eSefarad Noticias del Mundo Sefaradi
Keridos amigos,
Este djueves vo avlar en mi emisyon de Meir Dagan, ke mos desho el 17 de marso, i ke fue kapo del Mosad entre 2002 i 2010; de Imre Kertesz, djudyo ungarezo sovrebivyente de la shoah i premyo Nobel 2002, ke mos desho el 31 de marso; i de lo ke se paso en Estambol el 19 de marso, ande fueron matados tres turistos israelyanos i feridos munchos otros, i una turka del AKP eskrivyo ke esperava ke los firidos se muryeran.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
DAGAN, KERTESZ, TURKIYA
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, dainda abashamyentado esto no pasa kolay, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 10 de mayo, de las dos a las kuatro i medyo, en el Centre Communautaire.
Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, i estos tyempos lo kyere byen, mi emisyon se puede oir sea en direkto, sea kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.
Estos diyas pedrimos dos ombres ke meresen de ser nombrados, kyero avlar de Meir Dagan ke se muryo el 17 de marso, i de Imre Kertesz ke se muryo el 31, el diya mismo ande ize mi ultima emisyon. Para oy vos kyero avlar de estos dos ombres, i tambyen de lo ke se paso el 19 de marso en Turkiya, ande fueron matados tres turistos israelyanos.
Empesaremos por Meir Dagan, syendo ke el es ke se fue en primero.
Meir Dagan fue el kapo del Mosad entre 2002 i 2010. Nasyo el 30 de janvier 1945 en un treno ande su madre fuiya kon su padre de la Polonya verso la Unyon Sovyetika. El padre de su madre, ke se yamava Ber Erlich Sloshny, fue matado por los Almanes ke tomaron una foto kon eyos riyendosen unos kuantos puntos antes de travar un kurshum en la kavesa de este ombre arrodiyado. Esta foto va ser metida sovre la pared de kada buro ande Dagan va lavorar, para akodrarle de todo azer para ke nunka tal koza pueda afitar de muevo.
El chiko Dagan, ke se yama dainda Huberman, vyene kon su famiya, en 1950, a la edad de sinko anyos, en Israel. Empesa por bivir kon su famiya en un kampo de refujyados en Lod, i despues se van en Bat Yam ande su padre avre un echo de lavandon.
Meir se va ambezar pintura i eskultura en la Universidad de Tel Aviv. Despues se kaza i tyene tres kriaturas.
Aze su askerlik en 1963 (tyene 18 anyos) i entra en la brigada de parashutistos, i se keda militar.
Vyene la gerra de los sesh diyas en 1967, i el se ve dar komo zabit el komandamyento de una trupa de parashutistos en el Sinay. Al empesijo de 1970, se ve kapo de un komando sekreto, yamado Sayeret Rimon, kargado de luchar kontra los palestinyanos en los territoryos. En 1971, resive la Medaya del koraje por tener aferrado un terroristo tenyendo una granada en mano.
En 1973, durante la gerra de Kipur, lucha komo zabit en el Sinay, i entra kon la armada de Sharon en la parte afrikana de Ayifton, de la otra vanda del kanal de Suez.
En 1982, en la gerra del Levanon, komanda la Brigada Barak i es uno de los primeros a entrar en Beirut.
Suve los grados de la armada, asta ser Major General, i en 1995, sale de Tsahal despues de 32 anyos de servisyo.
De este momento va servir de konsejero de los primos ministros para la seguridad kontra el terrorismo. En 2002, Ariel Sharon lo mete kapo del Mosad, komo lo dishe. De este diya, todo lo ke izo i ordeno syendo sekreto, i el governo de Israel no dizyendo nunka las reushitas del Mosad, solo puedemos dizir lo ke se pensa sin tener prevas.
