eSefarad Noticias del Mundo Sefaradi
Keridos amigos,
Este djueves vo azer mi penultima emisyon antes de las vakansas, savyendo ke la ultima, el 29, no va ser una emisyon aparejada de antes, i no la embiyare a LK, syendo ke vo arresivir Alain de Toledo ke avlara en franses del sakon del livro judeo-espanyol ke se tendra en Paris el 3 de septyembre. Si kyere el Dyo, a esta okazyon se topara el livro memoryal de los djudeo-espanyoles deportados de Fransya, al aparejimyento del kual la asosyasyon Muestros Dezaparesidos, ke prezida Alain, lavora desde unos diez anyos. Este djueves, vo avlar de Carl Lutz, ke salvo unos 62.000 djudyos de Budapest en 1944, i vo kontinuar kon la etika djudiya.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct.
I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
——————————————————————————————
LA ETIKA DJUDIYA (4)
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Antiyer martes 20 de junyo se tuvo el ultimo atelye de konversasyon de Vidas Largas antes de las vakansas. Si kyere el Dyo, empesara por de muevo despues de las fyestas de Tishri.
En kuanto a mis emisyones, la de oy es tambyen la penultima antes de las vakansas. El djueves proksimo, para mi ultima emisyon antes de las vakansas, vo arresivir a mi amigo Alain de Toledo, ke vos avlara (en franses porke le vyene mas kolay) del salon del livro djudeo-espanyol ke se tendra el alhad 3 de septyembre en Paris.
Despues de las vakansas, mi primera emisyon sera ishalla el djueves 7 de septyembre.
Oy, komo la semana pasada, tengo en kaza dos de mis inyetizikos, estan kon mi i vo los kyereo prezentar.
Ladies first, las mujeres en primero:
«Saludes a todos. Me yamo Annaelle i so la inyetizika de Edmond. Tengo syete anyos.»
I despues su ermano grande:
«Yo so Lior. Ya vine aki dos vezes kon mi papu. La primera vez teniya syete anyos komo Annaelle, ama agora tengo diez.»
En kuanto al papu, antes de ayegar a la kontinuasyon de mi meldadura sovre la etika djudiya, me pensi de avlarvos de syertos Djustos entre las nasyones ke deskuvri mirando la istorya de los ke aprovaron, i por parte reusheron a salvar de los matadores nazis los djudyos deUngariya, sovre todo los de Budapest.
Ya vos teniya avlado aki mismo, en una emisyon ke ize el 5 de marso 2009, de Raul Wallenberg, venido de Sueda maksus para esto, i un poko antes, el 19 de fevrero del mismo anyo, vos aviya avlado de Angel Sanz Briz, diplomato espanyol.
Yo kreiya ke solo estos dos diplomatos se aviyan peleado en favor de los djudyos de Budapest, ama agora kayi, grasyas a internet, sovre una laja ke se topa en Budapest, i ke guadra la memorya de varyos otros Djustos, en jeneral diplomatos de paizes neutros ama no solo, ke por la mas grande parte yo no konosiya, i ke eyos tambyen djugaron un rolo, por syertos muy provechozo, en la salvasyon de los djudyos de Ungariya, sovre todo de Budapest.
El mas importante entre estos fue el diplomato suiso Carl Lutz, porke a el solo reusho a salvar 62.000 djudyos, luchando kon muncho koraje kontra kapos nazis komo Adolf Eichmann.
Oy vos vo avlar solo de Carl Lutz. Una otra vez, si kyere el Dyo, vo avlaré tambyen de otros Djustos komo Angelo Rotta o Henryk Slawik.
Carl Lutz nase en 1895 en Walzenhausen, una sivdadika de Suisa, noven en una famiya de diez kriaturas. Su padre es ovrero i su madre ambeza la relijyon (protestanta metodista) a las kriaturas del kazal. En 1913, a los 18 anyos, dechida de irse en Amerika, ande aze los chikos lavoros ke topa. En el Missouri, toma kursos de teolojiya metodista. Obtyene tambyen un lavoro de enverano en la embashada de Suisa en Washington. Despues va ser embiyado al konsulado suiso de la sivdad de Saint-Louis. Aya konose Gertrud Fankhauser i se kaza kon eya.
