eSefarad Noticias del Mundo Sefaradi
Keridos amigos,
Komo lo dishe la semana pasada, empesi una meldadura bastante larga de un pedaso del Meam Loez konsagrado a la atadura de Itshak. Este djueves va ser la sigunda parte, ama no la ultima. Kale dizir ke no es una meldadura kolay…Kuando oygo ke Khuli eskrivyo en espanyol para ke el puevlo lo entyenda, me digo ke el puevlo meldava al tyempo en karakteres rashi mijor de oy en karakteres latinos…
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos!
Edmond Cohen
Paris, Fransya
MEAM LOEZ ATADURA DE ITSHAK – 2
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez vos anunsyo ke el proksimo atelye de konversasyon de la asosyasyon Vidas Largas se tendra el martes 5 de novyembre, de las dos i un kuarto asta las kuatro i medya-sinko, en el Centre Communautaire, 119 rue Lafayette Paris (10°). Metro Poissonnière o Gare du Nord.
Komo vo lo dishe la semana pasada, empesi la meldadura de un pedaso bastante largo del Meam Loez en su komentaryo de la atadura de Itshak, meldadura ke me va tomar unas kuantas semanas.
Ama antes de kontinuar mi meldadura, ay un haber ke vos tengo de dizir: aze solo tres semanas de esto, mi emisyon era intitolada: «Komplementos sovre salvadores. Los gauchos djudyos». I en esta emisyon vos dishe ke ke un arabo ejipsyano yamado Mohamed Helmy meresyo la medaya de los Djustos de Yad Vashem en Israel, por tener salvado, kon riziko por su vida, a kuatro djudyos de Berlin durante la gerra.
I vos dishe ke, este Djusto syendo ya en ganeden, Yad Vashem era bushkando sus erederos para remeterles la medaya.
Vengo de ambezarme ke ya los topo, i ke la mujer del bissovrino de este ejipssyano, ke bive en Ayifton, a deklarado ke su famiya refuzava esta medaya, ke uvyera achetada si le veniya de kualkyer otro pais ke Israel .
Sin komentaryo. Solo vos akodro ke 34 anyos ya pasaron desde ke Israel i Ayifton an firmado un tratado de paz, en 1979…
Esto dicho, aboltaremos a mi meldadura del Meam Loez, ke meldo en su edisyon en karakteres rashi puvlikada sovre internet, ama muy ayudado por el lavoro de los profesores David Gonzalo Maeso i Pascual Pascual Recuero, ke trasliteraron en karakteres latinos una otra edisyon kon unos kuantos trokamyentos.
Vos aviya deshado la semana pasada en eskapando de meldarvos los 19 pesukim de la perasha de la atadura de Itshak, «en ladino» komo mos dize Yakov Khuli, kijo dizir en esta forma partikolar del espanyol apegada palavra por palavra al ebreo kuando sirve para trasladar el Tanah.
I una vez echa esta meldadura, Khuli mos dize:
I estas son las kushiot (kuestyones) ke ternesh (tendresh) ke demandar en ditas avlas:
Primera es en lo ke dize: «I fue despues de las palavras las estas». Ke syerto sin dizirlo ya es savido ke este kuento fue despues de los pasados, ke si fuera antes se eskrivyera arriva.
Dos es en lo ke dize: «I Dyo prevo a Avraham». Ke syendo el Santo Itbarah konose los korasones de la persona kada uno por sus kilates (un pezgo de dyamante, carat en franses, aki kyere dizir las mizuras de lo ke vale) ke hehreah (menester) uvo de prevarlo? Ke esto konvyerne al ben adam ke no save lo ke tyene su haver (kompanyero) en su korason, i lo preva para informarse de el. I mas ke aviya de dizir: «I el Dyo prevo a Itshak», ke en el konvyene dekolgar la koza mas ke en Avraham. I mas ke syendo ke no aviya ninguno en akeya montanya, sola mente a Avraham i Itshak, de onde supyeron la djente ke kijo degoyarlo i komo se kreyeron la djente en lo ke les disho Avraham o Itshak?
3 Es ke es el kavzo (la razon) ke le avlo el Santo Itbarah kon sifras (senyal) de no avizarle en kual montanya deviya de ir?
4 Es ke syendo iva por las montanyas, no aviya hehreah (menester) de penar a tomar lenya i yevarla tres diyas de kamino, ke syerto muncha lenya se topa en kual kyer montanya. I tambyen ke ehreah (menester ) tenemos de saver si la partyo la lenya o la yevo sin partir? I ke konvyene yamarlos lenyos de alsasyon komo ke son de otro modo de lenyos , i bastava kon dizir «i partyo lenyos»?
5 Es a saver en ke se detuvo Avraham 3 diyas asta topar el lugar, syendo de Hevron, ke de ayi salyo a har haMoria (monte del Moria) es lugar serka a 8 oras de kamino.
6 Es en lo ke dize «I vido a el lugar de leshos» ke syendo el Santo Itbarah no le deskuvriyo en kuala montanya deviya de ir, no konvyene dizir ditas avlas.
