeva verso supzisyones, ama yene bastante seryas. Si el bohor de sus ijos se yamava Joseph, todo da a pensar, por induksyon, ke su padre se yamava Joseph, i ke dyo este nombre al bohor de sus ijos asigun una tradisyon sefardiya raramente desmentida. Es vedra ke de este Joseph no savemos nada, sino ke por tener un ijo nasido en 1835, tuvo de naser serka de 1805, poko antes o poko despues la bataya de Austerlitz…
Es ke se puede suvir mas arriva ? Se puede azer una mueva supozisyon, ke keda serya afillu si dinguna preva vyene enforteserla : syendo ke savemos ke Abram Cohen era ijo regalado, dunke komo un ijo bohor, ay buenas razones de pensar ke su nombre Abram era el de su papu, padre del supozado Joseph. No es dunke imposivle de pensar ke el papu de Abram Cohen deviya yamarse el tambyen Abram, i por tener un inyeto nasido serka de 1835, este antepasado Abram Cohen tuvo de naser en el siglo XVIII, en los anyos 1780. Yo uvyera muy kerido saver mas sovre este antepasado, i uvyera sido bastante para esto ke mi padre peshkuze su papu Abram sovre su propyo papu, komo yo konto aki los rekodros ke tengo de mi papu Nissim. Ama sea no lo izo, sea lo izo ma yo no pensi a demandarle. Estonses mos kedaremos aki sovre los antepasados de mi papu Nissim.
A kontinuar…
Edmond Cohen
Paris, Fransya
Fuente: LK/eSefarad