La sola koza ke sea sigura, porke esto lo disheron los primos ministros despues ke se fue, i tambyen despues de su muerte, es ke Dagan fue un muy buen kapo del Mosad. El Mosad fue tres vezes mas numerozo i fuerte, i no se kontento de topar haberes sekretos, en mas de esto izo aksyones sekretas para matar a kapos terroristos komo por egzemplo Imad Mugnieh, gran kapo de Hezbollah ke pensava ser el suksesor de Nasrallah.
Tuvo tambyen el orden de aflakar lo mas posivle a la bomba atomika iranyana, matando los savyos atomistos, azyendo sabotaj de makinas, embiyando virus informatikos en las komputaderas de los injenyeres, bombardando una sentrala en Syria, ets.
Ama de otra parte, fue un adversaryo total de la idea de azer una gerra frentala al Iran, pensando ke no se podriya ganar.
En 2012 empeso un kanser del ligado kontra el kual lucho tanto ke pudo, indo en Bielorusiya para azerse una transplantasyon, ama yene el kanser empeso de muevo, i Dagan se muryo el 17 de marso a la edad de 71.
En vedra no fue un ombre kolay, i despues de su muerte el kontinua de azer ruido. La gazeta Yediyot Aharonot vyene de puvlikar, despues de su muerte, pedasos de la entrevista ke tuvo Dagan kon el gazetero Ronen Bergman. La entrevista entera sera puvlikada amanyana vyernes, ama kon lo poko ke ya fue puvlikado, mos puedemos dar una idea…
«Ya esto arto de Netanyahu…mos dize Dagan. Konosi munchos primos ministros, dinguno fue un santo, mismo Arik (Sharon). Ama todos aziyan pasar el interes del estado antes del suyo mismo. Salvo dos: Bibi (Netanyahu) i (Ehud) Barak. Bibi fue el peor patron ke tuve. El i Barak son siguros de ser los mas grandes djenyos del mundo.»
Aki me kedo kon Dagan, i vos vo avlar agora de Imre Kertesz, djudyo ungarezo sovrebivyente de la shoa ke fue el solo premyo Nobel ungarezo de literatura.
Imre Kertesz nasyo en Budapest en novyembre 1929, en una chika famiya djudiya, de padre merkader de lenya i de madre empyegada.
Komo ya lo savesh, kuando vino la gerra, la Ungariya syendo alyada de los almanes no tuvo okupasyon almana asta ke la situasyon troke i ke los Almanes entren en Ungariya para impedir ke se vaya de la vanda de los alyados. Esto se paso en marso 1944. La sufriensa de los djudyos ungarezos va pishin empesar, es Adolf Eichmann el mismo ke se okupa de organizar la solusyon finala, i va turar asta la yegada de los Rusos en fevrero 1945. Unos 500.000 djudyos son aferrados i embiyados en deportasyon en Auschwitz (salvo unos kuantos salvados por diplomates neutros komo Wallenberg de Sueda o Sanz Bris de Espanya).
Kertesh tyene 15 anyos en 1944. Mos konta komo se akodra del 6 de junyo 1944: «Los vendedores de gazetas gritavan: Invazyon! invazyon! Merki la gazeta i el haber me incho de alegriya. Me tresaliya. Teniya olvidado ke yevava una estreya amariya. Syertas miradas me lo akodraron. Para el chiko ke yo era, aviya solo un paso de la Normandiya a Budapest».
Mos konta lo ke sigyo: «Fui aferrado en Budapest por la polisiya ungareza i deportado a Auschwitz por los nazis en septyembre 1944, en un tyempo ande los Almanes ya aviyan virtualmente pedrido la gerra, leshos despues el desbarkamyento de los Alyados en Normandiya».
I yo, Edmond Cohen, puedo adjuntar ke, en septyembre 1944, ya era liberado de los Almanes. Para mi, la gerra ya estava eskapada, mismo si saviya muy byen ke los kombates kontinuavan mas leshos.
