eSefarad Noticias del Mundo Sefaradi
Keridos amigos,
Mi emisyon de radyo de este djueves va ser el kusur de la vida de Moshe Dayan, de 1955 asta su muerte, en 1981.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
MOSHE DAYAN (2)
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Mi emisyon se puede oir en el mundo entero sovre internet, al sityo de Radio J, http://www.radioj.fr, sea en direkto (el djueves a las 4 i sesh, kale klikar arriva a la derecha, sovre Ecoutez Radio J en direct) sea en redifuzyon, indose al kavo de la redifuzyon de las emisyones de la medyudiya del djueves.
De otra parte, vos akodro ke el proksimo atelye de konversasyon de Vidas Largas se va tener el martes ke vyene 2 de fevrero, de las dos a las kuatro, en el Centre Communautaire. Estos atelyes son avyertos a todos, venid munchos.
La semana pasada, empesi una emisyon sovre la vida de Moshe Dayan, i por manko de tyempo tuve de kedarme en 1955, el anyo ande los rusos trokaron de politika i se metyeron kon los arabos, i sovre todo kon Nasser, i le vendyeron , a traves la Tchekolslovakiya, un alay de avyones i tankes muy muy mas numerozos i fuertes de las armas de Israel.
Vyendo esto, Israel tyene menester de toparse un alyado: va ser la Fransya, ke por su parte lucha kontra los arabos en Afrika del Norte, i ke ve en Nasser el ombre ke ayuda a los rebeldos arabos, sovre todo en Algeriya.
Es Shimon Peres ke se karga de las negosyasyones kon la Fransya sosyalista de Guy Mollet para un ayudo militar i politiko. I obtyene un ayudo sekreto. No solo no kale ke los Rusos lo sepan, ama no kale tampoko ke lo sepan los Inglezes ni tampoko los Amerikanos.
A eskondidas de todos, la Fransya embiya a Israel los 270 avyones ke demando, 9 por 9 trenta vezes, lo todo en tres mezes, kijo dizir un emvbiyo de 9 avyones kada tres diyas.
Agora meldo ke istoryanos dizen ke Israel keriya azer la gerra a Ayifton i bushkava un preteksto para esto.
Lo ke no dizen estos mismos sözde istoryanos es ke entre 1949 i 1956, unos 500 israelyanos fueron matados por los infiltrados palestinyanos yamados fedayin, i sovre todo entre 1955 i 1956. Es kolay de tratar Israel de agresor si no se avla de estos 500 muertos, ke eran una razon muy fuerte, i no un «preteksto», komo meldo agora, para afrentar a Ayifton, dirijida por un Nasser diktador ke se armava komo un loko i menasava kadal diya a Israel. El es ke armava i embiyava a los fedayin.
Lo ke no dizen tampoko estos istoryanos ke prezentan Israel komo agresor, es ke nunka los Ejipsyanos permityeron a un vapor israelyano de pasar por el kanal de Suez, malgrado las leyes internasyonales. Una sola vez un vapor aprovo, fue el Bat Galim el 28 de septyembre 1954. El vapor fue aferrado por los Ejipsyanos kon lo ke trasportava (pyel i karne de vaka), i sus diez marineros echados en prezo.
Esto dicho, es vedra ke los Israelyanos i los Fransezes se reunen en gran sekreto el 21 de oktovre 1956 en Sevres, una sivdadika al lado de Paris, en una kaza diskreta pertenesyendo a un senyor Bonnier de la Chapelle. Es el padre del rezistante ke mato, en 1942, al Amiral Darlan, ombre de Vichy ke se seriya opozado al debarkamyento de los Amerikanos en Aljeriya.
Asigun lo ke meldi, los israelyanos venidos a eskondidas en Fransya para negosyar kon los fransezes son David Ben Gurion, ke es a la vez primo ministro i ministro de la defensa, Shimon Peres, direktor jeneral del ministeryo de la defensa, i Moshe Dayan, rav aluf. Meldi ke aviya tambyen Golda Meir, ministro de los echos ajenos, ama no esto siguro, porke todos no lo dizen.