En 1935, a la edad de 40 anyos, despues de 20 anyos en los Estados Unidos, es embiyado a Yafo, en Palestina, pais governado por los inglezes kon mandato de la SDN. Es el anyo ande empesa la krizis kon los arabos, segida por la grande rebuelta araba de 1936.
Kuando empesa la Sigunda gerra mundiala, los diplomatos almanes se van de Palestina, agora territoryo enemigo, i le fiyan la reprezentasyon de sus enteresos. Carl Lutz va luchar para mantener los derechos de bivdas i uerfanos almanes kedados en el pais, i de esto los Almanes van a guadrar una syerta konsiderasyon verso Lutz, konsiderasyon ke lo ayudara mas despues, porke va ser embiyado en Budapest en 1942.
Al empesijo, los djudyos de Ungariya, pais alyado de la Almanya i por esto non okupado por los Almanes, son bastante kyetos en komparazon kon los otros djudyos de Evropa. Carl Lutz, por su parte, vise-konsul en Budapest, se ve konfiar los interesos de los Estados Unidos, de Ingletyerra i de dodje otros paizes alyados. Lavora tambyen kon el buro de la Adjensiya Djudiya ke pudo embiar kriaturas djudiyas en Palestina.
Las kozas trokan el 19 de marso 1944, kuando, vyendo ke Horthy, kapo de la Ungariya, esta aprovando de tomar relasyones kon los rusos, los Almanes entran en Ungariya, yevando kon eyos a Eichmann, ke tyene por sola idea i solo eskopo de deportar a todos los djudyos de Ungariya, lo ke empesa desde el 15 de mayis.
Lutz, ke reprezenta, en mas de la Suisa, a unos dodje otros paizes, komo lo dishe, va aprovar de protejar al empesijo a lo manko a los djudyos sivdadanos de estos todos paizes.
Kon el ayudo de otros diplomatos de paizes neutros, Wallenberg i Angel Sanz Briz, estos ya los konosemos, ama tambyen Angelo Rotta, nonsyo apostoliko, kijo dizir reprezentante del Vatikano, Friedrich Born, delegado suiso del Komitado Internasyonal de la Kruz Kolorada, Carl Lutz va ograshear para salvar lo mas posivle de djudyos. Toma 76 hanes, munchos en la male djudiya i malorozamente vazyados de sus djudyos por las deportasyones ke ya empesaron los Almanes, i aze de estos hanes lugares protejados por la extraterritoryalidad suisa ande enkasha a famiyas enteras de djudyos – la misma koza ke aziya Wallenberg en nombre de la Sueda i Sanz Briz en nombre de la Espanya.
Lutz se va ver a Eichmann i reushe a obtener de el la proteksyon de la Suisa para 7.800 djudyos ke ya teniyan obtenido la otorizasyon de ir en Palestina. Komo Sanz Bris, Lutz toma kada numero, no por una persona sola, sino para su famiya entera. I kuando sus letras de proteksyon numerotadas de 1 a 7.800 ya yegaron a 7.800, kontinua de numerotar, ama en empesando de muevo por uno, i ansina munchas vezes, al punto ke va pueder, de una manera o de otra, salvar de la muerte a 62.000 djudyos.
Los nazis almanes ya se dan kuenta ke Lutz los esta enganyando, i uno eskrive mismo a Berlin para ke sea matado, ama, puede ser por memorya de lo ke izo en Palestina en favor de los Almanes, el orden no es dado de matarlo.
Lutz va tener munchas difikultades kon las Kruzes Flechadas, la organizasyon ungareza nazi al poder, ke no admite sus letras de proteksyon, i aprova de saver kuales son las halizes i kuales son las falsas. Kuando se aserkan los Rusos, Lutz se keda en Budapest para ayudar sus protejados. El mismo, kuando empesa la bataya de Budapest, se ve ovligado de kedarse en el mahsen a basho del konsulado durante dos mezes. A la yegada de los Rusos, se ve echado afuera, ama tyene la vida salva, lo ke no va ser el mazal del povereto de Wallenberg.