Kertesz kontinua: «No teniyamos la mas chika idea de lo ke se pasava en los kampos. Por tanto los kapos de la komunidad ungareza aviyan sido prevenidos por Rudolf Vrba, sonderkomando ke aviya reushido de fuir de Auschwitz. Lo konto en el filmo Shoah. Los kapos de la komunidad no lo izyeron saver, sea ke no lo kreyeron, sea ke pensaron ke no serviya de nada de dar espanto a la djente si no se puede azer nada.»
Yene yo, Edmond Cohen, adjunto ke no eran los poveretos de djudyos ke puediyan azer kualkyer koza para salvarsen, eran los Aliados ke saviyan i no izyeron nada de espesifiko en favor de los djudyos. Lo ke izyeron, i no fue kolay, es de luchar kontra los almanes asta arrematarlos, i esto permityo a djente komo mi de sovrebivir, ama para los poveretos en los kampos, kontra los trenos de la muerte, nada fue aprovado.
Para aboltar a lo ke fue la deportasyon de Kertesz, lo eskrivyo despues, en un livro ke empeso de eskrivir en1960, ama ke eskapo i puvliko solo en 1975, i ke es su livro lo mas konosido, ke konto muncho por su premyo Nobel afillu si lo obtuvo por su ovra entera. Este livro se yama Ser sin destino. Aya Kertesz mos konta la istorya de un manseviko de 15 anyos, ke por siguro es el mismo, ke se va sin espanto en un treno de deportasyon verso lo ke va ser, asigun lo ke le disheron, un kampo de lavoro. Vyendo los otros «prezoneros», se demanda lo ke puediyan ser sus krimenes. Una vez ayegado en Auschwitz, por lo ke es de los ornos, mas leshos, adjunta: «Mis kompanyeros se demandavan, kon razon yo pensava, si la epidemya era tan fuerte para azer tantos muertos»…
A poko a poko se ambeza lo ke se pasa, i dize:» Nunka uvyera kreido, por egzemplo, ke me transformariya en un vyejo amurkado». Despues de los suenyos de fuida, vyene la degradasyon, i la indiferensya.
Esta indiferensya, la va deskuvrir unos diez anyos despues, a la edad de 25, kayendo sovre el livro L’Etranger, de Albert Camus. «En ungarezo, étranger (ajeno) era trasladado por «indiferente», kon el sentido de dezatado, dezatado del mundo, de si mismo, ama tambyen kon el sentido de liberado, de ombre libero.»
Komo los otros deportados de Auschwitz, es yevado de Auschwitz a Buchenwald a la venida de los Rusos en janvier 1945, en un mas chiko kampo al lado yamado Zeits. Aya va ser liberado por los Amerikanos i va aboltar a Budapest. Topa su apartamento okupado i entyende ke toda su famiya fue matada i ke el keda solo.
Eskrive: «Era kuryozo. Komo era dainda un chiko, teniya de ir a la eskola, afillu si teniya, si se puede dizir, una syerta eksperyensa de la vida…»
Esta eksperyensa, la va dizir en pokos byervos: » el malo es el prinsipyo de la vida…lo ke es en vedra irrasyonal, es el byen.»
Otra koza eskrivyo, ke me parese bastante terrivle: «Auschwitz no fue un aksidente de la Istorya, i munchos sinyos amostran ke su repetisyon es posivle».
Eskrivyo tambyen: «Nunka tuve la tentasyon de konsiderar las kuestyones tenyendo a la shoa komo una gerra inekstrikavle entre Almanes i djudyos. Nunka pensi ke era uno de los kapitulos de la sufriensa djudiya ke sige kon lojika las desgrasyas de antes; nunka vide en esto un aksidente en supito de la istorya, un pogrom de una anchura mas importante ke los otros, o tambyen las kondisyones de la fondasyon de un estado djudyo. En la schoa, deskuvri la kondisyon umana, el kavo de una grande aventura ande los Evropeos an alkansado despues de dos mil anyos de kultura i de moral.»