Los fransezes son Guy Mollet, kapo del governo, Christian Pineau, ministro de los echos ajenos, Maurice Bourgès-Maunoury, ministro de la defensa, i Maurice Challe, kapo de las armadas.
Una gazeta a beyledeado a Dayan por modo de su ojo, ama Bourges- Maunoury tyene un amigo, Marc Soudé, ke tyene el tambyen un ojo kon un pedaso preto ensima, i aze saver ke la gazeta se yerro i konfundyo Soudé kon Dayan.
Los Israelyanos kyeren ke los Inglezes vengan tambyen. No kyeren tenerlos kontra elyos. El diya de despues, 22 de oktovre 1956, embiyados por Athony Eden, kapo del governo, vyenen Selwyn Lloyd, ministro de los echos ajenos, Patrick Dean i Donald Logan. Los Inglezes kyeren tomar atras el kanal, ke Nasser a nasyonalizado.
El 24 de oktovre, un akodro sekreto es firmado: Israel va atakar a los Ejipsyanos, i Fransezes i Inglezes van a venir para sözde separar los kombatantes, en vedra por echar a basho a Nasser i tomar atras el kanal.
Por su parte, Israel, ayudado militarmente, a eskondidas, por la Fransya, ataka Ayifton el 29 de oktovre. Dayan, rav aluf, reushe a tomar i Gaza i el Sinay en dos o tres diyas, i destruye la armada ejipsyana. Yega serka del kanal de Suez, lo ke sirve de preteksto a los fransezes i inglezes para intervenir. Obtyenen una viktorya militar kompleta: el kanal es tomado atras, ama esta viktorya militar se troka en desfecha diplomatika porke los amerikanos i los rusos ovligan a los fransezes, inglezes i israelyanos a aboltar i deshar todo. Me akodro de la boz de Ben Guryon anunsyando ke kale deshar atras el Sinay.
Yene Israel guadra dos konsolasyones:
-los kaskos blus de la ONU van a okupar la frontera kon Ayifton (lo ke va servir de nada en 1967, porke se van a ir djusto kuando Nasser va amenasar a Israel, ama esto dainda no se puede andevinar)
– i los fransezes van a ayudar a Israel para tener una bomba atomika (a eskondidas).
Moshe Dayan keda el jeneral viktoryozo, de reputasyon mundyala.
En janvier 1958, Dayan se va de Tsahal i, asigun lo ke meldi, se va a la Universita, deve ser komo estudyante afillu su edad, i si tal es, tuvo de ser, asigun mi, en arkeolojiya, syendo ke syempre se intereso a esto, punto komuno kon Ygael Yadin, el primer Rav Aluf de Israel, ke despues fue arkeologo komo era su padre, el profesor Sukenik.
El anyo de despues, 1959, se prezenta a las eleksyones para la Kneset en el partido de syedra Mapaï, al lado de Ben Gurion ke lo toma en su governo komo ministro de la agrikultura, lo ke va kedar asta 1964; vos akodro ke Dayan, en mismo tyempo ke era ombre de gerra, fue un moshavnik ke aviya estudiado agrikultura en Nahalal. A mi me plaze esta imajen de Cincinnatus deshando las armas para la aradera. Unos trezyentos anyos antes de Cincinnatus, Yeshayau ya aviya profetizado (II,4): «y majaran sus espadas para açadas» (itim en ebreo, socs en franses, ploughshares en ingles).
En 1965, Dayan i Ben-Gurion se van del Mapaï para fundar el partido Rafi. El partido no tyene el sukseso ke pensavan. Dayan se va en el Viet-Nam komo korespondante de gerra para la gazeta Maariv.
