eSefarad Noticias del Mundo Sefaradi
Amigos aki vos do el teksto de mi emisyon, la ke izi el 18 de marso, a las 4 06 pm, ora de Fransya, sovre las mujeres del rey David, ke tuvo una vida kon munchas aventuras, i no solo militares.
Los ke tyenen la gana, el tyempo, i una komputadora ke acheta, me pueden oyir en direkto (dainda no ay otra manera) kada djueves sovre internet, indo al sityo RADIO – la fréquence juive
Kale tener pasensya i asperar un poko, no se oye pishin.
Saludos a todos
Edmond Cohen Paris Fransya
Para Ladinokomunita
LAS MUJERES DEL REY DAVID
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves primo de avril, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière. Tengo una chika shupe syendo ke va kaer en los medyanos de Pesah, i kyero estar siguro ke el syentro sera avyerto este dia. Volo dire la semana proksima.
Por lo ke es de oy, mi amigo Jose Molho, ke se adjidea de verme syempre bushkar kualo kontarvos, me dyo una idea, komo me aviya dado por Montefiore, i su idea es de avlarvos de las mujeres del rey David, ke tuvo munchas. Esta idea me kuadro, porke me akodri ke en la gazeta France Soir, al tyempo, aviya un foyeton intitulado Les amours celebres (las amores famozas) i entre otras istoryas, pasaron muncho tyempo kon los amores del rey David, tal i mismo ke se topan kontadas en el Tanah.
Kale ke sepaj, keridos oyentes, ke me merki una mueva edisyon, ke vyene de salir en Espanya, de la Biblia de Ferrara, eskrita en ladino en 1553, i ke agora no va ser mas ovligado de demandar a kada vez a muestro profesor Haïm Vidal Sephiha komo se dize tal pasuk en ladino : agora es un plazer para mi de irme de mi para mi al pasuk ke kyero.
Esto dicho, empesaremos por el empesijo, ke va interesar a mis keridas oyentes : komo era David kuando era mansevo ? El tanah mos dize esto : El bermejo (kijo dizir ruvyo) i ermozo de ojos i de buena vista.
El, ke era ijo de Ishaï, desendyente de Boaz, del trivo de Yehuda, i de Ruth, la Moabita konvertida, fue eskojido por el Dyo para ser rey del puevlo de Israel en vez del rey Shaul. Sin ke dainda Shaul lo sepa, el profeta Shemuel unto a David.
Komo el rey Shaul, ke dainda era rey, teniya penseryos tristes de noche, bushko a un mansevo para djugar arpa, i sus konsejeros le propozaron a David, ke lavorava komo pastor para su padre. I Shaul tomo David para djugar arpa para el, i de oir a David se sentiya mijor.
Es en este tyempo ke uvo gerra entre los de Israel i los Pelishtim, i ke David gano la gerra en luchando kon Goliath el Pelishti, i en matandolo en kombate singular, grasyas a su onda (sa fronde), kon una sola pyedra afundeada, kijo dizir echada kon la onda, a la frente de Goliath.
De este tyempo David se va kedar syempre en el palasyo real de Shaul i se va azer amigo por la vida kon Yonathan, el ijo de Shaul.
Ama Shaul se selo de David porke las mujeres ( ayde, ya empesimos kon las mujeres) de todas las sivdades de Israel salyeron baylando i kantando : Shaul mato a miles, i David a miles de miles ! Lo ke indimas era falso, syendo ke David aviya djusto matado a un solo, Goliath.
De selo Shaul echo dos vezes su lansa kontra David, ama sin ferirlo. Vyendo esto, lo izo kapo en su armada, dizyendose : ke sea matado por los Pilishtim i no por mi…i para ke kombata para el, le disho ke le iva dar por mujer a Merav, su ija bohora. Ama en vedra no lo izo i la kazo kon otro.
Ama otra ija de Shaul, Mihal, se enamoro de David i Shaul lo supo, i disho a David : si matas a syen Pilishtim, te do Mihal en kazamyento (en vedra no disho si matas, disho si me traes syen prepusyos). David se fue kontra los Pilishtim i le trayo dozyentos ; i ansina es ke obtuvo la mano de Mihal, ija del rey, i se izo ansina yerno del rey.