7 Es en ke les disho Avraham a sus mosos: «Asentavos aki kon el hamor», ke es su deklaro (sentido) de estas avlas, i porke no los yevo kon el, syendo ke ya los trusho?
8 Es syendo su entisyon de Avraham era de degoyarlo a Itshak, komo les disho a sus mosos «i mos enkorvaremos i tornaremos onde vozotros», deviya de dizir «i tornaré», ke es por el solo?
9 Es porke lo kargo a Itshak kon la lenya, syendo ya teniya hamor?
10 Es en lo ke dize «I anduvyeron los dos djuntos», i esta avla la dize dos vezes, i no se aviya demenester dicho ni una vez, syendo ya me avizo ke les disho a sus mosos ke se detuvyeran ayi; de ayi se save ke eyos dos son los ke fueron .
11 Es en lo ke dize «vayomer Avi, va yomer hinneni, beni» (I disho Padre miyo, i disho Ek yo, ijo miyo). Ke no se entyende ke es lo ke disho Itshak i ke le respondyo Avraham. I mas, para ke alargo Itshak en su avla dizyendo «Ek el fuego i los lenyos, i ande esta el karnero?» ; i bastava ke dishera «Ande esta el karnero?», ke syerto por ver lumbre i lenya no es preva ke kere azer korban, ke puede ser ke se va a pasear i yeva kon el toda la hahana (preparasyon) ke se tyene demenester para gizar algunas komidas. I mas, ke esta demanda de Itshak kaliya ke la demandara la ora ke salyeron de kaza, ke ya vido ke tomo Avraham el fuego i los lenyos, i estonses le dishera ande esta el karnero, no despues de tres diyas.
12 Es en lo ke dize «I fraguo a el mizbeah (altar)», ke esta avla amostra ke ya aviya mizbeah de tyempo vyejo, i lo fraguo i es menester saver ke es el kavzo ke no fraguo un mizbeah de nuevo, ke era mas mijor i syerto ke en koza de mitsva es ovligo de azerla mas bueno ke puede ser.
13 Es en lo ke dize «I yamo a el anjel de los syelos». Ke ya se save ke en el syelo estan los anjeles. I porke no avlo el Santo Itbarah propyo kon el, i a lo menos vinyera el anjel a basho i avlara kon el. I porke lo yamo Avraham Avraham dos vezes, ke ya bastava kon una? I tambyen a entender ke syendo ke disho «no espandas tu mano a el moso, para ke torna a dizir «i no le agas nada»?
Katorze Es ke syendo ke Avraham pensava de degoyarlo a Itshak i kemarlo, ke por esto yevo kon el el kuchiyo i lumbre para azerlo korban ole (sakrifisyo de alsasyon), ke ansi entendyo de las avlas del Santo Itbarah, ke es el kavzo (la razon) ke kuando ordeno los lenyos sovre el mizbeah no ensendyo la lumbre, sigun es el din de la Tora ke antes se ensendiya la lumbre i despues se degoyava el karnero, konforme lo veresh en las zemirot (los kantes) ke dizimos kada diya i lo avizaremos en la perasha de Vayikra de largo? I syendo ansi, porke no tuvo kargo Avraham de azer este punto?
15 Es en lo ke dize «I no devedastes a tu ijo de mi, ke este byervo es de mas. I bastava kon dizir «i no devedastes a tu ijo», sigun le disho la sigunda vez.
16 Es ke mos importa a saver si el barvez se enramo por los kuernos, i ke era despues ke vido Avraham al karnero i si era antes?
17 Es en ke mos dize «i lo also por alsasyon en lugar de su ijo», ke es avla demazyada, ke ya vimos ke en lugar de Itshak se degoyo el karnero.
18 Es en la bendisyon ke le disho ke sea su semen komo las estreyas i komo la arena, ke si todo es uno, para ke es alargar avlas, i si las estreyas son mas ke la arena o la buelta, dishera lo ke es mas muncho. I mas, para ke apliko dizyendo ke sovre oriya de la mar, ke ya bastava kon dizir setam (solo) komo la arena.
19 Es en lo ke dize «I torno Avraham ande sus mosos» i no enmenta (nombra) a Itshak, a saver ke se izo?
20 Es ke es el kavzo (la razon) ke se fue Avraham a Beer Sheva, i porke no se torno a Hevron, ke ayi era su estada?
Estas 20 kishiot (kuestyones) ay ke demandar en este kapitulo, milvad (a parte) de algunas avlas ke paresen demazyadas.
Agora diremos el deklaro (komentaryo) i avizaremos komo fue el metsiut (el provecho) de la akeda del prisipyo asta el kavo. Ande savresh ke el taam (la razon) ke lo prevo el Santo Itbarah a Avraham fue rejido por provechos de Avraham.