Ama la situasyon se bozdeya en mayo 1967. Ayifton demanda a la ONU de tomar atras los kaskos blus ke guadravan la frontera kon Israel, i pishin U Thant, el sekretaryo jeneral de la ONU acheta. Nasser syerra el estrecho de Tiran, lo ke syerra el puerto de Eilath. Ayifton, Sirya i Jordaniya azen una alyansa militar kontra Israrl i Ahmed Chukeyri, kapo de la OLP, responde a los gazeteros ke, una vez los arabos aboltados en sus tyerra, kijo dizir Israel, no avra sovrebivyentes djudyos.
El primo ministro Levi Eshkol, vyendo esto, forma un governo de unyon nasyonala. Su vyejo adversaryo Menahem Begin, del partido Herut, entra en el governo, i el partido Rafi tambyen. Malgrado ke no kyere muncho a Dayan, Eshkol lo aze ministro de la defensa.
I el 5 de junyo, Israel ataka los Ejipsyanos. Los Jordanyanos bombardan a Israel, i Israel ataka tambyen a la Jordaniya. Delantre el mundo entero, enkantado, Israel destroye sus enemigos en kuatro diyas i konkista, entre otros territoryos, la parte este de Yerushalayim i el Kotel. Dayan no aviya tenido tyempo de todo arreglar antes, ama por lo ke es de Yerushalayim, djugo un rolo importante, i todos se akodran komo estava delantre el Kotel kon Uzi Narkis i el haham Shlomo Goren sonando el shofar.
I sovre todo, meldi ke es Dayan el mismo ke, komo ministro de la defensa, i malgrado Eshkol, primo ministro, i Rabin, rav aluf, da el orden de atakar a la Sirya para tomar las alturas del Golan ke menasavan a Israel. En dos diyas Tsahal ya se esta aserkando de Damas. Los Russos intervienyen para eskapar los kombates, ama los Israelyanos an echo tan pronto ke todo esta kocho kuando los enemigos achetan de firmar un armistisyo. Esta vez la opozisyon a Israel de los Rusos i Amerikanos no tuvo tyempo de djugar komo en 1956, indimas ke los arabos, a la vez de demandar ayudo, empesaron por pretender ke estavan ganando, i de esta manera, pedriyeron un tyempo presyozo.
Afillu ke Dayan no es mas militar, solo ministro de la defensa, sale mas i mas gloryozo de esta gerra. Tan gloryozo ke las mujeres se mueren de amor por el, i en vezes el lo aprovecha. Kansada por estas todas mujeres, en 1971, Ruth, kazada kon Dayan desde 36 anyos, demanda el divorsyo. Dayan se va kazar dos anyos mas despues, en 1973, kon una mujer tambyen divorsyada, Rachel Korem.
Ama aboltaremos a la vida publika de Dayan el gloryozo. Dayan, ke save avlar arabo, save tratar kon los Palestinyanos. No es ke kyere dar atras los territoryos konkistados, esto no. Ama alivyanar la vida de los Palestinyanos okupados, si. El es ke empusha la politika de los puentes avyertos, por egzemplo.
I por esto va kedar ministro de la defensa asta kipur 1973. Esta siguro ke los Ejipsyanos no son kapaches, mismo si lo kyeren, de atakar a Israel, afillu si Anuar el Sadat, ke agora se izo kapo de los Ejipsyanos despues de la muerte de Nasser, promete, a kada vez ke toma la palavra en publiko, ke va atakar para tomar atras el Sinaï. No solo Sadat lo apromete, ama los servisyos sekretos de Israel tambyen anunsyan a Dayan ke los Ejipsyanos se preparan a atakar. Dayan no se sikilee. No kree ke ay sekana serka. I de toda manera, pensa ke no es mas posivle de azer komo en 1967 i atakar los primeros. Esta vez los Amerikanos no ayudariyan a Israel.