Ama komo ganava todas las batayas kontra los Pelishtim, Shaul yene era selozo, i Yonathan komo Mihal su mujer le disheron de fuirse antes ke el rey lo aga matar. I de este diya empesaron para David tyempos muy negros, syempre fuyendo delantre los ombres de Shaul bushkandolo para matarlo.
Despues de la muerte del profeta Shemuel, David se hue en el desyerto de Paran, i aya en Maon biviya un ombre muy negro yamado Nabal, ke teniya una mujer ermoza i meoyuda yamada Avigaïl.
Kuando los mosos de David vinyeron a demandar kon muncha korteziya pan i karne, Nabal les respondyo (en ladino – de vez en kuando no puedo rezistir al plazer de meldarvos pasukes en ladino) : « Kyen David, i kyen ijo de Ishaï ?…Tomaré a mi pan, a mis aguas, i a mi degoyeo ke degoyé para mi traskiladores (los traskiladores son los ke kortan la lana de las ovejas, les tondeurs) i dare a varones ke no se de donde aki eyos ? »
Esta repuesta metyo David en una birra terrivle i se aprometyo de matar a este Nabal i toda su famiya. Kuando lo supo Avigaïl, koryo pishin ande David i se echo a sus piezes para demandarle piyadad, i reusho a apasiguarlo, i David le disho : « si no apresuraras i veniyas a mi enkuentro ke no remanesyera a Nabal fasta luz de la manyana orinan en la pared ». Manera en ladino de dizir ke si Avigail no se aviya apresurado para vinir a verlo, el, David, antes de la manyana no uvyera deshado bivo ni a un macho de la kaza de Nabal. En vedra no dize macho, dize uno ke pisha kontra la pared…
Avigaïl, aboltando a su kaza, konto toda la koza da su marido, ke de espanto « muryo su korason entre el, i el fue komo pyedra ». Kuando supo esto, David demando a Avigaïl, agora bivda, por mujer, i eya acheto pishin, i fue su mujer.
I el tanah adjusta : « I a Ahinoam tomo David de Yizreel, i fueron tambyen ambas eyas a el por mujeres. I Shaul dyo a Mihal su ija, mujer de David, a Palti ijo de Laïs, ke de Galim. »
I David, ke teniya una mujer, Mihal, ke lo amava i lo aviya salvado en azyendolo fuir, no tuvo mas esta mujer, ke su padre dyo a otro komo si no aviya nunka sido kazada, i sin ke David le e dado dingun get. Los reyes toman derechos ke los otros no tyenen. David no tuvo mas a esta mujer Mihal, ama komo entenditej tuvo dos otras, Avigail i Ahinoam.
Despues de estos akontesimyentos, uvo una grande bataya sovre el Monte Gilboa entre los Pelishtim i los Bene Israel, i los Bene Israel peryeron esta bataya, tanto ke el rey Shaul i Yonathan su ijo, amigo de David, se muryeron en la bataya. A esta okazyon David kanto un kante muy ermozo a la glorya no solo de su amigo Yonatan, ama tambyen de su rey Shaul, ke no se aviya por tanto amostrado muy amistozo kon el.
Agora kyen va ser rey ? Yonathan, ijo de Shaul, se muryo en mismo tyempo ke su padre, ama keda otro ijo de Shaul yamado Ishbaal. Kon el la kaza de Shaul i el trivo de Binyamin. David tyene komo partezanos su kaza i el trivo de Yehuda.Empesa una gerra entre las dos vandas.
I es en este momento ke el tanah mos konta ke David tuvo ijos : el bohor Amnon, nasido de Ahinoam, i mas chiko Kileav, nasido de Avigaïl. Ama mos ambezamos ke David tuvo tambyen otros ijos de otras mujeres : Absalom, ijo de Maaka, ke era ija de Talmaï, rey de Geshur ; i tambyen Adonia, ijo de Haggit ; i tambyen Shefatya, ijo de Abital ; i tambyen Yitream, ijo de Egla : sej mujeres, sej ijos.