«Ser djudyo no es para mi una relijyon, i no so syonisto. Mis paryentes eran djudyos, ama es por modo de la schoa ke vine a ser djudyo…Parese ke so un djudyo de un otro shishit. De kual shishit? De dinguno. Ay muncho tyempo ke no bushko mas ni mi patria ni mi identidad. La schoa a kreado un muevo shishit de djudyos, para kyenes ser djudyo no es una identidad relijyoza ni una apartenensya komunitarya, ama antes de todo un dever moral.»
Kertesz bivyo i eskrivyo en Budapest, del tyempo de los komunistos, asta 1988 ande pudo irse de Ungariya para ir a bivir en Berlin. Antes, sufriyo de la diktatura komunista kon la kuala nunka se komprometyo. Echado afuera de la gazeta ande lavorava, gano su vida trasladando ovras literaryas del alman al ungarezo. Abolto en Ungariya tres anyos antes de su muerte.
Es solo en 2002, kuando ya teniya 71, ke resivyo el premyo Nobel, el solo para un eskrivano de lingua ungareza.
Se muryo el 31 de marso, a la edad de 86.
I agora, para eskapar esta emisyon, djusto unos kuantos byervos sovre lo ke se esta pasando agora en Turkiya.
Se avla muncho de la Turkiya estos tyempos, por modo de los atentados , ke sean en Estambol, en Ankara i otros lugares, por modo tambyen de su gerra kontra los Kurdos, por modo tambyen de sus negosyasyones kon la Evropa sovre los migrantes.
Yo aki kyero solo avlar de una koza ke se paso el 19 de marso, diya de Shabath, en Istiklal Cadesi en Estambol. Un turko yamado Mehmet Özturk, se izo patladear serka de turistos israelyanos, matando tres de eyos (i un adjem) i firyendo munchos otros. Ya es koza muy triste de si para si, ama lo ke da mas espanto es ke una ermozika mujer yamada Irem Aktas no topo otra koza de eskrivir en un tweet despues del atentado: «espero ke los turistos israelyanos feridos van a morir.»
En primero meldi sovre internet ke esta mujer aze parte del governo Erdogan komo kargada de las relasyones puvlikas i de la komunikasyon, despues meldi solo ke reprezentava las mujeres de la male de Eyup en el partido AKP, el partido de Erdogan al poder en Turkiya.
Para dizir la vedra, kuando se supo esto no fueron solo los Israelyanos ke se indinyaron, ama gazetas turkas tambyen, al punto ke la mujer a sido echada afuera del partido por Hatice Yücel, la prezidente del partido en esta male, la kuala deklaro ke lo ke disho Aktas no era en dinguna manera la opinyon del partido.
El Prezidente Erdogan embiyo kondolensyas al Prezidente Rivlin de Israël, no por lo ke disho esta mujer, solo por los muertos del atentado. El ministro de los echos ajenos de Israel, Emmanuel Nahshon, demando ekskusas del governo turko, no por los atentados, ama por lo ke eskrivyo esta mujer ke teniya responsabilidades puvlikas, kual ke sean, ama no se si las obtuvo.
Por siguro, komo se dize en franses, una golondrina no aze la primavera, i Irem Aktas no reprezenta a eya sola la Turkiya entera, ama yene el fakto ke esta mujer pudo eskrivir tal koza sin pensar ke le puediya salir danyo, me parese dar razones de espantarse para los djudyos de Turkiya.
Parese, asigun lo ke amostraron las kameras de sorvelyansa, ke este Mehmet Özturk, el matador, aviya segido los israelyanos desde la salida del otel. Se pensa ke dechido de matarlos eyos syendo los oyo avlar en ebreo.
El governo de Israel demando a sus sivdadanos de no ir mas en torismo en Turkiya por modo del peligro de atentados.
Es sovre este konsejo de prudensya ke me vo kedar para oy, i vos digo al djueves ke vyene, si kyere el Dyo!
Saludes a todos
Edmond Cohen Paris Fransya