Primero, es ke esto asemeja a el botikaryo ke savyendo ke la ropa ke tyene es muy fina, kuando le vyene algun mushteri (kliente) lo va sonando akel haré (seda florada) entre las manos por darle avizo ke es muy bueno, ke syendo save k
e es muy rezyo, no se espanta ke se arrazge. Lo kual si es ropa flosha no la toka muncho porke tyene myedo no se le rompe. Lo mizmo es esto, ke adrabba (por mayor motivo) por saver el Santo Itbarah ke el korason de Avraham es muy limpyo i byen apegado kon la temor del Santo Itbarah, por esto lo prevo munchas vezes ke se puvlike su hasidut por el mundo, i konoskan su grandeza; ke su korason esta muy rezyo en el djudezmo, sigun dize el pasuk: Adonnaï tsadik yivhan (Adonaï djusto provara, Psalmo 11, pasuk 5); kyere dizir ke el Dyo preva a los buenos.
Sigundo es por pujarle el sheher (el salaryo), ke syendo le teniya aprometido de darle muncho byen, i en lugar de repozo i gusto resivyo ditas penas i no avlo del todo ni se kesho de las avtahot (promesas) del Santo Itbarah, i aun ke toda su vida fue penando de mal en mal, resivyo los yisurin (tormentos) kon buena veluntad. Syerto ke merese tener buen pago tresdovlado.
Tresero, es ke avanso Avraham kon esto ke deprendyeron (aprendyeron) la djente de su buen rijo i syerta mente ke todo kyen es mezake et harabim (amijorador del tyempo de munchos, si entendi byen) es muy estimado, ke si dereh mashal (por egzemplo) es gabay (organizador) de bikur holim (vijita a los hazinos) o de talmud tora, syendo es kavza ke por su mano azen tsedaka la djente, su maala (dignidad) es grande , mas ke los propyos ke dan la moneda. (Aki komo munchas vezes antes avro, yo Edmond Cohen, una paranteza para amostrarvos komo en vezes Khuli se olvida ke eskrive sozde en espanyol, i en vedra eskrive kaji mas en ebreo ke en espanyol; syerro la paranteza).
I kon ditas prevas ke lo prevo el Santo Itbarah a Avraham, se fueron dotrinando la djente del mundo, i resivyeron dotrino i atorgaron de kaminar en buenos kaminos i no azer kavzo de este mundo falso.
Kuarteno, es ke syendo vemos ke algunos tsadikim (djustos) tyenen atslaha (fortuna) en este mundo kon muncho repozo, i algunos estan abatidos kon yesurin (tormentos) i povreza grande, i parese koza muy fuerte en ojo de la djente, ke si el djudezmo kavza provecho, ke es el kavzo ke kuantos buenos djudyos yevan mala vida kon muncho tsaar? I mehamat (por modo) de esto se rekresyo el negro enganyo de la hohma de filozofiya ke dizen ke a kyen kyere el Santo Itbarah lo enrikese i a kyen kere lo emprovese, i no esta dekolgado en ser bueno o negro, ke tanto es uno komo otro, i todo esta en la maaraha (suerte) del ben adam, ke si su maz
Ma savresh ke todo esto es mintira klaro (klara) i sevara (avizo) muy falsa; ke syerto el zehut (merito) es bastante de boltar el mazal del ben adam. I por avizo de esto lo prevo el Santo Itbarah a Avraham en ditas prevas para ke konoskan el mundo su djudesmo i sepan ke todo akel byen ke tuvo fue por su meresimyento. Ke asigun fue su hasidut al otro kavo mas ke resto de los tsadikim, lo mizmo fue su hatslaha (fortuna) grande, i todo ombre ke alkanse a su madrega (nivel) tyene byen por syerto, aun ke sea kuentra de su mazal. I los buenos ke tyenen tsaar es porke no son kumplidos en el djudezmo.al es de vanda alta, tyene repozo i gusto.
Lo kual Avraham, ke su djudezmo fue demazyado ke no ay a kyen asemejarlo, ke syendo un ombre riko rikisimo, i muy vyejo i dezeozo de ijos, i syempre estuvo kon este dezeo de tener un ijo ke sea su yoresh (eredero); i kuando ya lo alkanso a tener, syerto ke no kave en pendola el shiur (nivel) de la amistad ke lo teniya. Ma su buen rejo kavzo ke no pensara en esto ke muncha amistad teniya de afirmar el komando del Santo Itbarah, i ansi de primera palavra atorgo de ir a degoyar a su ijo regalado komo si fuera algun karnero.
I si lo aziya esto en akel propyo diya ke se lo disho el Santo Itbarah, aviya haluka (reparte) de pensar ke de myedo del Santo Itbarah no supo lo ke izo mehamat (por modo) ke se tutuleo (haraganeo) i no lo izo kon su grado, sino a mal de su pezar. Ma syendo vemos ke despues de tres diyas fue la akeda , esto amostra ke por tener muncha amistad kon el Santo Itbarah lo izo kon gusto i buena veluntad i no tuvo ningun aravyo. I ansi afillu los ummot haolam (mizmo las nasyones del mundo) dyeron kredito en este kuento i de ayi konosyeron el djudesmo de Avraham.
Kon esto tengo de eskapar, no mi meldadura, ama por lo manko mi emisyon de oy.
Al djueves ke vyene, si kyere el Dyo!
Edmond Cohen