Despues David demanda a Ishbaal, el ijo el rey Shaul, ke le de atras su mujer Mihal, ke Shaul aviya dado a Palti o Paltiel. Ishbaal acheto i Mihal abolto ande David, kon Paltiel yorando detras de eya, ama ke tuvo de desharla i aboltar solo a su kaza.
Despues de esto Ishbaal fue matado por los suyos, i la kaza de Shaul no teniya mas kapo, i todos los trivos de Israel se metyeron d’akodro para tomar David komo rey. Morava en Hevron i teniya trenta anyos.
I David tomo kontra los Yevusim la sivdad de Yerushalaïm, i aya fraguo su Palasyo real, i aya tambyen, mos konta el tanah, « tomo David mas mansevas i mujeres de Yerushalaïm en pos su venir de Hevron (kijo dizir despues su venida de Hevron) . Lo ke el ladino traslada por manseva es el ebreo pilegesh, ke kyere dizir konkubina… De eyas, mujeres komo mansevas, tuvo otros onze ijos, entre los kuales un syerto Shelomo. Ama este Shelomo en vedra va naser mas despues. Dainda no estamos kon Shelomo.
Despues de esto, el tanah mos konta ke David se tomo la arka i se la yevo a su palasyo en Yerushalaïm, kantando i baylando, solo vestido de un espaldar de lino (el efod del cohen). Su mujer Mikal, ija del rey Shaul, se burlo de el de verlo ansina baylar. Su kastigo de tenerse burlado de David fue ke nunka tuvo kriatura.
El tanah mos konta despues komo David gano varyas gerras, i engrandesyo a su reyno. Ama oy no vine para kontarvos toda la istorya de David, solo su istorya kon las mujeres, i vitesh ke ya teniya munchas, komo vos dishe, ama parese ke no le abastava, porke agora el tanah mos konta esto, ke vos vo meldar en ladino, tal i komo esta eskrito en la Biblia de Ferrara : « I fue a ora de la tarde, i levantose David de su yazida (su kama), i anduvo sovre techo de kaza del rey, i vido mujer lavanse de sovre el techo, i la mujer buena de vista mucho. I embiyo David i rekiryo por la mujer, i disho (kale entender ke no es David ke disho, ama el moso) : de syerto, esta Bath-Sheva, ija de Eliham, mujer de Uriah el Hiteo. I embiyo David mensajeros, i tomola, i vino a el i yazyo kon eya ». Si yazida es la kama, ya entenditesh lo ke kyere dizir yazyo kon eya. « I eya se santifikava de su enconamyento, i tornavase a su kaza ». (kijo dizir ke se purifikava de no ser mas indispozada, i dunka puediya kaer prenyada , i es lo ke afito). « I ensintose la mujer, i embiyo i denunsyo a David, i disho : ensinta yo. » Ke azer ? Su marido era en la armada. Kaliya azerlo vinir i ke se eche kon su mujer para ke kreyga ke la kriatura era de el. David lo yama a Uriah, Uriah vyene, ama afillu los esfuersos de David para embiyarlo a kaza, el, soldado muy fiel, no se kyere ir. Entonses David no topa otra koza de azer ke dar el orden a Yoav, su kapo de gerra, de embiyar Uriah a la bataya, i de desharlo solo, « i sera ferido i morira ». I esto es lo ke se pasa.
Los askeres djudyos se aserkan de maziya de la pared de una sivdad enemiga, los enemigos travan kon arkos i matan a munchos askeres, i entre eyos a Uriah.
Kuando se ambeza la muerte de su marido Uriah, Bath Sheva toma el luto. Ama kuando el luto s’eskapa, David la aze vinir a su kaza i la toma komo mujer. I komo , ya lo savemos, era prenyada de el, le da un ijo.
Ama el profeta Nathan se va ver a David i le konta la konseja de los dos ombres, un riko i un prove, el prove solo aviya una kavretika, i kuando el riko tuvo menester de degoyar a una kavretika, en vez de tomar una de las suyas, el ke aviya tantas, tomo i degoyo la kavretika del prove. I David se toma en birra, i responde a Nathan : el ke izo tal koza merese la muerte!