Los dos primeros diyas del atako en djuntos de los Siryanos i de los Ejipsyanos son terrivles i kostan munchos muertos a Israel. Dayan se demanda kualo azer, i si no vale mijor de ir atras para defenderse mas serka. El rav Aluf David Elazar dize ke no, ke a la rovez kale rezistir i mismo atakar, i kon el ayudo de los Amerikanos ke embiyan armas kadal diya a Israel, lo ke por esto da razon a Dayan, los Israelyanos rezisten i atakan.
I despues de unos kuantos diyas muy duros, reushen a trokar la situasyon, al norte se aserkan de Damas, al sur Arik Sharon korta en dos la armada ejipsyana, traversa el kanal de Suez i entra en el korason de Ayifton, en su djiger. Suve verso el Kayro. Komo a kada vez, Amerikanos i Rusos ovligan Israel a kedarse.
Ama Dayan se topa muy aflakado por no tener preparado la defensa de Israel kontra el atako portanto anunsyado por Sadat. I desde este diya de Kipur 1973, no tyene mas en Israel su glorya de antes. Dayan se ve ovligado de salir del governo. No es mas ministro, solo deputado. Eskrive sus memoryas (Istorya de mi vida, salvo ke su vida dainda no se eskapo i ke Dayan va azer otras kozas, ama dainda no lo save) . Funda una gazeta, hayom aze (este diya) ama no se vende bastante byen i deve kedarse unos sesh mezes despues por modo de la konkurensa de las otras gazetas komo Yediot Aharonot i Maariv.
En 1977, Menahem Begin, kapo del governo i ombre de la derecha Likud ama ke tyene konsiderasyon por Dayan, le demanda de entrar en su governo komo ministro de los echos ajenos. Afillu si no fue elijido por toparse de esta vanda, Dayan acheta. Es echado de su partido i se keda komo deputado independente. I va amostrar su kapachedad de diplomato en la diplomasiya sekreta, para aparejar la famoza vijita de Sadat a Yerushalayim i a la Kneset, solo 4 anyos despues de la gerra de Kipur. Por esto Dayan djugo un rolo importante. Tuvo kontaktos sekretos kon los Ejipsyanos en el Maroko. A kada vez me demando komo Dayan puediya azer para no ser rekonosido, kon su kara i su ojo tan famozos… Es tambyen Moshe Dayan ke va lavorar sovre los akuerdos de Camp David, i ayudar para ke puedan ser firmados.
Ama en 1979, sale del governo Begin, ke topa demazyado duro en su politika ajena, i no lo puede achetar. Afuera de la syedra ke lo echo, afuera de la derecha de la kuala se travo, funda un muevo partido, el Telem, i se prezenta a las eleksyones de 1981. Su partido obtyene dos sityos, es dunke elijido.
Ama es un ombre hazino i aflakado ke entra en la Kneset. En 1980, a empesado un kanser del kolon. Se muere poko tyempo despues su eleksyon, en oktovre 1981, a la edad de solo 66 anyos.
5 diyas antes de su muerte, dize a Freddy Eytan venido a verlo para una entrevista: «No me espanto de la muerte. La syento i la veo vinir».
Es enterrado en su moshav de Nahalal.
Desha una ija, Yael, i dos ijos, Ehud (yamado Udi) i Asaf (yamado Asi).
Yael, nasida en desyembre 1939, fue eskrivana i gazetera. Fue tambyen elijida a la Kneset tres vezes en sira, entre 1992 i 2003. Sus ideas sovre la politika kon los arabos es muncho a la syedra, de la vanda del partido Merets.
Udi, nasido en 1942, artisto de eskultura, es sovre todo konosido por el livro muy kritiko ke eskrivyo sovre su padre despues de su muerte.
Assi Dayan, nasido en novyembre 1945, i muerto en 2014, a los 68, fue un ombre de sinema, a la vez aktor i realizador. Yo me akodro de el komo el ijo de Melina Mercouri en el filmo La promesse de l’aube, travada de un roman de Romain Gary.
Agora ya vino la ora de eskapar esta emisyon, i vos digo al djueves ke vyene, si kyere el Dyo!
Edmond Cohen
Paris – Fransya