A su yegada en Suisa, en vez de ser tratado komo un gibor ke also el onor de la Suisa, va ser sermoneado por su dezobedesensya i su abuzo de sus fonksyones. Es solo despues de 1958 ke su rolo va ser rekonosido por la Suisa.
En 1963, una kaye de Haifa en Israel yeva su nombre, i en 1964 Lutz resive el titolo de Djusto, i tambyen su prmera mujer Gertrud, ke lo ayudo muncho, en 1978.
Lutz se muryo en 1975, Gertrud, su primera mujer, en 1995.
Esto dicho, por oy, tengo de kontinuar mis emisyones sovre la etika djudiya, en vedra djudiya liberala, empesadas el 18 de mayis, travadas de un artikolo del haham liberal ingles John D. Rayner, trasladado i adaptado al franses por el haham, liberal el tambyen, François Garaï.
Me teniya kedado, ay dos semanas, sovre la Etika sosyala, sovre fuerte i flako, eskapando esta parte kon la konsolasyon de las personas en luto.
I agora, despues de fuerte i flako, vengo a riko i prove, lo ke no mos alesha muncho de lo de antes.
I en primero, luchar kontra la provedad.
La Tora dize el auguro «que no sea en ti desseoso» (Devarim, XV, 4). Esto es el eskopo ke devemos aprovar de obtener por muestra aksyon en el seno de la sosyedad. El mismo teksto rekonese ke la dezaparisyon entera de la provedad puede ser no sera posivle: » Que no se vedara (dezaparesera) desseoso de entre la tyerra» (XV, 11). Por esto es ke kale a lo manko eliminar la provedad ekstrema.
No apretar el prove.
Es una mitsva de no aprovechar la flakeza del prove i de no travar entereso del avanso ke le vyene imposivle de pagar, asigun esta eskrito: «No atuerças juizio (desviyes el derecho) de tu desseoso en su barajar (proseso)» (Shemot, XXIII, 6), i tambyen : «Quando plata prestares a (…) el pobre contigo, no pongades sobre él logro (entereso)» (Shemot, XXII, 24). Kon esta idea, los tekstos del Tanah son munchos kontra el apreto del prove i ordenan de no aprovechar su flakeza: «Por que fazes (karas) de pobres moledes (majash)? » (Yeshayau, III, 15), » Por su vender por plata justo y desseoso por dos çapatos» (Amos, II, 6) «Por vuestro prear (pizar) sobre mendigo y presente de civera (dasyo sovre su trigo) tomades del…Muchos vuestros rebellos y fuertes vuestros pecados, angustiantes (persigyentes) justo, tomantes precio y desseosos en el portal (del tribunal) atorcieron» (Amos V, 11-12).
Este prinsipyo vale tambyen para las relasyones komersyalas internasyonalas.
La reabilitasyon del prove.
Es una mitzva de ayudar a los ke son menesterozos para azerlos salir de sus povredad, asigun esta eskrito: » Y quando se empobresciere tu hermano (…) esforçaras en el, peregrino y moradizo, y bivira kontigo. No tomes de con el logro (enteres) ni usura, y temeras de tu Dio, y biva tu hermano contigo.» (Vayikra XXV, 35-36) «y prestando le prestaras abondo de su falta (de lo ke le falta) que faltare a el» (Devarim XV, 8). Los hahamim syempre konsideraron esta ovligasyon komo azyendo parte de las mitzvot esensyales para guadrar el ekilibryo de la sosyedad (Mekhilta sovre Shemot XXII, 24, Shemot Rabbah XXXI, 4). Kon esta idea, Hillel establesyo el Prosbul, akto ke baldava la anulasyon de las devdas por la deshadura (el anyo sabatiko) asigun Devarim XV, 3 (Mishna Sheviit X, 4). Es prosbul era nesesaryo porke sino, kuando se aserkava la deshadura, dinguno prestava al menesterozo.