Tu sos este ombre, le responde Nathan : teniyas todo, i mismo la ija del rey, i te fuites a tomar la mujer de uno de tus askeres, i para esto lo izites matar. Tu kastigo sera ke la espada sera syempre en tu kaza, i te van a tomar tus mujeres, no en sekreto, komo izites, ama a la luz del sol.
David disho a Natan : « Ize un pekado ». El Dyo te pedrona, le responde Natan, tu no vas a morir, ama tu ijo si.
I el ijo se kayo hazino, i David izo tanit, se echo en basho,al lado del chiko. Ama yene, syete diyas despues, el chiko se muryo, komo lo aviya dicho el profeta. I a la sorpreza de sus mosos, David se vistyo, tomo banyo, komyo. Komo se aze, agora ke el chiko es muerto ? Tanto ke biviya, ize todo lo ke pude para salvarlo. Ama agora no sirve mas de nada, respondyo el rey.
I David izo muevo ijo a Bath Sheva, i lo yamo Shelomo.
Entremyentres, los otros ijos de David se engrandesyeron, i David tuvo, komo ya lo savej, munchos dertes kon eyos. En primero es su ijo Amnon, ke tuvo kon Ahinoam, ke se enamoro de su medya ermana Tamar, ermana de Avshalom i ija komo el de Maacah. Le demando de venir a su kaza, sözde ke era hazino, i aya la tomo de fuersa i despues la echo a la kaye.
Kuando Avshalom, ermano de Tamar , lo supo, izo komo si no lo tomava a fuerte, i aspero dos anyos. Al kavo de estos dos anyos, kombido a sus ermanos inkluyendo Amnon, i lo izo matar por sus mosos. I se fuyo Avshalom de espanto de su padre, ama David lo desho aboltar sin azerle danyo.
Ama Avshalom empeso a intrigar kontra su padre para tomarle el poder, tanto ke David fue ovligado de fuir de Yerushalaïm, deshando solo a diez de sus mansevas en el Palasyo. I vino Avshalom i las tomo a todas las mansevas, komo lo aviya profetizado Natan despues de la muerte de Uriah.
Empesa una gerra entre los ombres de David i los de Avshalom. Yene disho David a sus kapos de gerra, inkluyendo Yoav, de no tokar a la vida de su ijo Avshalom. Ama komo se save, los de Avshalom peryeron la bataya, i Avshalom se tuvo de fuir en la sharra, i aya fue enkolgado por sus kaveyos a un arvole. Vino Yoav, i afillu los ordenes de David, mato a Avshalom.
Kuando David lo supo, en vez de ser kontento de tener ganado la bataya, se metyo a yorar en gritando Avshalom ! Avshalom !Mi ijo Avshalom ! I su armada abolto en Yerushalaïm, no komo una armada viktoryoza, ama komo una armada averguensada.
Ama David pudo vinir de muevo a ser rey en su sivdad Yerushalaïm. I los anyos pasaron i se envejesyo. Sus mosos le metiyan kolchas i no ayegava a kaentarse. Sus mosos le disheron – volo do en ladino : « busken a mi senyor el rey mosa virjen, i estara delante el rey, i sera a el eskayentan ; i yazera en su seno, i eskayentara a mi senyor el rey ». Le bushkaron una kolcha umana en la persona de Avisag la Sunamita, i la trusheron al rey, il el tanah mos dize : « ve a neara yafa ad meod » (i la mosa ermoza fasta mucho) i kayento al rey i lo servyo, ama el rey no la konosyo (kon el sentido bibliko, ya lo entenditej).
Ansina s’eskapa la istorya de David kon las mujeres, ama no la istorya de David kon sus ijos. Su ijo Adoniya, ijo de Hagith, empeso komo Avshalom a intrigar. El era para ser rey a la muerte de David su padre. Ama David eskojo su ijo Shelomo, el ijo de Bath Sheva, para ser rey despues de el, i es lo ke se paso.
David se muryo despues de 40 anyos de reyno, 7 en Hevron i 33 en Yerushalaïm. Shelomo suvyo sovre el trono, i otra istorya empeso.
Astal djueves ke vyene, si kyere el Dyo !
Edmond Cohen
Fuente: Ladinokomunita