Asigun el Talmud, «mijor es prestar a los menesterozos azyendo kon eyos un echo ke darles la sedaka (Shabat, 63a). Por esto es ke Rambam eskrive ke uno de los grados mas altos de los aktos de byenvolensya es prestarles paras, tomarlos komo haver o toparles un empleo (Mishne Tora, Hilkhot Matnot Aniyim, X, 7)
Prestar al prove.
Es una mitsva de ayudar al prove. No solo kale prestarle paras, ama ensima kale azerlo kon djenerozidad, asigun esta eskrito: «Quando fuere en ti desseoso de uno de tus hermanos, en una de tus villas en tu tierra que Adonay tu Dio dan a ti, no enforteças a tu coraçon, y no cierres a tu mano de tu hermano el desseoso. Que abriendo abriras a tu mano a el, y prestando le prestaras abondo de su falta (de lo ke le falta) que faltare a el» (Devarim, XV, 7 i 8). Esta idea es el fundamyento de la idea djudiya de tsedaka. Todos deven partisipar a la tsedaka, rikos i proves, kada uno asigun lo ke puede. Es grasyas a este fundo ke el prove puede emprestar de tal manera ke prestadero i emprestadero kedan deskonosidos, lo ke es konsiderado komo la mijor manera de rezolver los problemas de los unos sin ke dinguno syenta umilyasyon (ver Rambam, los ocho grados de la tsedaka en Mishne Tora Hilkhot Mahnot Aniyim X, 7-14). Esto se deve de azer en el respekto del menesterozo, asigun esta eskrito: «Ashre maskil el dal!» (Teilim XLI, 2). (Lo meti en ebreo porke tengo problemas kon la traduksyon, no del byervo ashre, ke kyere dizir orozo, ama de los byervos maskil i dal. Asta agora syempre tomi la traduksyon de la Biblia de Ferrara, porke es en ladino i ke dunke traslada palavra por palavra. Ama esta vez la Biblia de Ferrara traslada ansina: «Bienaventurado visitan a enfermo». Halbuki maskil kyere dizir meoyudo (ke tyene sehel), i dal prove. Deke la Biblia de Ferrara traslada «maskil el dal», ke todos, inkluyendo el haham Garaï, trasladan por «el ke entyende el prove», por «visitan a enfermo»? Esto no sé, afillu si Chouraqui, el tambyen, traslada «dal» por «infirme».
Esto dicho, el Talmud Bavli mos da a entender komo este prinsipyo se deve praktikar (Baba Batra 8b)
Alivyanar a la provedad.
Es una mitsva de dar al prove la posibilidad de alivyanar a su provedad, asigun esta eskrito: «En vuestro segar a segada (…) no atemes (eskapes) a rincon de tu campo por segar, y cogimiento (glanure) de tu segada no cojas. I tu viña no rebusques (ne grappille pas), y grano de tu viña no cojas, al pobre y al peregrino dexaras a ellos, yo Adonay vuestro Dio» (Vayikra XIX, 9 i 10). Otras leyes komo la del dyezmo (la dîme) (Vayikra XXVII, 30-33, Bamidbar, XVIII, 24, Devarim XIV, 22-26, 28-29), de la anulasyon de las devdas en el anyo sabatiko (Shemot, XXIII, 10-11, Vayikra, XXV,1-17, Devarim, XV, 1-3) i del ritorno de la propriedad immobilyare en el anyo del Yobel (Vayikra, XXV, 8-13) permetiyan de menguar syertas inegualidades.
Estas leyes amostran ke uno de los deveres de la sosyedad es de mamparar el prove kontra inegualidades demazyadas, i de azer una redistribusyon peryodika de los byenes para ke el aleshamyento entre rikos i proves no sea demazyado. Oy estos prinsipyos kedaron en las leyes sosyales ke aprovan de segir i mantener este espiritu del djudesmo.
Kon esto me vo kedar para oy. La semana proksima arresivere Alain de Toledo, komo vos dishe al empesijo. Dunke vos digo al djueves ke vyene, si kyere el Dyo!
Edmond Cohen
Paris Fransya
